, ,RGYA GAR SKAD DU, MA H'A MU DRA TATTVA N'AKshA RO PA DE SHA, ,BOD SKAD DU, DE KHO NA NYID PHYAG RGYA CHEN PO YI GE MED PA'I MAN NGAG ,'JAM DPAL SMRA BA'I SENG GE LA PHYAG 'TSAL LO, ,GRUB THOB DAM PA BRGYAD CU RTZA BZHI LAS, ,SKYES BU KHYAD PAR RIG 'DZIN LNGA YI GZHUNG, ,MCHOG GYUR RNAMS KYI ZHABS KYI RDUL LA REG ,DE PHYIR DPE BRAL PHYAG RGYA CHEN PO BSHAD, ,RNAM GCOD DANG NI YONGS GCOD DANG, ,PHUNG PO GSUM BO SEL BA DANG, ,DON DAM MJAL BA'I TSAD MA YIS, ,YANG DAG YID LA LTA BA BYA, ,YANG DAG DON LA YI GE MED, ,GANG GIS YI GE MED SHES PA, ,DE YIS YI GE THAMS CAD SHES, ,YI GE AA NAS KshA LA RDZOGS, ,SDE TSAN BRGYAD KYI SGRA SBYOR NI, ,A'A LI K'A LIR SHES PAR BYA, ,MA SKYES PA DANG MA 'GAG PA, ,ZUNG 'JUG MTHA' BZHI BRAL BA YI, ,BDE BA CHEN PO RGYUN CHAGS SU, ,BLA MA'I BRDA YIS MTSON PAR BYA, ,KHA DOG MAR ME ME LONG RGYA, ,ME SHEL SA BON SKYUR DANG SGRA, ,BRGYAD PA 'DI RU DON BSDUS PA, ,GO BA CIG SHOS SKYE BAR 'GYUR, ,AINDRA BH'U TI BDAG MED MA, ,LHAN CIG SKYES SBYOR 'DOD YON GROL, , 'KHOR BA DANG NI MYA NGAN 'DAS, ,BDEN DON RTOGS PA 'PHAGS PA LHA, ,SNGOG DANG RTZOL BA N'A GA PA, ,PHYI NANG RLUNG GSUM TSANGS PAR 'DREN, ,KHA SBYOR THIG LE PADMAR 'BYUNG, ,BDE BAS RGYAS PA'I ZA MA TOG ,SKU GSUM MNYAM GZHAG MDA' BSNUN NA, ,DRAN MED SKYE MED BLO LAS 'DAS, ,MNYAM GZHAG DANG NI RJES THOB DANG, ,RMI LAM DANG NI BAR DO LA, ,ZIN DANG BRTAN DANG BOGS 'BYIN PA, ,RGYAS GDAB PA DANG RNAM PA BZHI, ,DANG PO DUS BZHI MNYAM SBYAR LA, ,GNAD GSUM GZER BZHI GDAB PAR BYA, ,LUS KYI GNAD DANG DMIGS PA'I GNAD,,
, ,RLUNG GI GNAD NI SHES PAR BYA, ,RIG PA GCUR LA GDAB PA DANG, ,SHES PA SRANG DU GZHUG PA DANG, ,SEMS NI RUNG DMIGS 'DREN PA DANG, ,RTEN DANG DBRAL ZHING BSGOM PA GCES, ,AE WAm BRGYAN PA'I BDE BA LA, ,BDE BAS BYANG CHUB LAM DU KYER, ,SNANG SRID BRDA RU SLOB PA DANG, ,GANG MTHONG PHYAG RGYA CHEN POR SHAR, ,THAMS CAD RO MNYAM DE BZHIN NYID, ,GCIG ZOS PA YIS GZHAN KUN GROL, ,JI LTAR CHU BO'I RGYUN BZHIN DU, ,RNAL 'BYOR MA YENGS RGYUN DU BSGOM, ,GZUNG BA DANG NI SBYANG BA DANG, ,SGYU MA DANG NI KHO NA NYID, ,NYAL DANG LOG PA'I KHYAD PAR LAS,, RMI LAM MAN DAG SHES PAR BYA, ,DA LTA 'CHI KHA BAR DO LA, ,RTEN DANG 'ONG DANG THIG LE SEMS, ,GRONG 'PHO'I MAN NGAG SHES PA YIS, ,BDE BA CAN DU DE 'GRO'O, ,DON MTHONG PA YIS SGRO 'DOGS CHOD, ,NYAMS SU BLANGS NA BYIN RLABS 'BYUNG, ,DROD RTAGS NUS PA TSOD ZIN PAS, , YID BZHIN NOR BU LTA BU'O, ,RLUNG MKHRIS BAD KAN 'DUS PA'I NAD, ,MTSON DANG MCHE BA 'BYUNG BA 'KHRUGS, ,DAL YAMS 'BRUM PO CHU SER LA, ,TING 'DZIN ME BTZA' SKYUGS KYIS ZHI, ,BDUD DANG MU STEGS TSE 'PHRUL GTONG, ,GDON DANG 'BYUNG BO BSHUGS PA 'DREN, ,GNOD SBYIN 'KHU LDOG BYED PA'I TSE, ,MI G-YO RGYA MTSO LTA BU GZHAG ,ME DANG CHU DANG DUG SBRUL DANG, ,BSE DANG CHOM RKUN RGYAL PO'I CHAD, ,STAG DANG DRED MO GCAN GZAN KHRO, ,DE TSONG YIS 'DOD PA YIN, ,DGOD DANG RTZED MO BYED PA DANG, ,DAL DANG DRAG DANG SHIN TU DRAG ,ZANG ZING LONGS SPYOD MANG PO LA, ,SBYOR BA 'DI YIS KHYAB NA BDE, ,RO SNYOMS GTUM MO MKHA' SPYOD DANG, ,SMAN DANG BCUD LEN BDUD RTZI BSTEN, ,RO LANGS MKHA' 'GRO DNGOS GRUB STER, ,BLANG DOR MED PA'I SEMS KYIS 'BAD, ,MTHA' RGYAS GNYIS KYIS SHAN PHYE LA, ,KHAR PHOG CAR PHOG THOG BABS SU, ,THUN DANG BCUD KYIS RTZAL SBYANGS TE, ,SNANG GSUM SBYOR BA BSKYED PA'I PHYIR, ,DBANG PO GSUM GYIS DAM MI 'DA', ,MA 'KHRUL GSUM GYIS SO THUB STE, ,SROG 'DZIN GSUM GYIS BRTAN PA THOB, ,GROL LUGS GSUM GYIS TSAD BSTAN NO, ,LO ZLA GSUM
GYIS ZAD SAR BSKYAL, ,'GRO BA SDUG BSNGAL 'KHOR BAR BYING BA LA, ,MA RIG MIG 'BYED ZHI BYED 'DI BKOD PAS, ,PHYI NANG GSANG BA KHO NA NYID RTOGS TE, ,KUN GYIS PHYAG RGYA CHEN PO THOB PAR SHOG ,DE KHO NA NYID PHYAG RGYA CHEN PO YI GE MED PA'I MAN NGAG RNAL 'BYOR GYI DBANG PHYUG CHEN PO KA MA LA SH'I LAS MDZAD PA RDZOGS SO,, ,,RGYA GAR GYI MKHAN PO DZNY'A NA GU HYA DANG, ZHU CHEN GYI LO TZ'A BA BLA MA LO BTZUN CHUNG GIS BSGYUR CING ZHUS TE GTAN LA PHAB PA,,