, ,'JAM DPAL GZHON NUR GYUR PA LA PHYAG 'TSAL LO, ,MTSAN YANG DAG PAR BRJOD PA'I RNAL 'BYOR PAS SHES PA DUG GSUM LAS BZLOG PA'I MAN NGAG NI, DE YANG RIG PA BYANG CHUB KYI SEMS 'OD GSAL STONG PA GNYIS MED DE MA RIG STE MA SHES PA'O, ,SEMS CAN SANGS RGYAS KYI SNYING PO CAN YIN PA LA SANGS RGYAS KYI RGYU BOR TE NGAN SONG GI RGYU BSAGS PA NI GTI MUG GO, ,DE LTAR KHAMS GSUM GYI 'KHOR BA SDUG BSNGAL YIN PAR MA SHES PAS, SDUG BSNGAL DE LA MNGON PAR SRED CING CHAGS PA NI 'DOD CHAGS SO, ,DE LTAR CHAGS PA'I DBANG GIS SEMS CAN RNAMS KYI NYID SROG NYING GIS BCAD DE NYID SHA NYID GIS ZOS NAS GNOD PA BYAS PA NI ZHE SDANG NGO, ,DE LTAR RGYU DUG GSUM LAS 'BRAS BU NGAN SONG GSUM DU SMIN NO, ,DE'I DBANG GIS NYON MONGS PA'I CHU BO BZHI 'KHOR BA'I RGYA MTSOR 'BAB PA NI 'DI LTA STE, RTOG PA'I CHU PO DANG, LAS KYI CHU BO DANG, 'KHOR BA'I CHU PO DANG, SDUG BSNGAL GYI CHU BO'O, ,DE LA RTOG PA'I CHU BO GANG ZHE NA, RTOG PA'I CHU BO SNGA MA LA BRTEN NAS, PHYI MA BYED PA 'CHAD PA'O, ,LAS KYI CHU BO GANG ZHE NA, RTOG PA SNGA MA DE'I DBANG GIS LAS DGE SDIG YOD PAS SDIG PA SPYAD PA'I DBANG GIS LAS KYI RNAM SMIN GYI 'BRAS BU ZAD PA MED PAR 'BYUNG BA'O, ,'KHOR BA'I CHU BO GANG ZHE NA, LAS DE MA ZAD PA'I BAR DU SREG PA YANG RGYUN MI CHAD PAR 'BYUNG BAS SO, ,SDUG BSNGAL GYI CHU BO ZHE NA, DE LTAR SRID
PA GSUM DU 'KHOR BAS 'BRAS BU SDUG BSNGAL GSUM DANG RGYUN MI 'CHAD PAR NYAMS SU MYONG BA'O, ,DE BAS NA DE LTAR SMIN PAR BYED PA'I RGYU DUG GSUM LAS BZLOG NA CHU BO BZHI YANG RANG LOG TU 'GYUR RO, ,MTSAN YANG DAG PAR BRJOD PA'I SHES PA DUG GSUM LAS BZLOG PA'I MAN NGAG SLOB DPON 'JAM DPAL BSHES GNYEN GYIS MDZAD PA RDZOGS SO,,