, ,RGYA GAR SKAD DU, BO DHI TZITTA MA H'A SU KHA A'Am NA YA, BOD SKAD DU, BYANG CHUB KYI SEMS BDE BA'I MAN NGAG ,BDE BA CHEN PO BYANG CHUB KYI SEMS LA PHYAG 'TSAL LO, , GSANG RGYUD MTHA' DAG LAS MAN NGAG GANG PA'I DON, BYANG CHUB KYI SEMS 'DA' KA MA'I MAN NGAG 'DI LTAR LAGS TE, 'CHI 'PHO DUS SU 'DI LTAR RO, ,DA LTAR BDAG GI LUS KHYAB PAR GNAS PA'I SEMS 'DI NI 'UBS KYIS 'DUS NAS, SNYING GA'I DKYIL NA 'OD MTSON GANG BA CIG GNAS SO, ,YI GE SHIS PAS 'OD DU MI LTA STE, H'Um YUNGS 'BRU TZAM CIG LHANG NGER GNAS SO, ,DE NAS TSER BA DANG BRAL DROD SHOR TE, 'JIG RTEN PA'I SPYOD YUL DANG BRAL BA'O, ,DE TZAM NA 'OD MTHING GA DE SNYING GI DKYIL NAS, BYANG CHUB KYI SEMS KYI GSANG BA'I LAM G-YAS KYI SROG RTZA DAR DKAR GYI SKUD PA 'DRA BA'I NANG NAS YAR YENGS KYIS BYUNG STE, SPYI BO'I GTZUG TU BYUNG, RIL GYIS DRIL NAS, LHANG GIS SHAR TZAM NA, DE NAS YAR 'DOM GANG TZAM GYIS CHOD NAS RNAM PAR DAG PA CHOS KYI PHO BRANG, RANG BZHIN LHUN GYIS GRUB PA'I GNAS NA, DPAL KUN DU BZANG PO BZHUGS TE, RANG GIS KHYAB GDAL BA DANG BZHIN LHANG NGE BAR TE, SKU LA MDUN DANG RGYAB MI MNGA' BAR, BDE BA CHEN PO'I NANG DU LHANG NGER BZHUGS PA DANG, BDAG GI SEMS H'Um NGAM THIG LE YUNGS 'BRU SPYI BO NAS YAR BYUNG BA GNYIS KAR SBYIN LA SBRANG BU CHAGS PA'AM, CHU DANG 'O MA 'DRES PA'I TSUL DU, KUN DU BZANG PO DANG GNYIS GCIG TU LHANG NGER GNAS PAR GYUR TO, ,DE LTAR CHOS KYI DBYINGS KYIS GAR KHYAB PAR KUN DU BZANG POS KHYAB, KUN DU BZANG POS GAR KHYAB PAR BDAG GI SEMS KYIS KHYAB STE, GZUNG 'DZIN GYI RNAM RTOG DANG BRAL NAS CHOS KYI SKU THOB STE, SKYID PA CHEN PO G-YUNG DRUNG GI GNAS SU KHYAB GDAL LA LHANG NGE BAR GNAS SO, ,DE'I NGANG LAS MI 'GYUR LHANG NGER GNAS PA NI, RDZOGS PA CHEN PO'I LTA BA MUR THUG PA'O, ,DE'I NGANG LAS SA LER GNAS PA NI, RDZOGS PA CHEN PO'I BSGOM PA MTHAR PHYIN PA'O, ,DE'I NGANG LAS YUD TZAM BAR
, ,MI 'DA' BA NI, RDZOGS PA CHEN BO'I DAM TSIG MTHAR PHYIN PA'O, ,DE LTA BU'I DON LA SEMS RTZE GCIG TU BSGOM MO, ,BYANG CHUB KYI SEMS BDE BA CHEN PO'I MAN NGAG RDZOGS SO,, ,,RGYA GAR GYI MKHAN PO D'I PAm K'A RA SHR'I DZNY'A NA NYID DANG, ZHU CHEN GYI LO TZ'A BA DGE BA'I BLO GROS KYIS BSGYUR CING GTAN LA PHAB PHO BRANG BYANG CHUB 'OD KYIS ZHUS PA'O,,