, ,RGYA GAR SKAD DU, A'ARYA DHARMA DH'A TU GARBHA BI BA RA nA, BOD SKAD DU, 'PHAGS PA CHOS KYI DBYINGS KYI SNYING PO'I RNAM PAR 'GREL PA, DKON MCHOG GSUM LA PHYAG 'TSAL LO, ,CHOS RNAMS GANG DAG RGYUS BYUNG DE DAG NI, ,RGYU DANG DE LA 'GOG PA GANG YIN PA, ,DE BZHIN GSHEGS PA NYID KYIS BKA' STZAL PA, ,DE SKAD GSUNGS PA'I TSUL CAN DGE SBYONG CHE, ,ZHES BYA BA SMOS TE, DE LA CHOS GANG DAG CES BYA BA NI RNAM PA BDUN DU SHES PAR BYA STE, RNAM PAR SHES PA DANG, MING DANG, GZUGS DANG, SKYE MCHED DRUG DANG, REG PA DANG, TSOR BA DANG, SKYE BA DANG, RGA SHI RNAMS SO; ,CHOS DE DAG KYANG RNAM PA LNGA LAS BYUNG BA YIN PAS RGYUS BYUNG NGO, ,RGYU LNGA PO DE DAG KYANG GANG ZHE NA, MA RIG PA DANG, SRED PA DANG, LEN PA DANG, 'DU BYED DANG SRID PA DANG LNGA'O, ,CHOS RNAM PA BDUN DANG, DE'I RGYU LNGA PO DE DAG 'GOG PA NI RGYU DANG DE LA 'GOG PA STE, DE YANG NYE BAR ZHI BA DANG, THAR PA DANG, MYA NGAN LAS 'DAS PA ZHES BYA BA NYID DO, ,DE YANG SU ZHIG GIS BSHAD CE NA, DE BZHIN GSHEGS PA NYID KYIS BKA' STZAL TE ZHES BYA BA SMOS TE, DES BSHAD CES BYA BA'I DON TO, ,DON JI LTAR GNAS PA DE BZHIN DU RTOGS PAS NA DE BZHIN GSHEGS PA'O, ,YANG NA DNGOS PO JI LTA BA BZHIN DU MA NOR BAR GZHAN LA STON PAR MDZAD PAS NA DE BZHIN GSHEGS PA'O, ,DE LTA BU'I LAM STON CING RANG NYID KYIS RTOGS PA STE, THOS PA'I DANG TSUL GANG LA YOD PA DE NI DE SKAD GSUNG BA'I DANG TSUL CAN ZHES BYA'O, ,CHEN PO NI GTZO BO DANG, PHUL DANG, DAM PA DANG, RAB MCHOG GI DON TE, DE YANG GSUNGS PA, MKHAS PA DANG, DPA' BA DANG, DKA' THUB CAN DANG, SPRO BA CHE BA DANG, BRTZON 'GRUS DRAG PO DANG, RMAD DU BYUNG BA'I PHRIN LAS MDZAD PA GANG YIN PA DE NI CHEN PO'O, ,DE LA SHES PAR BYA BA MA LUS PA MKHYEN PAS NA MKHAS PA'O, ,NYON MONGS PA THAMS CAD BCOM PAS DPA' BA'O, TSUL KHRIMS YANG DAG PAR BSGOMS PAS DKA' THUB PA'O, ,YON TAN LA SOGS PA LA MI SKYO BAS NA SPRO BA CHE BA'O, ,MGO 'AM THOD LA ME 'BAR BA BZHIN DU BRTZON 'GRUS DRAG PO'O, ,RMAD DU BYUNG BA'I CHOS MNGON SUM DU MDZAD PAS NA RMAD DU BYUNG BA'I PHRIN LAS CAN TE, DE LTA BU LA CHEN PO ZHES BYA'O, ,DGE SBYONG ZHES BYA BA NI SDIG PA DANG NYON MONGS PA NYE BAR
, ,ZHI BAS DGE SBYONG NGO, ,SDIG PA THAMS CAD SPANGS PAS BRAM ZE'O, ,NYON MONGS PAS NGAL BA SEL BAS DGE SBYONG NGO, ,BDAG NYID KYI DRI MA 'BYIN PAS NA RAB TU BYUNG BA ZHES BYA BA STE, DE LTA BU'I YON TAN DANG LDAN PA'I BCOM LDAN 'DAS KYIS DE SKAD GSUNGS ZHES SBYAR RO, ,DE BZHIN DU SDUG BSNGAL DANG, KUN 'BYUNG DANG, 'GOG PA DANG, LAM GYI BDEN PA LA YANG SBYAR BAR BYA'O, ,DE LA RGYU MA RIG PA LAS 'DU BYED LA SOGS PA RGA SHI'I BAR DU BYED PA PO MED PAR 'BYUNG BA NI, LUGS LAS 'BYUNG BA YIN LA, RGYU MA RIG PA LA SOGS PA DE DAG 'GOG PA SHES PA LUGS LAS BZLOG PA ZHES BYA BA STE, MA RIG PA LOG PAS 'DU BYED LA SOGS PA MI 'BYUNG STE, DE LTAR GSUNG BA NI DGE SBYONG CHEN PO YIN NO, ,'PHAGS PA CHOS KYI DBYINGS KYI SNYING PO'I RNAM PAR 'GREL PA SLOB DPON KLU SGRUB KYI ZHAL SNGA NAS KYIS MDZAD PA RDZOGS SO,, ,,RGYA GAR GYI MKHAN PO YE SHES SNYING PO DANG, ZHU CHEN GYI LO TZ'A BA BAN DE DPAL BRTZEGS KYIS BSGYUR CING ZHUS TE GTAN LA PHAB PA'O,,