, ,RONG THANG STENG DGE BSNYEN RDO RJE RAB BRTAN LA MKHA' SPYOD MA'I BSNYEN CHEN SKABS ZHUS STZAL THUN DANG THUN MTSAMS SKOR GYI LAG LEN BSLAB BYA LAM GYI MYONG BA DPYID KYI RGYAL MO'I GLU DBYANGS BZHUGS SO, ,
, ,THUN DANG THUN MTSAMS KYIS SLAB BYA ZHIB RGYAS DGOS TSUL GSUNGS PA CUNG ZAD BRI BAR, GZHI RTZA THUN DANG THUN MTSAMS KYI DMIGS RNAM SKYONG SKABS NYAMS LEN MTHA' DAG BSNYEN YIG GZHUNG DU GSAL BA LTAR LA, BSNYEN MTSAMS KYI BZLAS PA'I SKABS BZLAS DMIGS GZHUNG NAS GSUNGS PA YANG CUNG ZAD SKYONG DGOS MOD, RANG RE LAS DANG PO PA RNAMS KYIS BYANG CHUB LAM GYI RIM PA'I DMIGS RNAM BSKYANG NA SHIN TU LEGS SHING, DE LTAR SKYONG BA'I PHYAG BZHES DANG MAN NGAG KYANG NGES PAR MCHIS, DE YANG PHYAG LEN 'GA' ZHIG TU BSNYEN MTSAMS ZLA BA GCIG LTA BU BGYIS NA BSHES GNYEN BSTEN TSUL NAS SEMS BSKYED KYI BAR DMIGS
, ,RNAM NYIN ZHAG CHA BGOS TE DMIGS SKOR RE LA GANG THOB RE BSKYANG NAS RIM BZHIN DMIGS PA SPOS PAS BSNYEN PA RDZOGS PA NA LAM RIM SHAR SGOM SHIN TU RGYAS PA LAN GCIG 'GRO BA BCAS SHIN TU LEGS MOD, DES NA RANG RE LTA BU BAG CHAGS 'JOG TZAM DANG, NYAMS 'OG TU TSUD TZAM BYUNG BA LAS RTZOL BCAS RTZOL MED KYI MYONG BA GANG YANG MI THON, YANG PHYAG LEN 'GA' ZHIG TU, SNGA THUN LA BSHES GNYEN BSTEN TSUL NAS DBU BTZUGS TE SROD THUN GYI MTHAR SEMS BSKYED KYI BAR GRUB PAR BYAS TE NYIN RER SHAR SGOM CHA TSANG RE BYED PA'I PHYAG LEN ZHIG KYANG SNANG LA, DES KYANG GONG BZHIN BAG CHAGS BRTAN PO 'JOG PA TZAM LAS RTZOL
BCAS RTZOL MED KYI MYONG BA GANG YANG MI THON, DES NA LAM RIM LA BAG CHAGS BRTAN PO 'JOG PA YANG GZHAN DU YI DAM GYI LHA ZHAL MJAL BA DANG, BZLAS GRANGS DUNG PHYUR SONG BA, MNGON SHES DANG RDZU 'PHRUL RNYED PA SOGS LAS KYAR LHAG PA'I KHYAD CHOS DU MA DANG LDAN ZHING, RANG RE RNYED DKA' DON CHE'I RTEN LAN GCIG TZAM RNYED, 'JAM MGON SNYAN BRGYUD KYI BSTAN PA DANG LAN GCIG TZAM MJAL BA'I DUS 'DIR MYONG BA KHYAD PAR CAN SA MTSAMS GANG THUB ZHIG TU SLEB AE THUB NGES PAR BLTA DGOS PAS, DES NA LAM YONGS RDZOGS LA BAG CHAGS 'JOG PHYIR BSHES GNYEN BSTEN TSUL GYI DBU NAS SEMS BSKYED KYI BAR SHAR SGOM DANG, DE MIN SPYOD PA SPYI BSLA BA DANG ZHI LHAG GI SKOR SOGS SMON LAM TSUN CHAD KYI THOG ,BSKYED RIM BDAG BSKYED LA DMIGS RNAM YID BSHAR BYED PA DER
, ,'DUS SHING, SROD THUN GYI MTHA' LTA BUR RDZOGS RIM MDOR BSDUS RE SHAR SGOM BCAS NYIN LTAR LAM YONGS RDZOGS LA SHAR SGOM MDOR BSDUS RE BYAS, DE NAS DMIGS SKOR GCIG LA DMIGS RNAM RGYAS PAR BSKYANG STE, MYONG BA GNAD DU BKAR NAS 'DON DGOS, DE YANG DANG PO LAM GYI DBU NAS NAN TAN BYED DGOS PAS, THOG MAR BSHES GNYEN BSTEN TSUL NYID LA MYONG BA 'DON DGOS MOD, 'ON KYANG BSHES GNYEN BSTEN TSUL GYIS BCAD RTZA BA DAD PA SBYANG BA 'DI SHIN TU SKYE DKA' BAS, 'DI LA MYONG BA THON THON BYAS NA 'GA' ZHIG MI TSE HRIL PO 'DI LA 'GOR NAS, DAL 'BYOR SOGS DMIGS RNAM GONG MA LA DMIGS PA SPO BA'I SKAL BA BRAL BA LTA BU YONGS NYEN YOD PAS, DES NA SKYONG TSUL THABS MKHAS KYI 'PHRUL 'DEGS LTA BUR BSHES GNYEN
BSTEN TSUL GYI NANG NAS DMIGS SKOR GCIG DANG, DAL 'BYOR GYI DBU NAS DMIGS SKOR GCIG BCAS SO SO MYONG BA MA THON GYI BAR NYIN LTAR DMIGS SU BKAR NAS RGYAS PAR SKYONG ZHING, DE MAN LA SNGAR SMRAS PA LTAR SHAR SGOM MDOR BSDUS RE TZAM BYED, DE YANG DPER NA THUN BZHI LTA BU'I THUN DANG PO GSUM MAM GNYIS LA DMIGS SKOR GNYIS PO 'DI KHO NA SKYONG ZHING, THUN THA MA GNYIS SAM GCIG LTA BUR LAM YONGS RDZOGS SEMS BSKYED BAR DU SHAR SGOM BYED CING, SEMS BSKYED KYI MJUG TU BYANG SDOM LEN PA'I DMIGS RNAM KYANG BSTEN, SPYOD PA SBYI BSLAB SOGS LA BLA MCHOD DAM BSDUS DON LTA BUS SMON LAM GYI YUL DU BYAS NAS SKYONG, DE DAG GI BAR SKABS 'GAR BSNYEN YIG DANG BSKYED RIM NAS GSUNGS PA'I DMIGS RNAM KYANG BSKYANG, 'ON KYANG SNYING GAR DMIGS RNAM GTAD PA
, ,MANG NA SROG RLUNG GI RGYUR 'GYUR NYEN CHE BAS STABS GZAB DGOS, GONG GI BSHES GNYEN BSTEN TSUL DANG, DAL 'BYOR NAS DMIGS SKOR RE RE SKYONG ZHES PA'ANG, BSHES GNYEN BSTEN TSUL GYI SKOR LAS BSTEN PA'I PHAN YON BRGYAD TZAM KHO NA DANG, DAL 'BYOR GYI SKOR NAS DAL 'BYOR NGOS BZUNG BA KHO NA GNYIS LA MYONG BA 'DON, MYONG BA 'DON TSUL YANG, DPER NA BSHES GNYEN BSTEN PA PHAN YON CHE STE, ZHES BSGRUB RGYU'I MA RTZA LTA BU BLO PHUGS SU BZHAG NAS, DE CHE BA'I RGYU MTSAN BRGYAD LUNG DANG RIGS PA 'DI DANG 'DI ZHES RANG GIS RANG LA RTZOD PA 'PHANGS PA LTA BU RGYU MTSAN DU MA BKOD NAS NGES SHES 'DREN PA LA 'BAD, GRUB DON YID 'GYUR DANG NGES SHES CUNG ZAD THON PA NA DA NI DE LTAR YIN NO SNYAM DU DE'I STENG DU BLO THAG BCAD NAS 'JOG ,YANG DE BZHIN
DU RGYU MTSAN BSAM PA DPYAD SGOM DANG NGES SHES RNYED PA NA 'JOG SGOM ZUNG 'BREL DU YANG YANG BSKYANG DGOS, SKYONG LUGS 'DIS ZHI GNAS MA GTOGS PA'I LHAG MTHONG BAR THAMS CAD LA 'DI LTAR BYA, DE YANG DMIGS RNAM 'OG MA 'OG MA LA MYONG BA MA THON BAR GONG MA GONG MA LA DMIGS PA MI SPO ZHING, 'OG MA 'OG MA LA MYONG BA THON PA NA GONG MA GONG MA LA DMIGS PA SPO, NYAMS MYONG SKYE SLA BA 'GA' ZHIG LA ZHAG BDUN PHRAG RE GNYIS KYIS KYANG MYONG BA THON PA 'BYUNG ZHING, SKYE DKA' BA 'GA' ZHIG LA ZLA GRANGS DANG LOR YANG MYONG BA MI THON PA 'BYUNG YANG, 'GRO BSAM PA MI BYED PAR YUN BSRING STE MYONG BA 'DON PA LA 'BAD, DE LTAR 'BAD NA RTOGS PA'I NYAMS MYONG TSAD MA GONG NAS GONG DU SKYE ZHING 'PHAR TE NYAMS MYONG GI RKANG TSUGS PAR 'GYUR, MYONG BA 'DON LUGS KYI YI GE TSIGS SU BCAD PA SBYIN
, ,BDAG SPOM MDA' NYI MA LAGS SU PHUL BA ZHIG YOD PA SHOG SGRIL ZUR BSHUS KYIS PHUL YOD, GZHAN DU NA CHOS GSHA' MA ZHIG BYED BSAMS KYANG, NYAMS MYONG GI LAG RJES THON PA GANG YANG MI 'BYUNG ZHING, 'DI LTAR BSKYANG NA 'DI SNANG GI RNAM GA-YENG MA CHOD BZHIN PA'I NGANG NAS KYANG ZLA SKYED DANG ZHAG SKYED THON PAR 'GYUR RO, ,THUN MTSAMS KYI NYAMS LEN NI GTZO BOR THUN DNGOS GZHI'I SKABS SU DMIGS PA GANG SKYONG BA DE NYID YANG DANG YANG DU DRAN ZHING, 'GRO 'CHAG NYAL 'DUG GI SPYOD LAM THAMS CAD DE DANG BSRE THUB PA ZHIG BYAS NA DGE SBYOR GYI YAR SKYED THON PA LA GNAD CHE, DPE CHA LTA RTOG BYED DGOS SHING, DE YANG RANG LUGS KYI BLA MA GONG MA'I RNAM THAR DANG, LAM RIM, BLO SBYONG, RIM GNYIS KYI DPE SOGS BLTA BA LAS, DPE GANG BYUNG SNA TSOGS BLTA BA SHES RAB
'CHAL BA'I RGYUR 'GRO ,THUN DNGOS GZHI'I SKABS SU DMIGS PA GANG SKYONG BA DE'I SKOR GYI GSUNG RAB LA BLTA RTOG BYED PA LHAG PAR GAL CHE; SNGA DRO LDANG BA'I RNAL 'BYOR SOGS SPYI LTAR LA, STAN LA 'DUG NAS MDANG MA SHI BAR DA NANGS LANGS RGYU BYUR BA 'DI SHIN TU LEGS, DA NI SPYIR TSE LHAG GANG YOD, LHAG PAR LO 'DI, DE LAS KYANG ZLA BA 'DI, DE'I NANG NAS KYANG DE RING GI NYI MA 'DI LA THEG PA CHEN PO'I CHOS GSHA' MA ZHIG BSGRUB NAS SNYING PO LEN THUB PA ZHIG BYED SNYAM DU 'PHEN PA GTONG, 'GYUR SNGAGS DANG PHRENG SNGAGS, NGAG BYIN RLABS SOGS BYA, DE NAS DAL 'BYOR DANG MI RTAG PA GTZO BOR BYAS PA'I NGES 'BYUNG DANG BYANG CHUB KYI SEMS GSAL 'DEBS DANG BCAS KUN SLONG BCOS, BLA MCHOD DANG THUN DRUG LTA BU'I BLA MA'I RNAL 'BYOR RGYAS BSDUS GANG RUNG SNGON DU BTANG NAS BDAG BSKYED KYI THUN DNGOS GZHIR
, ,'JUG ,THUN GZHAN RNAMS KYI 'GOR YANG MI RTAG PA NAN TAN RE BSGOM NA, DNGOS GZHI'I THUN GNAD DU 'GRO BA LA KHYAD CHE, NGES BSKUL NAS KUN SLONG DNGOS GZHI BYANG CHUB KYI SEMS KYIS 'JUG DGOS LA, DE YANG DPER NA BDAG 'CHI BAR NGES SHING, 'CHI BA DE YANG NAM YONG NGES PA MED PAS DE'I GONG DU SEMS CAN THAMS CAD KYI DON DU SANGS RGYAS KYI GO 'PHANG BSGRUB PAR BYA, DE'I PHYIR DU THUN 'DI NYID RANG LA RJE BTZUN RDO RJE RNAL 'BYOR MA'I SKU GSUM GYI GO 'PHANG MNGON DU BYA'O SNYAM NAS 'JUG DGOS, THUN DNGOS GZHI'I SKABS KYANG DE LTA BU'I KUN KLONG YANG YANG DRAN PAR BYED, THUN MTSAMS SHIG TU NYIN ZHAG PHRUGS GCIG NAS GSUNGS PA LTAR BSKOR RTEN BCOS NAS BSKOR BA BYA BA'AM, MTSAMS NANG DU 'CHAG PA MANG DU MA BYAS TSE, MTSAMS YUN RING NA
LUS LA NAD SOGS BSKYED NAS CHOS KYI BAR CHAD DU 'GYUR BAS SPYOD LAM 'CHAG PA MANG DU BYED, MTSAN MA SOGS BZANG PO LA RLOM SEMS DANG, NGAN PA LA RNAM RTOG BYED NA BAR CHAD 'JUG PA'I RGYUR 'GRO BAS RE DOGS GANG YANG MI BYED, BLO HA CANG BRTZON BSGRIMS GU DOGS CHE NA'ANG BLO SKYON GYI BAR CHAD 'JUG PAS GTING GRIMS LA PHYI BAG YANGS PAR BYA, BAR CHAD ZHES PA PHYI NANG GSANG GSUM GANG NAS 'ONG MI SHES PAS RTOG PA GRUNG PO BYED DGOS, SPYIR GEGS SEL DANG BOGS 'DON GYI RIGS RANG RANG LA MI 'DRA BA MANG DU YOD KYANG, THAMS CAD LA SPYI KHYAB RGYAL PO LTA BU'I BLA MA LA GSOL BA 'DEBS PA NYID YIN, DGE SBYOR 'DI DAG LA 'PHRAL 'PHRAL DU RTOGS PA SKYE RE BA DANG, LHA ZHAL MJAL DU RI BA LTA BU'I BLO SNA BREL 'TSUBS MI BYA BAR YUN BSRING STE MTHAR THON PA'I BLO RGYA BSKYED, SKYID SDUG BZANG NGAN BSTOD SMAD SOGS RKYEN
, ,GANG BYUNG YANG, DE'I RJES SU MI 'BRANG BAR THOG BRDZIS BTANG NAS DGE SBYOR GYI GROGS DANG LAM DU 'KHYER CI THUB BYA, 'ON KYANG NA TSA SOGS TSE'I BAR CHAD KYI RIGS LA SNANG CHUNG MI BYA BAR DE SEL THABS DANG RING 'TSO'I THABS LA NAN TAN 'BAD, NUB MO NYAL KHAR SENG GE RNAM PAR RTZE BA'I TING NGE 'DZIN ZHES DE NYIN GYI SPYOD LAM LA KHA PHYIR BLTAS KYIS ZHOGS PA NAS BZUNG 'PHEN PA BTANG BA LTAR BYUNG AE 'DUG LEGS PAR BLTA RTOG BYED, SDOM PA GSUM GYI BCAS MTSAMS DANG 'GAL BA'I SDIG LTUNG SOGS NYON MONGS DANG NYES SPYOD JI 'DRA BYUNG 'DUG ,DGE BA'I PHYOGS KYANG JI 'DRA BYUNG 'DUG LEGS PAR BSNGO BGRANG RTOG ZHIB KYIS TSUL BZHIN MA BYUNG BA RNAMS RANG GIS RANG LA DMA' PHAB CING 'GYOD PA BSKYED, DE NYIN GYI SDIG LTUNG
GANG BYUNG LA BSHAGS PA NAN TAN BYED, SANG NYIN DE LTAR MI BYA BA'I ZHE DAM DRAG TU BYA, DE'I NYIN DGE SBYOR LEGS PO BYUNG 'DUG NA DGA' BA BSGOM, SANG YANG DE LTAR BYED SNYAM PA'I 'PHEN PA BTANG, DE NYIN GYI DGE BA RNAMS BSNGO SMON SPYI DANG, LHAG PAR NAM 'CHI NGES MED YIN PAS DO NUB MAR NYAL NAS SANG LANGS RGYU AE 'ONG NGES PA MED LA, DO NUB SDOD PA'I GDENG YANG MED, GAL TE DO NUB LTA BU GLO BUR DU 'CHI NA'ANG 'GYOD PA MED PAR BYED DGOS PAS SDIG LTUNG GANG YOD LA BSHAGS SDOM NAN TAN DANG, DGE RTZA GANG YOD PHYOGS GCIG TU BSDOM NAS THAR PA DANG THAMS CAD MKHYEN PA'I RGYUR 'GRO BA'I BSNGO SMON SHUGS DRAG TU GDAB, SMON LAM GYI RIGS GANG YANG RUNG BA BTON NAS GTAN 'DUN GYI SMON LAM NAN TAN DU 'BAD, BKA' GDAMS GONG MA RNAMS KYIS 'O CAG DA LTA SHI
, ,YANG 'DUN MA 'DI RANG LAS MED DO, ,ZHES GSUNGS PA LTAR DO NUB SHI YANG SKYID, 'GYOD PA MED SNYAM PA ZHIG BYAS NAS NYAL BA'I RNAL 'BYOR LA 'JUG ,SANG LDANG BA'I RNAL 'BYOR NAS 'JUG TSUL KHOR MO YUG TU SKYONG, DE LTAR MTSAMS LA 'DUG KYANG RUNG MI 'DUG KYANG RUNG, TSE GCIG GI NYAMS LEN NYIN ZHAG PHRUGS GCIG TU DRIL NAS 'DI LTAR BSKYANG NA NGES LEGS KYI RTZA BA TSUGS PAR 'GYUR RO,, ,,DAD GTONG RAB YANGS DPAL LDAN TSE RING GIS ,RGYAL BSTAN RNAM RGYAL YON SBYAR RNAM DKAR MTHUS, ,SA LAM BGROD PA RAB MYUR SHING RTA'I SHUGS, ,ZUNG 'JUG GDOD MA'I RGYAL SAR MYUR 'GOD SHOG, ,,