(* ,BDE MCHOG DRIL BU LA'I LUS DKYIL GYI DBANG BSHAD BZHUGS SO,, ,,) #, ,BLA MA DANG DPAL HE RU KA DBYER MA MCHIS PA'I ZHABS LA PHYAG 'TSAL LO, ,'DIR 'KHOR LO SDOM PA'I LUS DKYIL DU DBANG BLONG BA'I CHO GA'I DMIGS RIM MDO TZAM DGONG PA LA, BUM SGRUB DANG SGRUB THABS KYI GTOR 'BUL YAN RDZOGS PA'I 'JUG TU RANG NYID GTZO BO LAS PHYE NAS DKYIL 'KHOR GYI SHAR SGO'I THANG KYI SNA TSOGS RDO RJE'I RVA DBUS MA'I SBOM SA'I STENG DU GNAS NAS SLOB MA'I BYA BA RNAMS RANG GIS BYED CING BLA MA'I BYA BA RNAMS DKYIL 'KHOR GYI GTZO BO BLA MA DANG THA MI DAD PAR MOS TE DES BYED PAR BSAM LA DKYIL 'KHOR DU 'JUG PA SOGS BYA'O, ,DE LA GSOL 'DEBS KYI DON NI, SNGAGS RIM LAS, BLA MA LA DGA' BA CHEN PO ZHES POS NAS KHYOD GCIG PU BDAG GI STON PA'O ZHES TE DGA' CHEN NI RDO RJE 'CHANG GI MTSAN YIN PAS BLA MA YANG DE DANG 'DRA BAR LTA BA'O, ,TSUL NI DE'I LAM STE BRTAN PA NI GZHAN GYIS MI SHIG SU PA LA SHANTI PAS BSHAD DO, ,RTZE MO LAS NI, BYANG CHUB SEMS DPA'I TSUL BSTAN PA ZHES KYANG 'BYUNG DO, 'TSAL BA NI DE 'DOD PA'O, ,DAM TSIG NI SNGAGS DANG RGYUD DANG PHYAG RGYA LA SOGS PA'O, ,BYANG CHUB SEMS KYANG ZHES PA LA RDOR PHRENG DANG RTZE MOR, SDOM PA DAG KYANG BDAG LA STZOL, ZHES 'BYUNG NGO, ,SKYABS GSUM NI GSUM LA SKYABS SU 'GRO BA'O, ,ZHES BSHAD PA LTAR RO, ,DE NAS MIG
DAR 'CHING BA'I DGOS PA NI SNGAGS RIM LAS, ME TOG DOR NAS SLOB DPON GYIS MA BSAL BAR DU DKYIL 'KHOR RDZOGS PAR MTHONG DU MI RUNG BAS MIG RAS 'CHING BA YIN TE, ZHES BSHAD PA LTAR YIN LA SNGAGS DON NI, TZAG KshU MIG ,BAN BHA CHING, BA RA MCHOG TU, MA NA YA YID KYI CHED DU ZHES PA LA 'JUG PA YOD PAS DBYAD CES SNAR THANG SMRA SENG GIS BSHAD DO, ,ME TOG 'PHRENG BA 'DZIN PA NI 'OG TU DKYIL 'KHOR DU ZHUGS NAS LHA LA 'DOR RGYU'I ME TOG 'DIR 'DZIN PA YIN LA, SNGAGS NI, A'A SNANG MTHA', BA'I RNAM SNANG RA RIN 'BYUNG GI MING YIG DANG PO DANG, BAm DON GRUB, H'Um MI BSKYOD PA'I SA BON STE, SNGAGS DES RIGS LNGA'I NGO BOR BYIN GYIS BRLABS PA'I KHA DOG SNA LNGA PA'I ME TOG GI 'PHENG BA BZUNG BAR BSAM ZHES GSUNG NGO, ,DE NAS GANS GSUM BYIN BRLAB KYI TSE, RANG GTZO BOR GSAL BA'I GNAS GSUM DU 'KHOR LO SDOM PA'I RDO RJE GSUM GYI NGO BO YI GE 'BRU GSUM GYIS MTSAN PA LAS BDUD RTZI 'OD ZER GYI RGYUN BAB, LUS THAMS CAD GANG, DRI MA THAMS CAD DAG, RDO RJE GSUM GYI NGO BOR GYUR SNYAM PA'I MOS PA BYA GSUNG NGO; ;DRI LAN GYI DRI BA DANG PO NI RIGS DANG MOS PA 'DRI BA'O, ,LAN DANG PO'I SKAL BZANG NI RGYAL SRAS TE THEG PA CHEN PO'I RIGS CAN DANG BDE CHEN LA MOS PAR BSTAN PAS DKYIL 'KHOR DU GZHUG DU RUNG BAR SHES PAR BYED DO, ,LAN GNYIS PA'I DON NI SANGS RGYAS KYI DAM TSIG MCHOG BSGRUB PA'I PHYIR YIN ZHES PA'O, ,BYANG SDOM 'DZIN PA'I TSE, BZUNG
, ,BA'I YUL BSGRUB PA'I DKYIL 'KHOR BA'ANG YIN MOD KYANG STENG GI NAM MKHAR RTZA BA DANG BRGYUD PA'I BLA MA, YI DAM, SANGS RGYAS, BYANG SEMS, DPA' BO; ;MKHA' 'GRO, BSTAN SRUNG YE SHES PA'I TSOGS TIL GYI GANG BU LTAR GANG BA BZHUGS PAR BSAM, BZUNG BA'I SNGON 'GRO SKYABS SU 'GRO BA, 'GAL RKYEN SDIG LTUNG BSHAGS PAS SBYANG BA, MTHUN RKYEN TSOGS YI RANG BAS SOG PA GSUM SNGON DU BTANG, 'DZIN PA'I DNGOS GZHI SEMS CAN THAMS CAD KYI DON DU SANGS RGYAS KYI GO 'PHANG THOB PAR BYA, DE'I PHYIR DU RGYAL SRAS KYI SDOM PA BZUNG NAS SPYOD PA MTHA' DAG LA BSLAB PAR BYA'O SNYAM PAS CHO GA RJES SU ZLOS PAR MOS TE BRJOD GSUNG, THAMS CAD RNAL 'BYOR GYI SEMS BSKYED PA'I TSE, KUN RDZOB DANG DON DAM PA'I SEMS BSKYED ZLA BA DANG RDO RJE'I RNAM PAR SKYED PA NI SNGAGS KYI THABS MKHAS KYIS THEG PA CHEN POR RIGS NGES PAR BYED PA YIN PAS SEMS CAN GYI DON DU SANGS RGYAS THOB 'DOD KYI SMON SEMS DANG LTA BA'I STENG NAS DON DAM SEMS PA SKYED GNYIS DMIGS LEGS PAR PHYED PAR BYAS LA ZLA BA DANG RDO RJE'I RNAM PAR BSKYED, SNGAGS DON NI, THAMS CAD RNAL 'BYOR KYI SEMS BSKYED PAR BGYI'O ZHES PA'O, ,S'U RA TE SOGS KYI SNGAGS DON NI, SHIN TU DGA' BA'I DAM TSIG DANG LDAN PA KHYOD KYIS JI LTAR BDE BAR RDO RJE STE SANGS RGYAS BSGRUB PAR BYA'O, ,ZHES PA STE DE'I TSE GTZO BO'I THUGS KA'I SEMS BSKYED GNYIS KYI NGO BO ZLA BA DANG RDO RJE'I RNAM PA CAN
LAS RANG 'DRA GNYIS PA RE CHAD DE RANG GI SNYING KHA'I ZLA RDOR LA THIM PAS BRTAN PAR BYAS PAR BSAM GSUNG NGO, ,GSANG BAR GDAM PA'I MA DAD PA RNAMS LA'ANG MA YIN NO, ,ZHES PA DKYIL 'KHOR DU ZHUGS SU ZIN KYANG SNGAGS LA MI DAD NI DE LA YANG MI BSTAN PA'I DON NO, ,H'Um DZA H'Um GI SKABS SU BLA MA DANG GTZO BO THA MI DANG PAS SPROS PA'I LAS KYI RDO RJE'I PHYAG GI RDO RJE LA 'THUS NAS SHAR SGOR PHYIN TE DER 'DUG PAR BSAM, GSOL 'DEBS KYI DON NI, SANGS RGYAS KUN GCIG TU 'DUS PA'I RANG BZHIN GYI SKU RDO RJE SLOB DPON LA NI SKYABS SU MCHI'O, ,RTEN PA DPA' BO DANG RNAL 'BYOR MA'I DKYIL 'KHOR KYI 'KHOR LO DANG, RTEN RNAL 'BYOR GYI GNAS LA'ANG BDAG PHYAG 'TSAL LO, ,RDO RJE SLOB DPON DON DAM SMRA BA'I SENG GE RNAL 'BYOR ZHES BYA BA NYON MONGS GCOD PA'I DON LA SHIN TU MKHAS PAR GYUR PA KHYOD KYIS SRID PA'I NYES PA BRGYA PHRAG STE DPAG MED SKYED PA'I RTZA BA BDEN 'DZIN GYI NYON MONGS PA CHOD PAR MDZOD LA STE GCOD PA'I DON DU, RNAL 'BYOR DON DAM PA'I RGYAL PO BDE STONG DBYER MED PA'I YE SHES DE NYID BDAG LA 'GRUB PAR TE SKYED PAR MDZOD CIG CES BA'O GSUNG NGO, ,DE NAS GTZO BOS NANG LUS KYI DKYIL 'KHOR GYI LHA LA GSOL BA 'DEBS PA'I TSIGS BCAD KYI DON NI, DE BZHIN GSHEGS PA KUN GYI BZHUGS GNAS DANG, DPAL HE RU KA'I LHA TSOGS KYI GRONG KHYER MCHOG YIN PAS, GNAS DANG GRONG KHYER RNAMS KYI SNYING PO STE GTZO BOR GYUR PA'I DKYIL 'KHOR 'DI RU BDAG GIS SLOB MA 'DI
, ,GZHUG PAR BGYI BAS GZHUG TU STZOL CIG ,CES PA STE DE LTAR GSOL BA BTAB PAS GNANG BA BYIN PAR BSAM, SNGAGS SDOM 'DZIN PAR GDAMS PA'I TSIGS BCAD KYI DON NI, BYANG SEMS KYI SNGON PA NI SO THAR GYI SDOM PA LAS GONG MAR GYUR PA YIN ZHING, DE LAS KYANG GONG MAR GYUR PA'I SDOM PA SNGAGS SDOM YIN LA DE 'DRA'I SDOM PA MCHOG 'DI NI KHYOD KYIS BZUNG NAS BSRUNG BAR BYA DGOS TE, SGRIB GNYIS BAG CHAGS DANG BCAS PA LAS SNYIGS DUS KYI SKYE BA BCU DRUG TSUN LA GROL BAR 'GYUR BA'I RGYU NI DE TSUL BZHIN DU SRUNG BA LA YOD KYI, DE LAS GZHAN MI SRUNG BA LA CI YENG YOD PA MA YIN PA'I PHYIR RO, ,ZHES PA'O, ,DE NAS SNGAGS SDOM 'DZIN PA'I YUL SNGAR LTAR GSAL BTAB LA RIGS LNGA SPYI DANG BYE BRAG GI SDOM PA THAMS CAD BZUNG NGO SNYAM PAS CHO GA RJES SU ZLOS PAR MOS, BYE BRAG TU DAM TSIG NYER GNYIS 'DZIN PA'I TSIGS BCAD KYI DON NI, SHU LO KA DANG POS SKYABS 'GRO, GNYIS PAS DGONGS GSOL, GSUM PAS BDAG DUS 'DI NAS BZUNG STE JI SRID SRID ZHI'I MTHA' GNYIS SU MED PA'I GO 'PHANG LA GNAS KYI BAR DU, DE'I TSANGS SPYOD GNYIS SU MED PA NYI SHU RTZA GNYIS LEGS PAR BSRUNG NGO, ,ZHES DAM BCA' PA BSTAN NO, ,DE NAS SBYANG BA'I SKABS SU BGEGS SDIG DRI MA GSUM DAG PAR BSAM, DE NAS DBANG BSKUR BA LA DKYIL 'KHOR DU 'JUG PA SNGON DU 'GRO DGOS PAR GSUNGS PA NI LHA DE DAG GI GSANG BA'I GTAM KHYAD PAR
CAN BSHAD PA'I SNOD DU RUNG BA LA LHA DE DAG GI NANG DU CHUD PA CIG DGOS PA YIN LA, DKYIL 'KHOR DU 'JUG PA DNGOS GZHI'I DOD DU 'DIR BYIN RLABS 'DI BYED PA YIN ZHING DE'I TSE GTZO BOS SPYAN DRANGS PA'I YE SHES PA A'A LI K'A LI'I RNAM PAS RANG GI LUS KYI CHA GSUM LA THIM PA DANG MNYAM DU GTZO BO'I THUGS KHA NAS KYANG A'A LI K'A LI'I RNAM PA CAN SPROS TE RANG GI LUS KYI CHA GSUM NAS ZHUGS TE, SNYING KHA'I HE RU KA LA THIM PAS BYIN GYIS BRLABS SHING, RANG LHA RNAMS DANG SKAL BA MNYAM PAR SONG BAR BSAM MO GSUNG NGO, , DE NAS PHAN YON GYI SGO NAS DAM LA BZHAG PA'I TSIG GI DON NI, SNGAGS RIM LAS, DKYIL 'KHOR DU ZHUGS PA NYID DE BZHIN GSHEGS PA THAMS CAD KYI SA BON DU GYUR PAS NA DE DAG GI RIGS SU ZHUGS PA'O, ,RDO RJE YE SHES NI DUS GSUM SHES PA'I LHA'I YE SHES 'CHAD PAR 'GYUR BA LTAR PHAB PAS SKYE BA STE DE BSKYED PAR BYAS ZHES PA 'AM BYA YI ZHES PA'O, ,YE SHES DE BSKYED PA'I PHAN YON NI YE SHES GANG GIS ZHES SOGS KYIS STON TE MCHOG DANG THUN MONG 'GRUB PA'O, ,DKYIL 'KHOR MTHONG BA NI CHO GA JI LTA BA BZHIN DU BCUG NAS LHA NGO BSTAN PA YIN PAS DE MIN PA NI DKYIL 'KHOR MA MTHONG BA'O, ,MAN 'CHU BLUNG PA LA SOGS PAS DAM TSIG CAN DU BYAS SHING MNA'I SNYING PO BYIN PA LAS 'DAS NA DAM TSIG NYAMS TE 'DIR NAD DANG PHYI MAR NGAN 'GROR 'GRO BA'I SDUG BSNGAL 'THOB PA LA SH'AKYA BSHES GNYEN GYIS BSHAD DO, ,ZHES GSUNGS PA LTAR RO, ,NYES DMIGS KYI SGO NAS DAM LA BZHAG PA'I TSIG BCAD
, ,DANG POS, KHYOD KYIS DAM TSIG RDO RJE 'DI ZHES PA, SNGAGS RIM LAS, GSANG BA MI BSGRAGS PA 'DI NI KHYOD KYIS 'DAR MI RUNG BA'I DAM TSIG YIN GYIS ZHES PA DE YANG MI PHYED PAS NA RDO RJE ZHES BYA YI MGOR BZHAG PA'I RDO RJE LA MI BYA'O, ,ZHES PA LTAR RO, ,GNYIS PAS KHYOD KYI SNYING LA YANG DAG ZHUGS ZHES PA GONG DU BYIN RLABS KYI TSE ZHUGS PA LA BYA'O, ,PHAN YON NYES DMIGS GNYIS KA'I SGO NAS DAM LA BZHAG PA'I TSIG GI DON NI SLA LA, SNGAGS DON NI BDUD RTZI LNGA'I CHU ZHES BA'O, ,BLA MA'I BKA' NYAN PA'I DAM GZHAG BYED PA'I TSIGS DON GZHAN SLA LA, YANG BA MA SPANGS PAR ZHES PA LA SNGAGS RIM LAS, DE NYID BSDUS PAR MI BDE BA MA SPANGS PAR ZHES 'BYUNG LA DE'I SKABS GZHAN DU DE NYID SNANG BA LAS GNOD PA'AM MI BDE BA NI RGYAL BA'I BKA' LAS 'DAS PA LA BSHAD KYANG 'DIR BLA MA LA BRNYES PAR MA BYED CIG CES BSGO BA LAS 'DAS PA'O, ,DE MA SPANGS PAS LO BRGYA THUB PA YANG TSE MA RDZOGS PAR DUS DE NYID DAM GZHAN DU MYUR BAR DUS BYAS NAS DMYAL BAR LTUNG NGO ZHES BSHAD PA LTAR RO, ,DES NA YANG BA MA SPANGS PAS ZHES 'BYUNG BA DAG PA YIN NO, ,ZHES GSUNG PA LTAR RO GSUNG, DE YANG SNGAGS RIM LAS, DAM GZHAG SNGA MA RNAMS KYIS DAM LA BZHAG PA DE MA BRTAN GYIS DOGS NAS BKA' NYAN PA'I DAM GZHAG 'DI MDZAD DO, ,DE LTAR NA MAN 'CHU BLUD PA'I DAM GZHAG NI RTZA BA DANG YAN LAG SPYI'I DAM GZHAG YIN LA LHAG MA KHYAD PAR PA'I DAM GZHAG GO ;DE YANG SNOD MIN LA GSAR BA SGROG PA DANG BLA MA LA BRNYES SHING BKA' LAS 'DAS PA DNGOS GRUB 'PHROG PA'I NYES DMIGS CHE BAR DGONGS NAS RTZA LTUNG DANG PO DANG BDUN PA BSRUNG BA LA KHYAD PAR BA'I
DAM GZHAG NAN CHER MDZAD DO, ,ZHES GSUNG PA LTAR YIN PAS 'DI RNAMS DRAN PAR BYAS NAS DAM TSIG BSRUNG BA LA BRTZON PA GAL CHE GSUNG NGO, ,DE NAS YE SHES 'BEBS SNGAGS AOm SHRI HE RU KA SOGS KYI SNGAGS DON NI, AOm DPAL KHRAG 'THUNG RIG PA CHEN PO RIG PA'I RGYAL PO BLO CHEN PO LA GZHI TSUG ,CES PA YIN LA YE SHES 'BEBS PA YANG LHA RNAMS DANG SKAL PA MNYAM PAR BYED PA STE NANG GI SKAL MNYAM MO, ,DE NAS ME TOG 'PHRENG BA'I DBANG GI ,PRA TI GRI HNA SOGS KYI SNGAGS DON NI, SEMS DPA' STOBS PO CHE ZHES LHA LA BOS NAS SLOB MA 'DI BYANG CHUB MA THOB KYI BAR DU RJES SU BZUNG SHIG CES PA STE, DE'I TSE RANG GI MGOR ME TOG 'PHRENG BA BZHAG PA DE LAS BDUD RTZI 'OD ZER GYI RGYUN BABS TE, LUS THAMS CAD GANG, DRI MA THAMS CAD DAG ,ME TOG PHOG PA'I LHAS BYANG CHUB MA THOB KYI BAR DU RJES SU 'DZIN PA'I NUS PA BZHAG BYUNG SNYAM DU BSAM GSUNG NGO, ,DE NAS SPYAN 'BYED PA'I TSIGS BCAD KYI DON NI, DENG DPAL HE RU KAS KHYOD KYI MIG 'BYED PAR MDZAD KYI, PHYE NAS NI THAMS CAD MTHONG BAR 'GYUR PA'I GZUGS CAN THAMS CAD LA THOGS PA MED PA'I RDO RJE'I MIG BLA NA MED PA SANGS RGYAS KYI SPYAN DANG 'DRA BAR 'GYUR RO ZHES PA DANG, SNGAGS DON NI, RDO RJE'I MIG GI SGRIB GA-YOG SOL CIG ,CES PA YIN CING, DE'I TSE SNYING KHA'I H'Um GI 'OD ZER DBRAL BA'I RAm LA PHOG ,RAm LAS YE SHES KYI ME 'BAR BA MIG GI AOm LA PHOG NAS SDIG SGRIBS BSREG ,
, ,AOm GYI 'OD ZER BSGRUB PA'I DKYIL 'KHOR BA DANG PHYOGS BCU'I SANGS RGYAS SRAS BCAS KYI SPYAN LA PHOG TE DBYER MED DU GYUR PA SLAR RANG GI MIG GI AOm YIG LA 'DUS, AOm YIG 'ONG DU MER GYIS ZHU BA MIG DBANG DANG DBYER MED DU GYUR BAS MIG RDO RJE'I SPYAN GYI RANG BZHIN DU GYUR PAR BSAM STE 'DI DZA YA SE NAS, DE NAS MIG GNYIS ZLA BA LA, AOm MO SNYING KHAR ZLA BA LA, BDAG PO YANG DAG DMIGS BYAS NAS, ,DE YI MIG BLTAS 'OD RNAMS KYIS, ,DKYIL 'KHOR KYI NI LHA RNAMS KYI; ;SPYAN DANG DBYER MED RANG BZHIN DU, ,YANG DAG DMIGS NAS DE NAS SBYIN, ,MIG GNYIS LA NI LEGS BSDUS TE, ,ZHES PA'I DON LTAR MAN NGAG GIS KHA BSKANG BA'I GSUNG NGO, ,DE NAS LUS KYI DKYIL 'KHOR DANG STON PA'I TSIGS BCAD KYI SHU LO KA DANG POS, DPA' BO DANG DPA' MO RNAMS KYI GNAS LUS RTEN GYI DKYIL 'KHOR DU BSKYED PA DANG, PHYI MA GNYIS KYIS GNAS DANG NYE BA'I GNAS LA SOGS PA BCU'I BDAG NYID KYI RTZA DANG KHAMS BYANG PHYOGS SO BDUN GYI NGO BO'I LHA SO BDUN DU BSGRUB PA'I RTEN PA'I DKYIL 'KHOR LA LTOS ZHES PA STE, DE'I TSE DKYIL 'KHOR GNYIS BLO'I YUL DU MNGON GSUM DU SNANG BAR BSAM MO, ,DE LTAR DKYIL 'KHOR GYI LHA NGO BSTAN PA'I SGO NAS MTHONG BA LA BRTEN NAS, JI SKAD DU SKAL PA BYE BA DU MA RU, ,SNGON CHAD SDIG PA GANG BYAS PA, ,DKYIL 'KHOR 'DI 'DRA MTHONG BA
YIS, ,DE DAG THAMS CAD ZAD 'GYUR NA, ,ZHES GSUNG PA LTAR SDIG PA 'DAG PA SOGS PHAN YON CHEN PO 'THOB PAS DGA' BA BSGOM DGOS GSUNG NGO, , DE NAS CHU DBANG GI SKABS KYI RDO RJE CAN GYI SANGS RGYAS LA SOGS KYI DON NI, RDO RJE CAN TE RDO RJE 'CHANG GIS SANGS RGYAS MI BSKYOD PA SOGS LA DBANG JI LTAR BSTZAL PA DE LTAR KHYED RNAMS KYIS BDAG GI SLOB MA 'DI LA'ANG BSTZAL DU GSOL, ZHES PA DANG, DBANG BSKUR RDO RJE CHEN PO NI, SOGS KYI DON NI, SNGAGS RIM LAS, SBYIN PAR BYA'O ZHES DRANG NGO, GANG GI MDUN DU NA SANGS RGYAS KUN GYI SPYAN SNGAR RO, ,GANG NA DBANG SKUR BA'O, ,DE'I KHYAD PAR LA CHEN PO NI KHAMS GSUM GYI RGYAL POR RAB TU BZHUGS PA STE DE'I PHYIR KHAMS GSUM PA YIS PHYAG BYAS PA'O, ,DE NGAS KHYOD LA SBYIN GYI KHYOD KYIS KYANG 'DI LA NAN TAN DU BYA'O ZHES SLOB MA LA DBUGS 'BYIN PA'O, ,RDO RJE NI 'DOR DU MI RUNG BA'O, ,RDO RJE GSANG BA GSUM DBYER MI PHYED PA NI RDO RJE 'CHANG YIN LA DE LAS BYUNG BA NI DE'I RIGS LAS SKYES PA LA LE'U BCU DRUG PA'I SGRON GSAL LAS BSHAD DO, ,ZHES GSUNG PA LTAR RO, ,SNGAGS DON NI, TZA KRA 'KHOR LO, B'I RA DPA' BO, ,STVAm KHYOD, AA BHI shI NYTZA NI DBANG BSKUR BA STE DPA' BO'I 'KHOR LOS KHYOD LA DBANG BSKUR RO ZHES PAR 'GYUR RO, ,DE'I TSE BSGRUB PA'I DBANG BUM DE BUM PA DPAG TU MED PAR
, ,GYUR PA SPYAN DRANGS PA'I DBANG LHA RNAMS KYIS BZUNG NAS CHU RUB KYI TSUL DU RANG GI SPYI BO NAS DBANG BSKUR BAS BDUD RTZI'I CHUS LUS THAMS CAD MER GYIS GANG, THOGS MED NAS BSAGS PA'I SDIG SGRIB THAMS CAD DBANG PO'I SGO DANG BA SPU'I BU GA THAMS CAD NAS DUD KHU DANG SOL KHU'I RNAM PAS NAG NYIL GYIS THON, YID BDE BA CHEN PO'I RANG BZHIN DU GYUR, BDE BA DE DANG STONG PA SBYAR BA'I BDE STONG GI YE SHES, RANG ME TOG PHOG PA'I LHA'I RIGS SU SANGS RGYA BA LA GEGS BYED KYI DRI MA 'KHRUD PA'I NUS PA, 'BRAS DUS KYI CHOS DBYINGS YE SHES MNGON DU BYED PA'I NUS PA, MI SKYOD PA DANG DE'I RIGS KYI CHA DNGOS GRUB SGRUB PA LA DBANG BA'I NUS PA SOGS NUS PA KHYAD PAR CAN RNAMS NI SKABS 'DI'I DBANG GI NGO BO YIN LA, DE RNAMS RANG RGYUD LA SKYES BYUNG SNYAM DU BSAM STE, RDO RJE SNYING PO RGYAN GYI RGYUD LAS, TIL GYI GANG BU LTAR GANG BA'I, ,RGYAL BA BUM PA 'DZIN PA YIS, ,DE RING KHYOD LA DBANG BSKUR TE, ,DE LTAR SHES NAS YID BDER GYIS, ,ZHES DANG, SGRON GSAL MTSAN DANG BCAS PA LAS, SNGAR NANG DU RNAM SNANG SOGS BSKYED PA'I BUM PA RNAMS DAM TSIG GI MCHOG RNAMS KYI TE SPYAN MA LA SOGS PAS BZUNG BAR MKHAS PA STE SLOB DPON GYIS BSGOM PAR BYA'O, , ZHES DANG, SNGAGS RIM LAS, DE LTAR DBANG BSKUR BA'I DUS SU BDE BA PHUN SUM TSOGS PA BYUNG BAR BSAM MO, ,ZHES DANG, NGO BO NI CHU DBANG LA MTSON
NA DBANG BSKUR SA MI SKYOD PAR BSKYED CING DBANG RDZAS MI BSKYOD PA ZHU BA'I CHU SA BSKUR TSUL SPYI BOR GTOR PA SOGS KYIS BYED PA DANG, BSGRUB PA'I DKYIL 'KHOR BA'I LHA CHU DBANG BSKUR BA LA DGONGS PA GTAD PA RNAMS DANG, GSAR DU SPYAN DRANGS PA'I DBANG LHA MI BSKYOD PAS GTZO MDZAD PA RNAMS LA GSOL BA BTAB NAS, DNGOS SU BLA MAS BSKUR BA'I MDZAD PA LA BRTEN NAS SLOB MA DE'I RGYUD LA, RNAMS SHES KYI PHUNG PO DANG ZHE SDANG SBYONG BA DANG, CHOS DBYINGS YE SHES MNGON DU BYED PA DANG, MI BSKYOD PA'I SGO NAS BSGOM BZLAS DANG, DNGOS GRUB 'GRUB PA LA DBANG BA'I NUS PA KHYAD PAR BA ZHIG BSGOS PA LA CHU DBANG ZHES BYA STE GZHAN BZHI DANG ME TOG 'PHRENG BA'I DBANG LA YANG DE'I RIGS PA SBYAR RO, ,ZHES DANG, RGYUD SDE SPYI RNAMS LAS, BUM DBANG RNAMS KYI NGO BO NI CHU DANG COD PAN SOGS KYI RANG RANG GI CHO GAS DBANG BSKUR BA'I TSE DBANG PO RNON PO LA BDE BA DNGOS SU SKYE BA 'OD BAS, DE DANG STONG NYID KYI LTA BA PHU THAG CHOD PA GNYIS SBYAR BA'I BDE STONG GI YE SHES NYID LA BYED CING, DE MIN NA'ANG DE'I TSE BDE BA SKYES PA'I MOS PA BYAS PA DANG, LTA BA DRAN PA'I BDE STONG MOS PA YID BYED KYI IDRAN PA DANG, RDO RJE SLOB DPON GYI DBANG GI NGO BO YANG DNGOS DANG BSGOM PA'I RIG MA GANG RUNG DANG RANG NYID RDO RJE 'CHANG DU GSAL BA GNYIS 'KHYUD PA LAS BYUNG BA'I BDE BA DANG, LTA BA DRAN NAS BDE STONG GI YE SHES SKYES PA'I MOS PA BYED PA MA MTHA' YANG DGOS KYI, DE LTA BU MA YIN NA DBANG DE LTA
, ,BU THOB PAR BZHAG MI NUS SO, ,ZHES GSUNGS PA RNAMS KYI MAN NGAG GO GSUNG, DAG PA'I SKABS KYI, SBYANGS, BSGYUR, BYAS ZHES PA RNAMS, SBYANG SGYUR BYED PA'I NUS PA BZHAG PA LA GO BAR BYA ZHING DMIGS PA 'DI DAG CI RIGS PAR 'OG MA RNAMS LA'ANG SBYAR BAR BYA'O, ,COD PAN GYI DBANG GI NGO BO NI SKABS 'DI'I DBANG BSKUR, BA'I RGYU TSOGS LA BRTEN NAS BYUNG BA'I BDE STONG GI YE SHES, RANG SANGS RGYAS PA'I SANGS RGYAS KYI RIGS BDAG 'GRUB PA'I NUS PA, DBU'I GTZUG TOR BLTAR MI MNGON PA BSGRUB PA'I NUS PA, NGAG PA'I SKABS NAS 'BYUNG BA LTAR GYI NUS PA RNAMS DE YIN NO, ,RDO RJE'I DBANG GI SKABS KYI TSIGS BCAD LA, ,SNGAGS RIM LAS, SANGS RGYAS RNAMS KYIS RDO RJE YI, ,DBANG GIS DE RING KHYOD DBANG BSKUR, ,'DI DE SANGS RGYAS THAMS CAD NYID, ,RDO RJE RAB TU GRUB PHYIR ZUNG, ,ZHES PA'I DON DE NYID SNANG BA LAS BSHAD PA LTAR BKOD DE, DE NYID LAS, DE NYID SNANG BA LAS NI TSIGS BCAD DE'I DON 'DI LTAR BSHAD DE SANGS RGYAS RNAMS KYIS DE RING KHYOD LA RDO RJE'I DBANG BSKUR BAS RDO RJE 'DI NI KHYOD KYIS LONGS SHIG PA STE ZUNGS SHIG ,BYANG CHUB SEMS GANG DE RDO RJE, SHES RAB DRIL BU ZHES BSHAD DO, ,ZHES GSUNG PAS RDO RJE'I DBANG BSKUR BAS NI RDO RJE YE SHES KYI DBANG BSKUR BA GSUNGS PA YIN NO, ,RDO RJE'I DBANG BSKUR BA 'DI NI STONG PA NYID DANG DBYER MED PA'I BYANG CHUB KYI SEMS KYI RANG BZHIN YIN PAS SANGS RGYAS THAMS CAD KYI YIN
NO; ;DE BLANG BAR BYA BA'I RGYU MTSAN NI GANG GI PHYIR RDO RJE 'DI NI SANGS RGYAS THAMS CAD KYI NGO BO NYID YIN PAS DE RAB TU GRUB PA STE THOB PAR BYA BA'I PHYIR KHYOD KYIS LONGS ZHES PA'O, ,ZHES 'BYUNG NGO, ,'DIR DON THOB KYI DBANG DU BYAS NA, DPA' BO CHEN PO DPAL HE RU KA SOGS KYIS DANG KHYOD LA SANGS RGYAS THAMS CAD KYI THUGS GNYIS SU MED PA'I YE SHES KYI BDAG POR DBANG BSKUR BAR 'GYUR RO, ,MTSON BYED RTAGS KYI RDO RJE 'DI NI SANGS RGYAS THAMS CAD KYI THUGS BDE STONG GNYIS SU MED PA'I YE SHES MTSON BYA DON GYI RDO RJE DE MTSON BYED YIN PAS, MTSON BYA'I RDO RJE DE 'GRUB PA'I PHYIR DU MTSON BYED KYI RDO RJE 'DI MI 'BRAL BAR ZUNG CES PA'O GSUNG, DBANG GI NGO BO NI 'DI'I DBANG BSKUR BA'I RGYU TSOGS LA BRTEN NAS THOB PA'I BDE STONG GI YE SHES, RANG SANGS RGYAS PA'I SANGS RGYAS KYI THUGS GNYIS SU MED PA'I YE SHES 'GRUB PA'I NUS PA, DAG PA'I SKABS NAS 'BYUNG BA LTAR GYI NUS PA RNAMS DE YIN NO, ,DRIL BU'I DBANG GI SKABS KYI TSIGS BCAD DANG PO LA, SNGAGS RIM LAS, RKANG PA PHYI MA GSUM 'DRA ZHING DANG PO 'DI DE SANGS RGYAS THAMS CAD KYI ZHES 'BYUNG BA'I DON 'CHAD PA NA, DE NYID LAS, JI LTAR SANGS RGYAS THAMS CAD KYI BYANG CHUB CHEN PO'I NGO BO NYID SHES RAB NI STONG PA NYID LA DMIGS PA YIN LA DE NI RANG GI DANG GIS LHUN GYIS GRUB PAR DBYANGS KYI SGRA SNA TSOGS KYIS GZHAN LA CHOS STON PAR BYED DE DRIL BU 'DI YANG 'DI DANG 'DRA STE DBYANGS
, ,KYI RJES SU 'GRO BA'I SHES RAB NYID STON PA'O, ,SHES RAB DBYANGS KYI RJES 'GRO ZHES PA'I 'GYUR BA DE'O, ,DE BAS NA RGYAL BA RNAMS KYIS DE NYID BYANG CHUB MCHOG TU YANG BZHED DO, ,KHYOD KYIS KYANG RTAG TU ZUNGS SHIG CES PA STE SHANTI PA LA SOGS PA'I BSHAD PA'O, ,ZHES SO, ,'DIR DON THOB KYI DBANG DU BYAS NA, DRIL BU 'DI NI DPA' BO DANG RNAL 'BYOR MA KUN GYI DBYANGS KYI SGRA SNA TSOGS GYIS CHOS STON PA'I RJES SU 'GRO BA'I SHES RAB DES DON GYI DRIL BU DE MTSON BYED YIN PAS MTSON BYA NGES DON GYI DRIL BU DE 'GRUB PA'I PHYIR DU MTSON BYED RTAGS KYI DRIL BU ZUNGS SHIG CES PA'O GSUNG, PHYI MA'I DON DBANG TSOG NAS 'BYUNG BA LTAR RO, ,DBANG GI NGO BO NI SKABS 'DI'I DBANG BSKUR BA'I RGYU TSOGS LA BRTEN NAS THOB PA'I BDE STONG GI YE SHES, RANG SANGS RGYAS PA'I SANGS RGYAS KYI CHOS PHUNG BRGYAD KHRI BZHI STONG SGROGS PA'I GSUNG 'GRUB PA'I NUS PA, DAG PA'I SKABS NAS 'BYUNG BA LTAR GYI NUS PA RNAMS DE YIN NO, ,MING DBANG GI SKABS KYI SNGAGS DON NI, RDO RJE SEMS DPAS KHYOD LA DBANG BSKUR BAR BGYI'O, ,GANG NA RDO RJE'I MING GI DBANG BSKUR BA'O, ,ZHES PA'O, ,DBANG GI NGO BO NI SKABS 'DI'I DBANG BSKUR BA'I RGYU TSOGS LA BRTEN NAS THOB PA'I BDE STONG GI YE SHES, RANG SANGS RGYAS PA'I SANGS RGYAS KYI MTSAN 'GRUB PA'I NUS PA, DAG PA'I SKABS NAS 'BYUNG BA LTAR GYI NUS PA RNAMS DE YIN NO, ,DE LTAR
DBANG LNGA NI SANGS RGYAS LNGA 'GRUB PA'I GEGS KYI DRI MA 'DAGS PAR BYED PA DANG, MA RIG PA DANG BRAL BA LAS RIG PA YE SHES LNGA 'GRUB PA'I NUS PA KHYAD PAR 'JOG PAS RIG PA'I DBANG STE, DBANG BSKUR LNGA THOB RGYU LAS NI, ,SANGS RGYAS LNGA PO 'DI RNAM DAG ,MA RIG PA DANG BRAL BA LAS, ,YE SHES LNGA NI THOB PAR BYED, ,CES SO,, SNGAGS DBANG GI TSIGS BCAD KYI DON NI, SNGAGS 'DI NI SANGS RGYAS THAMS CAD KYI NGES DON GYI SNYING PO BDE STONG GNYIS SU MED PA'I YE SHES MCHOG SANGS RGYAS THAMS CAD BSDUS PA'I NGO BOR GYUR PA DE MTSON BYED YIN PAS NGES DON GYI SNYING PO DE 'GRUB PA'I PHYIR DU DRANG DON GYI SNYING PO 'DI ZUNGS SHIG CES PA'O, ,DBANG GI NGO BO NI 'DI'I RGYU TSOGS LA BRTEN NAS THOB PA'I SNGAGS BZLAS PA LA BRTEN NAS BAR DU GCOD PA'I GEGS MED PAR BYED PA'I NUS PA, ZHI RGYAS DBANG DRAG GI DNGOS GRUB 'GRUB PA'I NUS PA, DON DAM PA'I SNGAGS GNYIS SU MED PA'I YE SHES KYI DNGOS GRUB KYI ZHING STE SNOD DAG PAR BYED PA'I NUS PA RNAMS DE YIN NO, ,RDO RJE'I RTUL SHUGS KYI DBANG GI TSIGS BCAD LA, SNGAGS RIM LAS, GZHAN RNAMS 'DRA BA LA HE RU KA DPAL ZHES PA'I DOD DU RDO RJE SEMS DPA' ZHES 'BYUNG BA'I DON 'CHAD PA NA, 'DI ZHES PA NI RANG GI LAG NA GNAS PA'O, ,DE ZHES PA NI BYANG CHUB SEMS GANG DE RDO RJE ZHES BYA BA'I RDO RJE'O, ,DE CI ZHIG YIN CE NA SANGS RGYAS LNGA PO THAMS CAD KYI RANG BZHIN NO, ,GANG GI PHYIR
, ,SANGS RGYAS THAMS CAD KYI RANG BZHIN GYI RDO RJE 'DI RDOR SEMS KYI LAG NA 'DUG PA YIN LA, DE BAS NA DE THOB PAR BYA BA'I PHYIR KHYOD KYIS KYANG RTAG TU BCAD PAR BYA'O, , 'DI GANG GI RTUL SHUGS YIN SNYAM NA, PHYAG NA RDO RJE'I RDUL SHUGS TE, DE YANG GZHAN GYI MI PHYED PAS NA BRTAN PA'O, ,RTUL SHUGS KYI DON NI DE BZHIN GSHEGS PA THAMS CAD KYI DNGOS GRUB KYI DON DU NGES PAR BYA BA STE, RDO RJE YONGS SU MI 'DOR PA'O, ,ZHES DE NYID SNANG BA LAS BSHAD DO, ,DON THOBS KYI DBANG DU BYAS NA RDOR SEMS THOB PA'I THABS SU YE SHES LNGA'I NANG GI RDO RJE DE MA BRAL BAR CHONGS SHIG ,CES GO BAR BYED PA'O, ,SNGAGS DON NI, DE BZHIN GSHEGS PA THAMS CAD KYI GRUB PA'I RDO RJE'I DAM TSIG 'DI BDAG LA BZHUGS SHIG ,BZUNG BAR BGYI'O ZHES PA'O, ,SPYOD PA'I RTUL SHUGS KYI DBANG GI TSIGS BCAD KYI SHU LO KA DANG PO LA, SNGAGS RIM LAS, RDO RJE SEMS DPA'I PHYAG RGYA 'DI, ,PHYI DANG NANG NA YANG DAG GNAS; ,DES NA KHA tV'Am CANG TE'U SNOD, ,BYIN PA DPA' BOS BZUNG BAR GYIS, ,ZHES 'BYUNG BA'I DON 'CHAD PA NA, RDOR SEMS KYI PHYAG RGYA THOD PA SOGS 'DI RNAMS LA PHYI NANG GNYIS KYI PHYAG RGYA YOD PAS DE DRAN BYED DU BCANGS DGOS PA DES NA ZHES SBYAR RO, ,ZHES GSUNG ZHING PHYI NANG GI PHYAG RGYA GNYIS NI, DE NYID LAS, DE LA SPYOD PA DANG PO NI NANG GI PHYAG RGYA GSUM LA SBYOR BA LHUR BYED PA STE DE LTAR YANG, KHA tV'Am GA NI LHA YI SKU, ,CANG TE'U SHES RAB TU NI BRTAGS, ,CES KUN SPYOD LAS GSUNG PA DANG, ,SNGAGS NI BTUNG BA'I THOD PA'O, ,ZHES SO,,
LHA'I SKU NA LUS DANG AA NA HA TA STE GZHOMS DU MED PA'I NGO BO GTUM MO'I SGRA'AM N'A DA DANG GNYIS SU MED PA'I BDE CHEN NYAMS SU MYONG BA'I RTEN KUN RDZOBS BYANG CHUB KYI SEMS TE DE LTAR GSUM MTSON PAR BYED PA STE, RANG GI LUS LHA'I SKUR BYAS PA DANG GTUM MO'I ME DANG BDE BA'I RTEN DU KUN TA LTA BU STON PA NI NANG GI PHYAG RGYA'O, ,ZHES DANG, DANG POS YAB DANG GNYIS PAS SHES RAB DANG GSUM PAS BZLAS BYA'I SNGAGS BSTAN PA NI, PHYI'I PHYAG RGYA'O, ,ZHES 'BYUNG NGO, ,MDOR NA GONG DU BSHAD PA'I PHYI NANG GI PHYAG RGYA GNYIS PO DE LA SBYOR BA LHUR LEN DGOS PA DE DRAN PA'I PHYIR DU, DE MTSON BYED KYI MTSAN MA GSUM PO BCANG BAR GYIS ZHES GO BAR BYED PA'O, ,LUNG STAN GYI DBANG GI TSIGS BCAD KYI DON NI SLA LA, SNGAGS DON NI, KHYOD SA 'OG SA STENG MTHO RIS TE KHAMS GSUM GYI RANG BZHIN GYI DE KHO NA NYID SA RAB TU DGA' BA LA SOGS PA'I RIM PAS RTOGS PAR NUS PA NYID KYIS DE BZHIN GSHEGS PA THAMS CAD KYI NGO BO MKHA' 'GRO MA'I GTZO BO DPAL THOD KHRAG LA ROL PA ZHES BYA BAR GRUB PA'O, ,ZHES PA'O, ,'DI'I SKABS SU SA RA HA SA, ,DE TSE HE RU KA DPAL DANG, ,MKHA' 'GRO MA DANG BLA MAR BCAS, ,MGRIN GCIG LUNG STON BSAM PAR BYA, ,ZHES DANG, SNGAGS RIM LAS, LUNG STAN GYI DON NI KHAMS GSUM DBYER MI PHYED PA'I CHOS NYID RTOGS PAR NUS PA KHYOD YIN NO ZHES GZENG BSTOD PA'I DON DU LUNG STAN PA'O; ;ZHES GSUNG PA LTAR GO BAR BYA DGOS GSUNG, RDO RJE SLOB DPON GYI DBANG GI GSOL 'DEBS KYI DON NI, PHYIR MI LDOG PA'I DBANG DANG 'DRA BA'I RDO RJE SLOB DPON GYI DBANG BSKUR
, ,BA CHEN PO DPA' BO CHEN PO RDO RJE SLOB DPON GYIS BDAG LA STZOL CIG ,GANG GIS 'GRO BA RNAMS MTSAN MA MED PA MI GNAS PA'I MYA NGAN LAS 'DAS PA'I GO 'PHANG MNGON DU BYED PAR NUS PA'I RGYU'I GTZO BOR GYUR PA'I DBANG BSKUR BA DE NI DA LTA NYID DU STZOL BAR MDZAD DU GSOL, ZHES PA'O, ,GSUNG RDO RJE'I DAM TSIG SBYIN PA'I TSIGS BCAD KYI DON NI, SEMS DPA' NI THOG MTHA' MED PA'I SEMS KYI RGYUN RANG BZHIN GYIS DAG PA'I DE BZHIN NYID DANG RO GCIG PA'I RNAM PAR MI RTOGS PA'I YE SHES BYANG CHUB KYI SEMS TE DE NI RDO RJE SEMS DPA' DGA' BA CHE BA'I RANG BZHIN NO, ,BZANG PO NI DGE BA YIN LA KUN NI MA LUS PA TE, 'DI LAS DE RNAMS BYUNG BA'O, ,CHOS KYI DBYINGS NI CHOS THAMS CAD KYI MTSAN NYID DAM RANG BZHIN YIN PAS KUN GYI BDAG NYID DO, ,GANG LA DMIGS NAS LHA'I SKU PHYAG RGYA CHEN PO SKYE BA'I RGYU CHOS KYI DBYINGS LA RDO RJE SNYEMS TSUL BDAG PO'I BDAG SANGS RGYAS THAMS CAD KYI SPRUL GZHI BCOM LDAN 'DAS DPAL MCHOG DANG PO'I SKYES BU ZHES 'BRAS BU RDO RJE 'CHANG GI MING GIS BTAGS NAS BSTAN PA'O ZHES DBANG BSHAD KHA CIG LAS 'BYUNG NGO, ,DRIL BU'I DAM TSIG SBYIN PA'I TSIGS BCAD KYI DON LA, SNGAGS RIM LAS, SRID PA NGO BO NYID KYIS DAG ,NGO BO NYID KYIS SRID 'GAL BYAS, ,RANG BZHIN DAG MCHOG SEMS DPA' YIS, ,DAM PA'I SRID PA BYED PAR 'GYUR, ,ZHES PA'I DON 'CHAD PA'I TSE, SRID PA NI 'KHOR BAR SKYE BA'I RGYUN NO, ,DE NI NGO BO NYID KYIS DAG STE RANG BZHIN GYIS YONGS SU DAG PA'O, ,'ON KYANG BDOG TU
SGRO BTAGS PA'I NGO BO NYID KYIS 'GAL BA'I SRID PAR BYAS PA STE GNOD PA MED PA LAS GNOD PA CAN DU BYAS PA'O, ,SHINTA PA DANG AA BHYA GNYIS KAS 'GAL BA'I SRID PAR BYAS PA'I 'BRU NON MDZAD LA DPAL MCHOG 'GREL PAR SRID BRAL BYAS ZHES PA LA 'BRU MNAN NA, SEMS DPA' MCHOG NI BYANG CHUB SEMS DPA' STE DE RNAMS KYIS SRID PA'I MCHOG GAM DAM PA'I SRID PA MDZAD PAR 'GYUR ZHES SBYAR RO, ,JI LTA BUS MDZAD NA RANG BZHIN DAG PAS ZHES TE DE LA MI BDEN PA'I ZHEN PA ZAD PAR MDZAD NAS MI GNAS PA'I MYANG 'DAS KYI RANG BZHIN DU RTOGS PAR MDZAD PA'O, , ZHES KUN SNYING DANG SHINTA PAS BSHAD DO, ,ZHES 'BYUNG NGO, ,PHYAG RGYA'I DAM TSIG SBYIN PA'I TSIGS BCAD KYI DON NI, YID KYI LUS YE SHES KYI PHYAG RGYA'I RNAM PA BRTAN PA NYID PHYAG RGYA'I DAM TSIG TU BRJOD DO, ,SGRUB PA PO GANG GIS YE SHES KYI PHYAG RGYA'I LUS NI RNAM PA THAMS CAD DU BRTAN PAR BYAS PA DES NA PHYAG RGYAR RAB TU BSGRAGS ZHES 'BYUNG NGO, ,DBANG GI NGO BO NI, DAM TSIG GSUM BZUNG BA'I SGO NAS BSGOM PA'I YE SHES KYI PHYAG RGYA DANG PHAN TSUN 'KHYUD PA LAS BYUNG BA'I BDE STONG GI YE SHES, RIGS THAMS CAD KYI BDAG PO DRUG PA RDO RJE 'CHAD LA BRTEN PA'I SKYED RIM YAN LAG DANG BCAS PA BSGOM PA LA DBANG BA'I NUS PA, LAN 'DI LA BRTEN NAS RDZOGS PA'I BYANG CHUB THOB PA LAS PHYIR MI LDOGS PA'I NUS PA, GZHAN LA RGYUD 'CHAD PA DANG, DBANG BSKUR BA SOGS RDO RJE SLOB DPON GYI LAS THAMS CAD LA DBANG BA'I NUS PA RNAMS DE YIN TE, KYEE RDOR LAS, SHES RAB BCU DRUG LON PA LA, ,LAG PA
, ,DAG GIS YANG DAG 'KHYUD, ,RDO RJE DRIL BU MNYAM SBYOR BA, ,SLOB DPON GYI NI DBANG DU 'DOD, ,CES SO, ,SNGAGS RIM LAS, JI LTAR SA BCU PA LA GNAS PA'I PHYIR MI LDOG PA'I BYANG CHUB SEMS DPA' CHEN PO LA PHYOGS BCU'I DE BZHIN GSHEGS PA RNAMS KYIS DBANG BSKUR BA DE BZHIN DU DAM TSIG GSUM DANG BCAS PA 'DI YANG DE BZHIN GSHEGS PA DE RNAMS DANG BLA MAS, SEMS CAN DPAG TU MED PA LA GZHAL DU MED PA'I CHOS STON PA LA SOGS PAS SLOB DPON DU BYA BA'I CHED DU KHAMS GSUM PA'I CHOS KYI RGYAL SRID DU DBANG BSKUR BAS NA SLOB DPON GYI DBANG DANG, PHYIR MI LDOG PA RNAMS KYI DBANG DANG 'DRA BAS PHYIR MI LDOG PA'I DBANG NGO, ,'DRA BA TZAM DU MA ZAD PHYIR MI LDOG PA'I SA BON KHYAD PAR CAN BSKRUN PAR BYED PA'I PHYIR YANG MI PHYIR MI LDOG PA'I DBANG DU BRJOD DE PHYIR MI LDOG PA DANG LDAN PA'I DBANG NGO, ,ZHES GSUNGS SO, ,RJES GNANG GI DBANG GI TSIGS BCAD RNAMS KYI GO DON DKYIL CHOG LAS 'BYUNG BA LTAR RO, ,DE LTAR BUM PA'I DBANG NI DKYIL 'KHOR GANG DU 'THOB NA, SBYOR BA BDUN PA LAS, RI MO DAD NI LUS KYI LAS, ,DKYIL 'KHOR DU NI DE NYID THOB, ,CES PA LTAR LUS KYI DKYIL 'KHOR DU THOB, DER JI LTAR THOB NA, SNGAGS RIM LAS, BUM DBANG BSKUR BA RNAMS LA RDUL TSON GYI DKYIL 'KHOR PA'I LHAS DGONGS PA GTAD NAS DBANG GI BYA BA MDZAD PA YOD LA DE'I PHYIR, RDUL TSON GYI DKYIL 'KHOR DU BUM DBANG THOB PA YANG MI 'GAL LO, ,ZHES PA LTAR
'DIR YANG LUS DKYIL KYI LHAS DGONGS PA GTAD PA'I SGO NAS DBANG GI BYA BA MDZAD PA YOD PAS DER THOB, GAD LA DBANG NA SKYED RIM KHYAD PAR CAN LUS DKYIL ZAB MO BSGOM PA LA DBANG DAG BYA GANG SPYOD NA LUS KYI DRI MA SBYONG, 'BRAS BU GANG 'GRUB NA SKU RDO RJE SPRUL PA'I SKU 'GRUB PA'I NUS PA BZHAG PA YIN PAS DGA' BA BSGOM MO, ,SGRA BSHAD NI SBYOR BA BDUN PA LAS, SNOD DU RUNG PHYIR BUM DBANG STE, ,BLUGS GTOR DAG PAR BYED PHYIR DBANG, ,'DI NI YANG DAG RGYUD RIM PA'I, ,LUNG GIS NGES PAR BYED PA'O, ,ZHES PA LTAR RO, ,GSANG DBANG GI GSOL 'DEBS KYI TSIGS BCAD KYI DON NI, 'GRO BA SDUG BSNGAL GYIS GDUNGS PA DPER NA BYIS PA MI DONG DU LHUNG BA DE LAS 'DON PA PO LTA BU'I SKYOB PA MED PA RNAMS KYI SKYOB PA DANG, ME GZHIL PA'I CHAR BSIL PA LTA BU'I SKYABS MED PA RNAMS KYI SKYABS SU GYUR BA'I YON TAN GYI DPAL DANG LDAN PA NI 'KHOR LO BDE PA'I MCHOG RDO RJE SLOB DPON KHYOD NYID YIN PAS, LAN DU PHAN 'DOGS PAR RE BA SOGS KYI RGYU MED PAR THUGS RJE CHEN POS RANG GI NGANG GIS 'GRO BA'I DON MDZAD PA LA 'JUG PA KHYOD KYI MGON DANG SKYABS MED PA BDAG GI MGON DANG SKYABS MDZOD CIG , BDAG NYID CHEN PO RDO RJE SLOB DPON KHYOD KYIS BLA NA MED PA'I GO 'PHANG BRNYES PA JI LTAR GTZO BOS BDAG KYANG DE KHO NA 'DRA BAR MDZOD CIG ,'KHOR BA NYON MONGS PA DANG SDUG BSNGAL GYI 'DAM GYI TSOGS CHEN PO'I NANG DU BYID PA BDAG LA 'KHOR BA'I SDUG BSNGAL GYIS MNAR BAR MI 'GYUR BA'I SKYABS MDZOD CIG ,CES PA YIN LA, DBANG BSKUR BA'I TSIGS BCAD KYI DON NI,
, ,GSANG RDZAS 'DI NI DPA' BO DANG LHA MO RNAMS KYI NGO BO THIG LE RTZA'I BCUD THAMS CAD 'DUS PA YIN LA 'DI ZOS PAS BZA' BA'I DAM TSIG LNGA LA SOGS PA BSTEN PA DANG BSRUNG BA'I DAM TSIG RNAMS LA DBANG BAR BYED PAS LUS KYI SA'I KHAMS SOGS KHAMS LNGA'I BCUD DANG LDAN PA 'DI'I RO RTOGS PA STE MYONG BAR BYED PA'I SGO NAS DE LAS 'BYUNG BA'I BDE BA GANG DE MYONG BAR BYA'O, ,ZHES PA YIN CING PHYI MA SLA'O, ,DBANG GI NGO BO NI GSANG RDZAS MYANG BA LAS BYUNG BA'I BDE STONG GI YE SHES, DAG DAG PAR BYED PA'I NUS PA, RTZA RLUNG GTUM MO'I RNAL 'BYOR DANG KUN RDZOBS SGYU MA'I RDZOGS RIM BSGOM PA LA DBANG BA'I NUS PA RNAMS DE YIN DE, PHYAG CHEN THIG LE'I GNYIS PA LAS, ,SBOM PO THA LTAG SBYOR BA YIS, ,LONGS SPYOD NANG DU GZHUG PAR BYA, ,DE TSE YANG DAG YE SHES SKYE, ,BU MO'I BDE BA JI LTA BU, ,ZHES DANG, SNGAGS RIM LAS, DAG DAG PA NI GSANG RDZAS DE BLA MA YAB YUM GTZO BO YAB YUM DANG THA MI DAD DU BYAS NAS SNYOMS PAR ZHUGS PA'I LHAN CIG SKYES DGA' BSKYED PA'I RDZAS YIN ZHING, PHYOGS BCU'I RGYAL BA SRAS BCAS THAMS CAD SPYAN DRANGS TE ZHU BA'I NGO BO DANG DBYER MED PAR BYAS PAS NA MTHU DANG LDAN PA'I PHYIR, PHYAG CHEN THIG LE SNGAR DRANGS PA LTAR DE MYANG BAS GZHON NU MA'I BDE BA 'DRA BA SKYE BAR BSHAD LA, DE 'DRA BA DE DAG GI GNAS LCE DANG MGRIN PA LA SOGS PA'I GNAS RNAMS SU PHYIN PA NA SKABS DE DANG DE'I RTZA DANG RLUNG RNAMS SBYONG BAS DAG DAG PAR BYED DO, ,BYANG SEMS KYI RO LCES MYANG BA'I SGO NAS NGAG DAG PAR BYED PA GSANG
DBANG GI MTHU YIN LA KHAMS GNYIS KYI REG BYA LUS KYIS MYONG BA LA BRTEN NAS YID DAG PAR BYED PA DBANG GSUM PA'I MTHU'O, ,DE LTAR NA RDZAS KYI RTEN 'BREL KHYAD PAR CAN DES RTZA DANG RLUNG DANG BYANG SEMS BYIN GYIS RLOB NUS PAS RTZA RLUNG DANG GTUM MO LA SOGS PA'I RNAL 'BYOR SGOM PA'I SNOD DU BYED LA DE DAG BSGOM PA NA BDAG BYIN GYIS RLAB PA SGYU MA'I TING NGE 'DZIN GYI 'ANG SNOD DU RUNG BAS, LAM DE DAG SGOM PA LA DBANG BA'O, ,ZHES GSUNG PAS SO GSUNG, DE LTAR GSANG BA'I DBANG DKYIL 'KHOR GANG DU THOB NA SBYOR BA BDUN PA LAS, LHAG PA BYANG SEMS ZHES BYA BA'I, ,DKYIL 'KHOR DU NI DE NYID THOB, ,ZHES PA LTAR KUN RDZOBS BYANG CHUB KYI SEMS KYI DKYIL 'KHOR DU THOB, GANG LA DBANG NA KUN RDZOB SGYU MA'I RDZOGS RIM GYIS MTSON PA'I SO SO SKYE BO'I RDZOGS RIM THAMS CAD SGOM PA LA DBANG, DAG BYA GANG SBYONG NA DAG GI DRI MA SBYONG, 'BRAS BU GANG 'GRUB NA GSUNG RDO RJE LONGS SKU 'GRUB PA'I NUS PA BZHAG PA YIN PAS DGA' BA BSGOM MO, SGRA DON NI, GSANG BA'I RDZAS BYANG SEMS MYANG BA LAS BYUNG BA'I DBANG YIN PAS GSANG DBANG DO, ,SHER DBANG GI SKABS KYI GSOL 'DEBS KYI TSIGS BCAD KYI DON NI, BCOM LDAN ZHI BA SOGS RKANG PA DRUG GI DON NI, BCOM LDAN 'DAS NYON MONGS KYIS GDUNGS PA LAS GROL BA'I DMAN PA'I MYANG 'DAS RNAMS NI ZHI BA YIN LA, SHES BYA'I SGRIB PA BAG CHAGS DANG BCAS PA'I GDUNGS PA LAS GROL BA'I THIG CHEN MYANG 'DAS NI SNGA MA LAS MCHOG TU GYUR LAS, DE LTA BU'I ZHI BA CHEN PO DANG
, ,LDAN PA RDO RJE SLOB DPON GYI, ZHES POS NAS, YUL CHOS THAMS CAD RANG BZHIN GYIS STONG PA DANG YUL CAN SGRIB BRAL LHAN SKYES KYI YE SHES GNYIS CHU LA CHU BZHAG GI TSUL DU NGO BO DBYER MED PA'I, RDO RJE'I RNAL 'BYOR MTHAR THUG PA RANG NYID KYIS BRNYES NAS, 'GRO BA SEMS CAN THAMS CAD KYANG RNAL 'BYOR DE LA PHYOGS GCIG TU 'GOD PAR BZHED PA KHYOD KYIS, BSHAD MA THAG PA'I YUL YUL CAN NGO BO DBYER MI PHYED PA'I PHYAG RGYA CHEN PO MCHOG GI DNGOS GRUB SGRUB PA PO BDAG LA, LAM DUS KYI YUL STONG PA NYID DANG YUL CAN LHAN SKYES KYI BDE CHEN DBYER MI PHYED PA'I RDO RJE'I RNAL 'BYOR BSGOMS PA LAS BYUNG BA'I, 'BRAS DUS KYI RNAL 'BYOR MTHAR THUG PA STZOL CIG ,MDOR NA SLOB DPON BDAG NYID CHEN PO RIGS DANG DKYIL 'KHOR KUN GYI MNGA' BDAG KHYOD KYIS, LAM 'BRAS KYI YUL YUL CAN DBYER MI PHYED PA'I 'OD GSAL LHAN CIG SKYES PA'I YE SHIS TSUL JI LTA BUR BRNYES PA; DE LTAR DU BDAG LA'ANG STZOL BAR MDZOD, CES PA STE RKANG PA THA MA GNYIS SLA'O, ,RIG MA GTOD PA'I TSIGS BCAD KYI DON NI, LHA MO STE RIG MA 'DI NI PHYAG RGYA CHEN PO MCHOG GI DNGOS GRUB BDE BA MTHA' YAS PA DANG LDAN PA DE SBYIN PA MO, ,BU YIS PHYAG RGYA MO 'DI LONG LA RNAM PA KUN TU MCHOD PA BLA NA MED PA GYIS, ZHES DANG, DRI BA'I TSIGS BCAD KYI DON NI, BYANG CHUB KYI SEMS SOGS ZA BA DANG, RIG MA MCHOD PA LA SPRO 'AM ZHES DRI BA STE DE YANG DNGOS DBANG GI TSE BYANG SEMS PADMAR 'PHOS NA DE LCES BLANG NAS
BTUNG BAR SNGAGS RIM LAS GSUNGS PA LTAR BYA DGOS PAS DE'I PHYIR 'DRI BA YIN LA, LAN GYI TSE DE DAG LA SPRO BAR LAN 'DEBS PA DANG, TSIGS BCAD PHYI MA NI, DA YI PADMA 'DI BDE BA KUN DANG YANG DAG PAR LDAN ZHING, YAB YUM LHAR GSAL BA'I GSANG GNAS 'DU BYA BA SOGS KYI CHO GA JI LTA BA BZHIN DU BSTEN NA, DE YI MDUN NA STE DRUNG DU NGA NYE BAR GNAS TE LHAN SKYES KYI DGA' BA DRANGS NAS BDE STONG SBYOR BA SOGS KYIS SANGS RGYAS BSTEN PA STE MA NYES PA LA SOGS PA'I BYA BA THAMS CAD PADMAR TE PADMA LA BRTEN NAS BYED DO, ,BDE CHEN RGYAL PO BDE STONG LHAN CIG SKYES PA'I YE SHES GANG YIN PA DE NYID KYI RGYU 'DI NYID DU GNAS PA YIN PAS STEN CIG CES PA'O, ,SNGAGS DON NI, PADMA STEN CIG CES PA'O, ,DBANG GI NGO BO NI, 'DU SHES GSUM DANG LDAN PAS SNYOM PAR ZHUGS PAS GSANG GNAS KYI THUR SEL GZHU'I DBYIBS CAN GYIS LTE BA'I GTUM MO SBAR BA'I MTHUS SPYI BO'I BYANG SEMS ZHU BA RLUNG GIS THUR DU PHUL BAS RIM GYIS NOR BU'I NANG DU PHYIN PA LAS SKYES PA'I LHAN CIG SKYES DGA' DANG STONG PA SBYAR BA'I BDE STONG GI YE SHES, YID DAG PAR BYED PA'I NUS PA, DON DAM 'OD GSAL GYI RDZOGS RIM SGOM PA LA DBANG BA'I NUS PA RNAMS DE YIN NO, ,ZHAL LUNG GI DBANG GSUM PA'I SKABS SU, SDOM BRTZON GZHU DBYIBS GA-YOG YIS, ,SUM MDOR YE SHES ME SPAR BAS, ,KHAMS ZHU NAS NI BCU DRUG CHAR, ,GYUR BA ME TOG KUN TA 'DRA, ,RLUNG GI SBYOR BAS PHUL BAR BYA, ,RANG BZHIN
, ,GYIS NI RAB ZHI BA, ,CHOS SKU ZHI BA DE KHO NA, ,BDE BA DE NYID NOR BUR 'DRUG ,SKAD CIG DRAN MED GA-YO BAR BYED, ,SGRUB PA CHEN PO DE NYID DO, ,ZHES DANG, PHRENG BA LAS, SHES RAB SBYOR BAS DPAL LDAN NI, ,DE NYID YANG DAG MTSON PAR BYA, ,RDO RJE DKYIL KRUNG LAS SEMS NI, ,NOR BU'I NANG DU CHUD PA BLTA, ,ZHES DANG MAN SNYE LAS, DE NYID NI CHOS THAMS CAD BSAM DU MED PA NYID DO, ,DE'I GZUGS BRNYAN DU RJES SU MTHUN PAS LHAN CIG SKYES PA'I DGA' BA'I NGO BO SHES RAB YE SHES LA DE NYID DU BRJOD DO, ,ZHES DANG ZHAL LUNG GI DBANG GSUM PA'I SKABS SU, NAM MKHA'I KHAMS DANG RDO RJE SBYOR BA LAS NI YANG DAG SPYAN CAN BDE CHEN 'BYUNG BAR 'GYUR, GANG GANG YANG DAG DGA' BYED CHAGS BRAL DGA' GNYIS BAR DU DBEN NYID MTHONG BYAS BRTAN PAR GYIS, PADMA'I MKHA' LA RDO RJE NOR BU PAD SNYID GNYIS LA SBYOR GANG RDO RJE DKYIL DKRUNG SEMS, NOR BU PAR DU MTHONG BYAS GANG TSE BDE BA 'BYUNG BAR NGES PA DE NYID YE SHES TE; 'DI NYID RDZOGS PA'I RIM PA YIN PAR BLA MA MCHOG RNAMS KUN GYIS BSHAD, 'DOD CHAGS CHAGS BRAL BAR MAR MI DMIGS YE SHES SKAD CIG DE RU GSAL, CHU TSOD BRGYAD DAM NYIN GCIG ZLA BA GCIG TU'AM, LO GCIG SKAL PA'AM SKAL PA STONG DU YE SHES DE MYONG BYA, ZHES DANG, SNGAGS RIM LAS, DES NA SLOB MA DE KHO NA NYID RTOGS PA'I LTA BA DANG LDAN PA LA BLA MAS DBANG GSUM PA'I YE SHES GANG DU SKYE BA BRDA' SPRAD NAS DBANG BSKUR BA'I TSE RIG MA LA BRTEN NAS BYANG CHUB KYI SEMS NOR BUR BZUNG BA'I GNYIS SNANG GI RTOG PA RAG PA RNAMS
LOG PA NA LTA BA DRAN PAR BYAS NAS, LTA THOG TU BZHAG PA'I YE SHES DE LA LHAN CIG SKYES PA ZHES BYA YI, LUS DANG SEMS KYI TSOR BA BDE BA TZAM BYUNG BA DANG DE'I MTHUS SEMS MI RTOG PAR GNAS PA TZAM MIN NO, ,'ON KYANG YIN LUGS KYI LTA BA LEGS PAR MA GO BA RNAMS LA BDE BA DANG BCAS PA'I MI RTOG PA SKYES PA YANG DBANG GSUM PAR NGO SPRAD DGOS SO ZHES GSUNGS SO; ;DE LTAR SHER DBANG DKYIL 'KHOR GANG DU THOB NA SBYOR BA BDUN PA LAS, BHA GA RNAM DAG ZHES BYA BA'I, ,DKYIL 'KHOR DU NI DE NYID THOB, ,CES PA LTAR BHA GA'I DKYIL 'KHOR DU THOB, LAM GANG LA DBANG NA DON DAM 'OD GSAL GYI RDZOGS RIM SGOM PA LA DBANG, DAG BYA GANG SBYONG NA YID KYI DRI MA SPYOD, 'BRAS BU GANG 'GRUB NA THUGS RDO RJE CHOS SKU 'GRUB PA'I NUS PA BZHAG PA YIN PAS DGA' BA BSGOM MO, ,SGRA DON NI, SNGAGS RIM LAS, DBANG GSUM PA'I DON LA SHES RAB NI PHUL DU PHYIN PA'I SHES PA 'DI LA YOD PAS NA PHYI ROL GYI PHYAG RGYA'O, ,YE SHES NI DE LAS BYUNG BA'I SEMS RNAM PAR RTOG PA DANG BRAL BA LAS RNAM PAR DAG PA LHAN CIG SKYES PA'I DGA' BA YIN TE RGYAS PAR BSHAD ZIN TO, ,ZHES PA LTAR RO; ;TSIGS DBANG GI GSOL 'DEBS KYI DON SLA LA, DBANG BZHI PA BSKUR LUGS NI KHA SBYOR LAS, ZAB CING RGYA CHE LA MOS NA, TSIG GIS RIN CHEN DBANG BSKUR BYA, ZHES DANG; 'DUS PA PHYI MA LAS, DBANG BSKUR BA NI GSUM DU DBYE, ,BUM PA'I DBANG NI DANG PO STE, ,GSANG BA'I DBANG NI GNYIS PA YIN, ,SHES RAB YE SHES GSUM
, ,PA STE; ;DE LTAR DE BZHIN BZHI PA YANG, ,RGYUD 'DI LAS NI RAB TU BSHAD, ,CES DANG, SNGAGS RIM LAS, TSIG GIS STER LUGS NI SHES RAB YE SHES DE NYID MYU GUR GYUR PA'I BYANG CHUB KYI SEMS BSGOM PAS RAB TU 'PHEL BZHIN PA SGRIB PA MED PA NYID DU GYUR PA'I DE KHO NA NYID CHOS THAMS CAD BSAM GYIS MI KHYAB PA NYID KYI RANG BZHIN YAN LAG BDUN DANG LDAN PA'I PHYAG RGYA CHEN PO NYID RDO RJE 'CHANG CHEN PO'I RANG BZHIN CAN DBANG BZHI PA BRJOD PAR BYA'O, ,ZHES GSUNGS PA LTAR RO, ,ZHES DANG, MDOR NA DBANG GSUM PA DPER BYAS NAS BZHI PA NGES PAR BYED TSUL NI 'DI YIN TE, GSUM PA'I SKABS SU RANG GI LUS LONGS SKU'I RNAM PA CAN GYI LHAR SNANG ZHING DE YANG YUM DANG BRAL BA MIN PAR YAB YUM ZHAL SBYOR PHAN TSUN 'KHYUD PA'I RNAM PA CAN DU SNANG BA DANG, DE'I NGANG NAS THUGS DNGOS PO'I DE KHO NA NYID LA ZHUGS PA'I LHAN SKYES KYI YE SHES LA GNAS PA CIG YOD PA DE GNYIS DPER BLANGS NAS, DON 'DI THABS KYI YAN LAG DANG BCAS PAR NYAMS SU BLANGS PAS MTHAR SANGS RGYAS KYI GZUGS SKUR MOS NAS SGOM PA TZAM MIN PAR RANG GI LUS SANGS RGYAS KYI MTSAN DPES SPRAS PA'I SKU LONGS SKU DANG KHA SBYOR GYI YAN LAG GNYIS KYI BDAG NYID DU GYUR BA DANG, THUGS KYANG DE KHO NA NYID LA GNAS PA RES 'GA' BA MIN PAR 'KHOR BA JI SRID KYI BAR DU GNAS PA'I BDE BA CHEN PO DANG RANG BZHIN MED PA'I YAN LAG GNYIS KYI BDAG NYID DU GYUR PA'I ZUNGS 'JUG DE DBANG BZHI PA'O ZHES NGO SPROD PA YIN NO, ,ZHES GSUNGS PA LTAR RO, ,YAN
LAG BDUN NI RAG DBANG GRAGS PAS, LONGS SPYOD RDZOGS DANG KHA SBYOR BDE CHEN RANG BZHIN MED, ,SNYING RJES YONGS GANG RGYUN MI CHAD DANG 'GOG PA MED, ,YAN LAG BDUN BSHAD DON DANG LDAN PAS BSGRUB BYA 'DIR, ,BDAG 'DOD TSAD MAS YONGS BSGOM BLO CAN GYIS KYANG BSNGAGS, ,ZHES PA LTAR RO, ,TSIG DBANG THOB LUGS NI, SNGAGS RIM LAS, 'O NA DBANG BZHI PA LAM GYI SKABS SU MI 'DOD DAM SNYAM NA SPYIR DBANG BZHI BA BSKUR PA'I TSE SNGAR BZHIN NGO SPRAD NAS TSIG TZAM GYIS GO BA SKYED PA LA DBANG DE SLOB MA LA BSKUR BA DANG SLOB MAS KYANG DBANG TSIG GI SGO NAS THOB PAR 'JOG STE SNOD RUNG GI DBANG BZHI PA'O, ,ZHES GSUNGS PA LTAR RO, ,DBANG GI NGO BO NI DON GYI DBANG BZHI PA TSIG GIS BRDA' SPRAD PA LA BRTEN NAS THOB PA'I ZUNG 'JUG GI RDZOGS RIM SGOM PA LA DBANG BA'I NUS PA, SGO GSUM GYI DRI MA SBYONG BA'I NUS PA, RDO RJE GSUM DBYER MI PHYED PA 'GRUB PA'I NUS PA RNAMS DE YIN NO, ,DKYIL 'KHOR GANG DU THOB PA SOGS NI, SNGAGS RIM LAS, DE LTAR SNGAR BSHAD PA LTAR GYI BRDA' LEGS PAR BLA MAS SLOB MA LA 'BYOR NA, DE'I GO BA RNYED PA TZAM GYIS DBANG BZHI PA TSIG GI SGO NAS THOB PA YIN LA, DE YANG DON DAM BYANG CHUB KYI SEMS KYI DKYIL 'KHOR DU THOB PA YIN NO, ,SGO GSUM GYI DRI MA PHRA MO SBYONG BA DANG, RDO RJE GSUM DBYER MI PHYED BA'I SKU 'GRUB PA'I SKAL PA CAN DU BYED CING, ZUNG 'JUG GI RDZOGS RIM SGOM PA'I DBANG BAR BYED DO, ,ZHES GSUNGS PA LTAR RO, ,SGRA DON NI, DBANG 'DI DBANG GSUM BA LTAR DON NYAMS SU MYONG BA MED PAR TSIG
, ,GIS BRDA' SPRAD BA'I SGO NAS THOBS PAS TSIG DBANG NGO, RIG MA'I RTUL SHUGS SBYIN PA'I TSIGS BCAD KYI DON DKYIL CHOG LAS 'BYUNG BA LTAR RO, ,DE LA SNGAGS BLA MED KYI BSGRUB BYA MTHAR THUG NI KHA SBYOR YAN LAG BDUN LDAN GYI ZUNG 'JUG GI SKUR 'DU ZHING, DE BSGRUB BYED KYI THABS NI SKYABS SU 'GRO BA DANG SEMS BSKYED PA DANG, THEG CHEN THUN MONGS DANG THUN MONGS MA YIN PA GNYIS KYI SDOM PA BZUNG NAS DE'I BSLAB BYA LA SLOB PA DANG LAM RIM PA GNYIS RNAMS SU 'DU LA, DE DAG LAS SKYABS SU 'GRO BA DANG SEMS BSKYED PA DANG SDOM PA GNYIS BZUNG NAS BSLAB BYA LA SLOB PA RNAMS NI, STA GON DANG DKYIL 'KHOR DU 'JUG PA'I SKOR RNAMS SU GSUNGS SHING, DE NAS BUM DBANG GIS LAM RIM PA GNYIS LAS SKYED RIM GYI SNOD RUNG DU SGRUB, GSANG DBANG GIS RDZOGS RIM LA SKYE 'PHAGS KYI SKABS GNYIS LAS SO SO SKYE BO'I RDZOGS RIM SGOM PA'I SNOD RUNG DU SGRUB, SHER DBANG GIS 'PHAGS PA'I SKABS KYI RDZOGS RIM LA YANG GNYIS YOD PA'I DON DAM 'ONG GSAL GYI RDZOGS RIM SGOM PA'I SNOD RUNG DU SGRUB, TSIGS DBANG GIS DBYER MED ZUNG 'JUG GI RDZOGS RIM SGOM PA'I SNOD RUNG DU SGRUB PAS SNGAGS BLA MED KYI LAM GYI GNAD THAMS CAD DBANG GI SKOR LA 'DU'O, ,DE DAG NI LAM GYI NGO BO MTSON TSUL YIN LA DKYIL 'KHOR DU 'JUG PA SOGS KYI GO RIM GYIS LAM GYI GO RIM DANG GRANGS KYIS LAM GYI GRANGS NGES KYANG MTSON NO, ,DE LTAR DBANG THOB NAS RTZA LTUNG BA BCU BZHI DANG SBOM PO BRGYAD BSRUNG BA LA SOGS PA DAM TSIG DANG SDOM PA BSRUNG BA LA 'BAD DGOS TE, ,
SNGAGS RIM LAS, DON 'DI DAG LA RJE BTZUN CHEN PO GRAGS PA RGYAL MTSAN PA'I ZHAL SNGA NAS, RDO RJE THEG LA DAD KYANG MA SMIN PAS, ,ZAB MO BSGOM KYANG 'BRAS BU NGAN 'GRO LAS MCHOG GZHAN MI 'GRUB SANGS RGYAS GSUNG BAS NA, ,BLA MA MCHOG LA DBANG BSKUR NOD PAR MDZOD, ,DBANG THOB MAN NGAG ZAB MO TSOL BA YIS, ,SA STENG RGYAS PAR KUN TU BCAL BYAS KYANG, ,PHAN PA'I DON BO GDAMS NGAG DAM TSIG STE, ,'DI MED 'GRAM RTZA ZAD PA'I KHANG RUL 'DRA, ,LEGS PAR SMIN LAS DAM TSIG BSRUNG BYAS NA, ,RIM GNYIS ZAB MO'I MAN NGAG MA BSTEN KYANG, ,SKYE BA BCU DRUG DAG NA 'GRUB BO ZHES, ,'GRO BA'I RTZA LAG PHAN PAR MDZAD PAS GSUNGS, ,BDAG NI THOS NYUNG SHES RAB MIG BRAL YANG, ,DRI MED RGYUD LAS LEGS GSUNG MTHONG BAS NA, ,DBANG BLANG DAM TSIG BSRUNG BAR MDZOD CIG CES, ,KUN LA THAL MO SBYAR NAS GSOL BA 'DEBS, ,ZHES GSUNG BA NI RGYUD SDE'I GNAD MKHYEN PA'I GTAM YIN TE, BDAG KYANG DE LTAR DU GSOL BA 'DEBS SO, ,ZHES GSUNGS SO, ,DAM TSIG BSRUNG BA LA 'BAD KYANG NYES PAS GOS NA JI LTAR BYA BA NI, SNGAGS RIM LAS; DE LTAR RNAM PAR DAG PA'I DBANG DANG DAM TSIG DANG SDOM PA RNAM PAR DAG PA LAN GCIG THOB KYANG MI SHES PA DANG, NYON MONGS MANG BA DANG, BAG MED PA DANG, MA GUS PA STE LTUNG BA 'BYUNG BA'I RGYU BZHIS LTUNG BA BYUNG NA RTZA LTUNG BA GTOGS PA RNAMS NI SNGAGS KYI SDOM LDAN GYI DRUNG DU PHYIR 'CHOS PA LA SOGS PAS BCOS NAS LTUNG BA LAS LDANG BAR BYA'O
, ,RTZA LTUNG BYUNG NAS DAM TSIG NYAMS NA DBANG GIS GSO DGOS PAS BLA MA DAM PA LAS DBANG BLANG BAR BYA LA, LEN SAM BYUNG NA SNGAR BSHAD PA'I DBANG DE RNAMS SLOB DPON 'JUG PA'I CHO GAR BSHAD PA LTAR BDAG 'JUG BYAS NAS DBANG DANG, DAM TSIG DANG, SDOM PA RNAMS BLANGS LA GSO BAR BYA STE, PHRENG BA LAS, RANG NYID KYANG DAM TSIG NYAMS NA 'DI LTA BU'I DBANG NYID JI LTAR SLOB DPON 'JUG PA'I CHO GAR BLANG BAR BSHAD PA DE LTAR BLANG BAR BYA'O, 'ON KYANG BLA MA DAM PA SHIN TU RING BA DAG GAM LAM BGROD DKA' BA LA SOGS PA'I NYE BAR 'TSE BAS BGROD PAR MI NUS PA'I PHYOGS NA BZHUGS NA STE GZHAN DU MA YIN NO, ,ZHES SO, ,ZHES PA LTAR BYA'O, ,DE LTA BU'I TSUL GYIS BLA MED RDO RJE THEG PA'I LAM GYI RMANGS LEGS PAR TSUGS PAR BYAS STE LAM RIM PA GNYIS KYI SGO NAS ZUNG 'JUG RDO RJE 'CHANG GI GO 'PHANG SGRUB PA LA BRTZON PA NI DAL BA'I RTEN LA SNYING PO LEN TSUL MCHOG YIN PAS TSUL 'DI LA 'BAD 'TSAL LO, ,ZHES GSUNGS SO, ,CES PA 'DI NI KHYAB BDAG 'KHOR LO'I MGON PO RJE BTZUN DKON MCHOG RGYAL MTSAN DPAL BZANG PO'I ZHAL SNGA NAS KYI GSUNG GI BDUD RTZI CUNG ZAD MYANGS PA'I MDO SMAD PA NGAG DBANG BLO BZANG CHOS LDAN DPAL BZANG POS RANG NYID KYIS BDAG 'JUG LEN PA SOGS LA MKHO BAR BSAM NAS BRJED THOR BRIS PA, 'DIS KYANG RGYAL BA BLO BZANG GRAGS PA'I BSTAN PA YUN RING DU GNAS PAR GYUR CIG , ,,MANGGA LAm,,