, ,'DUS BA'I DMAR KHRID ZLO BZANG DGONGS RGYAN BZHUGS SO,, *, ,BLA MA RDO RJE 'CHANG LA PHYAG 'TSAL LO, ,'DIR RGYUD KYI RGYAL PO DPAL GSANG BA 'DUS PA'I RDZOGS RIM ZAB MO NYAMS SU LEN PA LA SNGON 'GRO DANG DNGOS GZHI GNYIS, DANG PO LA SKYED RDZOGS THUN MONGS PA'I SNGON 'GRO DANG, RDZOGS RIM THUN MONG MA YIN PA'I SNGON 'GRO GNYIS LAS, DANG PO NI, LAM THUN MONG BAS RGYUD SBYANGS TE LUGS 'DI'I DKYIL 'KHOR DU DBANG BSKUR BA LEGS PAR MNOS NAS DAM TSIG DANG SNGOM PA TSUL BZHI DU BSRUNG PA'O, ,GNYIS PA LA 'GRAL RKYEN SDIG SGRIB SPYONG BA RDO RJE SEMS DPA'I BSGOM BZLAS DANG; MTHUN MTHUN RGYEN TSOGS SOGS PA BLA MA'I RNAL 'BYOR GNYIS, DANG PO LA RTEN GYI STOBS BSGRUB PA'I YAN LAG SKYABS 'GRO SEMS SKYED BSGOM PA DANG RDOR SEMS BSGOM BZLAS DNGOS GNYIS LAS; DANG PO NI, STAN BDE BA LA LUS GNAD BCAS LA RANG RGYUD LA LEGS PAR BRTAGS TE DEG SEMS KHYAD PAR CAN GYI NGANG NAS, MDUN GYI NAM MKHAR SENG GE BRGYAD KYIS BTEGS PA'I RIN PO CHE'I KHRI YANGS SHING RGYA CHE BA'I STENG DU SNA TSOGS PADMA 'DAB MA BSAM GYIS MI KHYAB PA DANG LDAN PA'I STENG DU NYI MA'I DKYIL 'KHOR GYI GDAN LA RTZA BA'I BLA MA LA DNGOS BRGYUD KYI BLA MA YI DAM SANGS RGYAS BYANG SEMS DPA' BO MKHA' 'GRO BSTAN SRUNGS YE SHES PA'I TSOGS KYIS BSKOR BA, RANG RANG GI MDUN NA RANG RANG GIS GSUNGS PA'I LUNG GI CHOS RNAMS 'OD KYI RANG BZHIN CAN GYI PO TI'I RNAM PAR YOD PA'I SKYABS YUL SKAD CIG GIS GSAL GDAB, RANG GI MTHA' SKOR NA RIGS DRUG GI SEMS CAN THAMS CAD SA'I DREG PA BZHIN DU SMUG SHIG GE YOD PAR BSAM LA, RANG GZHAN RNAMS THOG MA MED PA
, ,NAS 'KHOR BAR SDUG BSNGAL GYIS MNAR TSUL DANG, DA DUNG RANG RGYUD LA SDUG BSNGAL GYI RGYU SNA TSOGS PA ZHIG YOD PAS SKYABS CIG MA BRTEN NA SDUG BSNGAL DPAG TU MED PA MYONG DGOS TSUL RNAMS BSAM NAS, DE LTAR BU'I SDUG BSNGAL LAS SKYOB PA NUS PA SU LA YOD NA MDUN NA BZHUGS PA'I BLA MA DKON MCHOG RNAMS LA YOD PAR YID CHES PA'I DAD PA CHEN POS BDAG GZHAN SEMS CAN THAMS CAD SDUG BSNGAL DE DAG LAS BSKYAB TU GSOL SNYAM PAS RANG GZHAN THAMS CAD KYIS MGRIN GCIG TU BRJOD PAR MOS NAS, YID KYI ROL PA DRI MED ZLA 'DRAS BSGRUB, ZHES SOGS MANG NYUNG SKABS BSTUN BZLA ZHING BDUD RTZI 'BEBS SBYANG GI DMIGS PA, BSAM DANG RNAM PAR SMIN PA DAG GYUR PAS, ZHES SOGS KYIS BYANG CHUB TU SEMS BSKYED PA, SEMS CAN THAMS CAD KYIS SOGS KYIS TSAD MED BZHI BSGOM PA RNAMS BYA'O, ,GNYIS PA RDOR SEMS BSGOM BZLAS DNGOS NI, RANG LHAR GSAL BA'I RAL BA'I THOR COG GI RTZER NGO BO BDE STONG DBYER MED KYI YE SHES YIN PA LA RNAM PA PAm YIG DBU CAN GYI RNAM PA CAN MDO GA DUNG LTAR DKAR BA GCIG SKAD CIG NYID LA THOL GYIS BYUNG BA 'OD DU MER GYIS ZHUB LAS PADMA DKAR ZHING 'TSER LA RTZA BAR DMAR MDANGS YOD BA'I 'DAB MA BRGYAD PA ZHIG TU GYUR PAR BSAM, DE'I ZE'U 'BRU'I STENG GI DBUS SU AA YIG DKAR PO CHU LAS CHU BUR RDOL BA'I TSUL GYIS BYUNG BA 'OD DU ZHU BA LAS ZLA BA'I DKYIL 'KHOR DKAR BA SIL NYA GANG BA CHU SHEL GYI MDOG CAN ZHIG TU GYUR BA'I STENG GI DBUS SU, H'Um YIG DUNG GI MDOG CAN ZHIG CHU LAS CHU BUR LTA BUR THOL GYIS BYUNG BA 'OD DU ZHU BA LAS RDO RJE DKAR PO RTZE LNGA PA GYEN DU 'GRENG BA'I LTE BAR
H'Um YIG DUNG GI MDOG CAN PHYI BLTAS NANG GSAL GYI RNAM PA CAN ZHIG TU GYUR BAR BSAM, DE LTA BU'I RDO RJE'I DBUS KYI H'Um YIG LAS 'OD ZER SDOM GYI BA THAG LTA BU DPAG TU MED PA'I SNA LA RDO RJE SEMS DPA' YAB YUM ZUNG RE RE 'PHROS PA, SEMS CAN THAMS CAD KYI SPYI BOR 'KHOD PA'I SBYOR 'TSAMS NAS BDUD RTZI'I RGYUN BABS PA SEMS CAN RNAMS KYI SPYI BO NAS ZHUGS LUS THAMS CAD GANG DRI MA THAMS CAD DAG PAR BYAS TE, RDO RJE SEMS DPA' RNAMS 'OD DU ZHU NAS SEMS CAN THAMS CAD LA THIM PAS SEMS CAN THAMS CAD RDO RJE SEMS DPA'I GO 'PHANG LA BKOD DE 'OD ZER RNAMS TSUR 'DUS NAS H'Um YIG LA THIM, ,'OD ZER LA LA'I SNA LA MCHOD PA'I LHA MO DPAG TU MED PA SPROS PA RNAMS KYIS, PHYOGS BCU'I RGYAL BA SRAS BCAS THAMS CAD MCHOD PAS MNYES PAR BYAS TE DE RNAMS KYI SKU GSUNG THUGS KYI BYIN BRLABS THAMS CAD BDUD RTZI'I RNAM PAR 'OD ZER LA 'KHRIL TE BYUNG BA DANG, MCHOD LTA 'OD ZER DANG BCAS PA RNAMS TSUR 'DUS TE H'Um YIG LA THIM, RDO RJE H'Um YIG DANG BCAS PA 'OD DU ZHUB YONGS SU GYUR PA LAS, RDO RJE SEMS DPA' SKU MDOG DKAR PO YUM DANG BCAS PA DANGS GSAL 'OD KYI RANG BZHIN CAN MNGON RTOGS LTAR BSGOM, DE'I SPYI BOR AOm DKAR PO, , MGRIN PAR A'A: DMAR PO, THUGS KHAR ZLA BA'I DKYIL 'KHOR CHU SHEL KYI MDOG CAN GYI DBUS SU H'Um YIG DUNG GI MDOG CAN, DE LAS 'OD ZER 'PHROS TE BDE STONG NAM MKHA'I DBYINGS NAS DPER NA NAM MKHA' GA-YA' DAG LA SPRIN DKAR PO BLO BUR DU THOL GYIS BYUNG BA LTAR, BSGOM PA DANG 'DRA BA'I YE SHES PA RDO RJE SEMS DPA' YAB YUM THOL GYIS BYUNG BA MDUN GYI NAM MKHAR SPYAN DRANGS,
, ,THUGS KHA NAS MCHOD PA'I LHA MO DPAG TU MED PA SPROS TE MCHOD PA PHUL BAS MNYES PAR BYAS, DZA ZHES BRJOD PAS MI THOG TU MI RTZEGS PA LTAR SPYI BO'I RDO RJE SEMS DPA'I SPYI GTZUG TU DKUGS, H'Um ZHES BRJOD PAS DNGUL CHU LA DNGUL CHU BCUG PA BZHIN DAM TSIG PA LA BZHUGS, BAm ZHES BRJOD PAS CHU LA CHU BZHAG PA BZHIN DAM TSIG PA DANG DBYER MED DU CING, HO ZHES BRJOD PAS RGYAL PO RANG GI BLON 'BANGS RNAMS KYI NANG NAS GANG LA THUGS RTZIS CHE BA DE'I DBANG DU 'GYUR BA LTAR DGYES PA CHEN POS DAM TSIG PA DANG 'BRAL MED DU BZHUGS PAR BSAM, SLAR YANG 'OD ZER 'PHROS TE PHYOGS BCU'I RGYAL BA THAMS CAD RIGS LNGA YAB YUM KYI RNAM PAR MDUN GYI NAM MKHAR SPYAN DRANGS, SNGAR BZHIN MCHOD, DE BZHIN GSHEGS PA THAMS CAD KYIS MNGON PAR DBANG SKUR DU GSOL, ZHES GSOL BA BTAB PAS RGYAL BA RNAMS KYIS DBANG BSKUR BA'I DGONGS PA MDZAD, YUM LNGAS BUM PA DKAR PO BDUD RTZI LNGAS GANG BA BZUNG NAS, AOm SARBATA TH'A GA TA ZHES SOGS GSUNGS SHING SPYI BO NAS DBANG BSKUR BAS SKU YE SHES KYI BDUD RTZIS GANG, CHU LHAG MA YAR LUD PA SPYI GTZUG TU GNAS PA YONGS SU GYUR PA LAS MI BSKYOD PAS DBU BRGYAN PAR BSAM, DE NAS RNAM PAR SUN 'BYIN PA'I STOBS TSE 'DIR BSAGS PA'I SDIG BDRAN LAM DU GYUR PA DANG, THOGS MED NAS BSAGS PA'I SDIG PA RNAMS KYANG YID YUL DU BYAS TE 'GYOD PA DRAG POS, BCOM LDAN 'DAS RDO RJE SEMS DPA' ZHES SOGS KYI GSOL BA RTZE GCIG TU BTAB PAS, RDO RJE SEMS DPA'I THUGS KHAR THUGS KUN RDZOB BYANG CHUB KYIS SEMS ZLA BA'I DKYIL 'KHOR 'O MA'I MDOG CAN NAM CHU SHEL GYI MDOG CAN MAndA LA KHA SBU PA BA LTA BU,
DE'I STENG DU THUGS DON DAM BYANG CHUB KYI SEMS H'Um YIG YI GE BRGYA BA'I SNGAGS PHRENG GIS BSKOR BA'I RNAM PA CAN DU GYUR BA'I, H'Um YIG SNGAGS 'PHRENG DANG BCAS PA LAS 'OD ZER 'PHROS TE SEMS CAN RNAMS RDO RJE SEMS DPA'I GO 'PHANG LA BKOD PA SNGAR BZHIN DANG, YANG 'OD ZER 'PHROS TE SNGAR LTAR RGYAL BA SRAS BCAS RNAMS MCHOD PAS MNYES BAR BYAS PAS, DE RNAMS KYI SKU GSUNG THUGS KYI YON TAN RNAMS BDUD RTZI 'OD ZER GYI RNAM PAR DPER NA SHING LA 'KHRIL TE DKAR RTZI 'BABS PA LTAR, THUGS KHAR PHOG PA'I 'OD ZER LA 'KHRIL TE SNGAGS PHRENG H'Um DANG BCAS PA LA THIM PAS RDO RJE SEMS DPA' MTHU STOBS DANG GZI BRJID PHUN SUM TSOGS PAR GYUR BAR BSAM NAS YI GE BRGYA PA BZLA ZHING DMIGS PA NI, SNGAGS PHRENG H'Um DANG BCAS PA LAS BDUD RTZI DKAR PHROM PHROM BYUNG, RDZA SO MA LAS CHU THOGS MED DU 'BYUNG BA LTAR, RANG RANG GI THAD KYI ZLA BA LAS THOGS MED DU THON NAS SKU'I DBYIBS BRGYUD DE YAB YUM GYI SBYOR 'TSAMS NAS THON, ZLA DKYIL GYI STENG NAS SNGAR LTAR BABS, PAD 'DAB KYI GSE BA NAS THON TE RANG GI SPYI BO'I TSANG BUG NAS ZHUGS, SPYI GTZUG NAS RKANG MTHIL GYI BAR GYI LUS THAMS CAD GANG, SDIG SGRIB BAG CHAGS DANG BCAS PA THAMS CAD DKAN GZAR POR ME MA MUR GYI ZAL BA NYOR RE YOD PA CHUS DENG PA BZHIN DUD KHU DANG SOL KHU'I RNAM BAR 'OG SGO NAS BTON, LUS SHEL GONG GA-YA' DAG PA LTAR DANGS GSAL 'OD KYI RANG BZHIN CAN DU GYUR PAR BSAM, , GTZO BOR H'Um YIG YI GE BRGYA BA'I SNGAGS PHRENG DANG BCAS PA 'OD ZER 'BAR BA'I GONG BU'I RNAM PA CAN LA RTZE GCIG TU DMIGS NAS BZLA, RE 'GA' SNGAGS 'PHRENG H'Um DANG BCAS PA LAS 'OD ZER NYI MA
, ,'BUM GYI 'OD LTA BU 'PHROS TE SPYI BO DANG BA SPU'I SGO THAMS CAD NAS ZHUGS PAS, MUN KHUNG DU SGRON ME SPAR BAS MUN PA KAR SONG CHA MED DU YAL 'GRO BA LTAR, SDIG SGRIB BAG CHAGS DANG BCAS PA SANGS KYIS DAG BAR BSAM, RE 'GA' BDUD RTZI'I RGYUN BABS PA SPYI BO NAS ZHUGS PAS LUS KYI NAD GDON THAMS CAD RNAG KHRAG CHU SER SDIG SPRUL SBAL LCOD LA SOGS PA'I RNAM PAR 'OG SGO GNYIS NAS BTON PAR BSAM, RE 'GA' SNGAR LTAR DON GNYIS BYAS PA'I DMIGS PA BYA, DE LTAR BU'I DMIGS PA RNAMS RE MOS KYI TSUL DU BSKYANG ZHING, YI GE BRGYA PA GANG MANG BZLAS PA'I MTHAR NYES PA LAS SLAR LDOG PA'I THABS PHYIN CHAD SDIG PA SROG LA BABS KYANG MI BYA SNYAM PA'I SDOM SEMS DRAG POS, BDAG GIS THOGS MED NAS DA LTA'I BAR DU MI SHES PA'AM MA RIGS PA RMONGS PA'I DBANG GIS SDOM PA GSUM GYI DAM TSIG DANG 'GAL BA LA SOGS PA'I NYES LTUNG DPAG TU MED PA BSAGS YOD PAS DE RNAMS KYI RNAM PAR SMIN PA MYONG BAR MI 'GYUR BAR BYIN GYIS BRLANGS DU GSOL SNYAM PAS, BDAG NI MI SHES RMONGS PA YIS, ZHES SOGS BRJOD PAS RDO RJE SEMS DPA'I THUGS KHA'I SNGAGS PHRENG H'Um DANG BCAS PA LAS 'OD ZER 'PHROS TE SNGAR LTAR DON GNYIS BYAS, SEMS CAN THAMS CAD RDO RJE SEMS DPA'I GO 'PHANG LA BKOD PA DANG MCHOD YUL THAMS CAD 'OD DU ZHU NAS RDO RJE SEMS DPA' LA THIM, RDO RJE SEMS DPA'I ZHAL NAS RIGS KYI BU ZHES SOGS GSUNGS NAS DGYES BZHIN DU 'OD DU ZHU STE RANG GI TSANGS BUG NAS ZHUGS, DBU MA'I NANG BRGYUD DE SNYING KHA CHOS KYI 'KHOR LO'I DBUS KYI MI SHIGS PA'I THIG LE SHIN TU PHRA BA'I RLUNG SEMS NGO BO DBYER
MED PA LA THIM PAS, RLUNG SEMS DE LAS RDO RJE SEMS DPA' YAB YUM GYI SKUNG BZHENGS PAR MOS LA RTZE GCIG TU MNYAM PAR BZHAG ,DE LTAR BU'I BSGOM BZLAS KYI MGO 'JUG THAMS CAD SNANG STONG SGYU MA LTA BU'I DANG NAS BYED PA DANG, 'KHOR GSUM MI DMIGS PAS RGYAS 'DEBS PA NI STONG NYID LA BRTEN PA DANG, YI GE BRGYA PA BZLA BA NI GZUNG SNGAGS ZAB MO LA BRTEN PA DANG, MTHAR 'JAM DPAL DPA' BO ZHES SOGS KYIS RDZOGS BYANG DU BSNGO BA NI MDO SDE ZAB MO LA BRTEN PA'I GNYEN PO KUN TU SPYOD PA'I STOBS SU 'GYUR BAS DE LTAR BYA ZHING, TSUL 'DI LTA BU LA STOBS BZHI DANG GNYEN PO KUN TU SPYOD PA'I STOBS GSUM KYANG CHANG PAS SDIG PA 'DAG PA'I THABS MCHOG TU GYUR PA YIN NO, ,GNYIS PA MTHUN RKYE NA TSOGS SOG PA BLA MA'I RNAL 'BYOR BSGOM PA'I TSUL NI, RANG LHAR GSAL BA'I RAL BA'I THOR COG GI RTZER SENG GE BRGYAD KYIS BTEGS PA' RIN PO CHE'I KHRI'I STENG DU, BDE STONG DBYER MED KYI YI SHES KYI NGO BO BAm SER PO CIG THOL GYIS BYUNG BA 'OD DU ZHU BA LAS SNA TSOGS PADMA 'DAB MA BRGYAD BA, PHYOGS BZHI'I 'DAB MAD MAR, ME RLUNG GNYIS SER, BDEN BRAL LJANG, DBANG LDAN NAG ,LTE BA LJANG, GE SAR SER BA, DE'I STENG DU SHES RAB STONG BA'I YE SHES KYIS NGO BO RAmD MAR PO LAS NYI MA'I DKYIL 'KHOR, DE'I STENG DU THABS BDE BA CHEN PO'I YE SHES KYI NGO BO AA DKAR PO LAS ZLA BA'I DKYIL 'KHOR, DE'I STENG DU NGO BO DUS GSUM SANGS RGYAS THAMS CAD 'DUS PA'I BDAG NYID RANG GI DRIN CAN RTZA BA'I BLA MA YIN PA LA; RNAM PA RDO RJE 'CHANG SKU MDOG SNGON PO DANGS GSAL 'OD KYI RANG BZHIN CAN, ZHAL GCIG PHYAG GNYIS PA RDONG DRIL 'DZIN PA RIN PO CHE'I RGYAN GYIS BRGYAN
, ,ZHING DAR SNA TSOGS KYI NA BZA' KLUBS PA, RANG 'DRA'I YUM RDO RJE DBYINGS PHYAG MA DANG MNYAM PAR SBYAR BA'I SKU LAS 'PHROS PA'I 'OD KYI PHUNG PO'I DBUS NA RDO RJE SKYIL KRUNG GIS BZHUGS PA; DE'I THUGS KHAR MI BSKYOD PA SOGS SKU LA LHA SO GNYIS DANG MTSAN DPE'I DPAL 'BAR BAS MTSAN ZHING LTA BAS NGOMS PAS MED PA, MTHONG BA TZAM GYIS DAD PA'I SPU LONG GA-YO BAR BYED PA'I GZI MDANGS CAN; GSUNG YAN LAG DRUG CU DANG LDAN PA GSUNG GCIG NYID DU GSUNGS KYANG DU MA NYID DU SO SOR GO BA, THUGS MKHYEN BRTZE'I BDAG NYID SHES BYA THAMS CAD MNGON GSUM DU GZIGS SHING 'GRO BA KUN LAM BU GCIG PA LTAR BRTZE BA, 'PHRIN LAS KYI BKOD PA 'JIG RTEN GYI ZHING KHAMS DPAG TU MED PAR CHOS 'KHOR BSKOR BA LA SOGS PA'I MDZAD PA BCU GNYIS KYI TSUL STON BZHIN PA'I SPYI BOR AOm DKAR PO, ,MGRIN PAR A'A: DMAR PO, ,THUGS KHAR H'Um SNGON PO, ,LTE BAR S'A SER PO, ,GSANG BAR HA LJANG KHU RNAMS 'OD ZER 'PHRO BA DANG BCAS PA GSAL GDAB, THUGS KHA'I H'Um LAS 'OD ZER 'PHROS PAS RTZA BA'I BLA MA LA DNGOS BRGYUD KYI BLA MA YI DAM SANGS RGYAS BYANG SEMS DPA' BO DPA' MO BSTAN SRUNGS YE SHES PA'I TSOGS NAM MKHA' GANG BAS BSKOR BA MDUN GYI NAM MKHAR SPYAN DRANGS, MTHA' SKOR GYI YE SHES PA THAMS CAD RTZA BA'I BLA MA YE SHES PA LA THIM, RTZA BA'I BLA MA YE SHES PA RDOR SEMS KYI SKABS LTAR DGUG GZHUG BCINGS MNYES BYAS LA, SPYI BO'I BLA MA SKYABS GSUM KUN 'DUS KYI RO BOR BLTAS TE BSAGS SBYANG GI GNAD BSDUS PA YAN LAG BDUN PA 'BUL BA LA, THOG MAR PHYAG 'TSAL BA'I YAN LAG NI RANG GI LUS DPAG TU MED PA, DE RE RE LA MGO DPAG TU MED PA, DE RE RE LA KHA DPAG
TU MED PA, DE RE RE LA LCE DPAG TU MED PA, SOGS BLOS GANG LCOGS SPRUL NAS DE RNAMS KYIS LUS KYIS PHYAG DANG NGAG GIS BSTOD PA BYED PAR BSAM LA, GANG GI DRIN GYIS BDE CHEN GNAS ZHES SOGS DANG, BLA MA SANGS RGYAS ZHES SOGS DANG, MI BSKYOD RDO RJE ZHES SOGS DANG, GANG ZHIG GZUGS DANG ZHES SOGS GDON, GNYIS PA MCHOD PA'I YAN LAG NI, RANG GI SNYING KHA NAS MCHOD PA'I LHA MO MDZES SHING YID DU 'ONG BA'I ME TOG MA DKAR MO, ,BDUG SPOS MDUNG KHA, SNANG GSAL MA DMAR SER, DRI CHAB MA LJANG KHU, ZHAL ZAS MA KHRA MO, ,GZHAN YANG KHA DOG SNA TSOGS PA RGYAN GYIS BRGYAN PA, PHYAG NA RIN PO CHE'I SNOD BZANG PO'I NANG DU CHU BZHI LA SOGS PA DANG ROL MO LA SOGS PA'I MCHOD RDZAS BSAM GYIS MI KHYAB PA THOGS PA DPAG TU MED PA SPROS TE MCHOD PAR BSAM LA, 'DUS PA'I MCHOD 'PHRENG NAS 'BYUNG BA LTAR RAM BSDU NA, AOm GU RU BDZRA DHA RA LA AA RGHAm SOGS BTAG LA, CHU BZHI NYER SPYOD ROL MO LA SOGS PA'I PHYI MCHOD, SHA LNGA BDUD RTZI LNGA SBYANGS RTOGS SBYAR GSUM BYAS PA'I NANG MCHOD, PADMA CAN GYI PHYAG RGYA LTA BAS CHOG MI SHES PA DPAG TU MED PA PHUL BA YUM LA THIM, YAB YUM SNYOMS PAR ZHUGS PAS LHAN SKYES KYI BDE BA CHEN POS MNYES SHING TSIM PAR BSAM LA GSANG BA'I MCHOD PA, DE'I SKABS KYI LHAN SKYES KYI BDE CHEN DES DE KHO NA NYID YUL DU BYAS PAS BDE STONG DBYER MED KYI YE SHES GONG 'PHEL DU SONG BAR MOS PA DE KHO NA NYID KYI MCHOD PA STE MCHOD PA RNAM BZHI DBUL, MntAL NI, LI LTA BU'I MntAL YOD NA 'OG NGOS BA BYUNG DANG DRI BZANG GIS BYUGS, PHYI NGOS BYI DOR LEGS PAR BYAS PA'I
, ,STENG DU ME TOG GAM, 'BRU GTZANG MA SOGS KYIS TSON BU LEGS PAR BKOD DE, DE NYID 'JIG RTEN GYI KHAMS DPAG TU MED PA DANG DE DAG NA MCHOD PA'I YO BYAD DU 'OS PA 'JIG RTEN PA'I MCHOD PA BDAG POS BZUNG BA DANG MA BZUNG BA'I LHA MI'I DPAL 'BYOR THAMS CAD DANG, BLA NA MED PA'I MCHOD PA BYANG SEMS DBANG THOB PA RNAMS KYIS BZANG DGU SPRUL PA SOGS MCHOD PA DPAG TU MED PA, DMIGS RTEN DE CHER MA SONG 'JIG RTEN GYI KHAMS LA SOGS PA CHUNG NGU MA SONG BAR BSAM LA DBUL, 'DI NI BUG PA CHUNG DU NAS PHYI ROL GYI YUL KHAMS RGYA CHEN PO MTHONG BA DANG 'DRA ZHING, THOG MAR BLO YUL DU 'CHAR DKA' NA'ANG GOMS NA BDE MO 'ONG, SKYE BA PHYI MA RNAMS SU DGE BA'I BSHES GNYEN GYIS RJES SU 'DZIN PA'I RTEN 'BREL KHYAD PAR CAN YOD PAS BDAG NYID BRAN DU PHUL BAS BLA MAS BRAN DU BZUNG BA'I MOS PA BYA, GSUM PA BSHAGS PA'I YAN LAG NI, SDIG PA MI DGE BA SNGAR BYAS LA 'GYOD SEMS DANG PHYIN CHAD SDOM SEMS DRAG POS, GANG ZHIG THOGS MED SRID PA'I CHU KLUNG DU, ZHES SOGS BRJOD, BZHI PA YI RANG GI YAN LAG GIS NI, 'BAD PA CHUNG NGUS BRLAB CHEN TSOGS SDUD LA, ZHES SOGS NAS GSUNGS PA LTAR BSAM NAS RANG GZHAN SKYE 'PHAGS THAMS CAD KYI RGYU DANG 'BRAS BU'I DGE BA THAMS CAD LA RJES SU YI RANG BA'I BSAM PAS, RDZOGS SANGS RGYAS DANG BYANG CHUB SEMS DPA' DANG, ZHES SOGS BRJOD, YAN LAG LHAG MA RNAMS TSIG CI RIGS PA'I SGO NAS BYA ZHING DMIGS PA NI, SANGS RGYAS MA THAG PAS MTSON PA'I DGE BA'I BSHES GNYEN SOGS LA
CHOS 'KHOR RGYA CHEN PO BSKOR BAR BSKUL BAS DE DAG GIS CHOS 'KHOR BSKOR BA SEMS CAN THAMS CAD KYIS NYAMS SU BLANG BA LA BRTEN NAS SANGS RGYAS PAR BSAM, SANGS RGYAS MYA NGAN LAS 'DA' TSUL STON KHAMS MTSON PA'I BSHES GNYEN SOGS LA MYA NGAN LAS MI 'DA' BAR GSOL BA BTAB PAS 'KHOR BA JI SRID PAR MYA NGAN LAS MI 'DA' BAR ZHAL GYIS BZHES PAR MOS,, SGRUB PA'I MCHOD PA'I PHYIR BYANG SDOM DANG RIGS LNGA'I SDOM BZUNG KYANG LAN GCIG GAM GSUM BYA, DE NAS YON TAN DANG BKRIN RJES SU DRAN PA'I SGO NAS GDUD SHUGS DRAG POS, BLA MA KUN 'DUS KYI NGO BO BLA MA RIN PO CHE LA GSOL BA 'DEBS SO, ,NAS, SKYABS GSUM KUN 'DUS KYI NGO BO BLA MA RIN PO CHE LA GSOL BA 'DEBS SO'I, BAR DANG, BLA MA RIN PO CHE BDAG GI BLO CHOS SU 'GRO BAR BYIN GYIS BRLAB TU GSOL, CHOS LAM DU SLONG BAR BYIN GYIS BRLAB TU GSO, CHOS LA BAR CHAD MI 'BYUNG BAR BYIN GYIS BRLAB TU GSOL, CHOS MIN GYI BLO SNA SKAD CIG TZAM YANG MI SKYE BAR BYIN GYIS BRLAB TU GSOL, DGE BA'I BSHES GNYEN LA MA DANG BA, RTAG 'DZIN TSE 'DI LA ZHEN PA, 'KHOR BA'I PHUN TSOGS DANG RANG NYID GCIG PU'I PHYIR ZHI BDE DON DU GNYER BA, BDAG GNYIS KYI MTSAN MAR 'DZIN PA, THA MAL GYI SNANG ZHE NA, 'DOD YON LAM BYED KYI ZAB MO'I LAM LA SLANG ZHING LOG PAR LTA BA LA SOGS PA PHYIN CI LOG GI BLO SNA MTHA' DAG 'GAG PAR BYIN GYIS BRLAB TU GSOL, DGE BA'I BSHES GNYEN LA SANGS RGYAS DNGOS SU MTHONG BA'I DAD PA, DAL 'BYOR RNYED DKA' ZHING 'CHI BA MI RTAG PA'I 'DU SHES, 'KHOR BA'I DANG TSUL THAMS CAD ME'I RLUB LTAR MTHONG BA'I NGES 'BYUNG, BYAMS SNYING RJE'I RTZA BA CAN GYI BYANG CHUB KYI SEMS, BDAG MED RTOGS
, ,PA'I SHES RAB, LAM RIM PA GNYIS KYI RNAL 'BYOR LA SOGS PA PHYIN CI MA LOG PA'I BLO SNA KHYAD PAR CAN THAMS CAD BYIN GYIS RLOBS GSOL, KHYAD PAR DU YANG RTZA 'JAM, RLUNG BDE, DMIGS PA GSAL, BDE STONG SBYOR BA LA SOGS PA'I NYAM RTOGS KHYAD PAR CAN RNAMS DA LTA NYID DU RGYUD LA SKYE BAR BYIN GYIS RLABS GSOL, ZHES 'DOD DON GSOL 'DEBS RTZE GCIG TU LAN MANG PO BYAS PA'I MTHAR TING NGE 'DZIN GYI DBANG BZHI BLANG, SLAR YANG MOS GUS DRAG POS, DPAL LDAN RTZA BA'I BLA MA RIN PO CHE, BDAG GI SNYING KHAR PADMA'I GDAN BZHUGS LA, LUS NGAG YID LA SKU GSUNG THUGS ZHUGS TE; BLA MA KHYED RANG LTA BUR BYIN GYIS RLOBS, ZHES GSOL BA MANG DU BTAB PAS SENG KHRI NAS YANG RIM PA BZHIN BLA MA LA THIM, BLA MA 'OD DU ZHU NAS RANG GI TSANGS BU GNAS ZHUGS, DBU MA'I NANG BRGYUD DE SNYING KHA'I SHIN TU PHRA BA'I LUS NGAG YID GSUM LA THIM PAS, DE LAS BLA MA RDO RJE 'CHANG YAB YUM GYI SKUR BZHENGS PA'I THUGS KAR H'Um YIG GI MTHA' SKOR DU, AOm A'A: GU RU BDZRA DHA RA H'Um H'Um, ZHES PA'I SNGAGS 'PHRENG 'OD ZER 'BAR BA DANG BCAS PAS BSKOR BA LA DMIGS NAS SNGAGS TE GANG MANG BZLAS LA, DGE BA 'DI YIS MYUR DU BDAG ,DPAL LDAN BLA MA 'GRUB GYUR NAS, ZHES SOGS KYIS DGE BA BSNGO, GNYIS PA LA GNYIS, RTZE 'KHOR GSAL BTAB STE RTZAL MA SBYANG BA DANG, DMIGS PA DNGOS GZHI SKYONG TSUL LO, ,DANG PO NI, BSAM GTAN GYI STAN BDE BA LA LUS KYI KUN SPYOD CHOS BRGYAD DANG LDAN PAS 'DUG LA, RANG NYID RDO RJE 'CHANG ZHAL GSUM PHYAG DRUG PA'AM ZHAL GCIG PHYAG GNYIS PA YUM BCAS DANG SA GSAL 'OD
KYI RANG BZHIN CAN DU GSAL GDAB, DE LTAR GSAL BA'I LUS KYI GA-YAS GA-YON GNYIS LA LTOS PA'I DBUS, MDUN RGYAB GNYIS LA LTOS PA'I CUNG ZAD RGYAB LA PHYOGS PAR, LUS KYI GZHUNG SHING GI TSUL DU YANG SNA SMIN 'TSAMS KYI BUG DANG KHANG CHAD DANG MAR SNA RTAGS KYI RDO RJE'I RTZE DANG KHANG CHAD LAS CUNG ZAD RING BA'I, RTZA DBU MA PHRA SBOM GRO SOGS TZAM GTUM MO 'BAR DUS DANG MTSUNGS PAR RGYA SKYEGS KYI KHU BA LTAR DMAR ZHING SNUM PA, TIL MAR GYI MAR ME LTAR DNGAS SHING GSAL BA, PADMA'I 'DAB MA LTAR 'JAM ZHING MNYEN PA, CHU SHING GI SDONG PO LTAR DRANG ZHING 'DRONGS PA STE KHYAD PAR BZHI LDAN NAM, GZHI DUS LTAR SNGO SKYA'AM, PHYI SNGO LA NANG CUNG ZAD DMAR BA GANG YANG RUNG BA'I RNAM PA CAN SBUB STONG THAL LE YOD PA, DE'I GA-YAS SU RO MA DMAR ZHAR GA-YON DU RKYANG MA DKAR ZHAR GNYIS 'BYAR BA'I TSUL DU GNAS PA'I, YAR SNA SMIN 'TSAMS DANG MAR SNA RTAGS KYI RTZE'I BANG GSAL GDAB, DE NAS NU MA GNYIS KYI DBUS DRANG THAD KYI DBU MA LA RO RKYANG GNYIS KYIS SKOR GSUM GSUM 'KHYUD PA'I MDUD 'TSAMS NAS THON PA'I PHYOGS KYI RTZA 'DAB BZHI, SHAR GYI RTZA 'DAB LAS GYES PA'I SHAR LHO'I RTZI 'DAB SOGS 'TSAMS KYI RTZA 'DAB BZHI STE; RTZA 'DAB BRGYAD PA CHOS KYI 'KHOR LO KHA DOG DKAR PO, ,DBYIBS ZLUM PO GDUGS RTZIBS KHA SBUB PA LTA BU, MGRIN PA'I AOL MDUD KYI THAD KYI DBU MA LA RO RKYANG GIS LAN RE 'KHYUD PA'I MDUN 'TSAMS NAS THON PA'I PHYOGS KYI RTZA 'DAB BZHI, DE LAS SNGAR BZHIN GYIS PAS BRGYAD, GE RE RE LAS GNYIS GNYIS GYES PA'I RTZA 'DAB BCU DRUG PA'I LONGS SPYOD KYI 'KHOR LO KHA DOG DMAR PO, ,DBYIBS
, ,ZLUM PO GDUGS RTZI BAS KHA GYEN DU PHYOGS PA LTA BU, SPYI BOR THOD PA'I 'OG GLANG RGYA'I STENG 'TSAMS SU DBU MA LA RO RKYANG GI LAN RE 'KHYUD PA'I MDUD 'TSAMS NAS THON PA'I PHYOGS KYI RTZA 'DAB BZHI, DE RE RE LAS GNYIS GNYIS GYES PAS BRGYAD, DE RE RE LAS GNYIS GNYIS GYES PAS BCU DRUG ,DE RE RE LAS GNYIS GNYIS GYES PA'I RTZA 'DAB SO GNYIS PA'I BDE CHEN GYI 'KHOR LO, ,RTZA 'DAB KHA DOG SNA TSOGS PA GDUGS RTZI BAS KHA SBUB PA LTA BU, DBYIBS GRU GSUM PA, LTE BAR BUG PA'I THAD KYI DBU MA LA RO RKYANG GIS LAN RE 'KHYUD PA'I MDUD 'TSAMS NAS THON PA'I PHYOGS KYI RTZA 'DAB BZHI, DE RE RE LAS GNYIS GNYIS GYES PAS BRGYAD, DE RE RE LAS GNYIS GNYIS GYES PAS BCU DRUG ,DE RE RE LAS BZHI BZHIR GYES PAS DRUG CU RE BZHI'AM, YANG NA RE RE LAS GNYIS GNYIS GYES PAS SO GNYIS, DE RE RE LAS GNYIS GNYIS GYES PAS RTZA 'DAB DRUG CU RTZA BZHI PA'I SPRUL PA'I 'KHOR LO KHA DOG SNA TSOGS PA GDUGS RTZI BAS KHA GYEN DU PHYOGS PA LTA BU, DBYIBS GRU GSUM PA, SUM MDO GRU GSUM GYI THAD DRANG GI NANG DU DBU MA LA RO RKYANG GIS LAN RE 'KHYUD PA'I MDUD 'TSAMS NAS THON PA'I PHYOGS KYI RTZA 'DAB BZHI, DE RE RE LAS GNYIS GNYIS GYES PAS BRGYAD, DE'I PHYOGS KYI RTZA 'DAB BZHI LAS LNGA LNGA GYES PAS NYI SHU, GYES GZHI BZHI DANG NYER BZHI, 'TSAMS KYI BZHI DANG NYER BRGYAD, RTZA BA'I GYES GZHI BZHI DANG RTZA 'DAB SO GNYIS PA'I BDE SKYONG GI 'KHOR LO KHA DOG DMAR PO GDUGS RTZIBS KHA SBUB PA LTA BU, DBYIBS GRU GSUM PA, NOR BU'I DBUS
KYI DBU MA LA RO RKYANG GIS LAN RE 'KHYUD PA'I MDUD 'TSAMS NAS THON PA'I PHYOGS KYI RTZA 'DAB BZHI, DE RE RE LAS GNYIS GNYIS GYES PAS RTZA 'DAB BRGYAD PA'I 'KHOR LO, ,KHA DOG DKAR PO DBYIBS ZLUM PO GDUGS RTZI BAS KHA GYEN DU PHYOGS PA LTA BU, SPYI BO DANG MGRIN PA'I RTZA 'KHOR SOGS RTZA 'KHOR ZUNG RE THABS SHES KHA SBYAR GYI RNAM PAR YOD PA, RTZA 'DAB RNAMS KYI RTZA BA DBU MA LA ZUG SHING RTZA PHRAN RNAMS KYIS DRA MIG LTA BUR SBREL BA, MI GTZANG BA'I RANG BZHIN CAN MA YIN PA DANG SA GSAL 'OD KYI RANG BZHIN CAN NANG SBUB STOD HA RE YOD PA GSAL GDAB DE NAS SNYING KHA CHOS KYI 'KHOR LO'I DBUS KYI DH'U TI'I NANG DU NGO BOR RANG GI SHIN TU PHRA BA'I RLUNG SEMS DBYER MI PHYED PA YIN PA LA RNAM PA THIG LE DKAR LA DMAR BA'I MDANGS CAN SHIN TU 'TSER BA 'OD ZER KHA DOG LNGA 'PHRO BA CIG GSAL BTAB LA, DES DH'Um TI'I NANG NAS YAR LA SONG NAS MGRIN PA'I RTZA 'KHOR GYI DBUS SU SLEB PA NA, KHANG PA RGYUS MED KYI 'KHYAMS NAS MDZOD PHUG RNAMS LA LTA BA LTAR; RTZA'I CHAGS LUGS CI 'DRA SNYAM DU RTZA SBUGS RNAMS LA BLTAS BAS, RANG GI 'OD KYIS RTZA SBUG RNAMS SNANG BAR BYAS, RTZA SPUG THAMS CAD SPUG STONG THAL LEGS LA SING DE MTHONG, DE NAS DBU MA'I NANG NAS YAR KHYU RU RU PHYIN NAS SPYI BO'I RTZA 'KHOR GYI NANG NAS SNGAR LTAR BA LTAS PAS GSAL BAR MTHONG, DE NAS DBU MA'I NANG BRGYUD DE KHYU RU RU PHYIN NAS SMIN 'TSAMS SU SLEB PA NA, THIG LE'I PHYID RTZA NANG DANG PHYED PHYIR THON DE RANG GI RDO RJE'I LUS KYI PHYI'I CHAGS TSUL DCI 'DRA SNYAM DU BLTAS PAS SKU MDOG DANG RGYAN LA SOGS PA GSAL SID NGE MTHONG, RANG GI
, ,'OD KYIS PHYI ROL GYI YUL RNAMS GSAL BAR BYAS, DE NAS YAR LOG TE SMIN 'TSAMS SU CUNG ZAD BSDANG, DE NAS SPYI BO MGRIN PA, SNYING KHA RNAMS SU RIM GYIS PHYIN TE DE NAS KYANG SNGAR LTAR BLTAS PAS MTHONG, DE NAS LTE BA, GSANG GNAS, NOR BU'I DBUS KYI RTZA 'KHOR RNAMS KYI NANG NAS SNGAR BZHIN BLTAS PAS MTHONG BAR BSAM SHING; DE LTAR YANG DANG YANG DU DMIGS PAS GSAL POS GSAL SNANG 'DON PA NI RTZAL MA SPYOD PA'O, ,GNYIS PA DMIGS PA DNGOS GZHI SKYONG TSUL LA GNYIS, DBEN PA GSUM DANG, BDEN PA GNYIS KYI RDZOGS RIM MO, DANG PO LA GSUM LAS, DANG PO LUS DBEN GYI SKABS SU RANG GSANG CHEN RDO RJE 'CHANG YAB YUM DANGS GSAL 'OD KYIS RANG BZHIN CAN DU GSAL BA'I SNYING KHA'I THIG LE LAS, THIG LE TSAD YUNGS DKAR TZAM PA, DBYIBS ZLUM PO, KHA DOG SNGON PO DANGS SHING 'TSED PA NGO BO SHIN TU PHRA BA'I RLUNG SEMS DANG LHAG PA'I LHA DBYER MI PHYED PA'I KHYAD PAR GSUM LDAN ZHIG MAR ME GCIG LAS GNYIS CHAD KYI TSUL DU CHAD DE, DBU MA'I NANG BRGYUD DE MAR HRIL LI LI BABS TE DH'U TI'I MAR SNAR NYI GDAN SRAN MA PHYED GSHAGS TZAM DMAR KHYIL LE BA'I STENG DU GNAS PAR BSAM LA, DE LA SEMS ZHUGS PA BZHIN BYAS TE RTZE GCIG TU BSGOM, DE LTAR BSGOM PAS RLUNG SEMS 'JUG PA GCIG PA'I GNAD KYIS RLUNG DBU MAR ZHUGS GNAS THIM GSUM 'BYUNG LA LAS DANG PO BA LA THOG MA NAS DE LTA BU MI 'BYUNG YANG MOS PA YID BYED KYIS SBYONG DGOS PAS, ZHUGS PA'I RTAGS SU SNA BUG GNYIS NAS RLUNG MNYAM RGYU SHED
MTSUNGS SU NGES CAN DU THENGS PA BYUNG BAR BSAM LA, 'DI RLUNG DBU MAR ZHUGS PA'I RTAGS YIN, 'DI'I RJES SU RLUNG DBU MAR GNAS PA'I RTAGS 'BYUNG BAS, DE NGO SHES PAR BYA SNYAM DU BSAM, DE NAS RLUNG DBU MAR GNAS PA'I RTAGS SU SNA BUG GI RLUNG GI RGYU BA PHRA MO YANG CHAD CING LTO BA MI 'GUL BA DANG, 'OG SGO GNYIS NAS RGYUB 'GAG PA RNAMS BYUNG BAR MOS LA, 'DI RLUNG DBU MAR GNAS PA'I RTAGS YIN, 'DI'I SNGON DU ZHUGS PA'I RTAGS SONG, 'DI'I RJES SU THIM PA'I RTAGS 'BYUNG, DE NGO SHES PAR BYA SNYAM DU BSAM, DE NAS THIM PA'I RTAGS SU RIM PA BZHIN, SA CHU LA THIM PA'I RTAGS SOS GNYI MA'I 'OD ZER SA LA PHOG PAS SA'I RLAN GYI GRANG REG DANG NYI MA'I 'OD KYI TSA REG PHRAD PA LAS CHUR SNANG BA'I SMIG RGYU LTA BU, CHU ME LA THIM PA'I RTAGS DU BA 'PHYUR BA'AM MA GRONG TSO CHEN PO'I STENG GI DU ZHAG 'KHYIL PA LTA BU, ME RLUNG LA THIM PA'I RTAGS MKHA' SNANG ME KHYER TE SRIN BU ME KHYER LTA BU, RLUNG SNANG PA LA THIM PAR RTZOM PA'I RTAGS MAR ME RTEN MED RLUNG GIS MA BSKYOD PA LTA BU, RLUNG SNANG BA LA THIM PA'I SNANG BA RANG DUS SU STON NAM GA-YA' DAG LA ZLA 'OD KYIS KHYAB PA LTA BU'I DKAR LAM PA, SNANG BA MCHED PA LA THIM PA'I TSE STON NAM GA-YA' DAG PA NYI 'OD KYIS KHYAB PA LTA BU'I DMAR LAM PA, MCHED PA NYER THOB LA THIM PA'I TSE STON NAM GA-YA' DAG LA SROD KYI SMAG 'THUG POS KHYAB PA LTA BU'I NAG LAM PA, NYER THOB 'OD GSAL LA THIM PA'I 'OD GSAL RANG DUS SU THOS RANGS NAM MKHA' GA-YA' DAG GI RANG MDOG JI BZHIN PA RNAMS BYUNG BAR MOS LA NGO SHES PAR BYED TSUL
, ,'DIS CHU LA THIM PA'I RTAGS YIN, 'DI'I SNGON DU ZHUGS NAS GNAS PA'I RTAGS SONG, 'DI'I RJES SU TSU ME LA THIM PA'I RTAGS 'BYUNG PAS NGO SHES PAR BYA, KHYAD PAR GNYID DANG 'CHI BA'I TSE YANG 'DI LTA BU 'BYUNG BAS NGO SHES PAR BYA SNYAM PA RNAMS PHYI MA RNAMS LA'ANG RIGS BSGRES TE BYA, 'OD GSAL GYI SKABS SU DBU MA'I MAR SNA NAS THUR SEL GYI RLUNG CUNG ZAD YAR DRANGS PA GYEN DU SONG BA LTE GSANG GI GTUM MO LA PHOG ,DE LAS ME 'BAR BA JE CHER SONG STE SPYI BO'I RTZA 'KHOR LA MA REG TZAM DU SLEB, DE'I 'OD SPYI BO'I BYANG SEMS THIG LE DKAR PO LA PHOGS PAS ZHO RKYAL LA KHAB BRGYAB PAS ZHO DKAR PHROM PHROM 'ONG PA LTAR RAM, MAR DKAR LA NYI 'OD DAM ME 'OD PHOG PAS MAR KHU'I THAG PA 'BAB PA LTAR BYANG SEMS ZHU PA'I THIGS PA HRI LA LI LI BABS PA RIM PA BZHIN MGRIN PA, SNYING KHA, LTE BA, GSANG GNAS, RTAGS KYI RTZE'I BAR DU SLEB PA NA DGA' BZHI STONG BZHI'I NGO BOR BRANG SBROD KYI TSUL DU SKYES PAR BSAM LA, BZHI KA'I SKABS DANG KHYAD PAR LHAN SKYES KYI SKABS SU BDE STONG SBYAR TE MNYAM PAR BZHAG ,DE NAS BYANG SEMS DMIGS PAS GYEN DU BZLOG STE RIM PA LTAR MAS BRTAN GYI DGA' BA BZHI SKYES PAR MOS SHING STONG NYID LA MNYAM PAR BZHAG ,DE LTA BU LA GOMS PA BRTAN PO THOB PA'I TSE, 'OD GSAL DE LAS LDANG PAR RTZOM PA NA DPER NA GZHONG BA LTA BU'I NAD DU CHU BLUG PA RLUNG SOGS KYIS MA BSKYOD PA'I TSE GA-YO MED DU GNAS SHING SER BU PHRA MOS CUNG ZAD BSKYOD PA NA 'DAR BA'AM 'PHRIG 'ONG BA LTAR MNYAM BZHAG DE LAS GA-YO TSAD TSAD PA 'BYUNG, LAS DANG PO PA LA DANG POR DE
LTA BU MI 'BYUNG YANG MNYAM BZHAG DE LAS LDAR BAR 'DOD PA NA, PHUNG PO RNYENG BA LAS GOS SOGS SU MTSAN DPES SPRAS PA'I SGYU MA'I SKUR LDANG SNYAM PA'I 'PHEN PA BTANG LA SGYU MA'I SKUR BZHENGS PAR MOS, DE NAS DE DANG DUS MNYAM DU LUGS LDOG GI NYER THOB SHAR BAR MOS LA, 'DI LUGS LDOG GI NYER THOB YIN, 'DI'I SNGON DU 'OD GSAL SONG, 'DI'I RJES SU MCHED PA 'BYUNG BAS DI NGO SHES BAR BYA, KHYAD PAR RMI LAM DANG BAR DO GRUB PA'I TSE YANG 'DI LTAR 'BYUNG BAS NGO SHES BAR BYA SNYAM PA BYA ZHING, SMIG RGYU'I PAR LA RIGS 'DRE, SGYU MA'I SKUR LANGS PAR MOS BZHIN PA'I NGANG NAS 'OG TU 'BYUNG BA LTAR GYI SEMS DPA' SUM BRTZEGS BSGOM PA SOGS BYAS LA, MNYAM GZHAG LAS LDANG BAR 'DOD PA NA, PHUNG PO RNYING PA DAM TSIG SEMS DPA' BLTAS PA'I THUGS KHAR YE SHES SEMS DPA'I TSUL GYIS 'JUG PAR MOS, MNYAM BZHAG LAS LANGS PA'I RJOS THOB KYI TSE GANG SNANG RANG BZHIN GYIS STONG PA, STONG PA BDE BA, BDE BA LHA SKUR SHAR BAR MOS PA'I SGO NAS RJES THOB KYI NYAMS LEN RNAMS BSKYANG PAR BYA, RLUNG DBU MAR ZHUGS GNAS THIM GSUM BYUNG BAR MOS PA SOGS 'DI RNAMS NI SNGAGS 'KHOR BSGOM PA SOGS DMIGS SKOR PHYI MA RNAMS LA'ANG SBYAR BAR BYA'O, ,GNYIS PA DAG DBEN GYI SKABS SU SNYING KHA'I SNA RTZER SNGAGS KYI THIG LE'I SROG RTZOL BSGOM TSUL LA, N'A RO PA'I MAN NGAG LAS 'BYUNG BA LTAR SNGAGS 'KHOR RGYAS PA BSGOM TSUL NI, SNYING KHA'I CHOS KYI 'KHOR LO RTZA 'DAB BRGYA DKA'I RTZA BA DBU MA LA ZUG CING RTZA 'DAB REL TSIG GNYIS GNYIS DANG RIM PA GSUM GSUM
, ,YOD PAR GSAL GDAB LA, PHYI RIM GYI RTZA 'DAB SHAR MA'I NANG GI RGYAB TU AA THUNG DU, DE'I MDUN DU A'A RING PO, ,DE BZHIN DU LHO MA'I NANG DU AI A'I, NUB MA'I NANG DU AU A'U, BYANG MA'I NANG DU AE AEE, SHAR LHO NAS GA-YAS SKOR DU 'TSAMS KYI NANG DU AO AOO Am AA: RIM PA PAR MA'I SHAR GYI RTZA 'DAB KYI NANG DU, KA KHA GA GHA, SHAR LHO'I NANG DU; TZA TSA DZA DZHA, LHOR, tA thA dA dHA, LHO NUB TU, TA THAD DHA, NUB TU, PA PHA BA BHA, NUB BYANG DU, YA RA LA WA, BYANG DU, SHA shA SA HA, BYANG SHAR DU, NGA NYA nA NA, RIM PA NANG MA'I SHAR DU Ri, LHOR R'i, NUB TU Li, BYANG DU L'i, PA SDE'I THAM MA YIG Am MA GTOGS PA'I YI GE GZHAN THAMS CAD KYI MGOR THIG LER BZHAG LA YI GE RE RE BA MIN PA, RNAMS PHYI NANG DU BSGRIGS TE 'GRENG BA'I RNAM PAR DGOD, NANG MA'I 'TSAMS BZHI STONG PAR BZHAG ,PAD 'DAB TU PHYED NA RTZA 'DAB RIM PA GSUM YONGS SU GYUR PA LAS PAD 'DAB RIM PA GSUM PA NAD MA'I RTZA BA DBU MA LA 'BREL ZHING NANG MA NANG MA'I RTZE MOS PHYI MA PHYI MA'I RTZA BA NON PA GCIG TU GYUR BAR BSAM LA YI GE RNAMS 'PHRENG LA BSGRIGS TE DGOD, DE LTA BU'I RTZA 'DAB BAM PAD 'DAB DMAR PO 'AM, YANG NA PHYI RIM YI GE DANG BCAS PA KHA DOG DKAR PO SKU RDO RJE DANG SNANG BA MTSAN, BAR RIM YI GE DANG BCAS PA DMAR PO GSUNG RDO RJE DANG MCHED PA MTSON, NANG RIM YI GE DANG BCAS PA MTHING NAG THUGS RDO RJE DANG NYER THOB MTSON, RTZA 'KHOR RAM PAD 'DAB KYI DBUS KYI DH'U TI'I NANG DU, THIG LE STENG DKAR LA 'OG DMAR BA SRAN MA PHYED GSHAGS TZAM
GNYIS GA'U KHA SBYAR BA LTA BU'I DBUS SU, NGO BO SHIN TU PHRA BA'I RLUNG SEMS, RNAM PA LANYJA'I AA THUNG DBU CAN GYI SHANG LTA BU KHA DOG MTHING KHA DANG SA SHING 'TSOR BA, RGYAN DU BSTAN PA'I MGOR ZLA TSES THIG LE N'A DA DANG BCAS PA, SHEL DKAR DMAR GNYIS KHA SBYAR BA'I DBUS SU SKUD PA SNGON PO BRGYUS PA LTA BU GCIG GSAL GDAB, RTZA 'KHOR GYI YI GE LA SEMS 'DZIN PA'I TSE DANG POR RIM PA PHYI MA'I SHAR GYI YI GE PHYI MA AA THUNG DU LA SEMS GZUNG, DE NAS DE'I NANG MA A'A RING PO LA, DE NAS LHO'I PHYI MA SOGS PHYOGS BZHI DANG, DE NAS SHAR LHO SOGS 'TSAMS KYI YI GE RNAMS LA, DE NAS RIM PA BAR MA'I SHAR GYI KA LA, DE NAS DE'I NANG MA KHA SOGS LA, DE NAS RIM PA NANG MA'I SHAR GYI RI SOGS DANG, PAD 'DAB KYI YI GE LA SEMS 'DZIN PA'I TSE YANG RIM PA LTAR BZUNG BAR BYA ZHING, PHYI'I AA THUNG DU NAS NANG GI L'I RING PO'I BAR GYI YI GE RNAMS LA SEMS 'DZIN PA'I YUN NYIS 'GYUR, DBUS KYI SNGAGS THIG LA GZUNG NGO, ,SNGAGS THIG NYI TSE BA NI GO SLA, GDONG GI SNA RTZER 'OD KYI THIG LE'I SROG RTZOL BSGOM TSUL NI, DBU MA'I YAR SNA SMIN 'TSAMS NAS SNA BUG GNYIS KYI DBUS KYI KA BA'I RTZE'I BAR THAL LE YOD PAR GSAL BTUB LA, SNYING KHA'I MI SHIGS PA'I THIG LE AA THUNG DANG BCAS PA SNGA MA LTAR GSAL BA LAS, RLUNG PHYIR LNGANG BA'I SGRA H'Um GI GDANGS KYIS MGRIN PA'I RTZA 'KHOR GYI NANG DU YAR SONG, 'JUG PA'I SGRA AOm GYI GDANGS KYIS SLAR LOG STE MI SHIGS PA'I THIG LE LA THIM, GNAS PA'I SGRA AA':'I GDANGS KYIS LDANG 'JUG GCIG GI YUN TSAD DU GNAS PA LAN GSUM, DE NAS H'Um GI GDANGS KYIS SBYI
, ,BO'I RTZA 'KHOR GYI BAR DU SONG, AOm GYI GDANGS KYIS MI SHIGS PA LA THIM, A':'I GDANGS KYIS GNAS PA LAN GSUM, DE NAS SMIN 'TSAMS KYI BAR SONG BA SOGS LAN GSUM, DE NAS SNA SGO NAS THON TE SOR BZHI TZAM DU 'OD KHYIL KHYIL SOD NAS NANG DU 'JUG PA SOGS RLUNG SNGAGS DBYER MED KYI RDOR BZLAS BYA ZHING, DE YANG LDANG BA'I SGRA BUM PA RLUNG GIS KHA NGES PA'I KHA GCOD BLANGS PA LAS BYUNG BA'I SGRA LTA BU, 'JUG PA'I SGRA BUM PA'I NANG DU RLUNG ZHUGS PA LAS BYUNG BA'I SGRA LTA BU, GNAS PA'I SGRA LI PHOR LTA BU LA PHU BTAB PA LAS BYUNG BA'I SGRA LTA BU STE, RLUNG LDANG 'JUG GNAS GSUM LAS YI GE GSUM GYI SGRA 'BYUNG BA RANG AA THUNG GI NGO BOR YOD PA DES MNYAM PA LTA BU'I TSUL GYIS BSGOM PAR BYAL, LAS DANG PO PAS THOG MAR LDANG 'JUG GANG RUNG RE'I YON CHED RANG MNYAM PA'I GNAS PA CHED DU BYA ZHING, RIM GYIS GNAS PA JI RING DANG LDANG 'JUG GNYIS JI CHUNG LA BTANG NAS MTHAR GNAS PA 'BA' ZHIG 'ONG BA LA BSLAB BAR BYA'O, ,GSAD PA'I SNA RTZER RDZAS KYI THIG LE'I SROG RTZOL BSGOM TSUL NI, RANG GI SNYING KHA'I THIG LE LAS THIG LE DKAR PO YUNGS DKAR TZAM ZHIG DANG, YUM GYI SNYING KHA'I THIG LE LAS THIG LE YUNGS DKAR TZEM ZHIG MAR BABS NAS, YUM GYI DH'U TI'I MAR SNA YAB KYI DH'U TI'I MAR SNA'I NANG DU PHU DUNG GI NANG DU PHU DUNG BCUG PA LTAR TSUNG PA'I PHRAD 'TSAMS SU GCIG TU 'DRES TE DKAR LA DMAR BA'I MDANGS CAN DU GYUR PA 'AM; YANG NA RANG GI NGOS DKAR PO DANG YUM GYI DNGOS DMAR PO GNYIS KHA SBYAR BA'I TSUL GYIS YONG BA LA RTZE GCIG TU GTAD NAS BSGOM PAR BYA'O, ,GSUM PA SEMS DBEN GYI SKABS SU
KHYAB BYED LA DMIGS PA'I RDOR BZLAS BYA TSUL NI, RANG GI SBYI GTZUG NAS RKANG MTHIL GYI BAR GYI BUG THAMS CAD LA KHYAB PA'I RTZA RNAMS KYI RTZA BA SNYING GA'I RTZA 'KHOR GYI NANG GI DBU MA LA ZUG CING RTZE MO BA SBU'I BU GDANG KHAD CHAD DU YOD PAR GSAL BTAB LA, SNYING KHA'I THIG LE AA THUNG DANG BCAS LA LAS RLUNG RTZA SBUG THAMS CAD NAS H'Um GI GDANGS KYIS PHYIR LDANG BA SOGS SNGAR LTAR BSGOM PA YIN NO; ;KHA SBYOR BUM PA CAN BSGOM TSUL NI RANG GI DBU MA'I YAR SNA NAS SROG 'DZIN GYIS GTZO BYAS PA'I STENG RLUNG RNAMS NANG DU RDUB, MAR SNA NAS THUR SEL GYIS GTZO BYAS PA'I 'OG RLUNG RNAMS YAR DRANGS TE RLUNG GNYIS MI SHIGS PA LA ROL MED DU BSTIM PAS THIG LE'I STENG NGOS DKAR BA DE SNGAR LAS CHES DKAR DU SONG BA DANG 'OG NGOS DMAR BA DE CHES DMAR DU SONG BAR BSAM LA RTZE GCIG TU BSGOM PA DANG RLUNG 'JAM SBYOR BYAS TE MI BDE BA MI SKYED TZAM DU BZUNG LA MI THUB PA NAD LA BUS SNA BUG NAS BTANG BAR YANG BYA'O, ,BSAM GTAN GNYIS DANG 'DRA BA'I SDUD RIM BSGOM TSUL LA, RTZA LAM GSAL 'DEBS TSUL KHYAB BYED LA DMIGS PA'I RDOR BZLAS KYI SKABS BZHIN BYA STE, RJES GZHIG DANG 'DRA BA'I SDUD RIM NI, SNYING KHA'I MI SHIGS PA'I THIG LA AA THUNG DANG BCAS PA LA 'OD ZER 'PHROS TE PHYI ROL GYI RLUNG THAMS CAD BKUG NAS RTZA SBUG SO SO LA BSTIM, RTZA SBUG SO SO NAS SNYING KHA'I MI SHIGS PA LA BSTIM NAS RTZE GCIG TU SGOM PAR BYED PA DANG, RIL 'DZIN DANG 'DRA BA'I SDUD RIM NI, PHYI ROL GYI RLUNG MI SDUD PAR RANG GI LUS KYI RTZA SBUG SO SO NAS RLUNG THAMS CAD MI SHIGS PA LA BSTIM NAS BSGOM PAR BYED PA'O, ,DE GSUM CI RIGS BSGOM PA LA BRTEN NAS SGYU LUS
, ,'GRUB TU NYE BA'I MTSAN MA JI LTA BU 'BYUNG BA NI, RMI LAM DU RANG NYID CHES KYI GDAN SENG GE'I KHRI CHEN PO'I STENG DU 'DUG BA LA SANGS RGYAS BYANG SEMS KYIS BSKOR BAR RMI BA SOGS RTZA RGYUD LAS 'BYUNG BA LTAR RO,, GNYIS PA BDEN PA GNYIS KYI RDZOGS RIM NI, KUN RDZOB SGYU MA'I RDZOGS RIM, DON DAM 'OD GSAL GYI RDZOGS RIM, DBYER MED ZUNG 'JUG GI RDZOGS RIM GSUM LAS, DANG PO NI, SEMS DBEN GYI RTOGS PA RNAMS BSKYANGS PAS SEMS DPEN MTHAR THUG GI DPE'I 'OD GSAL 'GRUB CING, DE 'DRA'I 'OD GSAL GYI SEMS DO DE LHAN GCIG BYED RKYEN DANG, DE'I BZHON BA'I RLUNG GIS NYER LEN BYAS PA LA BRTEN NAS, THOGS MAR SNYING KHA'I KHAMS DKAR DMAR GYI THIG LE'I DBUS SU DKAR SHAS CHE BA'I 'OD ZER LNGA PA CAN GYI SGYU MA'I SKU RTEN DANG BRTEN PA'I RNAM PA CAN DU PHUNG PO RNYING BA LAS GOS LOGS SU PHYE NAS LDANG BAR 'GYUR RO, ,GNYIS PA NI, SGYU LUS BA DES SKU'I SEMS DPA' GSUM BRTZEGS SOGS GSUM PO SO SOR BSGOM TSUL LAG RJES LAS 'BYUNG BA LTAR RAM, RANG GI SNYING KHAR KHAMS GSUM SEMS CAN THAMS CAD KYI LUS DANG RANG GI LUS DBYER MED DU BYAS NAS SKU RDO RJE RNAM SNANG DU BSGOM PA SKU'I DAM TSIG SEMS DPA', DE'I THUGS KHAR AOm YIG BSGOM PA SKU'I YE SHES SEMS DPA', AOm YIG GI MGONG THIG LE N'A DA DANG BCAS PA BSGOM PA SKU'I TING NGE 'DZIN SEMS DPA', THIG LE'I NANG DU KHAMS GSUM SEMS CAN THAMS CAD KYI DAG DANG RANG GI DAG DBYER MED DU BYAS NAS GSUNG RDO RJE 'OD DPAG MED DU BSGOM PA GSUNG GI DAM TSIG SEMS DPA', DE'I THUGS KHAR AA': YIG BSGOM PA GSUNG GI YE SHES SEMS DPA', AA': YIG GI MGOR THIG LE N'DA DANG BCAS PA BSGOM PA GSUNG GI TING NGE 'DZIN SEMS DPA', THIG LE'I NANG DU KHAMS GSUM SEMS CAN THAMS CAD KYI YID DANG RANG GI YID DBYER MED DU BYAS NAS THUGS RDO RJE MI BSKYOD PAR BSGOM PA THUGS KYI DAM TSIG SEMS DPA', DE'I THUGS
KHAR H'Um YIG BSGOM PA THUGS KYI YE SHES SEMS DPA', H'Um YIG GI MGOR THIG LE N'DA DANG BCAS PA BSGOM PA THUGS KYI TING NGE 'DZIN SEMS DPA' STE, SEMS DPA' DGU BRTZEGS SU GSAL BA'I THUGS KHA'I TING NGE 'DZIN SEMS DPA' LAS 'OD ZER 'PHROS TE SNOD BCUD THAMS CAD LA PHOG PAS, SNOD RNAMS GZHAL YAS KHANG DANG BCUD RNAMS RDO RJE 'CHANG GI GO 'PHANG LA BKOD, DE RNAMS 'OD DU ZHU NAS SNOD RNAMS BCUD LA THIM, BCUD RNAMS SKU'I DAM TSIG SEMS DPA' LA THIM PA SOGS RIM GYIS THIM NAS MTHAR N'AD YANG JI PHRA JE PHRAR GYUR TE 'OD GSAL LA THIM PA'I 'OD GSAL STONG PA NYID LA RTZE GCIG TU MNYAM PAR 'JOG PA RJES GZHIG GI SDUD RIM DANG, PHYI ROL GYI SNOD BCUD RNAMS ME SDUD PAR, THUGS KYI TING NGE 'DZIN SEMS DPA'I 'OD ZER SKU'I DAM TSIG SEMS DPA' SOGS LA PHOG PAS DE RNAMS 'OD DU ZHU BA RIM GYIS BSDUS TE MTHAR STONG PA NYID LA RTZE GCIG TU MNYAM PAR 'JOG PAR RIL 'DZIN GYI SDUD RIM GNYIS CI RIGS BSGOM PA LA BRTEN NAS RIM PA BZHI BA DON GYI 'OD GSAL MNGON DU BYED PAR 'GYUR NGO, ,GSUM PA NI, DON GYI 'OD GSAL DE LAS KHANGS PA DANG DUS MNYAM DU SLOB PA'I ZUNG 'JUG PHAL BA SPANGS PA ZUNG 'JUG THOB PAR 'GYUR ZHING, ZUNG 'JUG PA DES STONG PA NYID LA RTZE GCIG TU MNYAM PAR BZHAG NAS BSGOM PA SOGS MNYAM RJES KYI DGE SBYOR RNAMS BSKYANGS PA LA BRTEN NAS RIM GYIS SLOB PA'I ZUNG 'JUG GI GTZO BO RTOGS PA ZUNG 'JUG DANG, 'BRAS BU MTHAR THUG PA MI SLOB PA'I ZUNG 'JUG KHA SBYOR YAN LAG BDUN LDAN RNAMS THOB PAR 'GYUR RO, ,'DI NI RJE BTZUN RDO RJE 'DZIN PA CHEN PO DKON MCHOG RGYAL MTSAN DPAL BZANG PO'I ZHAL SNGA NAS KYI GSUNG GI BDUD RTZI BCUNG ZAD MYANGS PA'I GYIN PA NGAG DBANG BLO BZANG CHOS LDAN GYIS RANG GI RJED THOR ZIN BRIS BGYIS PA'O,, ,,'DIS KYANG BSTAN PA'I SNYING PO YUN RING DU GNAS PAR GYUR CIG, ,,