*, ,MGON DKAR YID BZHIN NOR BU LA BRTEN PA'I TSE SGRUB 'CHI MED MCHOG SBYIN ZHES BYA BA BZHUGS SO, ,
, ,GU RU MAH'A K'A LA YE, GANGS RI LHUN POR NYIN BYED BYE BA'I 'OD, ,'KHYUD PA JI BZHIN GZI LDAN DBANG PHYUG MGON, ,KHYAB BDAG RDO RJE 'CHANG DANG DBYER MED ZHABS, ,GANG DER GUS PAS BTUD DO BRTZE BAS SKYONGS, ,LHA CHEN KHYOD LA BRTEN NAS TSE'I DNGOS GRUB, ,SGRUB BYED DAM PA'I GSUNG GI SNANG BA LA, ,BRTEN NAS TSE SGRUB 'CHI MED MCHOG SBYIN 'DI, ,SHES LDAN RNAMS KYIS NYAMS SU BLANGS PAR RIGS, ,(DE LA 'DIR LHA CHEN GZI LDAN DBANG PHYUG LA BRTEN NAS, 'CHI MED TSE'I DNGOS GRUB BSGRUB PAR 'DOD PA'I GANG ZAG GIS BLA MED KYI DKYIL 'KHOR GANG YANG RUNG BAR DBANG BZHI SKU BZHI'I SA BON THEBS NGES SU MNOS NAS DAM TSIG SDOM PA LAG CES SPRAS BYED CING, KHYAD PAR LHA CHEN 'DI NYID KYI RJES SU GNANG BA ZAB MO THOB PA DAG GIS SBYOR DNGOS RJES GSUM LAS, DANG PO SBYOR PA NI,
, ,GNAS DBEN PAR BYI DOR LEGS PAR BYAS, DRI BZANG DANG BA BYUNG GIS CHAG CHAG LEGS PAR BTAB NAS, NAS DKAR RJEN BTAGS LA TSE RDZAS DANG BDUD RTZI RIL BU KHUNGS THUB DKAR MNGAR MAR ZHUN MAS SPRUS TE GTOR MA NOR BU'I DBYIBS CAN MTHAR TSE RIL GYIS BSKOR BA MAR DKAR GYIS BYUGS, BRANG RGYAN, RTAGS BRGYAD DANG RTZE RGYAN NOR BU CHA DGU PAS BRGYAN, GZHAN YANG DBYIBS GONG MTSUNGS KYIS 'BUL GTOR NYER SPYOD TSAR BZHI LAS MI NYUNG BAR BSHAMS, 'DOD YON LNGA YANG 'OS 'GAB SOGS SU BSHAMS, RDUL MI 'GRO'I CHED GTOR SGAM MAM SHOG BUS GUR PHUBS, GTOR GSO SOGS KYANG STA GON BYED, 'OS SKABS GANG RIGS SU GZHI BDAG GI GTOR MA, RANG GI MDUN DU d'A DRIL 'THOR 'BRU SOGS DANG NANG MCHOD BSANG CHU RNAMS 'DU BYA'O, ,GNYIS PA DNGOS GZHI LA, SKYABS YUL GSAL BTAB NAS SKYABS 'GRO SEMS BSKYED TSAD MED BZHI SPYI LTAR BSGOM NAS TSOGS ZHING RNAMS RANG GI SMIN MTSAMS
SU THIM PAR BSAM MO, ,DE NAS BDAG BSKYED NI,) SVA BH'A WAS SBYANGS,) STONG PA'I NGANG LAS PAm LAS PADMA DANG RAm LAS NYI MA'I DKYIL 'KHOR GYI STENG DU NOR BDAG PHO MO GLANG PO CHE'I GDONG BA CAN GYI STENG DU RANG SEMS H'Um YIG DKAR PO LAS 'OD ZER 'PHROS, 'PHAGS PA MCHOD, SEMS CAN GYI DON BYAS, TSUR 'DUS YONGS SU GYUR PA LAS, RANG NYID BCOM LDAN 'DAS MGON PO YID BZHIN NOR BU SKU MDOG DKAR LA DMAR BA'I MDANGS CHAGS PA, KHRO 'DZUM SGEG PA'I NYAMS CAN SPYAN GSUM PA, ZHAL GCIG PHYAG DRUG PA, PHYAG GA-YAS KYI DANG POS NOR BU RIN PO CHE DBANG GI RGYAL PO DANG, GA-YON DANG POS RIN PO CHES BKANG BA'I THAD MA DGU GA-YON PA LA BRTEN NAS 'DZIN PAS 'DOD DGU'I CHAR 'BEBS PA, BAR BA GNYIS NA DBUL BRTZAD NAS GCOD PA'I RDO RJE GRI GUG DANG, KHAMS GSUM ZIL GYIS GNON PA'I RTZE GSUM 'DZIN PA, 'OG MA GNYIS NA GNAS GSUM MKHA' 'GRO 'BOD PA'I CANG TE'U DANG, SRID ZHI DBANG DU SDUD PA'I LCAGS KYU 'DZIN PA, SMIN MA DANG SMAR DMAR SER 'BAR ZHING DBU SKRA KHAM SER GYEN DU BRDZES PA'I DBRAL PAR SINHU RAS BYUGS PA, RIN PO CHE SNA TSOGS LAS GRUB PA'I DBU RGYAN, SNYAN RGYAN, MGUL RGYAN, PHYAG GDUB, ZHABS GDUB LA SOGS PA RIN PO CHE'I RGYAN BRGYAD KYIS BRGYAN PA, LHA RDZAS LAS GRUB PA'I DAR BZANG PO'I STOD GA-YOGS (DANG SMAD GA-YOGS LHAB LHUB TU) GSOL BA, RIN PO CHE'I 'PHRENG BA DANG, GSER GYI DRIL BU GA-YER KHAS SPRAS PA, ZHABS GNYIS DUR KHROD CHEN PO BSIL PA TSAL NAS DA LTAR NGA BYON PA 'DRA BA, BYON 'PHRO LA BZHUGS PA 'DRA BA'I ZHABS 'OG NA TSOGS BDAG GA-YAS
, ,LA PHUG DANG GA-YON NE'U LE BZUNG BA RE RE MNAN PA'I KHA DANG BSHANG LAM THAMS CAD NAS RIN PO CHE LHUG LHUG 'ONG BA MGON PO'I SPYI BOR BLA MA RDO RJE 'CHANG DGOS 'DOD THAMS CAD 'BYUNG BA ZHAL 'DZUM BAG DANG LDAN PA GA-YAS RIN PO CHE DANG, GA-YON DES YU BA BYAS PA'I DRIL BU 'DZIN PA, ZHABS RDO RJE SKYIL KRUNG GIS BZHUGS PA, MGON PO'I THUGS KAR DBANG SDUD KYI MKHA' 'GRO MA DMAR MO ZHAL GCIG PHYAG GNYIS MA RGYAN SNA TSOGS KYIS BRGYAN PA PHYAG GA-YAS LCAGS KYU, GA-YON THOD PA BSNAMS PA, ZHABS GNYIS GAR STABS LING NGE BA, SPYAN GSUM NAM MKHA' LA HRIG HRIG GZIGS PA, KHAMS GSUM DBANG DU BSDUD PA, DE'I SNYING GAR CHOS NYID KYI THIG LE DMAR PO 'OD 'PHRO BA, DE LAS 'OD ZER 'PHROS PAS, DUR KHROD CHEN PO BSIL BA'I TSAL NAS MGON PO MKHA' 'GRO'I TSOGS DANG BCAS PA AOm BADZRASA MA DZA: (ZHES PAS SPYAN DRANGS,) DZA: H'Um BAm HO: GNYIS SU MED PAR GYUR, (MCHOD PA RNAMS BLA MED SPYI LTAR BYIN GYIS BRLABS,) AOm GU RU MAH'A K'A LA SA PA RI W'A RA AA RGHAm (NAS,) SHAPTA'I (BAR DANG,) R'U PA (NAS,) SPA RSHA'I (BAR GYIS MCHOD, RTZA SNGAGS LA 'BRU GSUM BTAGS PA'I NANG MCHOD,) H'Um RGYAL KUN THUGS RJE'I NGO BO PAD DKAR 'CHANG, ,THUGS BSKYED GZHAN DBANG GYUR BA'I SGYU 'PHRUL GAR, ,SKAL DMAN SEMS CAN RE BA YONGS SKONG BA, ,MGON PO ZLA BA'I SPUN ZLA LA PHYAG 'TSAL, (,DE NAS BZLAS PA NI,) RANG GI SNYING GAR CHOS NYID KYI THIG LE DMAR PO'I MTHAR RTZA SNGAGS BYI RU'I PHRENG BA LTA BUS BSKOR
BA LAS 'OD ZER LCAGS KYU'I RNAM PA GRANGS MED PA 'PHROS PAS RANG GI TSE 'CHI BDAG GSHIN RJE RGYAL GDON MI MA YIN RNAMS KYIS 'PHROG PA DANG, BRKUS PA DANG, YAR BA 'KHYAMS PA LA SOGS PA RNAMS BUM PA DANG THOD PA BDUD RTZIS GANG BA'I RNAM PAR BSDUS NAS SNGAGS PHRENG LA THIM, DE BZHIN DU 'BYUNG BA LNGA'I BCUD DANG, SKYE 'GRO BSOD NAMS CAN RNAMS KYI TSE DANG BSOD NAMS, SRID PA GSUM GYI PHUN TSOGS THAMS CAD DANG, RGYAL BA SRAS BCAS RNAMS KYI SKU GSUNG THUGS KYI BYIN RLABS THAMS CAD 'CHI MED TSE'I BDUD RTZI'I RNAM PAR BSDUS NAS SNGAGS PHRENG LA THIM, DE LAS BDUD RTZI'I RGYUN BABS PAS 'CHI MED TSE'I DNGOS GRUB THOB PAR (BSAM LA,) AOm GU RU MAH'A K'A LA HA RI NI SA A'A YUR DZNY'A NA SIDDHI DZA: (ZHES PA CI NUS SU BZLAS LA, MCHOD BSTOD MDOR BSDUS BYA,) DGE BA 'DI YIS (ZHES SOGS BYA, DE NAS TSE GTOR BSANG SBYANGS,) STONG PA'I NGANG LAS GTOR MA'I GO SAR BAm LAS PADMA DANG RAm LAS NYI MA'I DKYIL 'KHOR GYI STENG DU NOR BDAG PHO MO GLANG PO CHE'I GDONG BA CAN GYI STENG DU SEMS NYID YI GE H'Um DKAR PO LAS 'OD 'PHROS, 'PHAGS PA MCHOD, SEMS CAN GYI DON BYAS, TSUR 'DUS YONGS SU GYUR PA LAS TSE GTOR DANG GNYIS SU MED PA'I BCOM LDAN 'DAS MGON PO YID BZHIN NOR BU SKU MDOG DKAR LA DMAR BA'I MDANGS CHAGS PA; (ZHES PA NAS,) AOm BADZRA SA MA DZA: (ZHES PAS SPYAN DRANGS,) DZA: H'Um BAm HO: DAM TSIG PA DANG GNYIS SU MED PAR GYUR, (MCHOD PA BYIN GYIS BRLABS TE SPRON, RTEN 'BYUNG MA'I MCHOD 'PHRENG DANG BCAS NYER SPYOD 'DOD YON LNGA NANG MCHOD BCAS GONG BZHIN 'BUL,) RGYAL KUN (MAS BSTOD,
, ,DE NAS, BZLAS PA'I SKABS,) RANG MGON POR GSAL BA'I ZHAL NAS 'OD ZER 'BYUNG STE GTOR MA MGON POR GSAL BA'I ZHAL NAS ZHUGS, THUGS KA'I CHOS NYID KYI THIG LE DMAR PO RTZA SNGAGS KYI PHRENG BAS BSKOR BA LA THIM PAS THUGS RGYUD BSKUL, THUGS KA NAS 'OD ZER GYI TSOGS DPAG TU MED PA 'PHROS, PHYI NANG SNOD BCUD KYI YON TAN, RGYAL BA SRAS BCAS KYI SKU GSUNG THUGS KYI BYIN RLABS, LHA MI'I DRANG SRONG TSE'I RIG 'DZIN THOB PA RNAMS KYI NUS MTHU THAMS CAD 'CHI MED TSE'I BDUD RTZI DMAR SER GYI RNAM PAR BKUG ,GTOR MA MGON POR GSAL BA LA THIM PAS MTHU STOBS NUS PA PHUN GSUM TSOGS PAR GYUR, MGON PO'I SKU LAS BDUD RTZI'I RGYUN DPAG TU MED PA BYUNG STE GTOR MA RIL BU DANG BCAS PA LA THIM PAR GYUR (BAR BSAM LA,) AOm GU RU MAH'A K'A LA (ZHES SOGS RTAGS MA BYUNG GI BAR DU BZLAS LA, THUN MTHAR YIG BRGYA BZLAS LA, MCHOD BSTOD MDOR BSDUS BYA, GTOR MA NANG MCHOD LTAR BYIN GYIS RLABS,) MGON PO YID BZHIN NOR BU'I LJAGS 'OD ZER GYI SPU GUS GTOR MA'I BCUD DRANGS TE GSOL BAR GYUR, (RTZA SNGAGS LA AI DAm BA LINGTA BTAGS PA GSUM MAM BDUN GYIS PHUL LA, GONG BZHIN MCHOD BSTOD BYA, DE NAS,) MGON PO YID BZHIN GYI NOR BU, 'CHI MED TSE'I MNGA' BDAG 'KHOR DANG BCAS PA KHYED RNAMS LA DAM RDZAS RGYAN DANG LDAN PA'I GTOR MA 'DOD YON LNGA LDAN GYI BDUD RTZI RGYA MTSO'I GTER DU GYUR PA 'DI 'BUL LO, ,BZHES LA SANGS RGYAS KYI BSTAN PA SRUNGS SHIG ,DKON MCHOG GI
DBU 'PHANG BSTOD CIG ,DGE 'DUN GYI CHOS 'KHOR SKYONGS SHIG ,DPAL LDAN BLA MA DAM PA'I SKU TSE SRINGS SHIG ,SGRUB MCHOG RNAL 'BYOR BA BDAG LA SNYAN PA'I GRAGS PAS SA STENG KHYAB PA DANG, DGOS 'DOD THAMS CAD CHAR BZHIN DU BABS NAS DPAL 'BYOR LONGS SPYOD ZAD MI SHES PA DANG, MI NOR ZAS GSUM DBANG DU 'DU ZHING, THOS BSAM SGOM GSUM GYI SHES RAB 'PHEL PA DANG, KHYAD PAR DU 'CHI BA MED PA TSE'I DNGOS GRUB DA LTA NYID DU STZAL DU GSOL, (ZHES 'DOD DON LA GSOL BA GDAB, YIG BRGYA BRJOD,) GANG YANG BDAG BLO (SOGS KYIS NONGS PA BSHAGS,) BLA MA MGON PO DBYER MED LA, (,ZHES SOGS LAN BDUN NAM NYER GCIG BRJOD NAS THUN MTSAMS LA 'JUG GO ,DE LTAR SGRUBS PAS PHYI NANG GI RTAGS SOGS NGES CAN DU BYUNG NA MJUG BSDU BAR BYA STE, GROL RGYU'I THUN THA MAR,) TSE GTOR GYI LHA 'OD DU ZHU NAS DAM RDZAS 'CHI MED KYI BDUD RTZIR GYUR, (ZHES BRJOD, MJUG TU BKRA SHIS BKA' RGYA MA'I SHIS PA BRJOD PA'I CHAR DBAB PAR BYA'O, ,YUL KHYAD PAR CAN LA 'BUL NA, TSE GTOR SRI ZHU DANG BCAS GDAN DRANGS TE 'BUL YUL GYI SPYAN SNGAR STEGS KYI KHAR BKOD, PHYAG BYAS 'KHOD LA,) MGON PO YID BZHIN NOR BU THUGS RJE'I GTER, ,KHYOD ZHABS GUS PAS BSTEN CING GSOL 'DEBS NA, ,BYIN RLABS THUGS RJE'I MTHU DPUNG CHER BSKYED DE, ,BLA MA'I SKU TSE BRTAN PAR BYIN GYIS RLOBS, ,AOm GU RU MA H'A K'A LA SOGS CI 'GRUB BZLAS MTHAR, TSE GTOR LAG TU THOGS NAS, 'CHI MED BDUD RTZI'I RANG BZHIN BA LING TA, ,SNA TSOGS RGYAN SPRAD TSE GTOR 'DI PHUL BAS, ,MGON KHYOD ZHABS ZUNG MI 'GYUR RDO RJE'I KHRIR, ,BGRANG YAS BSKAL BA RGYA MTSOR RTAG BRTAN CING, ,THOS BSAM SGOM
, ,DANG 'CHAD RTZOD RTZOM PA SOGS, ,GZHAN PHAN MKHAS BTZUN BZANG PO'I MDZAD PA YIS, ,BSTAN 'GRO'I PHAN BDE LEGS TSOGS MA LUS PA, ,YAR NGO'I ZLA LTAR 'PHEL BAR MDZAD DU GSOL, , RJE BTZUN BLA MA'I SKU TSE ZHES SOGS DANG, BDAG SOGS RNAMS KYIS DENG NAS BYANG CHUB PAR, (,ZHES SOGS BRJOD PAR BYA'O, ,DE MIN LA SBYIN BDAG SOGS GANG DMIGS DER 'BUL ZHING, DE NYID KYIS LONGS SPYAD PAS TSE'I DNGOS GRUB THOB PAR GYUR PA YIN NO, ,SMRAS PA,) DPAL LDAN SHANGS PA'I MAN NGAG RGYA MTSO LAS, ,DAM PA'I THUGS RJE'I SA 'DZIN BSRUB LAS THON, ,RMAD BYUNG TSE DPAL STER MDZAD 'DOD 'JO 'DI, ,SKAR LDIL ZONG GIS KHUG 'DI AE MA HO, ,(ZHES MGON DKAR YID BZHIN NOR BU LA BRTEN PA'I TSE SGRUB 'CHI MED MCHOG SBYIN ZHES BYA BA 'DI YANG AA BHA KA T'A WANG SHOG GTZUG LAG SMRA BA'I DBANG PO RDO RJE SLOB DPON ZUR BA BLO BZANG RAB RGYAS NAS 'DI LTA BU ZHIG DGOS ZHES YANG YANG RNA BA 'DZER BA'I NGO MA BZLOG PAR CHOS MED BAN RGAN SNYOM LAS BA ^CHOS KYI RDO RJES DAM BA'I GSUNG LAS BTUS TE CHA LAG TSANG BAR SUG BRIS SU BGYIS BA'O,, ,,MANG+GA LAm,,) ,