, ,DPAL SPYAN RAS GZIGS RDO RJE THOD PA CAN LA PHYAG 'TSAL LO, ,DPAL LDAN YE SHES RDO RJE 'DZIN DANG BDE BA CHE, ,MGO PHYED KHRAG BKANG NYAMS DGU'I GAR GYIS ROL PAR BZHUGS, ,ME TOG 'DAB DBUS GE SAR RANG GI SNYING PO BZHIN, , LHA MCHOG GIS MTSAN YE SHES LHA MO BZHIS BTUD 'DUD, ,BLO LDAN CHO GA BZANG SHES PAS, ,BDE CHEN DNGOS GRUB NYE BA'I PHYIR, ,KA P'A LA 'DRA'I GNAS SU NI, ,KA P'A LA YI DNGOS GRUB BSGRUB, ,MTSAN BZANG RIN CHEN MGO PHYED LA, ,GA BUR GLA RTZI TZANDAN SOGS, ,SNA TSOGS DRI ZHIM BYUGS BYAS TE, , GSO SBYONG CAN GYIS DKYIL 'KHOR BRI, ,SENG KHRI NYI ZLA PADMO DANG, ,DBUGS BRAL GDAN LA BZHAG NAS NI, ,LNGA MTSAN LNGA PHRAG LNGA RAB DGANG, ,BDE GSHEGS RING BSREL SNYING POR GZHUG, ,'DAB BRGYAD RTZIBS BRGYAD MU KHYUD PHRENG, ,BKRA SHIS BRGYAD DANG RIN CHEN BRGYAD, ,BRGYA PHRAG GRUB PA'I RDZAS 'DZIN
PA, ,SGEG MO MDZES LHA MOS BSKOR DBUS, ,'DAB BZHI RDO RJES MTSAN PA'I RTZER, ,RGYAL PO'I PHO BRANG KHRI BZANGS CAN, ,LEGS BSKYED DE MTHA' PHYOGS BZHI'I CHAR, ,LHA MO BZHI YI THOD PA DGOD, ,GLANG CHEN MYOS PA'I MCHE BA RNO DANG SMAD 'TSONG CHANG 'TSONG ME LONG DANG, ,SA DBANG MNGA' BDAG COD PAN DPA' BO SEN MO DE BZHIN DKA' THUB 'DZIN KHA SPU, ,BDE GSHEGS SKU KHRUS TSIL CHEN DANG NI G-YAS SU 'KHYIL BA'I DUNG DKAR RNAMS, ,PHYOGS MTSAMS RIN CHEN BUM PA BZANG LA BRGYAD PAR BYA, ,DE NAS SNGAGS PA KHA SHAR BLTAS, ,GOS MCHOG PHYI DANG DKAR DMAR LHUB, ,ME TOG PHRENG BAS SPRAS GON TE, G-YAS G-YON RDO RJE'I THOD GZUNG 'DUG ,'JIG RTEN MGON PO BDE CHEN SKU, ,DKAR LA DMAR GSAL MDANGS MNGA' BA, ,RDO RJE RIN CHEN RUS PAS SPUD, ,RDO RJE THOD 'DZIN NGA RGYAL BYA, ,DE MDUN RDO RJE PHRENG LDAN MA, ,DMAR LA DKAR GSAL SHIN TU MDZES, ,RDO RJE GRI GUG MGO PHYED CAN, ,BCING BA'I PHYAG RGYAS 'KHYUD PA'O, ,PHYI NANG GSANG BCAS RNAL 'BYOR GYIS, ,CHO GA BLA MA'I MAN NGAG BZHIN, ,MCHOD BYAS YE SHES PA BKUG LA, ,'DOD PA DRAG POS GSOL BA GDAB, ,BDE CHEN 'JIG RTEN GSUM MGON NI, ,SHES RAB RDO RJE 'BAR BA DANG, ,SNYING RJE CHEN PO KA P'A LA, ,GNYIS MED YE SHES HR'I: YIG 'DZIN, ,RDO RJE MKHA' 'GRO RDO RJE CAN, ,DKAR MO SGEG MO BDE STER MA, ,GRI GUG DANG NI THOD PA THOGS, ,GTZO CHEN GTZO MO NYID PHYAG 'TSAL, ,AE MA'O STOBS BDAG BRTZE SLAD DU, ,KA P'A LA NI BDE CHEN SNOD, ,DNGOS GRUB PHYIR NI SHES RAB THABS, ,SNYOMS PAR 'JUG PA MDZAD DU GSOL, ,DE LTAR BSTOD DANG GSOL BA YIS, ,GTZO BO'I THUGS KAR BSKUL BA NA, 'DAB BZHI LHA MO PHYOGS KYI LHAS, ,RANG RANG RJES MTHUN MCHOD PAR BYA, ,DE NAS SHES RAB THABS SNYOMS ZHUGS, ,DKAR DMAR AA PHRENG KA PHRENG RGYUN, ,BDE CHEN PHYI NANG SKYUG SBYANGS NAS, ,RING BSREL LA NI LHA BSTIM BYA, ,'TSEG DANG 'GUL DANG 'PHAR BA DANG, ,'OD 'BYIN PA DANG SGRA GRAG DANG, ,RDZAS RNAMS 'PHYUR BA MTHONG NAS NI, ,MCHOD PA CHEN PO BRTZAM PAR BYA, ,DPAL RDO RJE THOD PA'I DNGOS GRUB SGRUB PA'I THABS RDZOGS SO,,