, ,RGYA GAR SKAD DU, SHR'I BADZRA B'A R'A H'I S'A DHA NAm, BOD SKAD DU, DPAL RDO RJE PHAG MO'I SGRUB THABS, DPAL GSHIN RJE GSHED DMAR PO LA PHYAG 'TSAL LO, ,GANG ZHIG SGRUB PA POS GDUG PA CAN RNAMS SANGS RGYAS KYI BSTAN PA LA GZHUG PA'I PHYIR, SKAL BA DANG LDAN PA'I SGRUB PA POS DBEN PA'I GNAS SU SONG STE, STAN BDE BA LA 'DUG NAS, MCHOD PA DANG GTOR MA SNGON DU SONG BAS, RDO RJE PHAG MO BSGOM PAR BYA'O, ,ZHAL GCIG PHYAG GNYIS MA SKU MDOG DMAR MO, PHYAG G-YON THOD PA KHRAG GIS GANG BA THUGS KAR 'DZIN PA, DE'I STENG DU G-YAS GRI GUG 'JOG PA, PADMA DANG ZLA BA'I STENG DU G-YON BRKYANG BAS BZHUGS PA, G-YAS BSKUM PAS DE'I BYIN PA'I STENG DU REG PA'I BRKYANG BSKUM GYIS BZHUGS PA, SPYAN GSUM PA, DBU SKRA GROL BA CUNG ZAD KHRO BA'I RNAM PA CAN, RUS PA'I RGYAN GYIS BRGYAN PA, GAR GYI RO DANG LDAN PA BSGOM MO, ,DE'I SNYING GA'I CHU SKYES LAS ZLA BA'I STENG DU HR'I: DMAR PO BLTA'O, ,CHU SKYES 'DAB MA BRGYAD PA KHA PHYE BA LA, A'A LI BCU DRUG 'DAB MA RE RE LA GNYIS GNYIS MDUN NAS BRTZAMS TE, G-YAS SKOR DU MGO GYEN DU BSTAN PA MDOG DMAR PO BSAMS LA, JI SRID MI SKYO'I BAR DU BSGOM PAR BYA'O, ,DE NAS SNGAGS BZLAS PAR BYA STE, AOm AA A'A; AI A'I; AU A'U; Ri R'i; Li L'i; AE AEE; AO AOO; AAm AA: HR'I: SV'A H'A, ZHES 'BUM PHRAG NYI SHU RTZA GCIG PA'I SEMS KYIS BZLAS SO, ,DE'I MAN NGAG NI, RANG GI SNYING GA'I H'Um HR'I: LAS 'OD ZER 'PHROS TE SONG BAS BSGRUB BYA'I SNYING LA PHOG ,BDAG LA MA DAD PA'I DRI MA PHYIR BSAL TE, GUS PA'I SEMS GSAL BAR SKYES PAR BSAM, DE NAS BSGRUB BYA DE'I SNYING
GAR SNGAGS KYI DBYANGS KYI YI GE BSAMS LA, BDAG GI SNYING GNAS SNA BUG G-YAS NAS HR'I: THON TE, SNA BUG G-YON NAS ZHUGS TE, SNYING GA'I DBYANGS YIG DANG RANG GI SNYING GA'I YIG 'BRU LA BSIL LA BDE BA BSAM KHO'I SNYING GA'I YIG 'BRU RNAMS DANG, MING YIG DANG PO SKOM DUNGS DUNGS PAR BSAM MO, ,HR'I: LA THIM PAS SKOM PA'I GDUNG BSEL BA DANG, BDE BA SKYES PA DE GZHIBS NAS, YANG SNYING GAR BSDUS PA LA 'OG GI TSIGS BCAD KYI DON DRAN PAR BYA'O, ,DE LTAR ZHAG BDUN GYI MTHAR MTSAN THOG THAG BYA'O, ,DES 'GRUB PAR 'GYUR RO, ,YANG RANG KHA NUB TU BSTAN PA'I MDUN DU ME LONG LA DRIS BYUGS TE, SINDHU RA BKRAM LA, DE LA PADMA 'DAB MA BZHI PA LTE BA DANG BCAS PA BRIS TE, LTE BAR HR'I: SHAR DANG LHO DANG NUB DANG BYANG DU YAm RAm BAm LAm RIM PA BZHIN BKOD PA DANG, JI LTAR 'BYOR PA'I MCHOD PA DANG, NAM MKHA' LA YI GE LNGA BRIS PA LTA BU STE, NAG PO DANG DMAR PO DANG, DKAR PO DANG, SER PO'I RNAM PAR BSAMS LA, ME LONG GI YI GE RNAMS LA BSTIM, YI GE'I RNAM PA CAN GYI MKHA' 'GRO MA RNAM PA LNGA LA SNGAGS DE NYID BRJOD CING, ME TOG DMAR PO DANG, CHANG GI MCHOD PA BYA'O, ,DE NAS PHRENG BA DMAR PO BZUNG STE, YAm RAm BAm LAm HR'I: ZHES BZLAS SO; ,LTE BA'I YI GE LAS 'OD KYI PHRENG BA SPROS TE, MDUN GYI SNGAGS LA THIM PA LA SOGS PA SPRO BA DANG BSDU BA'I RNAM PA BYA'O, ,DE LTAR SA YA PHRAG GNYIS BZLAS SO, ,DE NAS NYA'I NUB MO MTSAN THOG THAG BYA'O, ,DE NI BSNYEN PA BYA BA'O, ,DE NAS RANG BYUNG GI ME TOG SINDHU RA DANG BCAS PA'I MAndALA SNGAR BZHIN BKRAM STE, SHAR LA SOGS PA'I YIG 'BRU YAm LA SOGS PA BKOD LA, SNGA MA LTAR YI GE LA BSTIM, MCHOD PA RGYA CHEN PO BYA ZHING, SNGAGS BZLAS PAS, CHU SKYES KYI HR'I: LAS 'OD 'PHROS TE BSGRUB BYA MDUN DU BKUG STE, 'GYEL BA DANG, YANG HR'I:'I 'OD ZER DMAR PO'I SNYING GAR THIM PAS, DMAR KHRIG STE KHENGS NAS MYOS TE, BDAG LA CHAGS PAS BRGYAL BAR BSAMS LA, HR'I: LA THIM PA DANG, YI GE SNGAGS RNAMS RNAM PAR YANGS, ,SGRA DANG THIG LE SEMS KYANG MED, ,'DI NI BDE BA CHEN PO'I MCHOG ,BDAG DANG GZHAN DU YOD MA YIN, ,ZHES
, ,BRJOD DO, ,DE LTAR ZHAG BDUN GYIS 'GRUB PAR 'GYUR RO, ,RDO RJE PHAG MO'I SGRUB THABS GRUB THOB KYI 'KHOR LOS SGYUR BA'I SLOB DPON DPAL 'DZIN GYIS MDZAD PA RDZOGS SO,, ,,RGYA GAR GYI PAndI TA CHEN PO RGYAL BA'I SRAS BI BH'U TI TZANDRA'I ZHAL SNGA NAS, DPAL CHOS KYI DBYINGS KYI GTZUG LAG KHANG RANG BYUNG DU MDZAD PA LAS GLO BO LO TZ'A BA DGE SLONG SHES RAB RIN CHEN GYIS ZHUS TE GTAN LA PHAB PA'O,,