KL00058E

RGYA GAR SKAD DU, A'ARYA YUshMI NADNAm GARBH'A BA KRANTI NI RA DE SHA, BOD SKAD DU, 'PHAGS PA TSE DANG LDAN PA DGA' BO LA MNGAL DU 'JUG PA BSTAN PA ZHES BYA BA THEG PA CHEN PO'I MDO, BAM PO GCIG PA, SANGS RGYAS DANG BYANG CHUB SEMS DPA' THAMS CAD LA PHYAG 'TSAL LO, ,'DI SKAD BDAG GIS THOS PA DUS GCIG NA BCOM LDAN 'DAS MNYAN YOD NA RGYAL BU RGYAL BYED KYI TSAL MGON MED ZAS SBYIN GYI KUN DGA' RA BA NA BZHUGS TE, DE NAS DE'I TSE TSE DANG LDAN PA DGA' BO PHYI

, ,DRO'I DUS KYI TSE NANG DU YANG DAG 'JOG PA LAS LANGS TE DGE SLONG LNGA BRGYA DANG LHAN CIG TU BCOM LDAN 'DAS GA LA BA DER DONG STE THAL MO SBYAR NAS GUS PAS BCOM LDAN 'DAS KYI ZHABS LA PHYAG 'TSAL NAS PHYOGS GCIG TU 'KHOD DO, ,DE NAS BCOM LDAN 'DAS KYIS TSE DANG LDAN PA DGA' BO DANG DGE SLONG RNAMS LA BKA' STZAL PA, NGA LA CHOS KYI RNAM GRANGS THOG MAR DGE BA, BAR DU DGE BA, THA MAR DGE BA, DON BZANG PO, ,GCIG PU, MA 'DRES PA, YONGS SU RDZOGS PA, YONGS SU DAG PA, YONGS SU DKAR BA, TSANGS PAR SPYOD PA'I CHOS 'DI LTA STE, MNGAL DU 'JUG PA ZHES BYA BA'I CHOS KYI RNAM GRANGS YOD KYI, LEGS PAR NYON LA YID LA ZUNGS SHIG DANG, NGAS KHYOD LA RNAM PAR PHYE STE BSTAN PAR BYA'O, ,BCOM LDAN 'DAS LA TSE DANG LDAN PA DGA' BOS GSOL PA, BCOM LDAN 'DAS, DE BZHIN DU THOS PAR 'TSAL LO, ,ZHES GSOL PA DANG, DE NAS BCOM LDAN 'DAS KYIS TSE DANG LDAN PA DGA' BO LA 'DI SKAD CES BKA' STZAL TO, ,DGA' BO, SEMS CAN RNAMS NI, MNGAL DU 'JUG PAR 'DOD PA'I TSE RGYU DANG, RKYEN PHUN SUM TSOGS PAR GYUR NA NI, LUS LEN PAR 'GYUR GYI, GAL TE PHUN SUM TSOGS PAR MA GYUR NA NI, LUS LEN PAR MI 'GYUR RO, ,DE LA RKYEN DANG MI LDAN PA ZHES BYA BA GANG ZHE NA,

'DI LTA STE, PHA DANG, MA GNYIS KA YANG CHAGS PA'I SEMS BYUNG BAR GYUR LA, BAR MA DO'I PHUNG PO YANG MNGON DU GYUR CING SKYE BA'I GNAS YONGS SU TSOL BAR BYED KYANG PHA MA DE DAG GI 'DU 'PHROD SNGA PHYIR GYUR CING DUS GCIG TU BYUNG BAR MA GYUR TAM, SO SO'I LUS LA NAD RNAMS LDAN PAR GYUR NA YANG MNGAL DU 'JUG PAR MI 'GYUR RO, ,GAL TE MAL MNGAL RLUNG DANG, MKHRIS PA DANG, BAD KAN DANG, KHRAG GIS NYE BAR NON PAR GYUR TAM, MTSAMS SHAS GANG BA'AM, SMAN GYIS GANG BA'AM, DBUS NAS 'DRA BA'AM, GROG MO'I RKED PA 'DRA BA'AM, RNGA MO'I KHA 'DRA BA'AM, SHING RTA'I TSIGS PA BZHIN SOG KHAR 'DUG PA'AM, SHING RTA'I SROG SHING LTA BUR 'DUG PA'AM, SHING RTA'I LTE BA'I KHA LTA BUR 'DUG PA'AM, SHING LO LTA BUR GYUR PA'AM, SPA LTA BUR GYU GYUR 'KHYIL BAR GYUR TAM, MNGAL GYI NANG NAS KYI GRA MA SKYES PA LTA BUR GYUR TAM, KHU CHU DANG KHRAG MANG DU 'DZAG CING SKAD CIG YUD TZAM YANG 'DUG TU MI BTUB PAR GYUR TAM, THUR DU 'DZAG PAR GYUR TAM, MNGAL GYI LAM RTZUB PAR GYUR TAM, STENG DU YANGS PA'AM, 'OG TU YANGS PA'AM, YO BA'AM, ZAB PA MA YIN PA'AM, RDOL NAS ZAGS PA'AM, MTHO BA'AM, DMA' BA'AM, THUNG ZHING DOG PA'AM, NAD SNA TSOGS DANG BCAS PAR GYUR NA YANG MNGAL DU 'JUG PAR MI 'GYUR, GAL TE PHA MA

, ,CHO RIGS BTZUN ZHING BSOD NAMS CHEN PO DANG LDAN PAR GYUR LA, BAR MA DO'I PHUNG PO BSOD NAMS CHUNG BA DANG, BAR MA DO'I SRID PA CHO RIGS BTZUN ZHING BSOD NAMS CHEN PO DANG LDAN PAR GYUR LA, PHA MA BSOD NAMS CHUNG BAR GYUR TAM, GNYIS KA BSOD NAMS DANG LDAN YANG PHAN TSUN PHRAD PAR 'GYUR BA'I LAS BSAGS PAR MA GYUR NA YANG MNGAL DU 'JUG PAR MI 'GYUR RO, ,'DI LTAR BAR MA DO'I PHUNG PO DE MNGAL DU 'JUG PAR 'GYUR BA NA THOG MA KHO NAR PHYIN CI LOG GI SEMS RNAM PA GNYIS 'BYUNG BAR 'GYUR TE, GNYIS GANG ZHE NA, 'DI LTA STE, PHA MA GNYIS PHRAD PAR GYUR PA'I TSE GAL TE PHOR 'GYUR BA ZHIG YIN NA NI, MA LA NI, CHAGS PA SKYE BAR 'GYUR LA, PHA LA NI, ZHE SDANG SKYE BAR 'GYUR TE, PHA'I KHU BA BYUNG NA, 'DI NI, BDAG GI YIN NO, ,SNYAM DU SEMS SO, ,GAL TE MOR 'GYUR BA ZHIG YIN NA NI, PHA LA NI, CHAGS PA SKYE BAR 'GYUR LA, MA LA NI, ZHE SDANG SKYE BAR 'GYUR TE, MA'I KHU BA BYUNG NA, 'DI NI, BDAG GI YIN NO, ,SNYAM DU SEMS PAS, GAL TE 'DI LTA BU'I ZHE SDANG DANG, CHAGS PA'I SEMS SKYES PAR MA GYUR NA, MNGAL DU 'JUG PAR MI 'GYUR RO, ,GZHAN YANG DGA' BO, JI LTAR MA'I MNGAL DU 'JUG PAR 'GYUR ZHE NA, 'DI LTA STE, PHA MA YANG CHAGS PA'I SEMS SKYES PAR GYUR, DUS KYI ZLA MTSAN

YANG RJES SU MTHUN PAR GYUR, BAR MA DO'I PHUNG PO YANG MNGON DU GYUR LA, GONG MA LTA BU'I SKYON MANG PO YANG MED CING LAS KYI RKYEN DANG YANG LDAN PAR GYUR NA, MNGAL DU 'JUG PAR 'GYUR RO, ,'DI LTAR BAR MA DO'I PHUNG PO DE MNGAL DU 'JUG PAR 'DOD PA NA DE YANG RNAM PA GNYIS SU 'GYUR TE, GNYIS GANG ZHE NA, BSOD NAMS DANG MI LDAN PA DANG, BSOD NAMS CHEN PO DANG LDAN PA GANG YIN PA'O, ,BSOD NAMS DANG MI LDAN PA GANG YIN PA DE NI, RNAM PAR RTOG PA'I SEMS BYUNG NAS YUL MTHONG BAR GYUR PA NA 'DI SNYAM DU SEMS TE, DENG BDAG NI; RLUNG DANG, GRANG BA DANG, GNAM RMUGS PA DANG, CHAR 'BAB PA DANG, SKYE BO MANG PO'I CA CO DANG, MANG PO'I MTHU STOBS KYIS GNOD PAR BYED PA DANG PHRAD PAR GYUR TE, ,ZHES 'JIGS SHING SKRAG PA SKYES NAS DENG BDAG RTZVA'I KHYIM DANG, LO MA'I KHYIM DANG, RTZIG PA'I DRUNG DBEN PAR 'JUG PAR BYA'O, ,YANG NA RI DANG, NAGS STUG PO DANG, BRAG PHUG DAG TU 'JUG BAR BYA'O, ,SNYAM DU SEMS TE, GZHAN YANG 'DU SHES RNAM PA SNA TSOGS BSKYED NAS JI LTAR MTHONG BA BZHIN DU MA'I MNGAL DU 'JUG PAR BYED DO, ,GANG BSOD NAMS CHEN PO DANG LDAN PA DE YANG 'DI SNYAM DU DENG BDAG NI, RLUNG DANG, GRANG BA DANG, GNAM RMUGS PA DANG, CHAR 'BAB PA DANG, SKYE BO MANG PO'I CA CO DANG, MANG PO'I MTHU STOBS KYIS GNOD PAR BYED PA DANG

, ,PHRAD PAR GYUR TO, ,ZHES 'JIGS SHING SKRAG PA SKYES NAS KHANG PA BRTZEGS MA'I STENG DU 'DZEG PA'AM, YANG THOG MTHON PO'I STENG DU 'DZEG PA'AM, GZHAL MED KHANG GI NANG DU 'JUG PA'AM, KHRI LA 'DUG PAR BYA'O, ,SNYAM DU SEMS TE, GZHAN YANG 'DU SHES RNAM PA SNA TSOGS BSKYED NAS JI LTAR MTHONG BA BZHIN DU MA'I MNGAL DU 'JUG PAR 'GYUR RO, ,BCOM LDAN 'DAS KYIS BKA' STZAL PA, DGA' BO, 'DI LTAR BAR MA DO'I PHUNG PO DE THOG MA KHO NAR MNGAL DU ZHUGS PA GANG YIN PA DE NI, MER MER PO ZHES BYA STE, PHA MA'I MI GTZANG BA DANG, 'DAS PA'I LAS LA BRTEN NAS LUS LEN PAR BYED KYANG 'DI LTAR LAS DE DANG, PHA MA'I RKYEN RNAMS KYIS SO SO NAS RANG BSKYED PAR MI BYED KYI, 'DUS PA'I MTHU STOBS KYIS LUS LEN PAR BYED PAS, 'DI LTA STE, DPER NA, SNOD KYI NANG DU ZHOS BKANG NAS SKYES BU'I RTZOL BA DANG, THAG PA LA SOGS PA LA BRTEN TE MAR 'BYUNG BA YANG RKYEN RNAMS LAS DMIGS PAR MI 'GYUR MOD KYI, 'ON KYANG 'DUS PA'I MTHU LAS MAR 'BYUNG BAR 'GYUR BA DE BZHIN DU MER MER PO'I LUS KYANG DE BZHIN TE, 'DI LTAR RGYU DANG, RKYEN GYI MTHUS MNGAL DU LUS MNGON PAR 'GRUB PAR 'GYUR RO, ,DGA' BO, 'DI LTA STE, DPER NA, RTZVA SNGON PO DANG, BA LANG GI LCI BA DANG, RGYA SHUG DANG, ZHO LA BRTEN NAS SO SO NAS SRIN BU

SKYE BAR 'GYUR BA RE RE'I NANG DU SRIN BU MI DMIGS KYANG RGYU DANG, RKYEN GYI STOBS KYIS SRIN BU SKYE BAR 'GYUR TE, SRIN BU DE DAG SKYE BA NA SO SO NAS RTEN JI LTA BA BZHIN DU KHA DOG SNGON PO DANG, SER PO DANG, DMAR PO DANG, DKAR POR 'GYUR RO, ,DE BZHIN DU PHA MA'I MI GTZANG BA LAS LUS 'DI SKYE BA YANG RKYEN RNAMS KYI NANG DU BTZAL NA, DMIGS PAR MI 'GYUR MOD KYI, 'ON KYANG RKYEN 'DUS PA'I MTHU DANG MA BRAL BAR YANG LUS YANG DAG PAR LEN PAR YANG MI 'GYUR RO, ,LUS 'DI SKYES PA NA PHA MA'I 'BYUNG BA CHEN PO BZHI DANG NGO BO NYID THA MI DAD PAR GYUR TE, 'DI LTA STE, SA'I KHAMS KYIS NI, SRA BA'I BYA BA BYED DO, ,CHU'I KHAMS KYIS NI, GSHER BA'I BYA BA BYED DO, ,ME'I KHAMS KYIS NI, DRO BA'I BYA BA BYED DO, ,RLUNG GI KHAMS KYIS NI, YANG ZHING G-YO BA'I BYA BA BYED DE, MER MER PO'I LUS DE DAG GAL TE SA'I KHAMS 'BA' ZHIG DANG LDAN LA CHU'I KHAMS MED PAR GYUR NA NI, 'DI LTA STE, DPER NA, PHYE DANG THAL BA SKAM PO BCANGS PA BZHIN DU 'DUR MI BTUB PAR 'GYUR RO, ,GAL TE CHU'I KHAMS 'BA' ZHIG DANG LDAN LA SA'I KHAMS MED PAR GYUR NA NI, 'DI LTA STE, DPER NA, 'BRU MAR RAM, CHU'I RANG BZHIN SNUM ZHING GSHER BAS, SRA BA MED PA BZHIN DU BO ZHING GYES PAR 'GYUR RO, ,GAL TE SA DANG CHU'I KHAMS 'BA' ZHIG DANG LDAN LA ME'I KHAMS MED PAR GYUR NA NI, 'DI LTA STE, DPER

, ,NA; DBYAR TSA BA'I DUS SU SHA'I GONG BU GRIB MA LA BZHAG PA NYI MA'I 'OD KYIS MA PHOG PA BZHIN DU RUL ZHING MYAGS PAR 'GYUR RO, ,GAL TE SA DANG, CHU DANG, ME'I KHAMS DANG LDAN LA RLUNG GI KHAMS MED PAR GYUR NA NI, 'PHEL BAR MI 'GYUR TE, 'DI LTA STE, DPER NA, 'KHUR BA MKHAN NAM DE'I SLOB MA MKHAS PAS 'KHUR BA BTZOS NAS DBUGS KYIS BUS TE, CI DANG CI BYA BA RNAMS MNGON PAR 'DUS BYAS NAS DE DAG NANG KHONG STONG DU BYED PA, GAL TE RLUNG GI STOBS MED PAR GYUR NA MNGON PAR 'GRUB PAR MI 'GYUR RO, ,DE BZHIN DU 'BYUNG BA CHEN PO BZHI PO DE DAG KYANG PHAN TSUN GCIG LA GCIG BRTEN CING YONGS SU BZUNG NAS RNAM PAR BZHAG PA YIN PAS DE'I PHYIR MER MER PA'I LUS PHA MA'I 'BYUNG BA CHEN PO BZHI DANG, LAS KYI RLUNG GI RGYUS SKYE BAR 'GYUR BA DANG, DE BZHIN DU RKYEN MANG PO RNAMS KYI NANG NA DMIGS PAR MI 'GYUR YANG 'DUS PA'I STOBS KYIS LUS YANG DAG PAR LEN PAR 'GYUR BAR RIG PAR BYA'O, ,GZHAN YANG DGA' BO, 'DI LTA STE, DPER NA, SA BON GSAR PA YONGS SU GTZANG LA LEGS PAR SBAS PA, SRIN BUS MA ZOS PA, MA RUL CING MA TSIG PA DANG, MA GAS PA DANG, BU GA MED PA ZHIG GANG LA LA ZHIG GIS ZHING BZANG ZHING GSHIN PA BTZAL TE SA BON DE BTAB NA, CI NYIN ZHAG GCIG GIS MYU GU DANG,

SDONG BU DANG, YAL GA DANG, LO MA GRIB MA DANG BCAS PA DANG, ME TOG DANG, 'BRAS BU RGYAS SHING PHUN SUM TSOGS PAR 'GYUR RAM, BCOM LDAN 'DAS, DE NI, 'DI LTAR MI 'GYUR LAGS SO; ;BCOM LDAN 'DAS KYIS BKA' STZAL PA, DGA' BO, MER MER PO'I LUS KYANG DE BZHIN DU RGYU DANG, RKYEN LAS RIM GYIS SKYE BAR 'GYUR GYI, DUS GCIG TU DBANG PO RNAMS PHUN SUM TSOGS PAR MI 'GYUR TE, DE LTA BAS NA, PHA MA LAS BYUNG BAR GYUR PA'I LUS 'DI RKYEN RNAMS KYI NANG NA BTZAL NA YANG DMIGS PAR MI 'GYUR MOD KYI, 'ON KYANG TSOGS PA'I STOBS KYIS SKYE BA LEN PAR 'GYUR BAR RIG PAR BYA'O, ,GZHAN YANG DGA' BO, 'DI LTA STE, DPER NA, SKYES BU MIG DANG LDAN PAS ME SHEL GYI NOR BU BLANGS NAS NYI MA LA BZHAG STE LCI BA SKAM PO NOR BU DANG MI RING BAR BSTEN PA LAS ME 'BYUNG BAR 'GYUR BA, LCI BA DANG, NYI MA'I 'OD SO SO NAS ME 'BYIN PAR MI NUS KYANG PHAN TSUN MI 'BRAL BAS RGYU DANG, RKYEN GYI STOBS KYIS ME 'BYUNG BAR BYED DO, ,PHA MA LAS BYUNG BA'I LUS KYANG DE BZHIN TE, 'DI LTA STE, MER MER PO'I LUS GANG YIN PA DE NI, GZUGS ZHES BYA'O, ,TSOR BA DANG, 'DU SHES DANG, 'DU BYAS DANG, RNAM PAR SHES PA GANG YIN PA DE NI, MING ZHES BYA STE, MING DANG GZUGS KYI PHUNG PO LNGA POS SKAD CIG MA GCIG LA LUS BLANGS NAS SDUG BSNGAL MYONG BAR BYED PA LA YANG NGAS BSNGAGS PA

, ,RJOD PAR MI BYED NA, YUN RING POR SRID PA RNAMS SU 'KHOR BAR 'GYUR BA LTA SMOS KYANG CI DGOS, 'DI LTA STE, DPER NA, MI GTZANG BA NI, NYUNG YANG MNAM NA, MANG PO LTA SMOS KYANG CI DGOS TE, DE LTA BAS NA, MER MER PO'I LUS NYE BAR LEN PA'I PHUNG PO LNGA PO DAG LA SU ZHIG SRED CING CHAGS PAR BYED, GZHAN YANG DGA' BO, 'DI LTAR LUS DE MA'I MNGAL NA GNAS PA YANG ZHAG BDUN PHRAG SUM CU RTZA BRGYAD LON NAS GDOD 'BYUNG BAR 'GYUR TE, ZHAG BDUN PHRAG DANG PO LA MA'I MNGAL NA GNAS PA GANG YIN PA DE NI, MER MER PO ZHES BYA STE, LUS KYI MTSAN MA DANG POR SNANG BA YIN PAS, 'DI LTA STE, DPER NA, ZHO MA CHAGS PA DANG 'DRA BAS ZHAG BDUN GYI BAR DU MNGAL GYI NANG DU BTZOS, RAB TU BTZOS NAS 'BYUNG BA CHEN PO BZHI MTHAR GYIS MNGON PAR GRUB PAR BYED DO, ,ZHAG BDUN PHRAG GNYIS PA LA MA'I MNGAL DU GNAS PA'I TSE LAS KYI RLUNG MNGON PAR GRUB PA GANG YIN PA DE NI, KUN SDUD CES BYA STE, RLUNG SHIN TU PHRA MO DES MA'I RTZIB LOGS G-YON PA DANG, G-YAS PA BUS TE MER MER PO'I LUS KYI MTSAN MA RIM GYIS SNANG BAR BYED PAS, DE'I DBYIBS ZHO BSKA BA'AM, MAR 'KHYAGS PA 'DRA STE, MNGAL GYI NANG DU BTZOS, RAB TU BTZOS PAS NUR NUR PO'I LUS SU GYUR NAS 'DI LTAR 'BYUNG BA CHEN PO BZHI PO DAG MTHAR GYIS MNGON PAR GRUB PAR BYED DO, ,

ZHAG BDUN PHRAG GSUM PA LA MA'I MNGAL DU GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, MDZOD KHA ZHES BYA STE, RLUNG DE'I STOBS KYIS NUR NUR PO GANG YIN PA DE MTHAR GYIS MKHREGS SHING LTAR LTAR POR BYED PAS DE'I DBYIBS NI, SMAN BRDUNGS PA'I GTUN BU 'DRA LA THUNG ZHING CHUNG STE MNGAL GYI NANG DU BTZOS, RAB TU BTZOS PAS 'DI LTAR 'BYUNG BA CHEN PO BZHI PO 'DI DAG MTHAR GYIS 'BREL PAR BYED DO, ,ZHAG BDUN PHRAG BZHI PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, NANG RAB TU 'BYED PA ZHES BYA STE, RLUNG DE'I STOBS KYIS LTAR LTAR PO GANG YIN PA DE NI, MKHRANG BAR BYED PAS, DE'I DBYIBS NI, MCHIG GU 'DRA BA STE, NANG DU BTZOS, RAB TU BTZOS PAS 'BYUNG BA CHEN PO BZHI PO MTHAR GYIS 'PHEL BAR BYED DO, ,ZHAG BDUN PHRAG LNGA PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, YANG DAG PAR SDUD PA ZHES BYA STE, RLUNG DE'I STOBS KYIS MKHRANG 'GYUR GANG YIN PA DE NI, RKANG LAG 'GYUR BAR SGYUR BAR BYED PAS GOR GOR PO GANG YIN PA DE NI, RNAM PAR PHYE NAS BRLA GNYIS DANG, DPUNG PA GNYIS DANG, MGO'I MTSAN MA MNGON DU 'BYUNG BAR BYED DE, 'DI LTA STE, DPER NA, DBYAR GYI DUS SU CHAR 'BAB PA'I TSE LJON SHING RNAMS YAL GA DANG, 'DAB MA SKYED PAR BYED PA DE BZHIN DU LAS KYI RLUNG GI STOBS KYIS KYANG LUS

, ,KYI MTSAN MA RNAMS SNANG BAR BYED DO, ,ZHAG BDUN PHRAG DRUG PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, ZAS ZHES BYA STE, RLUNG DE'I STOBS KYIS MTSAN MA BZHI 'BYUNG BAR BYED DO, ,BZHI GANG ZHE NA, 'DI LTA STE, PUS MO GNYIS DANG, DPUNG PA GNYIS GANG YIN PA DE NI, MTSAN MA RNAM PA BZHI ZHES BYA'O, ,ZHAG BDUN PHRAG BDUN PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, 'KHYIL BAR BYED PA ZHES BYA STE, RLUNG DE'I STOBS KYIS MTSAN MA RNAM PA BZHI 'BYUNG BAR BYED DE, 'DI LTA STE, LAG PA'I MTHIL GNYIS DANG, RKANG PA'I MTHIL GNYIS TE, DE'I MTSAN MA NI, SHIN TU MNYEN PAS DBU BA 'DUS PA DANG 'DRA'O, ,ZHAG BDUN PHRAG BRGYAD PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, ZLOG CING SGYUR BAR BYED PA ZHES BYA STE, RLUNG DE'I STOBS KYIS MTSAN MA NYI SHU 'BYUNG BAR BYED DE, 'DI LTA STE, LAG PA DANG, RKANG PA'I SOR MO'I MTSAN MA NYI SHU 'BYUNG BAR BYED PA GANG YIN PA'O, ,DE NI, 'DI LTA STE, DPER NA, DBYAR CHAR 'BAB PA'I TSE LJON SHING RNAMS KYI YAL GA DANG, 'DAB MA MTHAR GYIS SKYES SHING 'PHEL BAR BYED PA DE BZHIN DU LAS KYI RLUNG GI STOBS KYIS KYANG MTSAN MA RNAMS MNGON DU SNANG BAR

BYED DO, ,ZHAG BDUN PHRAG DGU PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, RNAM PAR 'BYED PA ZHES BYA STE, RLUNG DE'I STOBS KYIS MTSAN MA RNAM PA DGU 'BYUNG BAR BYED DO, ,DGU GANG ZHE NA, 'DI LTA STE, MIG GNYIS DANG, RNA BA GNYIS DANG, SNA GNYIS DANG, KHA DANG, BSHANG BA DANG, GCI BA'I GNAS GANG YIN PA DE DAG NI, MTSAN MA RNAM PA DGU ZHES BYA'O, ,ZHAG BDUN PHRAG BCU PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, SRA BAR BYED PA ZHES BYA STE, RLUNG DE'I STOBS KYIS SRA ZHING BRTAN PAR BYED DO, ,GZHAN YANG DE'I TSE KUN NAS SGO ZHES BYA BA'I RLUNG 'BYUNG STE, DES MNGAL NA GNAS PA'I LUS BUS PAS LUS KUN TU RGYAS SHING GANG BAR BYED DE, 'DI LTA STE, DPER NA, RKYAL PA GANG BA JI LTA BA BZHIN NO, ,ZHAG BDUN PHRAG BCU GCIG PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, RDO RJE ZHES BYA STE, RLUNG DE'I STOBS KYI MNGAL NA GNAS PA DE STENG DANG, 'OG GI PHYOGS SU 'GRO ZHING LUS KYI BU GA RNAMS 'BYIN PAR BYED DO, ,GZHAN YANG RLUNG DE'I STOBS KYIS MA DE RES 'GA' DGA' BA DANG, MI DGA' BAR YANG BYED, 'GRO BA DANG, 'GRENG BA DANG, 'DUG PA DANG, NYAL BA NA YANG DE'I RANG BZHIN DU 'GYUR ZHING RKANG LAG BSKYOD PAR YANG BYED PAS MNGAL NA GNAS PA'I BU GA RNAMS MTHAR GYIS SKYE ZHING 'PHEL BAR YANG

, ,BYED LA, DE'I KHA NAS KHRAG NAG PO YANG 'BYUNG BAR 'GYUR, SNA NAS KYANG CHU MI GTZANG BA 'BYUNG BAR 'GYUR TE, RLUNG DES DBANG PO RNAMS BZLOG NAS DE NAS ZHI BAR 'GYUR RO, ,ZHAG BDUN PHRAG BCU GNYIS PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, YON PA'I SGO ZHES BYA STE, RLUNG DE'I STOBS KYIS RTZIB LOGS G-YAS G-YON GYI NANG KHROL GYI RGYU MA CHE CHUNG RNAMS SKYED PAR BYED DE, DE NI, 'DI LTA STE, DPER NA, PADMA'I RTZA BA SHAD SHAD PO'AM, SKUD PA GRIMS PA SA LA BZHAG PA LTA BUR LAN BCO BRGYAD 'KHOR BAR LUS LA BRTEN TE GNAS SO, ,DE'I TSE GZHAN YANG SBU BA RGYUS PA ZHES BYA BA'I RLUNG 'BYUNG STE, RLUNG DE'I DBANG GIS TSIGS KYI YAN LAG SUM BRGYA NYI SHU DANG, GNAD BRGYA RTZA GCIG LUS LA GNAS PAR 'GYUR RO, ,ZHAG BDUN PHRAG BCU GSUM PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, BKRES SHING SKOM PAR BYED PA ZHES BYA STE, RLUNG DE'I STOBS KYIS MNGAL GYI LUS DE NYAM CHUNG ZHING BKRES PA DANG, SKOM PA'I 'DU SHES SKYED PAR BYED PAS, DE'I TSE MAS ZOS SHING 'THUNGS PA'I RO JI SNYED PA DAG LUS KYI GNAD DANG, LTE BA'I DKYIL 'KHOR YONGS SU 'DZIN CING PHAN 'DOGS PAR BYED DO, ,DE NAS DE'I TSE BCOM LDAN 'DAS KYIS TSIGS SU BCAD DE BKA' STZAL PA, BU NI MA MNGAL

GNAS PA NA, ,MNGAL GNAS DE LA PHAN 'DOGS PAS, ,DES NA LUS SROG RAB GNAS SHING, ,RIM GYIS SKYE DANG 'PHEL BAR BYED, ,MAS NI ZOS SHING 'THUNGS PA DANG, MNGAL NA GNAS LA PHAN 'DOGS PAS, ,RIM GYIS SKYE DANG 'PHEL BAR BYED, ,ZHAG BDUN PHRAG BCU BZHI PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, SKUD PA'I SGO ZHES BYA STE, RLUNG DE'I STOBS KYIS RTZA RGYUS DGU BRGYA BSKYED NAS LUS KYI MDUN DANG, RGYAB DANG, G-YAS G-YON SNOL MAR G-YOG PAR BYED DO, ,ZHAG BDUN PHRAG BCO LNGA PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, PADMA ZHES BYA STE, RLUNG DE'I STOBS KYIS RTZA RGYU BA NYI SHU BSKYED NAS BZA' BA DANG, BTUNG BA'I RO GANG YIN PA RTZA 'DI BZHUGS NAS LUS LA PHAN 'DOGS PAR BYED DO, ,NYI SHU GANG ZHE NA, LUS KYI MDUN DANG, RGYAB DANG, G-YAS G-YON RE RE LA YANG RTZA LNGA LNGA YOD DE, RTZA 'DI DAG RE RE LA YANG RTZA PHRA MO'I YAN LAG BZHI BCU BZHI BCU YOD DO, ,RTZA DE DAG RE RE LA YANG YAN LAG BRGYA BRGYA YOD DO, ,LUS KYI MDUN NA YOD PA NYI KHRI NI, SA GA ZHES BYA'O, ,LUS KYI RGYAB NA YOD PA NYI KHRI NI, STOBS ZHES BYA'O, ,LUS KYI G-YON PHYOGS NA YOD PA NYI KHRI NI, BRTAN PA ZHES BYA'O, ,LUS KYI G-YAS PHYOGS NA YOD PA NYI KHRI NI, MTHU DANG LDAN PA ZHES BYA STE, DE LTAR NA

, ,RTZA'I YAN LAG CHE PHRA BRGYAD KHRI LUS DE LA SKYE BAR 'GYUR RO, ,RTZA DE DAG KYANG KHA DOG RNAM PA SNA TSOGS DANG LDAN TE, 'DI LTA STE, SNGON PO DANG, SER PO DANG, DMAR PO DANG, DKAR PO DANG, MAR DANG, ZHO DANG, 'BRU MAR GYI KHA DOG GO ,RTZA BRGYAD KHRI PO DE DAG RE RE LA YANG RTZA BA RE RE YOD DE, RTZA BA RE RE LA YANG BU GA SNA TSOGS YOD DE, BU GA GCIG DANG, BU GA GNYIS NAS BU GA BDUN PA'I BAR DANG LDAN TE, RE RE YANG SPU'I BU GA DANG PHAN TSUN 'BREL TE, DE NI, DPER NA, PADMA'I RTZA BA LA BU GA MANG PO YOD PA JI LTA BA BZHIN NO, ,ZHAG BDUN PHRAG BCU DRUG PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, BDUD RTZI ZHES BYA STE, RLUNG DE'I STOBS KYIS DE'I MIG DANG, RNA BA DANG, SNA DANG, KHA'I SGO DANG, MID PA DANG, SNYING GI SNYING PO'I KHO RA KHOR YUG GI BU GA DGU PO DE DAG RNAM PAR PHYE NAS DBUGS PHYI NANG DU RGYU BA STENG DANG, 'OG TU RGYU ZHING THOGS PA MED PA DANG, BZA' BA DANG, BTUNG BA ZOS SHING 'THUNGS PA GANG YIN PA DE DAG KYANG LUS LA PHAN 'DOGS SHING BSAGS PA'I GNAS YOD PA DANG, LEGS PAR ZHUGS NAS 'OG GI PHYOGS SU 'BYUNG BAR BYED DE, 'DI LTA STE, DPER NA, RDZA MKHAN NAM RDZA MKHAN GYI SLOB MA MKHAS PAS 'JIM PA LEGS PAR SBYAR TE 'KHOR LO'I STENG DU BZHAG NAS 'OG DANG, STENG DU BSGYUR ZHING SNOD KYI

RNAM PA MNGON PAR 'DUS BYAS NAS MNGON PAR GRUB PA DE BZHIN DU 'DI YANG RLUNG GI STOBS DANG, DGE BA DANG, MI DGE BA'I LAM GYIS MGO DANG, RNA BA LA SOGS PA RIM GYIS YONGS SU RDZOGS PAR BYED DO, ,ZHAG BDUN PHRAG BCU BDUN PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, 'BRI GDONG ZHES BYA STE, RLUNG DE'I STOBS KYIS DE'I MIG GNYIS KUN TU DANG BA DANG, RNA BA DANG, SNA'I DBANG PO LA SOGS PA YANG RIM GYIS YONGS SU SMIN PAR BYED DE, 'DI LTA STE, DPER NA, ME LONG GI DKYIL 'KHOR RDUL GYIS G-YOGS PA SA'I PHYE MA DANG, 'BRU MAR DANG, THAL BA BLANGS TE BYI DOR BYAS NA, YONGS SU GSAL BAR 'GYUR BA DE BZHIN DU LAS KYI RLUNG GI STOBS KYIS MIG LA SOGS PA BUS NAS MIG LA SOGS PA KUN TU DANG BAR BYED PA YANG DE BZHIN DU RIG PAR BYA'O, ,ZHAG BDUN PHRAG BCO BRGYAD PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, BRTAN PAR 'GYUR BA ZHES BYA STE, RLUNG DE'I STOBS KYIS DE'I DBANG PO RNAMS MTHAR GYIS YONGS SU SMIN CING GSAL BA DANG, MTHAR GYIS YONGS SU DAG PAR BYED DE, 'DI LTA STE, DPER NA, NYI MA DANG, ZLA BA'I DKYIL 'KHOR SPRIN DANG, KHUG RNA RNAMS KYIS BSGRIBS SHING KHEBS PAR GYUR PA GLO BUR DU RLUNG DRAG PO LANGS TE BUS NAS PHYOGS BZHIR GTOR BAR GYUR NA, NYI MA DANG, ZLA BA'I DKYIL 'KHOR DE

, ,SHIN TU YONGS SU GSAL BAR 'GYUR BA DE BZHIN DU 'DI LTAR LAS KYI RLUNG GI DBANG PO RNAMS BUS PAS CHES SHIN TU GSAL ZHING YONGS SU DAG PAR BYED PA YANG DE BZHIN DU RIG PAR BYA'O, ,ZHAG BDUN PHRAG BCU DGU PA LA MA'I MNGAL NA GNAS PA'I TSE YANG SNGA MA'I RLUNG GI STOBS KYIS MIG DANG, SNA BA DANG, SNA DANG, LCE'I DBANG PO BZHI PO DAG YONGS SU SMIN PAR BYED DO, ,DANG PO MNGAL DU 'JUG PA'I TSE NI, DBANG PO GSUM DANG LDAN TE, LUS KYI DBANG PO DANG, SROG GI DBANG PO DANG, YID KYI DBANG PO STE, DE LTAR DBANG PO RNAMS YONGS SU RDZOGS PAR BYED DO, ,ZHAG BDUN PHRAG NYI SHU PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, SHIN TU SRA BA ZHES BYA STE, RLUNG DE'I STOBS KYIS DE'I LUS LAS RUS PA SNA TSOGS SKYED PAR BYED DE, RKANG PA G-YON PA LA BRTEN TE RUS PA NYI SHU BSKYED DO, ,RKANG PA G-YAS PA LA BRTEN TE RUS PA NYI SHU BSKYED DO, ,GZHAN YANG RKANG PA'I RTING PA'I RUS PA BZHI DANG, RJE NGAR GYI RUS PA GNYIS DANG, LHA NGA'I RUS PA GNYIS DANG, BRLA'I RUS PA GNYIS DANG, RKED PA DANG, DPYI'I RUS PA GSUM GSUM DANG, SGAL TSIGS KYI RUS PA BCO BRGYAD DANG, RTZIB MA'I RUS PA NYI SHU RTZA BZHI DANG, BRANG GI RUS PA SUM CU DANG, LAG PA G-YAS G-YON RE RE LA RUS PA NYI SHU NYI SHU DANG, LAG NGAR GYI RUS PA BZHI DANG,

DPUNG PA'I RUS PA GNYIS DANG, 'GRAM PA'I RUS PA GNYIS DANG, MGO'I RUS PA BZHI DANG, SO'I RTZA BA'I RUS PA SUM CU RTZA GNYIS KYANG SKYED PAR BYED DO, ,'DI LTA STE, DPER NA, GZUGS MKHAN NAM GZUGS MKHAN GYI SLOB MA MKHAS PAS SNGAR SHING SRA BA BLANGS TE PHYIS SRAD BUS BCINGS NAS GZUGS RNAMS BYAS PA LA 'JIM PA MA BSKUS MOD KYI, 'ON KYANG DE'I TSE RUS PA'I MTSAN NYID CES BRJOD PA DE BZHIN DU LAS KYI RLUNG GI STOBS KYIS RUS PA RNAMS BSKYED PA'I DUS KYI TSE YANG DE BZHIN TE, DE LTA BAS NA ZHAG BDUN PO DE DAG TU RUS PA PHRA MO MA GTOGS PAR RUS PA CHEN PO SKYE BA'I GRANGS NI, NYIS BRGYA YOD PAR RIG PAR BYA'O, ,ZHAG BDUN PHRAG NYI SHU GCIG PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, YANG DAG SKYED PA ZHES BYA STE, RLUNG DE'I STOBS KYIS MNGAL NA GNAS PA DE'I LUS KYI SHA SKYED PAR BYED DE, 'DI LTA STE, DPER NA, ZHAL ZHAL MKHAN NAM ZHAL ZHAL MKHAN GYI SLOB MAS 'JIM PA LEGS PAR SBYANGS NAS RTZIG PA RNAMS LA ZHAL ZHAL BYED PA DE BZHIN DU LAS KYI RLUNG GI DBANG GIS DE'I LUS KYI SHA SKYED PA YANG DE BZHIN DU RIG PAR BYA'O, ,ZHAG BDUN PHRAG NYI SHU GNYIS PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, KUN TU RGYAL BA ZHES BYA STE, RLUNG DE'I STOBS KYIS DE'I LUS KYI KHRAG SKYED PAR BYED DO, ,ZHAG BDUN PHRAG NYI SHU

, ,GSUM PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, YONGS SU DAG PAR 'DZIN PA ZHES BYA STE, RLUNG DE'I STOBS KYIS LUS KYI PAGS PA SKYED PAR BYED DO, ,ZHAG BDUN PHRAG NYI SHU BZHI PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, SPRIN 'DZIN ZHES BYA STE, RLUNG DE'I STOBS KYIS DE'I LUS KYI LAG PA RKYONG ZHING MDOG DANG LDAN PAR BYED DO, ,ZHAG BDUN PHRAG NYI SHU LNGA PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, GRONG KHYER 'DZIN CES BYA STE, RLUNG DE'I STOBS KYIS MNGAL NA GNAS PA DE'I LUS LA SHA DANG, KHRAG 'PHEL ZHING RIM GYIS RAB TU DANG BAR BYED DO, ,ZHAG BDUN PHRAG NYI SHU DRUG PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, SKYE BA MNGON PAR GRUB PA ZHES BYA STE, RLUNG DE'I STOBS KYIS DE'I SKRA DANG, SPU DANG, SEN MO RNAMS BSKYED NAS THAMS CAD RTZA RGYUS RNAMS DANG 'BREL PAR BYED DO, ,ZHAG BDUN PHRAG NYI SHU BDUN PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, SMAN YON CHEN PO ZHES BYA STE, RLUNG DE'I STOBS KYIS DE'I LUS KYI MTSAN MA RNAMS MTHAR GYIS MNGON PAR GRUB PAR BYED DO, ,GANG TSE RABS SNGA MA LA SDIG PA MI DGE

BA'I LAS RNAMS MNGON PAR 'DUS BYAS SHING YO BYAD RNAMS LA SER SNAS PHANGS SHING SBYIN PA GTONG BAR MI BYED PA DANG, PHA MA DANG, MKHAN PO DANG, BLA MA'I GNAS RNAMS KYIS RJES SU BSTAN PA NYAN PAR MI BYED PA ZHIG YIN NA NI, LAS DE'I DBANG GIS YID DU MI 'ONG BA'I GZUGS RNAM PA SNA TSOGS THOB PAR 'GYUR BAS, GAL TE LUS RING ZHING SBOM PA DANG, TSO ZHING DKAR BA DANG, MNYEN PA GANG YIN PA DES MDZES PAR GYUR NA NI, LUS THUNG ZHING PHRA BA DANG, RID CING GNAG PA DANG, RTZUB PA DAG THOB PAR BYED DO, ,GAL TE LUS THUNG ZHING PHRA BA DANG, RID CING GNAG PA DANG, RTZUB PA GANG YIN PA DES MDZES PAR GYUR NA NI, LUS RING ZHING SBOM PA DANG, TSO ZHING DKAR BA DANG, SHIN TU MNYEN PA DAG THOB PAR BYED DO, ,GAL TE LUS KYI YAN LAG MTHO BA DANG, DMA' BA DANG, MANG BA DANG, NYUNG BA DANG, THAGS BZANG BA DANG, THAGS NGAN PAS MDZES PAR GYUR NA NI, MTHO BA DANG, DMA' BA DANG, MANG BA DANG, NYUNG BA DANG, THAGS BZANG BA DANG, THAGS NGAN PA DANG, MI LDAN PA'I LUS YANG DAG PAR LEN PAR BYED DO, ,GZHAN YANG 'ON PA DANG, LONG PA DANG, LKUGS PA DANG, RKANG LAG 'PHYE ZHING 'GRO BA DANG, DBANG PO RNAMS MA TSANG BA DANG, TSIG SMRAS PA GZHAN GYIS NYAN PAR MI 'DOD PA DANG, LUS MI SDUG CING YI DVAGS DANG 'DRA BA YANG YANG DAG PAR LEN PAR 'GYUR TE, SDIG PA MI DGE BA'I LAS KYI DBANG

, ,GIS YID DU MI 'ONG BA'I LUS RNAM PA SNA TSOGS LEN PAR 'GYUR BAS, PHA MA DANG NYE BSHES RNAMS KYIS KYANG MTHONG BAR MI 'DOD NA, GZHAN LTA SMOS KYANG CI DGOS, GAL TE TSE RABS SNGA MA LA DGE BA BCU'I LAS MNGON PAR 'DUS BYAS SHING SBYIN PA LEGS PAR BTANG BA DANG, SER SNA DANG, G-YO SGYU'I BSAM PA MED PA DANG, PHA MA DANG, MKHAN PO DANG, BLA MA'I GNAS RNAMS KYIS RJES SU BSTAN PA DAG LA MNGON PAR YID CHES SHING YANG DAG PAR BLANGS PA ZHIG YIN NA NI, RGYU DANG, RKYEN DES GAL TE MI'I LUS THOB PAR GYUR NA YANG GONG DU BSTAN PA LTA BU'I SDIG PA MI DGE BA'I LAS LAS MNGON PAR GRUB PA'I LUS LEN PAR MI 'GYUR ZHING GYA NOM SNA TSOGS DANG LDAN PA'I LUS THOB PAR 'GYUR BAS, BYAD BZHIN MDZES PA DANG, MTSAN RNAMS DANG LDAN ZHING TSIG SMRAS PA RNAMS MANG PO KUN GYIS MNYAN PAR 'DOD PA'I 'OS SU 'GYUR TE, DE LTA BAS NA, DGE BA'I LAS KYI DBANG GIS KHYAD PAR DU 'PHAGS PA'I 'BRAS BU RNAM PAR SMIN PA DE LTA BU THOB PAR 'GYUR BAR RIG PAR BYA'O, ,DGA' BO, DE LTA BU'I LUS DE YANG GAL TE PHO YIN NA NI, MA'I MNGAL NA G-YAS PHYOGS SU TZOG PUR 'DUG LA, LAG PA GNYIS KYIS GDONG G-YOGS NAS MA'I SGAL TSIGS LOGS SU BLTAS TE 'DUG GO ,GAL TE MO YIN NA NI, RTZIB LOGS G-YON PHYOGS SU

TZOG PUR 'DUG GO ,LAG PA GNYIS KYIS GDONG G-YOGS TE MA'I LTO BA LA KHA BLTAS NAS MA ZHU BA'I GNAS KYI NI, 'OG, ZHU BA'I GNAS KYI NI, STENG NA NANG DU BTZOS, RAB TU BTZOS SHING GNAS LNGA KUN TU BCINGS PAS 'DI LTA STE, DPER NA, RTZVA'I RKYAL BA'I NANG NA 'DUG PA DANG 'DRA'O, ,GAL TE DE'I MAS SHIN TU MANG DU ZOS SAM, SHIN TU NYUNG DU ZOS SAM, GAL TE ZAS SHIN TU MNGAR BA'AM, SHIN TU RTZUB PA'AM, SHIN TU BSKA BA'AM, SHIN TU SNUM PA'AM, SHIN TU LAN TSVA BRO BA'AM, SHIN TU KHA BA'AM, SHIN TU SKYUR BA'AM, SHIN TU GRANG BA'AM, SHIN TU TSA BA DAG ZOS PAR GYUR TAM, GZHAN YANG 'DOD CHAGS SPYAD PAR GYUR TAM, DRAG TU SONG NGAM, MCHONG BA BYAS SAM, YUN RING DU NYAL LAM, YUN RING DU 'DUG PAR GYUR NA YANG MNGAL NA GNAS PA DE SDUG BSNGAL MYONG BAR 'GYUR TE, DE LTA BAS NA, MA'I MNGAL NA GNAS PA'I TSE SDUG BSNGAL MANG PO DAG GIS RAB TU GZIR BAR RIG PAR BYA'O, NGAS MIR GYUR PA'I SDUG BSNGAL MDO TZAM DU BSTAN PA YANG DE 'DRA NA, SEMS CAN DMYAL BA RNAMS KYI SDUG BSNGAL DPE BYAR DKA' BA LTA SMOS KYANG CI DGOS TE, MKHAS PA SU ZHIG 'KHOR BA'I RGYA MTSOR LUS 'DI LTA BU LA RAB TU MOS PAR BYED, ZHAG BDUN PHRAG NYI SHU BRGYAD PA LA MA'I MNGAL NA GNAS PA'I TSE PHYIN CI LOG GI 'DU SHES RNAM PA BRGYAD 'BYUNG BAR 'GYUR TE,

, ,BRGYAD GANG ZHE NA, BZHON PA'I 'DU SHES DANG, KHANG BU BRTZEGS PA'I 'DU SHES DANG, KHRI STAN GYI 'DU SHES DANG, CHU MIG GI 'DU SHES DANG, RDZING GI 'DU SHES DANG, CHU BO'I 'DU SHES DANG, KUN DGA' RA BA'I 'DU SHES DANG, SKYED MOS TSAL GYI 'DU SHES TE, 'DI NI, 'DU SHES RNAM PA BRGYAD CES BYA'O, ,ZHAG BDUN PHRAG NYI SHU DGU PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, ME TOG PHRENG BA ZHES BYA STE, RLUNG DE'I STOBS KYIS MNGAL NA GNAS PA DE'I LUS KYI PAGS PA'I MDOG KUN TU BZANG ZHING MTSAN MA RNAMS RAB TU GSAL BAR BYED DE, THAMS CAD KYANG 'DAS PA'I DUS SU LAS RNAMS MNGON PAR 'DUS BYAS PA'I BYE BRAG MI MTSUNGS PAS RNAM PA JI LTA BA BZHIN DU KHA DOG RNAM PA SNA TSOGS DANG LDAN PAR 'GYUR BAS, KHA CIG NI, KHA DOG DKAR POR 'GYUR, KHA CIG NI, KHA DOG NAG POR 'GYUR, KHA CIG NI, KHA DOG DKAR BA YANG MA YIN, NAG PA YANG MA YIN PAR 'GYUR, KHA CIG NI, KHA DOG SNGON PAR 'GYUR, KHA CIG NI, KHA DOG RTZUB CING SKAM PAR 'GYUR, KHA CIG NI, KHA DOG SNUM PAR 'GYUR TE, 'DI LTA BU'I KHA DOG GI MTSAN NYID DANG LDAN PAR 'GYUR RO, ,ZHAG BDUN PHRAG SUM CU PA LA MA'I MNGAL NA GNAS PA'I TSE YANG LAS KYI RLUNG MNGON

PAR GRUB PA GANG YIN PA DE NI, LCAGS KYI SGO ZHES BYA STE, RLUNG DE'I STOBS KYIS DE'I SKRA DANG, SPU DANG, SEN MO RNAMS RAB TU BSKYED PA DANG, KHA DOG DKAR NAG RNAMS RAB TU GSAL BYAR BYED DE, LAS KYI RKYEN GYIS MTSAN MA 'DI DANG 'DI DAG 'BYUNG BAR 'GYUR RO, ,ZHAG BDUN PHRAG SUM CU GCIG PA NAS ZHAG BDUN PHRAG SUM CU LNGA PA'I BAR DU MA'I MNGAL NA GNAS PA'I TSE NI, LUS KYI MTSAN MA RNAMS CHER SKYE BAR 'GYUR BAS, MTHAR GYIS LUS KYI YAN LAG PHUN SUM TSOGS SHING YANGS PAR 'GYUR RO, ,ZHAG BDUN PHRAG SUM CU DRUG PA LA MA'I MNGAL NA GNAS PA'I TSE NI, DE 'BYUNG BA'I BSAM PA SKYE BAS MNGON PAR MI DGA' BAR 'GYUR RO, ,ZHAG BDUN PHRAG SUM CU BDUN PA LA MA'I MNGAL NA GNAS PA'I TSE NI, PHYIN CI LOG TU MA GYUR PA'I 'DU SHES RNAM PA LNGA 'BYUNG BAR 'GYUR RO, ,LNGA GANG ZHE NA, MI GTZANG BA'I 'DU SHES DANG, DRI MI ZHIM PA'I 'DU SHES DANG, BTZON RA'I 'DU SHES DANG, MUN NAG GI 'DU SHES DANG, YONGS SU SKYO NAS PHYIR 'BYUNG BA'I 'DU SHES SKYE BA GANG YIN PA STE, MNGAL NA GNAS PA DE YONGS SU SKYO BA'I BSAM PA DE LTA BU DAG SKYE BAR 'GYUR RO, ,ZHAG BDUN PHRAG SUM CU BRGYAD PA LA MA'I MNGAL NA GNAS PA'I TSE YANG LAS KYI RLUNG MNGON PAR GRUB PA GANG YIN PA DE NI, THOGS PA'I RKYEN CES BYA STE, RLUNG DE'I STOBS KYIS DE RAB TU BSGYUR BAR BYED

, ,DO; ;GZHAN YANG KHA THUR DU LTA BA ZHES BYA BA'I RLUNG 'BYUNG STE, DE'I MGO THUR DU LTA ZHING LAG PA GNYIS BRKYANG STE MTHAR GYIS 'BYUNG BAR 'DOD PAR 'GYUR RO; ;MNGAL NA GNAS PA DE GAL TE TSE RABS SNGA MA LA MNGAL DU 'CHI BAR 'GYUR BA'I LAS BSAGS PA ZHIG YIN NA NI, DE'I LAG PA DANG, RKANG PA SNOL MAR GYUR NAS BSGYUR MI NUS PAS, SDIG PA MI DGE BA'I LAS KYI RKYEN GYIS MA'I MNGAL NYID DU 'CHI BA'I DUS BYED PAR 'GYUR TE, DE'I MA YANG DE'I TSE SDUG BSNGAL CHEN PO MYONG BA'AM, YANG NA 'CHI BA'I DUS BYED PAR 'GYUR RO, ,GAL TE TSE RABS SNGA MA LA DGE BA'I LAS RNAMS MNGON PAR 'DUS BYAS SHING TSE RING POR 'GYUR BA'I RGYU BSAGS PA ZHIG YIN NA NI, BTZAS SU NYE BA'I TSE MA DANG, BU GNYIS KA RAB TU BDE ZHING, SDIG PA MI DGE BA'I LAS KYI SDUG BSNGAL GONG MA LTA BU MED DO, ,ZHAG BDUN PHRAG SUM CU RTZA BRGYAD 'DAS NAS MNGAL NAS 'BYUNG BAR 'DOD PA'I TSE SDUG BSNGAL SNA TSOGS MYONG NAS GDOD 'BYUNG BAR 'GYUR BA DE'I PHYIR LUS 'DI LTA BU LEN PA 'DI NI, YANG DAG PAR SDUG BSNGAL CHEN PO YIN PAR RIG PAR BYA'O, ,DANG PO MNGAL NAS 'BYUNG BA'I TSE KHYE'U'AM BU MO YANG RUNG STE, SA LA LHUNG MA THAG TU LAG PAS BZUNG NGAM, GOS KYIS BLANGS SAM, KHRI LA BZHAG

GAM, KHANG PA'I NANG DU BZHAG GAM, SA LA BZHAG GAM, BLA GAB MED PAR BZHAG GAM, NYI MA LA BZHAG GAM, DGUN NAM DBYAR GYI DUS GRANG BA DANG, TSA BA'I RLUNG GIS BTZAS MA THAG PA'I LUS DE LA REG PAR GYUR NA YANG SDUG BSNGAL CHEN PO MYONG BAR 'GYUR TE, 'DI LTA STE, DPER NA, BA LANG GSON POR BSHUS RTZIG PA LA REG GAM, BLA GAB MED PA'I THANG LA LHUNG BAR GYUR NA, SROG CHAGS DAG GIS ZA BAR 'GYUR BA'AM, GZHAN YANG 'DI LTA STE, DPER NA, MI ZHIG LA SBRANG BU MCHU RING RNAMS KYIS ZA BA LA YANG LCAG GIS BZHUS PA DE BZHIN DU DANG PO MNGAL NAS 'BYUNG BA'I TSE CHU DRON PO DAG GIS LUS DKRUS PAS REG PA'I SDUG BSNGAL MYONG BA YANG DE DANG 'DRA'O, ,BTZAS NAS MTHAR GYIS CHER 'GYUR BA DANG, MA'I LUS LAS KHRAG DANG 'DRES PA'I NU ZHO BYUNG NAS GSO BAR BYED DE, NGAS SNGAR MDO SDE GZHAN DAG LAS RGYA CHER BSTAN PA YIN NO, ,DE LTA BAS NA, LUS 'DI NI, MI GTZANG BA DANG, SDUG BSNGAL MANG PO LAS MNGON PAR GRUB PA YIN PAS MKHAS PA SU ZHIG 'KHOR BA NA 'DI 'DRA BA'I LUS LA RJES SU CHAGS PAR BYED, GZHAN YANG DGA' BO, ,DANG PO MNGAL NAS BYUNG NAS ZHAG BDUN LON PA DANG, SROG CHAGS SRIN BU'I RIGS STONG PHRAG BRGYAD CU LUS LAS SKYES NAS DE LAS ZA BAR BYED DO, ,DE LA SKRA LA ZA BA ZHES

, ,BYA BA'I SRIN BU'I RIGS GNYIS YOD DE, SKRA LA GNAS NAS SKRA LA ZA BAR BYED DO, ,SRIN BU'I RIGS GNYIS NI, MIG LA GNAS NAS MIG LA ZA BAR BYED DO, , SRIN BU'I RIGS BA HA NA DANG, RKAN LDAN DANG, NAD RLONG DANG, YONGS SU RDZOGS PA ZHES BYA BA BZHI YOD DE, KLAD PA LA GNAS NAS KLAD PA LA ZA BAR BYED DO, ,SRIN BU'I RIGS S'A LU NAG PO'I LO MA ZHES BYA BA ZHIG YOD DE, RNA BA LA GNAS NAS RNA BA LA ZA BAR BYED DO, ,SRIN BU'I RIGS MDZOD SGO ZHES BYA BA ZHIG YOD DE, SNA LA GNAS NAS SNA LA ZA BAR BYED DO, ,SRIN BU'I RIGS 'PHEN PA DANG, KUN TU 'PHEN PA ZHES BYA BA GNYIS YOD DE, MCHU LA GNAS NAS MCHU LA ZA BAR BYED DO, ,SRIN BU'I RIG KHAB MCHU ZHES BYA BA ZHIG YOD DE, LCE LA GNAS NAS LCE LA ZA BAR BYED DO, ,SRIN BU'I RIGS KHA RNO ZHES BYA BA ZHIG YOD DE, LCE'I DRUNG LA GNAS NAS LCE'I DRUNG LA ZA BAR BYED DO, ,SRIN BU'I RIGS LAG RDZOGS ZHES BYA BA ZHIG YOD DE, RKAN LA GNAS NAS RKAN LA ZA BAR BYED DO, ,SRIN BU'I RIGS LAG PA DRA BA CAN DANG, PHYENG GYUR ZHES BYA BA GNYIS YOD DE, LAG MTHIL LA GNAS NAS LAG MTHIL LA ZA BAR BYED DO, ,SRIN BU'I RIGS DPUNG BA DANG, NYE BA'I DPUNG BA ZHES BYA BA GNYIS YOD DE, DPUNG PA LA GNAS NAS DPUNG PA LA ZA BAR BYED DO, ,SRIN BU'I RIGS LCAGS CAN DANG, NYE BA'I LCAGS CAN ZHES BYA BA GNYIS

YOD DE, MID PA LA GNAS NAS MID PA LA ZA BAR BYED DO, ,SRIN BU'I RIGS RDO RJE DANG, RDO RJE CHEN PO ZHES BYA BA GNYIS YOD DE, SNYING LA GNAS NAS SNYING LA ZA BAR BYED DO, ,SRIN BU'I RIGS DMAN PA DANG, DMAN PA'I ZHES BYA BA GNYIS YOD DE, SHA LA GNAS NAS SHA LA ZA BAR BYED DO, ,SRIN BU'I RIGS KHA DOG LDAN DANG, GRAGS LDAN ZHES BYA BA GNYIS YOD DE, KHRAG LA GNAS NAS KHRAG LA 'THUNG BAR BYED DO, ,SRIN BU'I RIGS DPA' BO DANG, DRI GTONG ZHES BYA BA GNYIS YOD DE, CHU BA LA GNAS NAS CHU BA LA ZA BAR BYED DO, ,SRIN BU'I RIGS MI MTHO BA DANG, KHAS RDUB [*RNGUB?] CES BYA BA GNYIS YOD DE, RGYAB KYI SGAL TSIGS LA GNAS NAS RGYAB KYI SGAL TSIGS LA ZA BAR BYED DO, ,SRIN BU'I RIGS TSIL GYI KHA DOG CES BYA BA ZHIG YOD DE, TSIL LA GNAS NAS TSIL LA ZA BAR BYED DO, ,SRIN BU'I RIGS MKHRIS PA'I KHA DOG CES BYA BA ZHIG YOD DE, MKHRIS PA LA GNAS NAS MKHRIS PA LA ZA BAR BYED DO, ,SRIN BU'I RIGS MU TIG CES BYA BA ZHIG YOD DE, MCHIN PA LA GNAS NAS MCHIN PA LA ZA BAR BYED DO, ,SRIN BU'I RIGS 'DAM BU ZHES BYA BA ZHIG YOD DE, MTSER BA LA GNAS NAS MTSER BA LA ZA BAR BYED DO, ,SRIN BU'I RIGS LNGA BRGYA YOD DE, RIGS BRGYA NI, ZLA BA ZHES BYA'O, ,RIGS BRGYA NI, ZLA BA'I KHA ZHES BYA'O, ,RIGS BRGYA NI, BSIL BYED CES BYA'O, ,RIGS BRGYA NI, BSIL BYED GTONG ZHES BYA'O, ,RIGS BRGYA NI, YANGS

, ,PA ZHES BYA STE, RTZIB LOGS G-YON PA LA GNAS NAS RTZIB LOGS G-YON PA LA ZA BAR BYED DO, ,GZHAN YANG SRIN BU'I RIGS LNGA BRGYA YOD PA YANG MING GONG MA DANG MTHUN TE, RTZIB LOGS G-YAS PA LA GNAS NAS RTZIB LOGS G-YAS PA LA ZA BAR BYED DO, ,SRIN BU'I RIGS CUNG ZAD 'BIGS PA DANG, CHER 'BIGS PA DANG, RUS PA 'BIGS PA DANG, RUS PA'I GDONG ZHES BYA BA BZHI YOD DE, RUS PA LA GNAS NAS RUS PA LA ZA BAR BYED DO, ,SRIN BU'I RIGS TSOR DKAR BA DANG, CUNG ZAD DKAR BA DANG, SNOM PA'I STOBS DANG, STAG LAM ZHES BYA BA BZHI YOD DE, RTZA RGYUS LA GNAS NAS RTZA RGYUS LA ZA BAR BYED DO, ,SRIN BU'I RIGS MOS PA'I YID DANG, SENGGE'I STOBS DANG, RI BONG LTO DANG, 'DOD PA LA MNGON PAR ZHEN PA ZHES BYA BA BZHI YOD DE, MA ZHU BA'I GNAS LA GNAS NAS MA ZHU BA'I GNAS LA ZA BAR BYED DO, ,SRIN BU'I RIGS DPA' BO DANG, DPA' BO'I BDAG PO ZHES BYA BA GNYIS YOD DE, ZHU BA'I GNAS LA GNAS NAS ZHU BA'I GNAS LA ZA BAR BYED DO, ,SRIN BU'I RIGS MU KA DANG, DRA BA KHA DANG, PHUNG PO'I KHA DANG, BYE'U KHA ZHES BYA BA BZHI YOD DE; GCI BA'I LAM LA GNAS NAS GCI BA'I LAM LA ZA BAR BYED DO, ,SRIN BU'I RIGS BYED PA DANG, BYED PA CHEN PO DANG, PHYE MA DANG, PO TAR KA ZHES BYA BA BZHI YOD DE, BSHANG BA'I

LAM LA GNAS NAS BSHANG BA'I LAM LA ZA BAR BYED DO, ,SRIN BU'I RIGS GDONG NAG DANG, 'JIGS SU RUNG BA'I GDONG ZHES BYA BA GNYIS YOD DE, BRLA LA GNAS NAS BRLA LA ZA BAR BYED DO, , SRIN BU'I RIGS MDZE CAN DANG, MDZE CAN CHUNG DU ZHES BYA BA GNYIS YOD DE, PUS MO LA GNAS NAS PUS MO LA ZA BAR BYED DO, ,SRIN BU'I RIGS MYOS PA'I RTZA BA ZHES BYA BA ZHIG YOD DE, BYIN PA LA GNAS NAS BYIN PA LA ZA BAR BYED DO, ,SRIN BU'I RIGS MGON CES BYA BA ZHIG YOD DE, RKANG PA LA GNAS NAS RKANG PA LA ZA BAR BYED DO, ,DGA' BO, NGAS DENG KHYOD LA SRIN BU'I RIGS STONG PHRAG BRGYAD CU LUS 'DI LA GNAS NAS NYIN MTSAN DU ZA BAR BYED PAS NYAMS STOBS CHUNG ZHING MDOG NGAN PAR BYED PA DANG, NAD KYI SDUG BSNGAL RNAM PA SNA TSOGS LUS 'DI LA 'DUS NAS GZHAN YANG DE'I SEMS GDUNG BA DANG, RAB TU GDUNG BA DANG, YONGS SU GDUNG BAR BYED PAS SMAN PA MKHAS PA YOD KYANG DE LA RMONGS NAS SMAN GANG GIS NAD 'DI DAG GSO BAR NUS PA SHES PAR MI 'GYUR BA MDOR BSTAN PA YIN TE, MKHAS PA SU ZHIG 'KHOR BA'I RGYA MTSOR 'DI 'DRA BA'I LUS LA RJES SU CHAGS PAR BYED, GZHAN YANG DGA' BO, DANG PO BTZAS NAS CHER SKYE BAR GYUR PA'I BAR DU GOS DANG, ZAS KYIS GSOS NAS LUS 'DI MNGON PAR GRUB PAR 'GYUR KYANG DE'I TSE'I TSAD LO BRGYA THUB PA YANG YOD DE, DE BAS THUNG BA YANG YOD DO, ,LO BRGYA PO DE YANG DUS GSUM

, ,DU 'GYUR RO, ,'DI LTA STE, DPYID DANG, DBYAR DANG, DGUN GYI DUS GANG YIN PA'O, ,DE LAS DPYID GANG YIN PA DE NI, TSA BA'I DUS SO, ,DBYAR GANG YIN PA DE NI, CHAR 'BAB PA'I DUS SO, ,DGUN GANG YIN PA DE NI, GRANG BA'I DUS SO, ,DUS GSUM PO DE DAG RE RE LA YANG ZLA BA BZHI BZHI YOD PAS LO GCIG LA ZLA BA BCU GNYIS YOD PAR 'GYUR LA, LO BRGYA LA NI, ZLA BA STONG NYIS BRGYA YOD PAR 'GYUR PAS, ZLA BA YAR GYI NGO DKAR PO DANG, ZLA BA MAR GYI NGO NAG POS PHYE NA NI, NYIS STONG BZHI BRGYAR 'GYUR TE, DE LA NYIN MTSAN NI, STONG PHRAG GSUM CU RTZA DRUG YOD DO, ,NYIN GCIG LA LAN GNYIS SU ZA BAS ZAS NI, LAN STONG PHRAG BDUN CU RTZA GNYIS ZA BAR 'GYUR TE, RES 'GA' NI, MI ZA BA YANG GRANGS DER 'DUS SO, ,DE NI, 'DI LTA STE, NA BA DANG, RA RO BA DANG, CHED DU ZAS BCAD PA DANG, GNYID LOG PA DANG, RTZED MO RTZES PA DANG, LAS GZHAN GYIS BREL BA DANG, MA'I NU ZHO 'THUNGS PA'I RGYU DANG, RKYEN GYIS MA ZOS PA GANG YIN PA 'DI NI, MA ZOS PA ZHES BYA'O, ,'DI LTA BU'I LUS 'DI LO BRGYA THUB PAR GYUR KYANG MTHAR 'JIG PAR 'GYUR BAS, MKHAS PA SU ZHIG 'KHOR BA'I RGYA MTSO 'DIR DE LA RJES SU CHAGS PAR BYED, GZHAN YANG DGA' BO, LUS 'DI YANG DAG PAR BLANGS PA LA SDUG BSNGAL RNAM PA GNYIS YOD DE,

GNYIS GANG ZHE NA, NAD MANG PO RNAMS LUS LA 'DUS PA GANG YIN PA DE NI, NANG GI SDUG BSNGAL LO ZHES BYA'O, ,MI DANG MI MA YIN PAS RNAM PAR 'TSE BA GANG YIN PA DE NI, PHYI ROL GYI SDUG BSNGAL ZHES BYA'O, ,DE LA NAD MANG PO LUS LA 'DUS PA ZHES BYA BA JI LTA BU ZHE NA, 'DI LTA STE, MIG DANG, RNA BA DANG, SNA DANG, LCE DANG, LKOG MA DANG, SO DANG, BRANG DANG, LTO BA DANG, LAG PA DANG, RKANG PA RNAMS NA BAR GYUR PA DANG, GZHAN YANG RLUNG NA BA DANG, MCHIL SNABS DANG, SMYOS PA DANG, KHONG RDE DANG, DBUGS MI BDE BA DANG, GLO NA BA DANG, GCI BA'I LAM RTZUB PA DANG, G-YAN PA DANG, MDZE DANG, 'BRAS DANG, THOR BU DANG, SHU BA DANG, 'BRUM BU DANG, RKANG BAM DANG, GZHAN YANG NAD RNAM PA SNA TSOGS LUS LA 'DUS PA GANG YIN PA'O, ,GZHAN YANG MKHRIS PA'I NAD BRGYA RTZA GCIG DANG, RLUNG NAD BRGYA RTZA GCIG DANG, BAD KAN GYI NAD BRGYA RTZA GCIG DANG, RLUNG DANG MKHRIS PA DANG BAD KAN 'DUS PA LAS BYUNG BA'I NAD PA BRGYA RTZA GCIG STE, DE LTAR NAD BZHI BRGYA RTZA BZHI PO DAG GIS LUS NYON MONGS PA GANG YIN PA DE NI, NANG GI SDUG BSNGAL ZHES BYA'O, ,GZHAN YANG PHYI ROL GYI SDUG BSNGAL GYIS LUS 'DI LA GNOD PAR BYED PA 'DI LTA STE; BTZON RA DAM POR BCUG PA DANG, LCAG GIS BZHUS PA DANG, BRTZON RAR BCUG PA DANG, BCINGS PA'I SDUG BSNGAL GANG YIN PA DANG, GZHAN YANG RNA BA BCAD PA DANG, SNA BCAD PA

, ,DANG, LAG PA DANG RKANG PA GTUBS PA DANG, MGO BCAD PA DANG, LHA RNAMS KYIS MA BSRUNGS PAS MI MA YIN PA'I GDON MA RUNGS PA RNAMS DANG, GNOD SBYIN DANG, SRIN BU RNAMS KYIS GLAGS RNYED PAR 'GYUR BA GANG YIN PA DANG, GZHAN YANG SBRANG BU MCHU RING DANG, SHA SBRANG LA SOGS PA SRIN BU GDUG PA CAN RNAMS KYIS ZOS PA DANG, GRANG BA DANG, TSA PA DANG, BKRES PA DANG, SKOM PA DANG, RLUNG DANG, CHAR PA NYE BAR GNAS PAR GYUR PA'I SDUG BSNGAL RNAM PA SNA TSOGS KYIS LUS NYON MONGS PAR BYED DE, MIR GYUR PA RNAMS KYIS SDUG BSNGAL YANG DE 'DRA NA, NGAN 'GRO RNAMS KYI SDUG BSNGAL LTA SMOS KYANG CI DGOS TE, DE NI, SHIN TU BRJOD PAR DKA'O, ,DE LTA BAS NA, 'DI DAG THAMS CAD KYANG 'DAS PA'I DUS SU SDIG PA MI DGE BA'I LAS MNGON PAR 'DUS MA BYAS PA'I DBANG GIS 'DI LTA BU'I RNAM PAR SMIN PA MYONG BAR RIG PAR BYA'O, ,GANG GIS MTSON CHA DAG GIS GNOD PA BYAS PA YONGS SU BSRUNG BA'I PHYIR GRONG KHYER BRTZIGS TE 'OBS KYIS BSKOR NAS LUS 'DI YONGS SU BSRUNGS KYANG RLUNG DANG, CHAR PA DANG, SBRANG BU MCHU RINGS DANG, SHA SBRANG LA SOGS PA KHANG KHYIM DAG TU 'ONGS NAS GNOD PA BYED PAR 'GYUR LA NAD BZHI BRGYA RTZA BZHIS KYANG NANG DANG PHYI ROL NYON MONGS PAR BYED DO, ,BZA' BA DANG, BTUNG BA DANG, MAL CHA DANG, NA BA'I GSOS SMAN DANG, ZHING DANG,

KUN DGA' RA BA DANG, KHANG KHYIM DANG, GSER DANG, DNGUL LA SOGS PA RIN PO CHE SNA BDUN DANG, BRAN PHO DANG, BRAN MO DANG, SHING RTA DANG, BZHON PA DANG, 'TSO BA'I YO BYAD RNAMS YONGS SU TSOL BA NA GAL TE YID DANG MTHUN PAR MA GYUR NA YANG SDUG BSNGAL SKYED PAR BYED LA, GAL TE LONGS SPYOD THOB PAR GYUR NA YANG SER SNAS PHANGS SHING RTAG TU SRUNG BA DANG, GAL TE STOR CING CHUD ZOS PAR GYUR NA YANG SDUG BSNGAL CHEN PO SKYED PAR BYED DO, ,DGA' BO, MDOR NA NYE BAR LEN PA'I PHUNG PO LNGA'I LUS 'DI NI, 'GRO BA DANG, SDOD PA DANG, 'DUG PA DANG, NYAL BA'I SPYOD LAM THAMS CAD SDUG BSNGAL MA YIN PA GANG YANG MED PAS GAL TE YUN RING DU 'GRO ZHING SKAD CIG TZAM DU YANG NGAL GSOR MED PAR GYUR NA YANG SDUG BSNGAL 'BYUNG BAR 'GYUR LA, SDOD PA DANG, 'DUG PA DANG, NYAL BA DE DAG SO SO NAS YUN RING DU GYUR NA YANG THAMS CAD SDUG BSNGAL BAR 'GYUR PAS, GAL TE YUN RING DU SONG SONG PA LAS SKAD CIG TZAM 'DUG TU YOD PAR GYUR NA BDE BA'I 'DU SHES SKYED PAR BYED KYANG DE YANG DAG PAR BDE BAR BYED PA MA YIN NO, ,GAL TE YUN RING DU 'GRENG BA LAS SKAD CIG TZAM 'DUG PA DANG, GAL TE YUN RING DU 'DUG PA LAS SKAD CIG TZAM NYAL BAR GYUR PA LA YANG DAG PA MA YIN PAS BDE BA'I 'DU SHES SKYED PAR BYED KYANG DE YANG DAG PAR BDE BA MA YIN PAS, DE'I PHYIR NYE BAR LEN PA'I PHUNG PO LNGA'I LUS 'DI NI, THAMS CAD SDUG BSNGAL YIN PAR RIG PAR BYA'O, ,

, ,GANG LA LA ZHIG BDAG GI DON DANG, GZHAN GYI DON DANG, BDAG DANG, GZHAN GYI DON GYI PHYIR DE LTA BU'I SDUG BSNGAL RNAMS LA YONGS SU SKYO BA BSKYED NAS KHYIM NAS KHYIM MED PAR RAB TU BYUNG STE YANG DAG PAR SLOB PAR BYED NA, MYA NGAN LAS 'DAS PA RNAM PAR GROL BA'I CHOS LAS YONGS SU NYAMS PAR MI 'GYUR LA, GANG LA LA ZHIG GOS DANG, MAL CHA DANG, NA BA'I GSOS SMAN DANG, YO BYAD RNAMS KYIS DE LA RIM GRO BYED PA DE DAG KYANG RNAM PAR SMIN PA CHEN PO'I MTHU DANG, GRAGS PA THOB PAR 'GYUR RO, ,BCOM LDAN 'DAS KYIS BKA' STZAL PA, DGA' BO, 'DI JI SNYAM DU SEMS, GZUGS GANG YIN PA DE CI RTAG PA ZHIG YIN NAM, 'ON TE MI RTAG PA ZHIG YIN, BCOM LDAN 'DAS LA TSE DANG LDAN PA DGA' BOS GSOL PA, BCOM LDAN 'DAS, GZUGS DE NI, MI RTAG PA LAGS SO, ,BCOM LDAN 'DAS KYIS BKA' STZAL PA, GAL TE MI RTAG PA YIN NA, DE SDUG BSNGAL BA ZHIG YIN NAM, 'ON TE SDUG BSNGAL MED PA ZHIG YIN, DGA' BOS GSOL PA, GZUGS GANG YIN PA DE NI, SDUG BSNGAL BA LAGS SO, ,BCOM LDAN 'DAS KYIS BKA' STZAL PA, GANG MI RTAG CING SDUG BSNGAL BA DE NI, RNAM PAR 'JIG PA'I CHOS CAN YIN NA, 'PHAGS PA'I NYAN THOS MANG DU THOS PA DANG LDAN PA GANG DE LTA BU'I BSTAN PA THOS PAR GYUR NA YANG LUS 'DI NI,

'DI LTA BU'I GZUGS CAN NO, ,ZHES 'DZIN CING, DE LA BDAG DANG, BDAG GIR 'DZIN PAR BYED DAM, BCOM LDAN 'DAS, DE NI, MA LAGS TE, GZUGS LA BDAG CES BGYI BA YANG MA MCHIS LA, BDAG GI ZHES BGYI BA YANG MA MCHIS LAGS SO, ,GZHAN YANG DGA' BO, 'DI JI SNYAM DU SEMS, TSOR BA DANG, 'DU SHES DANG, 'DU BYED DANG, RNAM PAR SHES PA GANG YIN PA DE DAG CI, RTAG PA ZHIG YIN NAM, 'ON TE MI RTAG PA ZHIG YIN, BCOM LDAN 'DAS LA TSE DANG LDAN PA DGA' BOS GSOL PA, BCOM LDAN 'DAS, DE DAG THAMS CAD NI, MI RTAG PA LAGS SO, ,BCOM LDAN 'DAS KYIS BKA' STZAL PA, GAL TE MI RTAG PA YIN NA, CI SDUG BSNGAL BA ZHIG YIN NAM, 'ON TE SDUG BSNGAL MED PA ZHIG YIN, DGA' BOS GSOL PA; 'DI LTAR PHUNG PO BZHI PO DE DAG NI, SDUG BSNGAL BA ZHES BGYI BA LAGS SO, ,BCOM LDAN 'DAS KYIS BKA' STZAL PA, GANG MI RTAG CING SDUG BSNGAL BA DE NI, RNAM PAR 'JIG PA'I CHOS CAN YIN NA; 'PHAGS PA NYAN THOS MANG DU THOS PA DANG LDAN PA GANG DE LTA BU'I BSTAN PA THOS PAR GYUR NA YANG LUS 'DI'I PHUNG PO BZHI PO DAG LA BDAG DANG, BDAG GIR 'DZIN PAR BYED DAM, BCOM LDAN 'DAS, DE NI, MA LAGS TE, PHUNG PO BZHI BO DE DAG LA YANG DAG PAR BDAG CES BGYI BA YANG MA MCHIS LA, BDAG GI ZHES BGYI BA YANG MA MCHIS LAGS SO, ,GZHAN YANG

, ,DGA' BO, 'DI LTAR BDAG CES BGYI BA NI, 'DAS PA DANG, DA LTAR BYUNG BA DANG, MA 'ONGS PA DANG, NANG DANG, PHYI ROL NA YANG YOD PA MA YIN LA, RAGS PA DANG, PHRA BA DANG, BZANG PO DANG, NGAN PA DANG, NYE BA DANG, RING BA YANG MA YIN PAS CHOS DE DAG THAMS CAD NI, BDAG DANG, BDAG GI BA MA YIN NO, ,DE LTA BAS NA, DGA' BO; 'DI LTAR YANG DAG PA'I SHES PAS CHOS RNAMS LA BDAG MED PAR SO SOR BRTAG PAR RIG PAR BYA'O, ,'PHAGS PA NYAN THOS MANG DU THOS PA DANG LDAN PA GANG DE LTAR SO SOR BRTAGS NAS YONGS SU SKYO BA SKYED PAR BYED NA, RNAM PAR GROL ZHING MTHAR YONGS SU MYA NGAN LAS 'DAS PA THOB PAR 'GYUR TE, DE LTAR YANG DAG PAR BSLAB NAS CHOS 'DI MNGON DU GYUR PA'I TSE SKYE BA'I CHA NI, ZAD CING, TSANGS PAR SPYOD PA YANG DAG PAR SPYAD PAS BYA BA BYAS NAS YANG SRID PA PHYI MA LEN PAR MI 'GYUR RO, ,BCOM LDAN 'DAS KYIS CHOS KYI RNAM GRANGS 'DI BKA' STZAL PA NA, TSE DANG LDAN PA DGA' BO NI, RDUL SPANGS SHING DRI MA DANG BRAL BAS CHOS KYI MIG RNAM PAR DAG PA THOB PAR 'GYUR TO, ,DGE SLONG LNGA BRGYA PO DE DAG NI, CHOS RNAMS LA LEN PA MED PAR ZAG PA ZAD NAS SEMS RNAM PAR GROL BAR GYUR TO, ,BCOM LDAN 'DAS KYIS DE SKAD CES BKA' STZAL NAS 'KHOR MANG PO RNAMS BCOM LDAN 'DAS KYIS GSUNGS PA LA MNGON

PAR BSTOD DO,, ,,'PHAGS PA DKON MCHOG BRTZEGS PA CHEN PO'I CHOS KYI RNAM GRANGS LE'U STONG PHRAG BRGYA BA LAS, TSE DANG LDAN PA DGA' BO LA MNGAL DU 'JUG PA BSTAN PA'I LE'U STE, LE'U BCU GSUM PA RDZOGS SO,, ,,LO TZTSA BA 'GOS CHOS GRUB KYIS RGYA NAG GI DPE LAS BSGYUR CING ZHUS TE GTAN LA PHAB PA,