, ,DPAL RDO RJE RNAM PAR 'JOMS PA LA PHYAG 'TSAL LO, ,GANG DAG GZA' RNAMS KYIS ZIN PA LAS GROL BAR 'DOD PA'I SGRUB PA PO DAM TSIG DANG LDAN PAS, DKYIL 'KHOR SNGA MA LTAR BRIS LA, DKYIL 'KHOR GYI SHAR PHYOGS SU CHU DANG KHRAG DANG 'O MA BSRES PAS SNOD ZANGS LA SOGS PA BKANG LA, GZA' GANG GIS ZIN PA'I GZUGS BAG ZAN LA ZHI DKAR SA'I PHYE MAS BSRES PA LA KHRU GANG PA TSON SNA TSOGS PAS RI MO DANG, THIG LER BYAS LA GZHAG GO; ,DE'I LUS RNAMS LTAS NGAN SNA TSOGS PA'I SPU DANG, STAG GZIG GI RAS DANG, SMYUG MA GTZANG MA LA GDUGS DANG, RGYAL MTSAN DANG, BA DAN KYANG PHYAR RO, ,DE NAS GZUGS DE CHU'I STENG DU KHRI BYAS LA DAR DMAR PO'I YOL BA BRES LA GZHAG GO, ,DKYIL 'KHOR GYI PHYOGS MTSAMS RNAMS SU GTOR MA GTZANG MA BRGYAD, SPOS DANG MAR ME DANG BSHOS DANG LDAN PA BSHAM MO, ,STAG PA'AM SHUG PA KHRU GANG BA CIG LA KHRAM NYI SHU RTZA GCIG BTOD LA, RMA BYA'I SGRO DANG BAL TSON DANG, DAR TSON LNGA YIS BYAS PAS GZAS ZIN PA'I LUS MGO MJUG BYA BA STE; CHU DANG GZUGS LA BSTIM MO, ,SNGAGS PA GTZANG SBRA LDAN PAS DMAR PO'I GOS GYON, MGO LA DMAR PO'I THOD BCINGS LA, ME LONG LNGA BTZUGS LA GZA' GANG GIS ZIN PA'I SNYING PO LA 'BUM PHRAG GCIG KHRAM SHING LA BTAB LA KHRAM PHYIS BYAD BKROL SHOD GTOR ZHES BRJOD CING NAD PA'I LUS LA GZA'I SGO'I NGOS SU BYA STE, GZUGS LA BSTIM, GTOR MA CHAR GYIN GZA' LA MCHOD PA DANG BSTOD PA BYA, LHAG MA BDUN PO'I SNYING PO LA STONG PHRAG RE CHU LA BZLAS SHING, GZAS ZIN PA'I LUS LA BYA BA BO, ,DBUNG SHIG ,TSOGS KHYE, NGAR RTUL, DMAG
SOD; CES BRJOD CING BRAB PO, ,DE NAS 'BRU MAR DANG RTZI MAR LA SOGS PA RNYED TSAD LA SNYING PO RGYAS BSDUS GANG YANG RUNG BA BRGYA RTZA BRGYAD BZLAS TE, NAD PA'I LUS MGO MJUG TU BSKU MNYE BYA'O, ,DE LTAR LAN GCIG LAS MA GROL NA GNYIS DANG GSUM DANG BDUN BYAS NA, GZAS ZIN PA LAS MI GROL MI SRID DO, ,DE NAS CHU RUNGS SU BCAS PA DE RGYA MTSO CHEN PO'I GLING NGAM, RI BRGYAD 'DUS PA'I RTZE MO LA PI WANG LA SOGS PA'I SGRA SNA TSOGS DANG LDAN PAS BSKYAL LO, ,GTOR MA BRGYAD PO YANG PHYOGS MTSAMS MA NOR BAR GTANG, DE LTAR CHO GA RDZOGS PAR BYAS NAS, GZAS ZIN PA LA YANG GONG GI GZA' BRGYAD KYI DKYIL 'KHOR DU DBANG BSKUR NA, DUS THAMS CAD DU GZA' RNAMS KYI DMAG DPON DU 'GYUR RO, ,GAL TE GZA' GANG GIS ZIN PA'I DUS MA PHYED NA GZA' BRGYAD CHAR GYI GZUGS BYAS LA, BSNYEN PA 'BUM PHRAG RE BSKYAR LA SNGA MA LTAR BYA'O, ,GZA'I GDON LAS GROL BAR BYED PA'I CHO GA RIN PO CHE GROL BYED CES BYA BA, DPAL MAR ME MDZAD BZANG POS MDZAD PA RDZOGS SO,,