, ,SRAD RGYUD LUGS KYI DGA' LDAN LHA BRGYA MA'I 'PHO KHRID 'DON CHOG DANG BCAS PA SKAL BZANG DGA' LDAN BGROD PA'I THEM SKAS ZHES BYA BA BZHUGS SO,,
, ,BRTAN PA'I 'KHOR LO RGYAL KUN YE SHES GAR, ,MI YI ZOL GYIS SNYIGS MTHA'I 'GRO BA LA, ,TSANG LA MA NOR LAM BZANG GSAL MDZAD PA, ,RGYAL BA GNYIS PA TZONG KHA PA LA 'DUD,, MGON PO KHYOD KYI SNYAN BRGYUD BDUD RTZI'I ROR, ,SPYOD PA'I SKAL BZANG DGA' LDAN MKHA' SPYOD DU, ,BDE BLAG BGROD PA'I GDAMS ZAB SNYING PO'I GNAD, ,'BRI LA CHOS BDAG RNAMS KYIS GNANG BA STZOL; (;'DIR RJE BTZUN CHOS KYI RGYAL PO TZONG KHA PA CHEN PO'I SNYAN BRGYUD KYI MAN NGAG DGA' LDAN 'PHO KHRID THUN MONG MA YIN PA DMIGS BRTZE MA 'BUM GYI BKA' RGYA CAN GYI ZAB GNAD MTHAR THUG PA'I SNYING PO BSDUS TE NYAMS SU BZHES TSUL 'DON CHOG DANG, DMIGS RNAM DKYUS SBRAGS SU NYUNG DU'I TSIG GI LAM NAS GZIGS BDER 'GOD PA LA, 'DUN PAS SBYANG BA DANG, LAS LA SBYAR BA GNYIS LAS, DANG PO NI, STAN BDE BA LA LUS GNAD DANG LDAN PAS 'KHOD DE 'DI LTAR BSAM PAR BYA'O, ,RANG NYID 'KHOR PA 'DIR SKYE SHI'I
, ,'PHRUL 'KHOR RGYUN MI CHAD PA'I SDUG BSNGAL DRAG POS 'KHOR BA THOG MA MED PA NAS DA BAR RAB TU MNAR LA, DA DUNG YANG DA RES DAL 'BYOR GYI RTEN BZANG PO THOB PA'I SKABS 'DIR BTZAN SA ZIN PA ZHIG BYED MA NUS NA SLAR YANG RIGS DRUG GI SKYE GNAS KUN TU RANG DBANG MED PAR LAS NYON GYI ZHAGS PA DAM POS RTAG TU BCINGS TE TSA GRANG BKRES SKOM, NGAL 'JIGS BKOL SPYOD SKYE RGA NA 'CHI SOGS SDUG BSNGAL MI BZAD PA'I TSOR BA DRAG PO MU MTHA' MED BA MYONG BZHIN 'KHOR BA MTHA' MED DU 'KHYAMS DGOS PA BYUNG NA CI RANG DREG SNYAM DU SKYO SHAS DANG, BDAG GIS 'DI LAS NGES PAR THAR BAR BYA'O SNYAM DU NGES 'BYUNG DANG, DE YANG RANG GCIG BU TZAM MIN PAR SEMS CAN THAMS CAD KYANG RANG NYID BZHIN 'KHOR BA MTHA' MED DU 'KHYAMS PA SHA STAG MA ZAD, SPYOD 'JUG LAS, SDUG BSNGAL 'DOR 'DOD SEMS YOD KYANG, ,SDUG BSNGAL NYID LA MNGON PAR RGYUGS, ,BDE BA 'DOD KYANG GTI MUG PAS, ,RANG GI BDE BA DGRA LTAR 'JOMS, ,ZHES GSUNGS PA LTAR NYON MONGS PA'I GDON GYIS YID DKRUGS PAS RANG DBANG MED PAR BLANG DOR GO LOG
TU SPYOD CING SDUG BSNGAL MI BZAD PA LA RANG GIS 'BAD PAS 'JUG ,GTAN GYI 'DUN MA DANG 'JIG RTEN PHYI MA'I MTHA' LA MNO BSAM TZAM YANG MED PAR SHIN CHU 'KHRUL PA DRAG POS SMYOS TE SDUG BSNGAL GYI RGYU 'BA' ZHIG LA SHIN TU YANG BAR SPYOD PA'I 'GRO BA 'DI RNAMS SNYING RE RJE, 'DI DAG KYANG BDAG GI TSE RABS SNGA MA RNAMS SU MA MA BYAS PA GCIG KYANG MED, MA'I SDUG BSNGAL SEL BA'I KHUR BU LA BABS PA LTAR BDAG GI MA NYAM THAG PA 'DI RNAMS BDE BA THAMS CAD DANG LDAN ZHING SDUG BSNGAL THAMS CAD DANG BRAL BA ZHIG BDAG GIS BYA; DE YANG DA LTA BDAG LA DE LTA BU'I NUS PA MED, NUS PA SU LA YOD NA YANG DAG PAR RDZOGS PA'I SANGS RGYAS LA YOD PAS DES NA BDAG GIS MA SEMS CAN THAMS CAD KYI DON DU RDZOGS PA'I SANGS RGYAS KYI GO 'PHANG MYUR DU THOB BA ZHIG BYA'O, ,DE SA YANG LAM MA NOR BAR STON PA'I BSHES GNYEN, TSUL BZHIN NYAMS SU LEN PA'I GROGS, GANG DU NYAMS SU LEN PA'I GNAS, NYAMS SU BLANG BYA'I CHOS SOGS LEGS BAR 'DZOMS PA GAL CHE ZHING, DE NI DGA' LDAN YID DGA' CHOS 'DZIN LAS LHAG PA MED BAS 'DI NAS 'PHOS MA THAG ZHING DER SKYES TE BYAMS MGON SRAS DANG BCAS PA'I GSUNG GI 'DUD RTZI LA LONGS SPYAD NAS ZUNG 'JUG RDO RJE 'CHANG GI GO 'PHANG MYUR DU THOB PAR BYA, DE'I CHED DU ZAB LA MA 'PHO BA'I GDAMS PA NYAMS SU BLANG BAR BYA'O SNYAM DU DGE SEMS KHYAD PAR CAN GYI NGANG NAS, MDUN GYI NAM MKHAR PADMA 'DAB MA BZHI PA YANGS SHING RGYA CHE BA LTE BAR BLA MA DANG GNYIS SU MED PA'I BYAMS MGON LA RJE YAB SRAS SOGS KYIS BSKOR BA DANG, MDUN GYI 'DAB MAR YI DAM RGYUD SDE BZHI'I LHA TSOGS, GA-YAS KYI 'DAB MAR SANGS RGYAS, GA-YON GYI 'DAB MAR THEG PA GSUM GYI
, ,DGE 'DUN DANG, DPA' BO MKHA' 'GRO, CHOS SRUNG YE SHES PA'I TSOGS, RGYAB KYI 'DAB MAR DE RNAMS KYI THUGS RGYUD LA MNGA' BA'I RTOGS PA'I CHOS RNAMS PO TE'I RNAM PAR SHAR PAR SHAR BA BRAG RI LTAR BRTZEGS PA RNAMS GSAL GDAB, RANG GI MTHA' SKOR DU RIGS DRUG GI SEMS CAN THAMS CAD SA'I DREG PA LTAR 'KHOD PAR MOS NAS, RANG GZHAN THAMS CAD SRID ZHI'I 'JIGS PA LAS DA LTA NYID DU SKYOB TU GSOL SNYAM PA'I GDUNG SHUGS DRAG PO'I NGANG NAS 'DI LTAR,) RANG GI THUGS KA NAS 'OD ZER 'PHROS TSOGS ZHING NAM MKHA' GANG BA SPYAN DRANGS MDUN GYI NAM MKHAR BZHUGS PAR GYUR, BDAG DANG 'GRO BA NAM MKHA'I MTHA' DANG MNYAM PA'I SEMS CAN THAMS CAD DUS RTAG PAR BLA MA LA SKYABS SU MCHI'O,, SANGS RGYAS LAx CHOS LAx DGE 'DUN LA SKYABS SU MCHI'O, (,LAN GSUM,) BDAG GIS SEMS CAN THAMS CAD MU MTHA' MED PA'I 'KHOR BA SDUG BSNGAL GYI RGYA MTSO CHEN PO 'DI LAS BSGRAL TE BLA NA MED PA'I BYANG CHUB KYI SNYING PO LA 'GOD PAR BGYI, DE'I PHYIR DU ZAB LAM 'PHO BA'I GDAMS PA NYAMS SU BLANG BAR BGYI'O, (,LAN GSUM GYIS SKYABS 'GRO SEMS BSKYED NAN TAN BYAS RJES,) SKYABS YUL RNAMS RANG GI SMIN MTSAMS NAS THIM PAS RGYUD BYIN GYIS BRLAB PAR GYUR (PAR BSAM, DNGOS GZHI LA THOG MAR RLUNG RO 'BUD PA, LUS KYI STOD RA, TSVA'I STONG RA RNAMS GAL CHE BAS DANG BO RLUNG RA 'BUD PA NI, LUS RNAM SNANG GI CHOS BDUN LDAN DU 'KHOD DE LUS KYI DBUS GA-YAS GA-YON GNYIS NAS
BRTZIS PA'I DBUS RLANG THAD RGYAB MDUN GNYIS NAS BRTZIS PA'I CUNG ZAD RGYAB LA NYE BAR RTZA DBU MA SBOM PHRA SBA LCAG 'BRING PO ZHES PA MTHE'U CHUNG TZAM LUS KYI GZHUNG SHING GI TSUL DU YOD PA'I YAR SNE SPYI BO NAS MAR GUG STE SMIN MTSAMS GU ZUG PA, MAR SNE STE 'OG SOR BZHI'I MTSAMS SU SLEBS PA, DE'I GA-YAS SU RO MA DMAR PO, GA-YON DU RGYANG MA DKAR BO GNYIS SBOM PHRA GRO SOG TZAM, YAR SNE SPYI BO NAS MAR GUG STE SNA BUG GNYIS LA ZUG PA, MAR SNE DBU MA LAS CUNG ZAD RING BAR GNAS PA GSAL BTAB, DE NAS RKYANG MA'I MAR SNE RO MA'I NANG DU LU DUNG NANG PHU DUNG BCUG PA LTAR MOS, LAG PA GA-YAS KYI SRIN LAG GIS SNA BUG GA-YAS BKAG ,DAL BUS RLUNG SNA BUG GA-YON NAS RDU BCING, SNA BUG GA-YON BKAG STE GA-YAS NAS 'BUD PA LAN GSUM, YANG RO MA'I MAR SNE RKYANG MAR BCUG PAR MOS LA LAG GA-YON SRIN LAG GIS SNA BUG GA-YON BKAG RLUNG SNA BUG GA-YAS NAS RDUB CING GA-YON NAS 'BUD PA LAN GSUM, RO RKYANG GNYIS KA'I MAR SNE DBU MAR BCUG PAR MOS LA, SNA BUG GNYIS KA NAS RDUB CING GNYIS KA NAS 'BUD PA LAN GSUM, DE DAG GI SKABS LAS NGAN SDIG SGRIB MI DGE BA'I RTOG PA BAG CHAGS DANG BCAS PA RLUNG DANG MNYAM DU SANGS KYIS SONG PAR BSAM, 'DI SKABS SNGAR RANG GI SNYING GAR BKOD PA'I RJE BLA MA RTZA DBU MA DANG BCAS PA CHED GNYER GYIS GSAL BDABS PA DANG, NYER BSDU STONG SBYANG SOGS MI BYED PAR BTANG SNYOMS SU MI DMIGS PAR 'JOG GO ,GNYIS BA LUS KYI STONG RA NI SNGAR GYI RTZA GSUM MI DMIGS PAR DE LTAR LAS NGAN SOGS SBYANGS PAS RANG LUS SHA KHRAG BRDOS BCAS MIN PAR PHRU MA PHUS BTAB BA'AM, SHEL BUM NANG DU MAR ME 'BAR BA LTAR STONG SANG DE BA DVANGS GSAL 'OD KYI RANG BZHIN CAN DU BSGOM, GSUM PA RTZA'I STONG RA NI, DE LTAR LUS STONGS SANG NGE BA DE'I DBUS DRANG POR RTZA DBU MA KHYAD CHOS BZHI LDAN SBOM PHRA
, ,SBA LCAG TZAM RAG DUNG MGO MJUG LOG PA LTAR YAR SNE JE CHER SONG BA TSANGS BUG TU RGYA MTHONGS KHA PHYE BA LTAR BU GA DKAR THAL LE YOD PA, MAR SNE LTE 'OG SOR BZHI'I THAD 'OD ZER SKYA CHIL LE BA ZHIG GIS DAM POR BKAG PA YANG YANG GSAL 'DEBS BA NI RTZA'I STONG RA'O, ,DE LTAR STONG RA GNYIS PO 'DI SHIN TU GAL CHE BAS NAN TAN DU SKYONG DGOS, DE NAS SNYING KHA'I THAD KYI DBU MA DE'I NANG DU RGYUN PAR RANG GI DGA' LHA'I RNAL 'BYOR SKABS SNYING DBUS SU BSKYED BSTIM YANG YANG BYAS PA'I RJE BLA MA SHIN TU PHRA BA'I RLUNG SEMS DANG NGO BO DBYER MED DU YOD PA DE NYID GSAL BTAB, SNGAGS KYI DKRIS DKROL, PADMA BUM SKU KHA BYE BAR BSAM STE RANG LUS STONG SANG, DE DBUS RTZA DBU MA, DE NAS RANG SEMS RJE BLA MA DBYER MED RNAMS LA YID YANG YANG GOMS SU GZHUG ,DE NAS 'PHO BA'I ZHING GSAL 'DEBS NI, RANG NYID GANG DU KHA PHYOGS PA'I STENG GI NAM MKHA'I DBYINGS SU DGA' LDAN GYI ZHING KHAMS, DE'I DBUS SU PHO BRANG RGYAL MTSAN MTHON PO, DE'I MDUN DU YID DGA' CHOS 'DZIN SOGS DGA' LHA'I KHRID KYI SKABS LTAR GSAL GDAB, YID DGA' CHOS 'DZIN GYI DBUS SU SENG GES BTEG PA'I RIN PO CHE'I KHRI'I STENG DU RANG GI RTZA BA'I BLA MA DANG RGYAL BA TZONG KHA PA DBYER MED PA'I RJE BTZUN BYAMS MGON BZANG PO'I 'DUG STANGS KYIS BZHUGS PA SKU MDOG GSER GYI LHUN PO LA NYI MA 'BUM GYIS 'KHYUD PA LTA BU, PHYAG GNYIS THUGS KAR CHOS 'KHOR GYI PHYAG RGYA MDZAD PAS KLU SHING GI ME TOG SDONG BU DANG BCAS PA GA-YAS KYI STENG NA 'KHOR LO DANG GA-YON GYI STENG NA RIL BA SPYI BLUGS KYIS MTSAN PA 'DZIN PA MCHOG GI SPRUL SKU'I CHA BYAD CAN, SKU LA
CHOS GOS NGUR SMRIG GSUM MDZES PAR GSOL BA, MTSAN BZANG PO SUM CU RTZA GNYIS DANG, DPE BYAD BZANG PO BRGYAD CUS SPRAS PA, GZI BRJID NYI MA 'BUM LAS LHAG PA, DGYES PA'I 'DZUM DKAR DANG LDAN PA'I SPYAN GYIS GZIGS PA, THUGS KAR DPAL GYI BE'U'I RI MO PHRA SENG NGE THA'I NANG DU RJE BLA MA YAB SRAS GSUM BZHUGS PA, RJE BTZUN GYI 'KHOR DU YANG NYE BA'I SRAS CHEN BRGYAD, RJE BLA MA'I RNAM ROL RGYAL SRAS 'JAM DPAL SNYING PO, JO BO RJE'I RNAM ROL NAM MKHA' DRI MA MED PA SOGS DAG PA'I 'KHOR TSOGS RGYA MTSO LTA BU'I DBUS SU CHOS KYI SGRA DBYANGS LHANG LHANG GSUNG BA GSAL 'DEBS PA DANG BCAS, RANG GI MDUN GYI THAD DRANG MKHA' DBYINGS SU, ,STENG PHYOGS DGA' LDAN MKHA' SPYOD ZHING KHAMS CHE, ,DE DBUS PHO BRANG RGYAL MTSAN MTHON PO ZHES, ,CHOS KYIS MTHO BA'I KHANG BZANG KHYAD 'PHAGS MDUN, , YID DGA' CHOS 'DZIN KUN DGA' RA BAR NI, ,RIN CHEN SENG KHRI PAD ZLA'I GDAN STENG DU, ,RTZA BA'I BLA MA RJE BTZUN MI PHAM MGON, ,GSER RI LTAR BRJID CHOS 'KHOR PHYAG RGYA CAN, ,DE YI THUGS KAR DPAL GYI BE'U'I NANG, ,RGYAL BA'I DBANG PO RJE BTZUN TZONG KHA PA, ,SRAS KYI THU BO GNYIS DANG BCAS PA YI, ,MTHA' SKOR 'KHOR TSOGS RGYA MTSOS BSKOR BAR GYUR, ,MDUN GYI NAM MKHAR SENG KHRI PAD ZLA'I STENG, ,BYAMS MGON RJE BTZUN BLA MA YAB SRAS BCAS, ,BDAG CAG BSOD NAMS ZHING GI DAM PA RU, ,'KHOR BA MA STONGS BAR DU BZHUGS SU GSOL, ,SHES BYA'I KHYON KUN 'JAL BA'I BLO GROS THUGS, (,ZHES PA NAS,) BSTAN PA'I SNYING PO RING DU GSAL BYED SHOG (,BAR DGA' LHA'I RNAL 'BYOR LTAR DANG,)
, ,SA GZHI SPOS KYIS BYUGS SHING ME TOG BKRAM, ,RI RAB GLING BZHI NYI ZLAS BRGYAN PA 'DI, ,DGA' LDAN ZHING DU DMIGS TE PHUL BA YIS, ,'GRO KUN DGA' LDAN ZHING LA SPYOD PAR SHOG (,CES YAN LAG BDUN PA MAndAL DANG BCAS PA DMIGS RNAM RGYUD DANG 'DRES NGES SU BSKYANG, MTSAMS 'DIR SPRO NA 'PHO BA'I 'GAL RKYEN SEL ZHING MTHUN RKYEN 'GRUB PA DANG, KHYAD PAR DA LTA NYID DU DGA' LDAN CHOS KYI PHO BRANG DU THOGS PA MED PAR DRANG DU GSOL SNYAM PA DANG BYAMS MGON RGYAL SRAS RGYA MTSO'I TSOGS DANG BCAS PA'I ZHAL MTHONG, GSUNG GI BDUD RTZIR SPYOD PA'I SMON 'DUN SHUGS DRAG POS DMIGS BRTZE MA CI RIGS KYIS GSOL BA BTAB, BYAMS MGON SRAS BCAS KYI SKU LAS BDUD RTZI'I RGYUN BABS NGAN SONG DU SKYE 'GYUR GYI LAS NGAN SDIG SGRIB DANG ,DGE BA YIN YANG DAG ZHING DU SKYE BA LA GEGS BYED MTHA' DAG LHAG MED DU SBYANGS, SLAR YANG BDUD RTZI'I RGYUN BABS, DER SKYE BA'I MTHUN RKYEN MTSANG BA MED PA'I RTOGS PA PHUN SUM TSOGS PA THOB PAR BSAM, DE NAS RANG GZHAN SEMS CAN THAMS CAD SPYIR 'KHOR BA DANG, KHYAD PAR NGAN SONG GSUM, MDOR NA RIGS DRUG GANG DU SKYES KYANG SDUG BSNGAL GYI RANG BZHIN KHO NA LAS MA 'DAS PAS DE LAS THAR 'DOD KYI BLO SHUGS DRAG PO DANG, ZHING MCHOG YID DGA' CHOS 'DZIN DU SKYES NAS BYAMS MGON SRAS BCAS KYI ZHAL MJAL, GSUNG GI BDUD RTZIR SPYAD NAS MA RGAN SEMS CAN THAMS CAD KYI DON DU MYUR DU 'TSANG RGYA THUB PA ZHIG BYA'O SNYAM DU, ZHING DER 'GRO 'DOD KYI 'DUN PA DRAG PO DANG, DER BGROD PA'I THABS ZAB MO NI GDAMS NGAG 'DI KHO NA DANG, 'DI LA BRTEN NAS NGES PAR BGROD NUS SO SNYAM DU YID CHES KYI DAD PA, 'KHOR BA'I GNAS LUS LONGS SPYOD GANG LA YANG CHAGS ZHEN MED PA'I ZHE
BCAD DRAG PO'I NGANG NAS, RANG LUS STONG RA'I DBUS RTZA DBU MA'I NANG RANG SEMS RJE BLA MAR GSAL BA PHA RI NAS TSU RIR BLTA BA LTA BU MA YIN PAR RANG SEMS ZHUGS PA BZHIN BYAS, DES RTZA DBU MA'I NANG NAS YAR BLTAS PAS RJE BTZUN GYI THUGS KA GSER GYI MAndAL PHYIS NGA LA NYI MA PHOG BA LTAR SER LHAG GE MTHONG, RJE BTZUN GYIS KYANG MAR GZIGS TE BU KHYOD DGA' LDAN MKHA' SPYOD KYI ZHING 'DIR MYUR DU SHOG CES GSUNG LHANG LHANG BYON PA DANG, THUGS KA NAS SPRIN DKAR SBUBS CAN PHU DUNG LTA BU ZHIG BRKYANGS PA'I MAR SNE DANG, RANG GI DBU MA'I YAR SNE'I TSANGS BUG SBREL BA'I SBUBS NAS RJE BTZUN GYI THUGS KA GSER GYI MAndAL PHYIS PA LTA BU MTHONG BAS SPRIN SBUBS LA LAM GYI 'DU SHES, LAM DE LA RANG NYID 'GRO BA'I 'DU SHES, SONG NAS BYAMS MGON DANG RJE BLA MA'I THUGS RANG SEMS DBYER MED DU BSRE BA'I 'DU SHES GSUM DANG ,MDOR NA SKYID SDUG LEGS NYES JI LTAR GYUR KYANG RJE BTZUN YAB SRAS MA GTOGS BDAG LA SKYABS DANG MGON DANG RE SA GZHAN NA MED PAS BDAG DA LTA NYID DU DGA' LDAN CHOS KYI PHO BRANG MI PHAM RGYAL BA'I THUGS KAR DRANG DU GSOL SNYAM PA'I GDUNG SHUGS DRAG POS SNYING KHONG RUS PA'I GTING NAS GSOL BA 'DI LTAR GDAB PAR BYA'O, , STENG DGA' LDAN LHA BRGYA'I MGON PO MCHOG ,RJE MI PHAM CHOS KYI BLA MA DANG, ,DBYER MED PA'I 'DREN MCHOG THAMS CAD MKHYEN, ,PHA BLO BZANG GRAGS PA YAB SRAS LA, ,YID RTZE GCIG GUS PAS GSOL BA 'DEBS, ,LAM ZAB MO 'PHO BA'I RNAL 'BYOR GYIS, ,ZHING DGA' LDAN MKHA' SPYOD GNAS MCHOG DER, ,DUS DA LTA NYID DU BGROD PA DANG, ,RJE BLA MA YAB SRAS ZHAL MTHONG ZHING, ,GSUNG BDUD RTZI'I DGA' STON MYONG BA LAS, ,LAM ZAB MO'I RTOGS PA MTHAR PHYIN NAS, ,
, ,MCHOG MYUR DU THOB PAR BYIN GYIS RLOBS, ,PHA KHYOD KYI THUGS RJE'I LCAGS KYU YIS, ,'OD SBU GU'I LAM LAS SKAD CIG LA, ,RJE MI PHAM CHOS KYI MDUN SA DER, ,DUS DA LTA NYID DU DRANG DU GSOL, ,LAM 'PHO BA 'BYONGS PAR BYIN GYIS RLOBS, (,ZHES GDUNG SHUGS DRAG POS GSOL BA LAN GSUM BTAB PAS RJE BTZUN GYI THUGS KA'I RJE YAB SRAS GSUM GYI THUGS KA NAS 'OD ZER DMAR PO LCAGS KYU LTA BU RE SPROS TE GCIG TU GYUR PA 'OD KYI SBU GU DE'I NANG NAS RANG SEMS RJE BLA MAR GSAL BA'I SNYING GAR BTAB ,RDO KHAB LEN GYIS LCAGS 'DREN PA LTAR DRANG BAR MOS, SNGAR GYI 'DU SHES GSUM LDAN GYI NGANG NAS, LUS GNAD MA 'PHYUGS PAR RKANG LAG GI MDZUB MO RNAMS BSKUMS TE NYVA BZHI BSGRIMS PAS 'OG RLUNG DRAG TU 'THEN PAS KYANG BTEG STE, HIKA CES SGRA JE CHER BRJOD PAS TSANGS BUG TU REG TZAM BYAS, DBUGS MAR 'JOG PA DANG, KA ZHES SDOM GYI BA THAG GLOD PA LTAR SNGAR GYI RANG GNAS SU MAR PHAB, HI KA CES YAR 'PHANGS DUS MYUR BA DANG, KA ZHES MAR 'BEBS DUS DAL BA DGOS, DE YANG HI ZHES PA RLUNG YAR DRANGS PA'I SGRA DANG, KA ZHES PA DMIGS RTEN TSANGS BU GE LA REG PA'I THAG SGRA LTA BUR GO DGOS, DE LTAR THUN RE LA 'PHANGS 'BEBS LAN LNGA'AM, BDUN NAM, NYER GCIG ,BRGYA SOGS GANG MOS BYED GSUNGS KYANG, NYER GCIG PA TSAN PHA GSUM BYA BA PHYAG LEN DU YOD, DE YANG NYER GCIG RE'I MTSAMS SU SNGAR GYI GSOL 'DEBS LAN GSUM RE BYA, DE NAS THUN 'JOG KHAR HIKA CES CHANGS BUG TU DRANGS, PHAt DRAG POS TSANGS BUG NAS THON TE BYAMS MGON GYI THUGS KAR SIB KYIS THIM PAS RANG SEMS RJE BTZUN GYI THUGS BDE STONG CHOS KYI SKU DANG DBYER MED 'DRES PAR BSAMS LA DAR CIG MNYAM PAR BZHAG ,KA ZHES STENG RLUNG MNAN
PAS RANG SEMS RJE BLA MA'I RNAM PAR THUGS KA NAS THON TE 'OD KYI SBUBS NAS HRIL GYIS RANG GNAS SU PHAB, YANG HIKA CES TSANGS BUG DANG PHAt CES THUGS KAR 'PHANG BA DANG, MAR 'BEBS PA SOGS LAN GSUM BYA, THA MA'I TSE RANG SEMS RJE BLA MAR GSAL BA SNYING GAR BZHUGS,) DPAL LDAN RTZA BA'I BLA MA RIN PO CHE, ,BDAG GI SNYING KHAR PADMO'I STENG BZHUGS LA, (,ZHES SOGS BRJOD DE BYAMS MGON RJE YAB SRAS KYI SKU LAS RANG 'DRA CHAD DE SNYING KHA'I RJE BLA MA LA THIM, PADMA KHA BUB KYIS 'DUS, SNGAGS KYIS DKRI BA SOGS DGA' LHA'I GZHUNG LTAR BYA, 'OD ZER DANG SPRIN SBUBS THUGS KA NAS TSAD PA BDUD RTZI GSER ZHUN MA'I RNAM PAR ZHU NAS DBU MA'I NANG THAMS CAD KHENGS, TSANGS BUG RDO RJE'I RANG BZHIN GYI 'OD SNGON POS BKAG PAR BSAMS NA TSE RING BA'I RTEN 'BREL DU 'GYUR GSUNG, MJUG TU BSNGO SMON GYI RGYAS 'DEBS PA GAL CHE ZHING, BYAMS PAS DAM BCAS PA'I GZUNGS, BYAMS SMON SOGS DANG, BSDU NA,) DE LTAR DNGOS GRUB MA LUS 'BYUNG BA'I GNAS, ,RJE BTZUN BLA MA MCHOD CING GSOL BTAB MTHUS, ,SKYE BA KUN TU 'JAM DBYANGS BLA MA YIS, ,MNYES BZHIN RJES SU 'DZIN PA NYID GYUR CIG , RIN CHEN DU MA LAS GRUB DGA' LDAN ZHING, ,NGO MTSAR BYE BA'I DBUS NA MI PHAM MGON, ,LEGS PAR BSGOMS PAS RNAM DAG ZHING 'GRUB CING, ,TSE 'PHOS MOD LA GNAS DER SKYE BAR SHOG ,RJE BTZUN THUGS KA NAS 'PHROS SPRIN DKAR YUG ,BRKYANG BA'I SNE MOR BLA MA SRAS DANG BCAS, ,SPYAN DRANGS YAN LAG BDUN GYIS TSOGS BSAGS PAS, ,BDAG RGYUD BDE BLAG NYID DU SMIN PAR SHOG ,DUS GSUM RGYAL BA'I MKHYEN BRTZE NUS PA RNAMS, ,ZUNG 'JUG SPRUL SKUR
, ,SHAR BA'I RNAM 'DREN GANG, ,RIGS GSUM NGO BOR THAG BCAD GSOL BTAB MTHUS, ,MCHOG THUN DNGOS GRUB MA LUS MYUR THOB SHOG ,KHYAD PAR DAG PA YE SHES BDUD RTZI'I CHUS, ,SGO GSUM SDIG SGRIB MI SHES KUN 'KHRUD CING, ,'CHAD RTZOD RTZOM SOGS MTHA' YAS SHES BYA LA; ,BLO GROS MGON PO 'JAM DBYANGS MTSUNGS PAR SHOG ,'DI SNANG 'GAG TSE 'DA' KA'I RNAL 'BYOR GYIS, ,DGA' LDAN MKHA' SPYOD GNAS SU BGROD NAS NI, ,BLO BZANG RGYAL BA YAB SRAS ZHAL MTHONG ZHING, ,GSUNG GI BDUD RTZI'I DGA' STON MYONG BAR SHOG ,BYANG SHAR NGO MTSAR RMAD BYUNG BKOD PA'I ZHING, ,RNAM 'DREN SENG GE'I NGA RO'I ZHABS DRUNG DU, ,'KHOR GYI THOG MAR SKYES NAS MDO SNGAGS LA, ,THOS BSAM BSGOMS RTAG TU 'DA' BAR SHOG ,MDOR NA SKYE ZHING SKYE BA THAMS CAD DU, ,RJE BTZUN BLO BZANG GRAGS PA YAB SRAS DANG, ,MI 'BRAL RGYAL BA'I CHOS TSUL KUN BZUNG NAS, ,BSTAN DANG 'GRO BA'I DON CHEN LHUR LEN SHOG (,CES SOGS BSNGO BA DANG SMON LAM GYI RGYAS 'DEBS NAN TAN BYA, DE LTAR SBYANGS PAS SPYI GTZUG ZA BA DANG 'PHRIG PA 'JAG MA TSUGS PA SOGS GNAD CHE BAR BYED KYANG DE CAM LA NGES PA CI YANG MED, DMIGS PA GANG YANG MED PAR HIKA KHO NA BYAS KYANG SPYI PO SKRANG BA SOGS 'BYUNG BAR GSUNG, GTZO BOR DMIGS RNAM LA 'DRIS SHING NYAMS 'OG TU TSUD PAR BYAS TE DUS THA MAR LAS LA SBYOR BA'I TSE LAG LEN LA 'GEL THUB NGES SU SBYONG BA GNAD TSA, DE LTAR SBYANGS ZIN NAS RGYUN DU DMIGS PA BSKYANG DRAGS NA 'PHO RAB TSE THUNG ZHES DMIGS PA'I GNAD KYIS TSE LA GNOD PAS 'KHRID DMIGS MA BRJED TZAM BYAS PAS 'THUS, RGYUN DU
DGA' LDAN GYI ZHING GI RNAM PA YANG YANG YID LA BYED PA DANG, SKYE BA GZHAN GYIS BAR MA CHOD PAR DER 'PHO 'DOD DRAG PO DANG, DGE RTZA THAMS CAD DER SKYES NAS RJE BTZUN GYI SRAS KYI THU BOR RJES SU BZUNG BA'I RGYUR BSNGOS NA, RANG GI DGE RTZAS NYER LEN DANG BYAMS MGON SRAS BCAS KYI THUGS RJE BYIN RLABS KYIS LHAN CIG BYED RKYEN BYAS TE NGES PAR SKYE NUS, LHAG PAR RGYUN DU RANG SEMS RJE BLA MA DANG, DGA' LDAN GYI RJE BTZUN GYI THUGS KA 'OD ZER RAM SPRIN DKAR GYIS 'BREL BAR BSAMS PA YANG YANG BYED PA SHIN TU GNAD CHE'O, ,GNYIS PA LAS LA SBYAR BA NI, 'CHI BA'I DUS LA MA BABS PAR 'PHO BA BYAS NA, PHUNG PO SANGS RGYAS LNGA BDAG NYID, ,DE LA BRNYAS BYED BRGYAD PA YIN, ,ZHES PA'I DON LTAR RIGS LNGA LA SOGS PA'I LHA BSAD PA'I NYES PA 'BYUNG BAR GSUNGS PAS 'CHI LTAS MA BYUNG BAR 'PHO BA MI BYED, 'CHI LTAS BYUNG NAS KYANG DE MA THAG 'PHO BA MI BYED PAR 'CHI BA BLU BA'I THABS LA SGO SNA TSOGS NAS 'BAD, DE LTAR 'BAD KYANG 'CHI LTAS MA LDOG NA GNAD GCOD KYIS MA ZIN GONG NAS 'PHO THUB NA LEGS SHING, DE YANG TSE 'DIR CHAGS ZHEN PHRA MO TZAM YANG MED PA SHIN TU GAL CHE STE, 'PHO BA'I NYAMS LEN YOD KYANG 'CHI KHAR CHAGS ZHEN BYUNG NA BYA NAM MKHAR 'PHUR BA'I RKANG BA RDO LA BTAGS PA DANG 'DRA BAR GSUNGS PAS, ZAS POS GNAS MAL, GNYEN NYED, 'KHOR MDZA' BSHES, LUS LONGS SPYOD GANG LA YANG CHAGS ZHEN MI BYA BAR, 'DI DAG THAMS CAD KYIS KYANG BDAG 'DOR, BDAG GIS KYANG 'DI DAG THAMS CAD 'DOR NGES BAS CHAGS PAS CI PHAN SNYAM PA DANG, DAG ZHING DU SKYES NA GNAS LUS YONGS SPYOD DA LTA'I 'DI BAS BRGYA 'GYUR STONG 'GYUR GYIS LHAG PA YOD PAS 'DI DAG LA CHAGS PAS CI BYA SNYAM PA DANG 'KHOR BA'I BDE 'BYOR GANG LA YANG YID BRTAN DU RUNG BA'I SNYING PO MED TSUL BSAMS PA SOGS SGO SNA TSOGS NAS CHAGS ZHEN PHRA MO TSUN CHAD 'GOG CI THUB BYA, NOR RDZAS RNAMS DGE PHYOGS SU GTONG BA SOGS
, ,TSOGS GSOG SGO DU MA NAS 'BAD, DGE RTZA RNAMS DGA' LDAN DU SKYES NAS MYUR DU ZUNG 'JUG THOB PA'I RGYUR BSNGO, SNGAR BSAGS SDIG LTUNG RNAMS LA BSHAGS PA SGO SNA TSOGS NAS 'BAD, LHAG PAR GSANG SNGAGS KYI DBANG CHEN THOB PA RNAMS KYIS DBANG BSKYAR NAS ZHU BA'AM, BDAG 'JUG LEN PA LA SOGS PA'I SGO NAS BYANG SDOM DANG SNGAGS SDOM SOR CHUD PAR BYED, BSNGO BA DANG SMON LAM GYIS MTSAMS SBYOR NAN TAN BYAS RJES SNGAR BZHIN 'PHO BA'I DMIGS PA RNAMS SKYONG ZHING MI 'DRA BA'I KHYAD PAR HIKA CES RNAM SHES RJE BLA MAR GSAL BA BYAMS MGON GYI THUGS KA'I RJE BLA MA'I THUGS KAR 'BANGS; KA ZHES MAR MI 'BEBS PAR SLAR DMIGS RTEN GSAR PA ZHIG GSAL BTAB NAS YANG THUGS KAR 'PHANGS PA SHA STAG DBUGS KYI RGYU BA MCHAD BAR BRGYUD MAR NYAMS SU BLANG ,DRAN PA MI GSAL DU SONG NA SKYES BU DAM PA SOGS LAM 'DI NYAMS SU LEN PA ZHIG GAM, MIN KYANG GROGS DAM TSEG GTZANG MAS RNA KHUNG NAS TSIG GSAL 'DEBS BYED PA SOGS NAN TAN DU NYAMS SU BLANGS NA NGES PAR DGA' LDAN MKHA' SPYOD YID DGA' CHOS 'DZIN DU RJE BTZUN MI PHAM MGON DANG, RGYAL BA TZONG KHA PA YAB SRAS KYI ZHABS DRUNG DU SKYES, DNGOS SU CHOS NYAN PA'I SKAL BA CAN DU GYUR NAS RING POR MI THOGS BAR ZUNG 'JUG RDO RJE 'CHANG GI GO 'PHANG THOB PAR 'GYUR RO,) ,'JAM MGON SNYAN BRGYUD LAS 'ONGS GDAMS ZAB 'DI, ,SKAL BZANG DGA' LDAN BGROD PA'I THEM SKAS TE, ,SDIG CAN BTZAN THABS 'TSANG RGYA'I MYUR LAM DANG, ,LAM NGAN GA-YANG SA 'GOG PA'I RVA BA'ANG YIN, ,GAB DKRUGS 'THOR DANG ZHAL LAS SHES DGOS SOGS, ,GNAD KUN PHYOGS GCIG BKLAG CHOG TU BKOD PAS, ,ZLOS PA'I SKYON DAB RANG BZO'I LHAD MED BAR, ,MTHA' YAS SKAL BZANG SPYI NOR
NYID DU GRUB, ,'DI LAS RAB DKAR DGE TSOGS GANG THOB DES, ,MI DBANG MCHOG DANG BDAG DANG 'GRO KUN KYANG, ,DGA' LDAN ZHING DU RGYAL SRAS THU BO RU, ,SKYES NAS ZUNG 'JUG RGYAL SA MYUR ZIN SHOG (,DE LTAR DGA' LDAN LHA BRGYA MA LA BRTEN PA'I 'PHO BA'I GDAMS PA NYAMS SU LEN TSUL SKAL BZANG DGA' LDAN BGROD 'I THEM SKAS ZHES BYA BA 'DI NI, SRID ZHI'I MGON GCIG RNAM 'DREN PHYAG NA PADMO'I BKA'I MDUN BLON ZHOL KHANG BA RJE RGYAL BA GNYIS PA'I BSTAN PA LA MI PHYED PA'I THUGS DAD PHUL DU BYUNG BA MCHOG GSUM BLA MAR 'DZIN PA DON GRUB PHYAN TSOGS KYI NYAMS BZHES SU DGOS TSUL GSUNGS PA LTAR, SNYAN BRGYUD MAN NGAG GI GTOR MDZOD, RTZA BA'I BLA MA ZUNG 'JUG RDO RJE 'CHANG SKU 'BUM CHE SHOS RIN PO CHE BLO BZANG BYANG CHUB BSTAN PA'I SGRON ME DPAL BZANG PO'I ZHAL SNGA NAS LAM 'DI'I MAN NGAG ZHAL SHES DANG BCAS PA LEGS PAR NOS PA'I BTZUN GZUGS BYAMS PA BSTAN 'DZIN 'PHRIN LAS RGYA MTSOR 'BOD PAS, MAN NGAG KHONG NA SBAS PA RNAMS GSAL BAR PHYE, 'THOR BA RNAMS PHYOGS GCIG TU BSDUS, ZHAL SHES GNAD KYIS ZUR BRGYAN, 'JUG PA BDE KHYAD 'DON CHOG DANG DMIGS RNAM DKYUS GCIG TU SBRAGS TE BKOD PA 'DI YANG BGRANG YAS 'GRO BA SGROL BA'I DED DPON DU GYUR CIG,, ,,DGE LEGS 'PHEL,, ,,