, ,RGYA GAR SKAD DU, SHR'I KRishnA YA M'A RI S'A DHA NAm N'A MA, BOD SKAD DU, DPAL GSHIN RJE GSHED NAG PO SGRUB PA'I THABS ZHES BYA BA, DPAL GSHIN RJE GSHED LA PHYAG 'TSAL LO, ,GUS PA YIS NI BLA MA YI, ,ZHABS KYI PADMAR PHYAG 'TSAL TE, ,BLA MA'I ZHAL SNGA'I BKA' DRIN GYIS, ,NAG PO ZHAL GSUM PHYAG DRUG PA'I, ,MDOR BSDUS PA YI SGRUB THABS BSHAD, ,DANG POR RNAL 'BYOR DBANG PHYUG GIS, ,DBEN
PA'I GNAS SU 'DUG NAS NI, ,STONG PA'I SEMS LA MNYAM GZHAG STE, ,SNYING GA PADMA 'DAB BRGYAD BSAM, ,DE STENG NYI MA'I DKYIL 'KHOR RO, ,DE YI STENG DU H'Um BSAMS TE, ,H'Um LAS 'OD BYUNG MDUN DU NI, ,BLA MA MKHA' 'GRO BZHUGS PAR BSAM, ,PHYAG 'TSAL BA DANG MCHOD BYAS LA, ,SDIG BSHAGS LA SOGS TSOGS BCU BSAG ,DE NAS SNYING GA'I H'Um LAS NI, ,'OD BYUNG LUS NGAG BAG CHAGS RNAMS, ,BSREGS NAS STONG PA NYID DU BSGOM, ,DE NI YE SHES TSOGS YIN NO, ,SEMS NI H'Um GI RNAM PAR BSAM, ,H'Um LAS RDO RJE RTZE LNGAR GYUR, ,RDO RJE LAS NI SKUR BSKYED DO, ,ZHAL GSUM PHYAG DRUG SKU MDOG NAG ,G-YAS DKAR G-YON DMAR DBUS MTHING ZHAL, ,SPYAN GSUM MCHE BA GTZIGS PA'I ZHAL, ,DBU SKRA KHAM NAG GYEN DU BRDZES, ,RDO RJE RAL GRI GRI GUG GSUM, ,G-YAS PA YI NI PHYAG NA BSNAMS, ,'KHOR LO PADMA THOD PA GSUM, ,G-YON GYI PHYAG NA BSNAMS PA YI; ,G-YAS BSKUM G-YON BRKYANG GSUS PO CHE, ,LHA MO PHAG MOS MGUL NAS 'KHYUD, ,PHAG MO ZHAL GCIG PHYAG GNYIS MA, ,G-YAS PA GRI GUG BANDHA G-YON, ,GTZO BO'I SKU LA 'KHYUD PA'I TSUL, ,GNYIS SU MED PA'I GNAS SU BZHUGS, ,MIG DANG LUS SOGS DBANG PO DRUG ,SANGS RGYAS DRUG KYANG YOD PAR BSAM, ,SKU GSUNG THUGS KYANG BYIN GYIS BRLAB, ,SNYING GA'I H'Um LAS 'OD BYUNG BAS, ,YE SHES MKHA' 'GRO SPYAN DRANGS LA, ,TSIG GI DBANG YANG BLANG BAR BYA, ,BCOM LDAN DE BZHIN GSHEGS PA KUN, ,BCOM LDAN MNGA' BDAG CHEN PO RNAMS; ,KHYED KYIS BDAG LA DBANG BSKUR STZOL, ,DE SKAD BDAG GIS DBANG BLANGS PAS, ,YE SHES BDUD RTZI'I CHU RGYUN GYIS, ,BDAG GI SPYI BOR DBANG BSKUR BAR, ,RIGS LNGA COD PAN GYUR BAR BSAM, ,MCHOD DANG BSTOD DANG BDUD RTZI BZA', ,RDO RJE'I BZLAS PA BYA BA STE, ,BZLAS PA'I SNGAGS NI 'DI YIN NO, ,AOm HR'I: shtRi: WI KRi T'A NA NA H'Um H'Um PHAt PHAt SV'A H'A, ,THAMS CAD GRUB PA'I DON DU BZLAS, ,GTOR MA'I SNGAGS NI 'DI YIN NO, ,AOm AA K'A RO MU KHAm SARBA DHARM'A n'Am A'A DYA NU TA PANNA TV'A TA AOm A'A: H'Um PHAt SV'A H'A, BAR CHAD THAMS CAD BSRUNG BA'I PHYIR, ,DES NI GTOR MA SBYIN PAR BYA, ,DES NI
, ,BSKYED PA'I RIM PA'O, ,DE NAS RNAL 'BYOR NGAL BSO BYA, ,SNYING GA'I H'Um GI 'OD ZER GYIS, ,KHAMS GSUM MA LUS KUN LA KHYAB, ,KUN KYANG SANGS RGYAS SKU RU GYUR, ,GYUR PA KUN KYANG BDAG LA BSDU, ,BDAG KYANG H'Um LA BSDU BYAS LA, ,H'Um YANG THIG LER GYUR PAR BSGOM, ,LHAG MA'I RTOG PA SPANGS PA STE, ,YANG DAG BDE BA'I RNAM PA'O, ,PHYAG MED ZHAL MED KHA DOG MED, ,MCHOG TU DGA' BA'I MTSAN NYID DO, ,'DI BYAS BSOD NAMS GANG THOB DES, ,SEMS CAN THAMS CAD SANGS RGYAS SHOG ,NAG PO ZHAL GSUM PHYAG DRUG PA'I MDOR BSDUS PA'I SGRUB THABS RDZOGS SO,,
, ,RGYA GAR SKAD DU, KRishnA YA M'A RI KRO DHA R'A DZA BA TRA SA RA S'A DHA NAm N'A MA, BOD SKAD DU, KHRO BO'I RGYAL PO GSHIN RJE'I GSHED NAG PO DUS MTHAR PHYIN PA'I SGRUB THABS ZHES BYA BA, BCOM LDAN 'DAS GSHIN RJE GSHED LA PHYAG 'TSAL LO; ,SPROS BRAL THUGS SU CHUD BDAG 'GRO BA KUN KHYAB PA, ,MA LUS BDUD 'JOMS THOGS MED KHRO BO KUN GYI GTZO, ,PADMA RDO RJE SNYOMS 'JUG ZHI BDE MDZES PAS BSGYINGS, ,LONGS SPYOD RDZOGS SKUR BZHENGS PA'I SNYING PO LA BTUD DE, ,SANGS RGYAS THUGS KYI RGYUD RGYAL 'BUM PA THU BO CHE, ,NA DA KU BE RA LA YAB KYIS RJES GDAMS SHING, ,DE YIS DE NYID BSDUS PA'I BYANG CHUB SEMS CHEN PO'I, ,RNAM PAR RGYAL BA GSHED RGYUD LAS BYUNG BSHAD PAR BYA, ,'GRO KUN SANGS RGYAS SNYING PO STE, ,GTZO BO MI YANG DAD LDAN BRTAN, ,RAL GRI PADMA SKYON MED GNAS, ,COD PAN BRGYAN PA MTHONG BAR BYA, ,MTHA' YANG MI GNAS GTZO BO LA, ,DMIGS DANG PADMOS RJES BZUNG NAS, ,RGYAL POR DRAN PA BYAS NAS KYANG, ,LHAG PA'I LHA RNAMS SPYAN DRANG NGO, ,RNAM DAG BDUN GYIS SBYANGS PA LA, ,TSANGS PA BZHI YI SEMS GNAS NAS, ,'PHROG PA MED PA'I SNYING PO NYID, ,THOG MTHA' MED PA DMIGS PAR BYA, ,AOm SH'U N+YA T'A DZNY'A NA BADZRA SVA BH'A WA A'ATMA KO&HAm, YI GE GSUM GYI RANG BZHIN NI, ,BDE GSAL STONG PA'I RANG BZHIN NYID, ,THOG MTHA' MED NAS SEMS CAN LA, ,GNAS PHYIR RIG PA NYAMS MI BYA, ,H'Um LAS RE PHA BYUNG NAS SU, ,NYI
DKYIL RDO RJE 'KHOR LO BSGOM, ,DE RJES H'Um LAS H'Um BYUNG STE, ,RDO RJE SEMS DPA' CHOS 'BYUNG GNAS, ,SKU GSUNG THUGS KYI PHYAG RGYAR LDAN, ,PADMA RDO RJES MTSAN BYAS PA'O, ,GONG MTSUNGS BHR'Um LAS GZHAL YAS KHANG, ,AOm LAS RTAG PA SNA TSOGS MNYAM, ,GDAN NI RJES MTHUN GNAS PA'O, ,AA LAS MAR LDAN NYI MA ZLA, ,MNYAM PA H'Um LAS RDO RJE STE, ,SKU YI GZI BRJID BSDUS NGA RGYAL, ,RGYUD GSHED RDO RJE 'DZIN PA BSGOM, ,PHAB PA'I SBYOR LDAN BYANG CHUB SEMS, ,YONGS 'GYUR THABS DANG SHES RAB SKU, ,YIG 'BRU LNGA YIS GANG BA LAS, ,'PHROS PA'I LHA MOS BSKUL NAS BZHENGS, ,CHOS KUN BDAG POS BSGOM PAR BYA, ,AOm DHARMA DH'A TU SVA BH'A WA A'ATMA KO&HAm, YA LAS SKYES PA'I GSHIN RJE GSHED, ,AINDRA N'I LA'I MDOG 'DRA BA, ,G-YAS DKAR G-YON DMAR PHAG MOS 'KHRIL, ,MA HE SER SKYA LA BSKUM BRKYANG, ,G-YAS PA GRI GUG G-YON THOD PA, ,RDO RJE RAL GRI 'KHOR LO PAD, ,THOD PA LNGA YIS DBU BRGYAN CING, ,DBU SKYES GYEN 'GRENG BRGYAD KYIS BRGYAN, ,RLON PA KHRAG 'DZAG LNGA BCU 'PHYANG, ,ME DPUNG NANG NA GNAS PAR BSGOM, ,RANG MTSUNGS YE SHES SEMS DPA' NI, ,CHO GA GSUM DANG LDAN PAS SO; ,YI GE LNGA RDZOGS DE BZHIN GSHEGS, ,RIGS KYI MDOG DANG MTSUN MAR LDAN, ,SKU NI MTHO GANG TSAD YIN TE, ,PHRA MO LNGA NI TSON GANG NGO, ,SKU GSUM RAB TU THOB BYA'I PHYIR, ,LUS NGAG YID GSUM BYIN BRLAB BYA, ,SPYI GTZUG RTAG PA'I RGYAL PO STE, ,MGRIN PAR RDO RJE NYI MA BSGOM, ,SNYING GAR MI BSKYOD RDO RJE 'CHANG, ,AOm A'A: H'Um, MIG LA SA YI SNYING PO STE, ,RNA BA LA NI RDO RJE 'DZIN, ,SNA LA NAM MKHA'I SNYING PO MCHOG ,LCE LA 'JIG RTEN DBANG PHYUG MGON, ,SGRIB PA RNAM SEL LUS LA DGOD, ,KUN DU BZANG PO YID KYI'O, ,KshIm DZIm KHAm GAm KAm SAm, ,CHO GA GSUM DANG LDAN PA LA, ,AOm DANG H'Um GIS SPEL BAR BYA, ,RDO RJE LNGA NI MCHOD BYAS LA, ,GSOL BTAB DBANG GIS MI BSKYOD 'GYUR, ,MI BZAD RDO RJE 'KHOR LO NYID, ,MCHOD BSTOD BYAS LA DGUG GZHUG BYA, ,AOm BADZRA SA TVA SA MA YA, TZAKRA MAndALA DH'A TU DZA: H'Um BA HO: SA MA YA STVAm AA NYA HAm, AA LA
, ,LA LA LA HO, ,AA AA AA AA, RDO RJE NAM MKHA' BYIN RLABS LA, ,BSKYOD PAS LNGA 'GYUR BYANG CHUB SEMS, ,MKHA' YI PADMAR RDZUS SKYES NAS, ,SA DGUR BSKYED LA RAB RGYAS SKU, ,BA SPU'I BU GA CHE NAS SPRO, ,SANGS RGYAS SPRIN YANG RJES BSAMS NAS, ,RIGS KYI DON YANG BSGRUB PAR BYA, ,AOm BADZRA DHRiK YA H'Um, AOm DZIN DZIK KshE H'Um, AOm RATNA DHRiK MA H'Um, AOm A'A RO LiK ME H'Um, AOm PRA DZNY'A DHRiK DA H'Um, SHAR DU GTI MUG GSHED PO STE, ,LHO RU NGA RGYAL GSHED PO'O, ,NUB TU 'DOD CHAGS GSHED PO STE, ,BYANG DU PHRAG DOG GSHED PO'O, ,SHAR LA 'OD ZER GZHAN RNON PO, ,DKAR SER DMAR LJANG RANG 'OD RIG ,RIGS KYI BDAG PO'I PHYAG RGYA 'DZIN, ,GZHAN NI GO RIMS SBYOR SHES PA'O, ,nA YO N'I RA 'PHROS PA LAS, ,BYANG CHUB SEMS KYIS RAB RGYAS PA'I, ,RTZA RTZI K'A SOGS LHA MO YIS, ,MCHOD PAS RAB TU MNYES PAR BYA, ,DE NAS RDO RJE DRIL 'CHANG BAS, , BSTOD PA YANG NI CHED DU BRJOD, ,DAM TSIG BZANG PO BYIN BRLABS NAS, ,RDO RJE H'Um GIS MYANG BAR BYA, ,SPRO BA CHEN PO 'JIG RTEN KHAMS, ,THOG MA MED PAS BSDUS BYAS NAS, ,DU MAR BRTZON 'GRUS LDAN YID KYIS, ,YANG DANG YANG DU GOMS PAR BYA, ,RDO RJE SNYING GA'I DKYIL 'KHOR LA, ,YID SKYOB BKOD NAS BZLAS PAR BYA, ,AOm HR'I: shtRi: WI KRi T'A NA NA H'Um H'Um PHAt PHAt, RIM DANG CIG CAR SBYOR BA YI, ,SEMS CAN DON DU BZLAS PAR BYA, ,ZLA BA'O COG GI BCU BZHI LA, ,DRI CHUS BYUGS PA'I DKYIL 'KHOR NI, ,GRU GSUM LDAN ZHING ME TOG SPRAS, ,MCHOD PA BZANG LDAN GTOR MAS BKANG, ,MI RUS LNGA BCU THAM PA LA, ,KHRAG GI SPANGS PA'I MGO BOR BSGOM, ,RI LU RE LA BSHED NAG PHOS, ,BRGYAN PA KHRI YI BAR DU BZLAS, ,MCHOD PA RNAMS KYIS MNYES BYAS LA, ,GSOL BTAB GTOR MA DUR KHROD SBYIN, ,AOm AINDR'A YA HR'I:, YA MA YA shtRi:, BA RU n'A YA WI, KU BE R'A YA KRi, A'I SHV'A N'A YA TA, AAGNA YE AA, NEE RRi TA YE NA, B'A YE BE YA NA, TZANDR'A YA H'Um, S'URY'A YA H'Um, BRAHMA n'A YA PHAt, BA SU DHA R'A YA PHAt, BE MA TZI TRA YA SV'A, SARBA BHU TE BHYO H'A, HI HI HI HI H'Um, PHEm PHEm PHEm PHEm PHAt SV'A H'A, GAD MO CHEN MO BRGYAD BRGYAD NAS, ,GNANG BA BYIN NAS GSHEGS PAR BSAM, ,'DI NI BSNYEN
PA'I CHO GA'O, ,SRID PA GSUM GYI 'KHOR LO NI, ,DBANG PO SKYE MCHED STONG PA YI, ,LCAGS KYI KHANG PA BCU BDUN GYI, ,RDO RJE SNYING PO DGOD PAR BYA, ,CHU YI DKYIL 'KHOR SHING RTA DANG, ,CE SPYANG RGYUG PA LTA BU'O, ,SBYOR LDAN MAN NGAG DAM PA NI, ,DAM PA'I ZHAL LAS SHES PAR BYA, ,LAS DANG RJES MTHUN 'KHOR NI, GZHAN DU RGYA CHER BSHAD PAS NA, ,'DIR NI MANG DU MA SMOS SO, ,YA MA R'A DZA SA DO ME YA, YA ME DO RU nA YO DA YA, YA DA YO NI RA YA KshE YA, YAKshE YATZTSA NI R'A MA YA, ZHI BA'I MTHAR NI SV'A H'A, RGYAS DANG DBANG LA AOm DANG HO, ,DRAG PO PHAt KYIS BRTAN PAR BYA, , PHRIN LAS BZHI NI 'GRUB PAR 'GYUR, ,RGYUD DANG BSTAN BCOS MKHAS PA BDAG MIN TE, ,DAM PA BLA MA'I ZHABS LA BRTEN NAS CHOS 'DI BYAS, ,RGYUD KYI MNGON RTOGS NGES PAR BYIN PA'I YON TAN DPAL, ,DANG DANG SHES RAB SNYING RJER BCAS RNAMS NGES SGROL SHOG ,BSNYEN DANG SGRUB PA'I CHO GA'I RIM, ,ZAB MO'I SGRUB PA RNYED DKA' BA, ,NOR BU LTA BU'I GZHUNG 'DI YIS, ,'GRO KUN GSHIN RJE GSHED NAG SHOG ,KHRO BO'I RGYAL PO GSHIN RJE GSHED NAG PO'I DUS MTHAR PHYIN PA'I SGRUB PA'I THABS ZHES BYA BA RDZOGS SO,, ,,RGYA GAR GYI MKHAN PO SHR'I PAndI TAS MDZAD PA'O, ,RNAL 'BYOR PA BSOD SNYOMS PA PRA DZNY'A SHR'I DZNY'A NA K'I RTI SA RANG 'GYUR DU BSGYUR BA'O,,
, ,RGYA GAR SKAD DU, KRishnA LA N'A RI S'A DHA NA PRO TA PHUL LA KU MU D'A N'A MA, BOD SKAD DU, GSHIN RJE'I DGRA NAG PO'I SGRUB PA'I THABS KU MU DA KHA BYE BA ZHES BYA BA, SANGS RGYAS LA PHYAG 'TSAL LO, ,'BAR BA'I 'OD ZER PHRENG 'KHRUGS PAS, ,'GRO BA'I MUN SEL GSHIN RJE'I DGRA, ,RAB SNANG BTZUN MO DGA' MDZAD LA, ,BTUD NAS DE YI SGRUB THABS BSHAD, ,DANG PO RE ZHIG SNGAGS PAS STAN BDE BA LA NYE BAR 'DUG STE, RANG GI SNYING GAR ZLA BA'I DKYIL 'KHOR RNAM PAR BSAMS LA, DE'I STENG DU YI GE YAm SNGON PO BLTA'O, ,DE MA THAG TU BYAMS PA DANG, SNYING RJE DANG, DGA' BA DANG BTANG SNYOMS RNAM PAR BSGOMS TE, DE'I 'OG TU SNYING GA'I YI GE YAm LAS SKYES PA'I 'OD ZER
, ,RNAMS KYIS, BLA MA DANG SANGS RGYAS DANG, BYANG CHUB SEMS DPA' THAMS CAD DANG, DPAL GSHIN RJE'I DGRA NAM MKHA' LA SNANG BAR BYAS LA, DE RNAMS LA MNGON PAR 'DUD PA DANG, MCHOD PA DANG MDUN DU SDIG PA BSHAGS PA DANG, BSOD NAMS LA RJES SU YI RANG BA DANG; DE YONGS SU BSNGO BA DANG, GSUM LA SKYABS SU 'GRO BA DANG, SMON PA BYANG CHUB KYI SEMS BSKYED PA DANG, RGYAL BA'I LAM LA BRTEN PA DANG, 'JUG PA BYANG CHUB TU SEMS BSKYED PA DANG, SLAR GTANG BA'I BAR DU BSGRUB PO, ,DE NAS YANG RNAM PAR THAR PA'I SGO GSUM DRAN PAS STONG PA NYID BSGOMS LA, AOm SH'U N+YA T'A DZNY'A NA BADZRA SVA BH'A WA A'ATMA KO&HAm, ZHES BYA BA'I SNGAGS BRJOD DE, 'DI NI BSOD NAMS DANG YE SHES KYI TSOGS DPAL GSHIN RJE'I DGRA SKYED PAR BYED PA'O, ,DE BZHIN DU RANG BZHIN GYI LUS DANG NGAG DANG YID DAG ,AOm A'A: H'Um ZHES PA'I YI GE GSUM PHA DANG MA'I DBUS NA GNAS PA STENG DU ZLA BA LA GNAS PA BSAM MO, ,MDUN DU NYI MA LA GNAS PA'I H'Um NAG PO LAS BYUNG BA'I RDO RJE NGA PO 'BAR BA LAS, RDO RJE'I SA GZHI DANG DRA BA DANG GUR RNAMS BSGOM PAR BYA ZHING, BGEGS MED PA'I SEMS KYIS DBUS SU SNA TSOGS PADMA DANG ZLA BA LA GNAS PA'I RDO RJE SEMS DPA' YONGS SU GYUR PA LAS CHOS KYI 'BYUNG GNAS DBUS NA PAm LAS BYUNG BA'I PADMA SNA TSOGS DANG, KHAm LAS BYUNG BA'I SNA TSOGS RDO RJE CAN BSAMS TE, DE'I ZLA BA LA YI GE BHR'Um LAS BYUNG BA'I 'KHOR LO RTZIBS BRGYAD PA YI GE BHR'Um GYIS BYIN GYIS BRLABS PA'O, ,DE YONGS SU GYUR PA LAS SKYES PA'I RNAM PAR SNANG MDZAD RIG MA DANG BCAS PA'I YAN LAG LAS BYUNG BA'I KHANG PA BRTZEGS PA, GRU BZHI SGO BZHI PA, RTA BABS BZHI DANG LDAN PA, DRA BA DANG DRA BA PHYED PAS MDZES PA, SNA TSOGS PA'I RGYAN GNAS PA, SNA TSOGS RDO RJE LA BRTEN PA'I SNA TSOGS PADMA LA ZLA BA DANG NYI MAS MNAN PA BCU BDUN GYIS MDZES PA RNAM PAR BSGOM MO, ,DE'I DBUS SU ZLA BA'I GDAN LA GNAS PA'I YI GE GSUM LA GZIGS NAS BYON PA'I SANGS RGYAS RNAMS, DBYANGS BCU DRUG DANG YA RA LA WA dA dHA LHAG PA'I GSAL BYED BZHI BCU'I GZUGS NYIS 'GYUR DU BYAS PA BYON NAS,
RIM PA BZHIN 'OG DANG STENG DU ZLA BA GNYIS SU GYUR PAR BYA BA NI, ME LONG LTA BU'I YE SHES SO, ,ZLA BA GNYIS DANG YI GE GSUM 'DRES PAS GANG BA'I ZLA BA GSUM DU GYUR PA NI MNYAM PA NYID DO, ,DE YONGS SU GYUR PA LAS YI GE H'Um DKAR POS MTSAN PA'I RDO RJE BSAMS TE, AOm BADZRA A'ATMA KO&HAm, ZHES NGAR 'DZIN PA NI SO SOR RTOG PA'O, ,YI GE H'Um LAS BYUNG BA'I DE BZHIN GSHEGS PA RNAMS KYIS SEMS CAN THAMS CAD DE BZHIN GSHEGS PAR BYAS TE, YI GE H'Um GI NANG DU SON PA DANG, AOm YA TH'A SARBA TA TH'A GA T'A TA TH'A AA HAm, ZHES NGA RGYAL BYA BA NI BYA BA GRUB PA'O; ,YI GE H'Um LAS BYUNG BA'I 'OD ZER RNAMS KYIS RDO RJE SEMS DPA'I GZUGS DANG LDAN PA'I DE BZHIN GSHEGS PA RNAMS BSKUL TE, H'Um LA ZHUGS PA DANG H'Um DANG RDO RJER BCAS PA YONGS SU GYUR PA LAS BYUNG BA'I RDO RJE SEMS DPA' KHRO BA SGEG PA'I NYAMS CAN, G-YAS BRKYANG BA, RTZA BA'I ZHAL DANG SKU THAMS CAD DKAR BA, ZHAL G-YAS G-YON SNGO BA DANG DMAR BA, PHYAG DANG PO G-YAS DANG G-YON GYIS GRI GUG DANG THOD PA 'DZIN PAS RANG DANG 'DRA BA'I SHES RAB MA LA 'KHYUD PA, PHYAG LHAG MA RNAMS NI RDO RJE DANG RAL GRI DANG, 'KHOR LO DANG PADMA BSNAMS PA, DBU RGYAN DU MI BSKYOD PAS MNAN PA, 'DI LTAR BDAG NYID BSGOM PA NI CHOS KYI DBYINGS RNAM PAR DAG PA'O, ,'DI NI DPAL GSHIN RJE'I DGRA SGO NGAR 'JUG PA RAB TU BSGOM PA'O, ,DE NAS RANG GI YE SHES SEMS DPA'I SA BON LAS BYUNG BA'I 'OD ZER GYIS 'GRO BA THAMS CAD SANGS RGYAS SU BYAS PA DRANGS TE, RANG GI LUS LA GZHUG GO, ,DE'I 'OG TU YI GE GSUM PHA DANG MA'I DBUS NA GNAS PA DRI ZA'I SEMS CAN LTA BUR RANG GI KHA NAS ZHUGS TE, BYANG CHUB KYI SEMS KYI RNAM PA RDO RJE'I LAM NAS BYUNG STE, RANG GI RIG MA'I PADMAR LHUNG BA DANG, DE LAS BYUNG BA'I 'OD ZER DMAR POS DE LA REG PAS RIG MA 'DOD CHAGS CHEN POS ZHU ZHING, BCOM LDAN 'DAS KYANG ZHU BAR BLTA'O, ,ZHU BA'I SGO NGA LAS BYUNG BA'I TZA RTZI K'A LA SOGS PA BZHI RANG RANG GI STAN LA 'KHOD PAS, BCOM LDAN 'DAS MI BZHUGS PAR MTHONG BAS, ,YID MI DGA' BAS
, ,MGRIN PA GSHIBS TE, SLONG BA'I GLUS 'DI LTAR BSKUL LO, ,RJE BTZUN THUGS RJES KHRO BA BZHENGS MDZOD LA, ,JO BO DA RING BDUD LAS RGYAL BA'I PHYIR, ,SRID GSUM KUN GYI GTI MUG MTHAR MDZOD CIG, ,'JIG RTEN MA LUS THUGS KYI MGRON POS NAS, ,STONG PA NYID DU MA BZHUGS RJE BTZUN BZHENGS, ,'JIG RTEN BSOD NAMS BYA BA'I CHED DU NI, ,STONG PA NYID DU MA BZHUGS RJE BTZUN BZHENGS, ,BYANG CHUB DNGOS LA 'JIG RTEN MGRON POS NA, ,CIS NA BSAM PA MI MNGA' RJE BTZUN BZHENGS, ,DE MA THAG TU TZA RTZI K'A LA SOGS PA SGO NGA LA ZHUGS SHING ZHUGS MA THAG TU, SGO NGA YONGS SU GYUR PA LAS, GSHIN RJE'I DGRA MA HE'I STENG NAS SNA TSOGS PADMA NYI MA LA G-YAS BRKYANG BAS GNAS PA, ZHAL GSUM PHYAG DRUG PA, RTZA BA'I ZHAL DANG SKU MDOG MTHING NAG ,ZHAL G-YAS DANG G-YON DKAR BA DANG DMAR BA, PHYAG RNAMS RDO RJE SEMS DPA'I MTSAN DANG LDAN PA, RUS PA'I RGYAN GYIS SPRAS PA, 'OD ZER MTHING GA'I PHRENG BA 'KHRUGS PA, SMIN MA 'BAR ZHING KHRO GNYER GTZIGS PA, PHYAG DANG ZHABS KYI SEN MO RNO BA, GSUS PA CHE BA, MI'U THUNG GI GZUGS CAN, SKRA KHAM PA GYEN DU BRDZES PA, KLU CHEN PO MTHONG BA'I DUG CHEN PHU: ZHES ZER BA RNAMS KYIS YAN LAG RNAM PAR BRGYAN PA, 'DI LTAR BDAG NYID RNAM PAR BSAMS PA'I 'OG TU BDAG NYID LA CHU'I NANG GI ZLA BA LTAR BSKYOD PAS, AOm DHARMA DH'A TU SVA WA A'ATMA KO&HAm, ZHES BZLAS PAR BYA'O, ,'DI NI DPAL GSHIN RJE'I DGRA SGO NGA LAS BYUNG BA'I SGRUB PA'I THABS SO, ,DE NAS RANG GI SA BON LAS BYUNG BA'I 'OD ZER GYIS SANGS RGYAS THAMS CAD SPYAN DRANGS TE, RANG GI KHA NAS ZHUGS PA DANG, RDO RJE'I LAM NAS SONG STE, SHES RAB MA'I PADMAR GNAS PA'I GONG BU LAS, ZHES SDANG RDO RJE DANG, GTI MUG RDO RJE DANG, SER SNA RDO RJE DANG, 'DOD CHAGS RDO RJE DANG, PHRAG DOG RDO RJE RNAMS YA DANG KshE DANG MA DANG ME DANG DA RNAMS KYI SA BON LAS SPRO ZHING, DE BZHIN DU GONG BU LAS BYUNG BA'I SA BON YA DANG TZA DANG NI DANG R'A DANG DZA DANG SA DANG, DO DANG RU RNAMS LAS THO BA DANG, BE CON DANG, PADMA DANG, RAL GRI DANG TZA RTZI K'A DANG, PHAG MO DANG,
DBYANGS CAN MA DANG, MDZOD LDAN MA RNAMS DBYUNG BAR BYA'O, ,YANG GONG BU LAS BYUNG BA'I SA BON, NA DANG YO DANG NI DANG R'A RNAMS LAS GRVA BZHIR THOD PA BZHI DBYUNG BAR BYA'O, ,DE NI 'DI LTAR SA BON LAS RANG RANG GI STAN GYI STENG DU RANG RANG GI RTZA BA'I MTSAN MA DES MTSAN PA DBYUNG ZHING DE YONGS SU GYUR PA LAS RANG RANG GI LUS SU GNAS PA'O, ,DE NAS RIM PA BZHIN DU, AOm HR'I: shtRi: WI KRi T'A NA NA H'Um H'Um PHAt PHAt SV'A H'A, AOm DZIN DZIK ,AOm RATNA DHRiK ,AOm A'A RO liKA ,AOm PAR DZNY'A DHRiK ,AOm MUNG+GA'I RA DHRiK ,AOm DAndA DHRiK ,AOm PADMA DHRiK ,AOm DVE shA RA TI, AOm MO HA RA TI, AOm R'A GA RA TI, AOm BADZRA R'A TI, AOm A'A: H'Um ZHES PA'I SNGAGS RNAMS KYIS SNGAR BSHAD PA'I LHA RNAMS DANG, THOD PA BZHI SPROS TE, 'GRO BA'I DON BYAS NAS, RANG RE'I STAN LA SA BON LAS BYUNG BA'I LUS RNAMS LA ZHUGS PAR BLTA'O, ,DA NI DE DAG GI GNAS DANG STAN DANG, KHA DOG DANG, LAG CHA RNAMS BSHAD PAR BYA STE, DBUS SU NI NYI MA LA ZHE SDANG RDO RJE SNGAR BSHAD PA'I MDOG DANG LAG CHA'O, ,SNA TSOGS RDO RJE'I SHAR PHYOGS SU NI GTI MUG RDO RJE ZLA BA LA GNAS PA DKAR PO, ZHAL GSUM PHYAG DRUG PA, G-YAS NA 'KHOR LO DANG, RAL GRI DANG, G-YON NA RIN PO CHE DANG PADMA CAN NO, ,SNA TSOGS RDO RJE'I LHO'I CHA LA NI, NYI MA LA GNAS PA'I SER SNA RDO RJE GSER BTZO MA LTA BU, ZHAL GSUM PHYAG DRUG PA, G-YAS NA RIN PO CHE DANG RAL GRI CAN, G-YON DAG NA 'KHOR LO DANG CHU SKYES 'DZIN PA'O, ,SNA TSOGS RDO RJE'I NUB TU NYI MAL 'DOD CHAGS RDO RJE MDOG DMAR BA, ZHAL GSUM PHYAG DRUG PA, G-YAS DAG NA PADMA DANG RAL GRI CAN, G-YON DAG GIS NOR BU DANG 'KHOR LO THOGS PA'O, ,SNA TSOGS RDO RJE'I BYANG PHYOGS SU NYI MA LA GNAS PA'I PHRAG DOG RDO RJE SKU MDOG LJANG GU, ZHAL GSUM PHYAG DRUG PA, G-YAS DAG NA RAL GRI DANG 'KHOR LO 'DZIN PA, G-YON DAG NA NOR BU DANG PADMA 'DZIN PA'O, ,'DI RNAMS NI RTZA BA'I ZHAL SKU DANG 'DRA BA, ZHAL LHAG MA DAG 'CHAD PAR BYED PA LTA BU, PHYAG DANG PO GNYIS THOD PA GRI GUG DANG BCAS PA, RANG DANG 'DRA BA'I SHES RAB MA LA 'KHYUD PA 'DUG STANGS DANG, RGYAN THAMS CAD ZHE
, ,SDANG RDO RJE DANG 'DRA BA, SNA TSOGS PADMA LA BRTEN PA'O, ,SHAR GYI SGOR RDO RJE THO BA MDOG DKAR BA, G-YAS DAG NA THO BA DANG RAL GRI, ,G-YON DAG NA NOR BU DANG PADMA'O, ,LHOR RDO RJE BE CON MDOG SER PO, G-YAS DAG NA BE CON DANG RAL GRI, G-YON DAG NA PADMA DANG 'KHOR LO 'DZIN PA'O, ,NUB TU RDO RJE PADMA MDOG DMAR BA, G-YAS DAG NA PADMA DANG RAL GRI ,G-YON DAG NA NOR BU DANG 'KHOR LO CAN NO, ,BYANG GI SGOR RDO RJE RAL GRI MDOG LJANG GU, G-YAS DAG NA RAL GRI DANG 'KHOR LO CAN, G-YON DAG NA NOR BU DANG PADMA CAN NO, ,'DI RNAMS NI SNA TSOGS PADMA'I NYI MA LA BZHUGS PA, ZHAL RNAMS 'CHAD PAR BYED PA LAS RTZA BA'I ZHAL RANG RANG GI SKU DANG 'DRA BA, DANG PO'I PHYAG NA GRI GUG DANG THOD PA 'DZIN PAS, RANG DANG 'DRA BA'I SHES RAB MA LA 'KHYUD PA, SHIN TU 'JIGS PAR BYED PA'I GZUGS CAN NO, ,DE BZHIN DU SNA TSOGS RDO RJE'I SHAR LHO'I MTSAMS SU RDO RJE TZA RTZI K'A SHA CHUNG BA MDOG DKAR BA, G-YAS DAG NA 'KHOR LO DANG RAL GRI DANG, G-YON DAG NA RIN PO CHE DANG PADMA 'DZIN PA'O, ,LHO NUB TU RDO RJE PHAG MO MDOG SER BA, G-YAS NA RIN PO CHE DANG RAL GRI 'DZIN PA, G-YON DAG NA 'KHOR LO DANG PADMA 'DZIN PA'O, ,NUB BYANG DU RDO RJE DBYANGS CAN MA MDOG DMAR MO G-YAS DAG NA PADMA DANG RAL GRI CAN, G-YON DAG NA NOR BU DANG 'KHOR LO 'DZIN PA'O, ,BYANG SHAR DU RDO RJE MDZOD LDAN MA MDOG LJANG GU G-YAS DAG NA RAL GRI DANG 'KHOR LO CAN, G-YON DAG NA NOR BU DANG PADMA 'DZIN PA'O, ,'DI RNAMS NI SHIN TU GTUM PA'I GZUGS CAN MA SNA TSOGS PADMA'I ZLA BA LA GNAS SHING, DANG PO'I PHYAG DAG GIS GRI GUG DANG THOD PA 'DZIN CING, RANG DANG 'DRA BA'I THABS RNAMS LA 'KHYUD PA, G-YON BRKYANG BAS GNAS PA, ZHAL GSUM PA LA GANG GI RTZA BA'I ZHAL SNGO BA NI G-YAS PA DKAR BA'O, ,G-YON PA DMAR BA'O, ,YANG GANG GI RTZA BA'I ZHAL DKAR BA DE'I ZHAL G-YAS SNGO BA'O, ,G-YON PA DMAR BA'O, ,GANG GI RTZA BA'I ZHAL SER BA DE'I NI, G-YAS DANG G-YON SNGO BA DANG DKAR BA STE, LJANG GU DANG DMAR BA YANG DE BZHIN NO, ,GRVA BZHIN GNAS PA'I MI'I THOD PA RNAMS NI KHA DOG DKAR PO
BCUD KYIS BKANG BA'I PADMA SNA TSOGS PA'I DBUS SU GNAS PA'O, ,DE NAS YE SHES KYI 'KHOR LO DAM TSIG GI 'KHOR LO LA BSTIMS TE, THAMS CAD KYI MIG LA SOGS PA BYIN GYIS BRLABS LA DE BZHIN DU THAMS CAD KYI SKU DANG GSUNG DANG THUGS BYIN GYIS BRLABS NAS CHO GA JI LTA BAS DBANG BSKUR TE; RJES SU MTHUN PAR SPYI BO LA RGYAS GDAB PAR BYA'O, ,DE NAS MAN NGAG JI LTA BAS MCHOD PA DANG, BSTOD PA DANG, BDUD RTZI MYANG BA'I BAR DU BYA'O, ,DE NAS RANG GI SNYING GA'I YE SHES SEMS DPA'I THUGS KAR PADMA LA GNAS PA'I RDO RJE RTZE MO LNGA PA GYEN DU 'GRENG BA ZLA BA LA GNAS PA'O, ,DE'I LTE BA LA ZLA BA'I DKYIL 'KHOR RO, ,DE LA DBUS SU YAm SNGON PO NYID DE, AOm HR'I: shtRi: WI KRi T'A NA NA H'Um H'Um PHAt PHAt SV'A H'A, ZHES PAS BSKOR BA YI GE SHIN TU PHRA BAS GNAS PAR BLTAS LA, DE LAS BYUNG BA'I GSHIN RJE'I DGRA DBUGS LA ZHON PAS 'GRO ZHING DE DANG LHAN CIG 'JUG PA GSAL BAR SPRO BAR BYA'O, ,GANG GI TSE SKYO BA NA, RUS PA'I RANG BZHIN GYI PHRENG BA BDUD RTZI BCUS LEGS PAR BYUGS PA BLANGS LA, RIL BU RE RE ZHING YI GE ME YONGS SU 'GYUR BA'I 'DOD CHAGS GSHIN RJE'I DGRA'I GZUGS SU RNAM PAR BSAM PA'AM, MI'I MGO BO 'PHRAL DU BCAD PA KHRAG 'DZAG PAS KHYAB PAR BSAMS TE, G-YAS PA'I MTHE BO DANG SRIN LAG GIS BZUNG LA, KHRO BO'I BRJOD PA KHO NAS GSANG SNGAGS BZLAS PA BYA'O, ,'DI LA GANG GI TSE RIM GYIS ZLOS PA DE'I TSE, SA BON YAm LAS ZHE SDANG GSHIN RJE'I DGRA LA SOGS PA RE RE LHA MO DANG BCAS PAR SPRO BA DANG, GSANG SNGAGS RE RE'I YONGS SU RDZOGS PAR BYA'O, ,'ON TE CIG CAR DU NI SA BON YAm LAS KYANG ZHE SDANG GSHIN RJE'I DGRA NAS, JI SRID MDZOD LDAN MA GSHIN RJE'I DGRA'I BAR DU DUS GCIG TU SPRO ZHING, SNGAGS KYANG RE RE YONGS SU RDZOGS PAR BYA STE, CIG CAR PA'I PHYOGS LA SKU RDO RJE LA SOGS PA YANG YE SHES SEMS DPA'I SA BON DANG LHAN CIG SPRO BA'O, ,'DIR YANG THOGS PA DANG, SHIN TU MYUR BA DANG SHIN TU GSAL BA DANG, MI GSAL BA DANG, YANG DAG PA MA YIN PA'I RNAM PAR RTOG PA SPANGS PA'I SNGAGS PAS NI GRANGS 'BUM GYI PHRA MO'I DNGOS GRUB TU 'GYUR
, ,RO; ,BYE BAS NI MKHA' LA SPYOD PA'I DBANG PO PHYAG RGYA CHEN POR GNAS PA'O, ,DE NAS BZLAS PAS YID SKYO BA NA, ,YE SHES 'KHOR LO MDUN NA BZHUGS PA LEGS PAR MCHOD DE, BSTOD CING BDUD RTZI BCU PHUL LA, AOm A'A: H'Um MU: ZHES PAS GSHEGS SU GSOL BAR BYA'O, ,YANG DAM TSIG 'KHOR LO BDAG NYID KYI YAm GI SA BON GYI NANG DU BCUG LA, BDAG NYID ZHE SDANG GSHIN RJE'I DGRA'I NGAR 'DZIN PA DANG GNAS PAR BYA'O, ,THUN MTSAMS BZHI PO THAMS CAD DU 'DI LTAR SGRUB PA 'DI NI, DPAL GSHIN RJE DGRA'I LAS RAB TU SGRUB PA, LAS DANG PO PA'I RNAL 'BYOR PA'I BYA BA'O, ,GZHAN YE SHES CUNG ZAD BABS PA DANG, YE SHES LA DBANG THOB PA DANG, YE SHES LA YANG DAG PAR DBANG THOB PA RNAMS KYIS BSGRUB PAR BYA BA NI LE'U BCU BDUN PA'I RNAM PAR BSHAD PA RGYA CHER 'GREL PA 'DIR YANG MA SMRAS SO, ,DE BZHIN DU BDUD RTZI MYANG BA DANG, GTOR MA SBYIN PA DAG KYANG, BDAG GIS LE'U GSUM PA DANG DRUG PA'I RNAM PAR BSHAD PA'I SKABS SU GSAL BAR BYAS PA KHO NAS SHES SO, ,PHYOGS DBANG ZLA BA ZHES GRAGS PA, ,DPAL LDAN CHOS SKYONG DE YI BKAS, ,GSHIN RJE'I DGRA GANG NAG PO YI, ,SGRUB THABS CHO GA RNAMS GSAL BA, ,ZLA BA'I ZER GYIS REG PA YIS, ,KU MUD RAB TU RGYAS 'DRA BA, ,'DI NI RNAM SBYAR DGE GANG DES, ,'GRO RNAMS 'CHI BDAG LAS RGYAL GYUR, ,GSHIN RJE'I DGRA NAG PO'I SGRUB PA'I THABS, ,KU MU DA KHA BYE BA ZHES BYA BA, SLOB DPON RIN CHEN 'BYUNG GNAS ZHI BA'I ZHAL SNGA NAS KYIS MDZAD PA RDZOGS SO,, ,,A'A TZ'ARYA BI NA TZANDRA DANG, LO TZ'A BA DGE SLONG CHOS KYI SHES RAB KYIS BSGYUR CING ZHUS TE GTAN LA PHAB PA'O,,