, ,RGYA GAR SKAD DU, TATTVA DA SHA KA N'A MA, BOD SKAD DU, DE KHO NA NYID BCU PA ZHES BYA BA, 'JAM DPAL GZHON NUR GYUR PA LA PHYAG 'TSAL LO, ,YOD DANG MED PA'I SBYOR BAS KYANG, ,SPANGS PA
, ,GANG ZHIG DRI MED PA, ,BYANG CHUB RANG BZHIN RTOGS PA GANG, ,DE BZHIN NYID DE PHYAG 'TSAL 'DUD, ,DE BZHIN NYID NI SHES 'DOD PAS, ,RNAM BCAS MA YIN RNAM MED MIN, ,BLA MA'I NGAG GIS MA BRGYAN PA'I, ,DBU MA'ANG 'BRING PO TZAM NYID DO, ,DNGOS PO 'DI NI BYANG CHUB 'GYUR, ,CHAGS PA SPANGS PA'I RANG BZHIN NYID, ,'KHRUL PA LAS NI CHAGS MED 'GYUR, ,'KHRUL PA 'ANG GNAS PA MED PAR 'DOD, ,DE NYID CI NA DNGOS RANG BZHIN, ,DNGOS PO DNGOS MED GANG YIN PA'O, ,DNGOS PO MED PA'ANG DNGOS POR 'GYUR, ,RGYU DANG 'BRAS BU'I RANG BZHIN GYIS, ,DE LTAR CHOS RNAMS RO GCIG STE, ,THOG MA MED CING GNAS MED PAR, ,JI LTA BA YI TING 'DZIN GYIS, ,'DI DAG THAMS CAD 'OD GSAL TE, ,JI LTA BA YI TING 'DZIN YANG, ,RAB TU 'JUG PA'I SEMS NYID KYIS, ,GANG PHYIR DE YANG GNAS RIG PAS, , DE NYID RGYUN MI 'CHAD LAS SKYES, ,SHES DANG SHES BYA RNAM BRAL BA'I, ,'GRO BA NYID NI GNYIS MED 'DOD, ,GNYIS DANG BRAL BAR RLOM PA YANG, ,DE LTAR 'OD GSAL BA NYID DO, ,DE LTA'I DE NYID NGES RTOGS NA, ,JI LTA DE LTAR GANG DE NA, ,RNAL 'BYOR MIG NI RGYAS 'GYUR BAS, , KUN DU SENG GE JI BZHIN NO, ,'JIG RTEN CHOS LA RNAM LOG 'DIS, ,SMYON PA'I SPYOD PA LA BRTEN NAS, ,BDAG BYIN BRLAB PAS RNAM BRGYAN NAS, ,DMIGS PA MED PAR THAMS CAD BYED, ,DRI MED DE NYID GANG BSTAN CING, ,GNYIS SU MED PA GANG SMRAS PA, ,MNYAM DANG MI MNYAM 'DI SPANGS NAS, ,BLO CHEN RNAMS KYIS RTOGS BYA'I RIGS, ,DE KHO NA NYID BCU PA, SLOB DPON GNYIS SU MED PA'I RDO RJES MDZAD PA RDZOGS SO,, ,,BLA MA PHYAG NA DANG, MTSUR GYIS BSGYUR BA'O,, ,PHYIS LO TZ'A BA TSUL KHRIMS RGYAL BAS BSGYUR RO,,