, ,RGYA GAR SKAD DU, AU dI Y'A nA M'A R'I TZYEE S'A DHA NAm, BOD SKAD DU, AUdYAN GYI 'OD ZER CAN GYI SGRUB PA'I THABS, 'PHAGS MA 'OD ZER CAN LA PHYAG 'TSAL LO, ,SNGON DU BSTAN PA'I CHO GAS SDIG PA BSHAGS PA'I RJES SU STONG PA NYID RNAM PAR BSGOMS LA, SNA TSOGS PADMA DANG NYI MA LA MAm GI SA BON DMAR PO YONGS SU GYUR PA LAS AU dYAN GYI 'OD ZER CAN MDOG DMAR BA, ZHAL DRUG PA PHYAG BCU GNYIS PA ZHAL RE RE LA SPYAN GSUM GSUM MO, ,DMAR PO DANG,
, ,NAG PO DANG, DKAR PO DANG, LJANG GU DANG, SER PO NI G-YAS SKOR DU ZHAL LNGA'O, ,STENG DU NI PHAG ZHAL NAG PO'O, ,DANG PO G-YAS KYI PHYAG DRUG TU GO RIMS BZHIN DU RAL GRI DANG, 'KHOR LO DANG, GTUN SHING DANG, MDA' DANG, DGRA STA DANG, RDO RJE RTZE GCIG PA'O, ,G-YON GYI PHYAG RNAMS SU SDIGS MDZUB DANG BCAS PA'I ZHAGS PA DANG, KHA tV'Am GA DANG, THOD PA DANG, MYA NGAN MED PA'I YAL GA DANG, TSANGS PA'I MGO BO DANG, GZHU DANG RTZE GSUM MO, ,MCHOD RTEN GYI NANG NA GNAS PA, KLU'I DBANG PO BRGYAD KYIS SKU BRGYAN PA, SKRA KHAM PA GYEN DU BSGRENG BA, ZHAL MCHE BA GTZIGS PA, MGO BO SKAM PO BRGYAD KYIS DBU BRGYAN PA, MGO BO RLON PA'I PHRENG BA SKE BA NAS 'CHANG BA, RIN PO CHE MANG POS SPRAS PA'I SHING RTA SNA TSOGS PA PHAG PA BDUN LA CHIBS PA, PHYI ROL DU DUR KHROD BRGYAD KYIS YONGS SU BSKOR BA, SHING RTA'I DBUS SU GNAS PA NI SKYIL MO KRUNG GIS BZHUGS PA, RDO RJE DANG KHAB DANG, MYA NGAN MED DANG, SDIGS MDZUB BSNAMS PA, MDOG BZANG PO'I 'OD ZER CAN SHA 'GAG SER PO, SNA TSOGS KYI RIN PO CHES BRGYAN PA, STAG GI PAGS PA'I SHAM THABS KYIS KYANG BRGYAN PA'O, ,'OD DMAR PO LAS DE BZHIN GSHEGS PA LNGA SPRO BA DANG, SKAD CIG GIS BSAMS LA SNYING GAR NYI MA LA MAm GI SA BON LAS RNAM PAR BYUNG BA'I 'OD ZER BRGYAD, SANGS RGYAS DANG BYANG CHUB SEMS DPA' YANG DAG PAR BKUG STE, DBANG BSKUR BA BLANGS NAS RNAM PAR SNANG MDZAD BDAG NYID KYI DBU RGYAN DU RNAM PAR BSAM PAR BYA'O, ,DE NAS RNAL 'BYOR PAS 'KHOR LO 'KHOR BA'I RIM PA 'DIS SNGAGS KYI BZLAS PA BYA'O, ,AOm M'A R'I TZYEE M'Am H'Um H'Um PHAt PHAt SV'AH'A, BZLAS PA BYAS NAS PHYIS KYI DUS SU TING NGE 'DZIN NYE BAR BSDUS LA DE NYID KYI RNAL 'BYOR GYIS JI LTAR BDE BAR GNAS PAR BYA'O, ,AU dYAN GYI 'OD ZER CAN GYI SGRUB THABS, SLOB DPON LHAN CIG SKYES PA'I ROL PAS MDZAD PA RDZOGS SO, ,PAndI TA DON YOD RDO RJE DANG, KHAMS PA LO TZ'A BA DGE SLONG BA RIS BSGYUR BA'O,,