, ,RGYA GAR SKAD DU, BADZRA BI D'A RA nA KARMA TZA TU:S'A DHA NA BI DHI:, BOD SKAD DU, RDO RJE RNAM PAR 'JOMS PA'I LAS BZHI SGRUB PA'I CHO GA ,RDO RJE RNAM PAR 'JOMS PA LA PHYAG 'TSAL LO, ,GNYIS MED YE SHES RDO RJE CAN, ,MA RUNGS 'DUL LA PHYAG 'TSAL NAS, ,'BYUNG BA BZHI LA BRTEN PA'I LAS, ,TSAR GCAD RJES SU GZUNG BA BSHAD, ,SA PHYOGS GANG DU GNOD PA'I LAS, ,SGRUB PAR 'OS PA DER GNAS TE, ,TSVA SGO CAN NAS SA BLANGS LA, ,THAB KHUNG ME DBYIBS NAG POS BYUG ,GNAG DANG 'KHYOL DANG DRI NGA DANG, ,SRIN GYIS RNAM PAR ZOS PA DANG, ,REG NAS ZUG RNGU BSKYED PA'I SHING, ,KHUNG DANG RJES MTHUN DBYIBS SU BRTZIG ,GU GUL NAG PO N'A RI'I SHA, ,KHVA YI GSHOG PA BONG BU'I SPANGS, ,MCHE BA CAN GYI RTUG PA DANG, ,YUNGS KAR GDON RNAMS TSAR GCOD BYED, ,TIL DANG ME TOG NAG PO DANG, ,MA SHA LA SOGS 'BRU NAG BCAS,, DUG KHRAG TSA BA'I MAR KHU RNAMS, ,SKYES PA'I YAN LAG LAS BYUNG BA'I, ,SNOD DAM YANG NA LCAGS KYI SNOD, ,NIM PA'I SHING LO'I SNOD BZHAG NAS, ,RDO GNYIS GTZUBS LAS BYUNG BA'AM, ,RNGON PA'I KHYIM BLANGS ME SBAR TE, ,DE'I DBUS RAm LAS DRAG PO'I ME, ,KHRO GZUGS 'JIGS PAR BYED PA PO, ,MDOG NAG RNAM PAR GTZIGS PA'I ZHAL, ,BGRANG PHRENG MI 'JIGS SBYIN PA DANG, ,DBYU GU RTZE GSUM SPYI BLUGS 'DZIN, ,PHYAG BZHI 'JIGS CHEN 'JIGS MDZAD PA, ,RA YI GDAN LA GNAS PA BSKYED, ,YE SHES ME NI SPYAN DRANGS TE, ,DE DANG GNYIS SU MED BYAS LA, ,MCHOD DANG BSTOD PAS MNYES PAR BYAS,, AOm AAGNE DE WA, K'A LA RU TRA, MA H'A RU TRA, SARBBA KARMA MA HE SHVA RA SARBA DUsht'A NA M'A RA YA H'Um PHAt, SNGAGS BCAS RDZAS RNAMS TSA BA YI, ,MAR LA SPAGS TE ME LA DBUL, ,SLAR YANG MCHOD DANG BSTOD PA YIS, ,MNYES PAR BYAS LA MI DBUS SU, ,RANG LHA BSKYED DANG YE SHES GZHUG ,DER YANG MCHOD DANG BSTOD BYAS TE,,
TSA BA'I MAR GYIS SPAGS PA'I RDZAS, ,SNGAGS BCAS BSREGS PAS LHA MNYES BYAS, ,'DIR YANG DE BZHIN MCHOD PA DANG, ,BSTOD PAS MNYES BYAS SGRUB GSOL DANG, ,YI GE BRGYA BA'I GSANG SNGAGS KYIS, ,YONGS SU DAG PAS MNYES PAR BYA, ,RDO RJE'I SNGAGS KYIS LHA GSHEGS TE, ,SLAR YANG MI DMIGS MCHOD PA DANG, ,BSREG DANG MCHOD DANG LAS SGRUB PAR, ,GSOL BTAB NAS NI GSHEGS GSOL BYA, ,'DIS NI SGRUB LA BAR GCOD PA'I, ,BGEGS MED DNGOS GRUB SBYIN PAR BYED, ,DPAL RDO RJE RNAM PAR 'JOMS PA'I LAS SU BYA BA ME DANG 'BREL BA'O,, ,,THAL BA MTSAN NGAN SNOD GZHAG PA, , DER NI BGEGS KYI GZUGS BRIS LA, ,DKYIL 'KHOR DUR KHROD SO PHAG GIS, ,ME GZUGS BRIS BA'I STENG DU GZHAG ,RANG LHAR BSGOMS PA'I SNYING GA YI, ,YE SHES YI GE'I 'OD ZER GYIS, ,BGEGS KUN MDUN GYI SNGAGS LA BSTIM, ,SNGAGS 'OD ME BZHIN TSA BA YIS, ,BSREG PAR BSAM ZHING BZLAS PA'I MTHAR, ,YUNGS KAR YUNGS NAG SKE TSE DUG ,GSANG SNGAGS BZLAS DANG BCAS PAS BRAB, ,SKYES PA'I RKANG DAM SENG LDENG GI, ,PHUR BU SNGAGS BCAS SNYING GAR BSNUN, ,DE MTHAR GZUGS BCAS THAL BA LA, ,RNAM PAR 'THOR BA'I SBYOR BA YIS, ,TSAR GCOD BGEGS MED GRUB SBYIN BYED, ,DPAL RDO RJE RNAM PAR 'JOMS PA'I LAS SU BYA BA RLUNG DANG 'BREL BAS 'THOR BA'O, ,BSREGS PA'I THAL BA TSVA SGO CAN, ,SHING GCIG RTZA BA 'JUG NGOGS SA, ,NIM PA'I KHU BAS SBRUS PA LAS, ,BGEGS GZUGS SNYING GAR SNGAGS BRIS GZHUG ,RANG LHA YE SHES YI GE YI, ,'OD KYIS BGEGS BKUG GZUGS LA BSTIM, ,SNGAGS 'OD ZHAGS PAS 'CHING BA YI, ,BSAM GTAN LDAN PAS RIG SNGAGS BZLAS, ,'DZEG DANG 'PHAR DANG SNYING RJE BA'I, ,NGA RO 'DON PA'I RTAGS THOB NAS, ,MCHOD RTEN MTSAN MA GCIG PA LA, ,DUR KHROD MA MO'I KHYIM DU SBA, ,SBYOR 'DIS SGRUB LA BAR GCOD PA, ,BCINGS NAS BGEGS MED DNGOS GRUB STER, ,DPAL RDO RJE RNAM PAR 'JOMS PA'I LAS SU BYA BA SA DANG 'BREL PA MNAN PA'O,, ,,DBEN PAR TSVA SGO CAN SA LA, ,DUG DANG KHRAG SBYAR CHUS SPAGS PAS, ,DKYIL 'KHOR GRU GSUM DUG DANG KHRAG ,RO BSREGS SOL BAS NAG POR BYUG,
, ,DER NI BUM PA KHA DOG GNAG ,SNGON PO'I RAS KYIS MA KUL DGRIS TE, ,GDUG PA'I SHING GIS KHA BRGYAN NGAS, ,RGYUN BRAL CHU YIS LEGS BKANG STE, ,DER YANG MING RUS YUNGS KAR DANG, ,DUG KHRAG GU GUL SKE TSE GZHUG ,RANG LHA'I RNAL 'BYOR LDAN PA YIS, ,BUM NANG YAm RAm BAm BHR'Um LAS,, RLUNG GNAS ME STENG CHU DKYIL 'KHOR, ,BSGOMS TE RANG SNYING SA BON LAS, ,BGEGS BKUG 'KHOR LO'I LTE BAR GZHUG ,SNGAGS KYI 'OD KYIS BSKUL BA'I RLUNG, ,RNAM PAR G-YOS PAS ME SPAR TE, ,RAB TU KHOL BA'I CHU RLABS DANG, ,BSREGS PA'I 'KHOR LOS BGEGS KYI LUS, ,NYAM THAG BYED BSGOM GSANG SNGAGS BZLAS, ,SBYOR BA 'DI YIS JI SRID DU, ,MNGON PAR 'DOD PA RDZOGS PA DANG, ,GANG GI LUS LA CHUS REG PA, ,BGEGS KYI GNOD PA LAS GROL 'GYUR, ,DPAL RDO RJE RNAM PAR 'JOMS PA'I LAS SU BYA BA CHU DANG 'BREL PAS BKRU BA'O, ,RDO RJE CAN GYI LAS GANG GIS, ,MA RUNGS GDON BGEGS TSAR BCAD NAS, ,'GRO RNAMS RJES SU 'DZIN PA'I LAS, ,'DI NI GZHAN PHAN BYED PA'O, ,RDO RJE RNAM PAR 'JOMS PA'I LAS BZHI SGRUB PA'I CHO GA ,BRAM ZE MA nI BADZRAS MDZAD PA RDZOGS SO,, ,,PAndI TA CHEN PO DZNY'A NA SHR'I DANG, LO TZ'A BA RA BA ZHI BSHES GNYEN GYIS BSGYUR BA'O,,