, ,RGYA GAR SKAD DU, SHR'I TZAKRA SAMBA RA STO TRA, BOD SKAD DU, DPAL 'KHOR LO SNGOM PA LA BSTOD PA, BCOM LDAN 'DAS 'KHOR LO SNGOM PA LA PHYAG 'TSAL LO, ,KUN RTOG SPROS BRAL DRI MA RNAM DAG CING, ,MTSO LTAR BDE BA CHEN POR RO GCIG PA, ,NAM MKHA'I NGANG DU SPRIN DKAR DAG PA BZHIN, ,RANG BZHIN RNAM DAG CHOS RNAMS MNGON GYUR TE, ,JI LTAR MKHA' LA 'JA' TSON SHAR BA BZHIN, ,GNYIS MED BDE CHEN LONGS SPYOD RDZOGS PA'I SKU, ,YID BZHIN NOR BU RTOG MED JI BZHIN DU, ,GDUL BYA MCHOG LA SPRUL SKU KHRO BO'I TSUL, , DPA' BO 'JIGS BYED GAR DGU'I NYAMS DANG LDAN, ,SKU YI RANG BZHIN MTSAN DANG DPE BYAD NI, ,SGEG DANG DPA' DANG 'JIGS SU RUNG BA'I TSUL, ,GSUNG GI RANG BZHIN YAN LAG DRUG CU NI, ,BZHAD DANG GSHE DANG RNGAM PA'I TSUL DU BSTAN, ,THUGS KYI RANG BZHIN GZUGS DANG TING NGE 'DZIN, ,ZHIB SEMS DPA' RMAD DU BYUNG BA'I TSUL, ,DBANG PHYUG CHEN PO'I SGEG PA'I NYAMS BCOM NAS, ,GNYIS MED YUM LA 'KHYUD NAS 'GYING BAG BZHUGS, ,GZHON NU GDONG DRUG DPA' BA'I NYAMS BCOM NAS, ,'JIGS BYED DUS MTSAN G-YAS BRGYANG ZHABS KYIS
, ,MNAN, ,KHYAB 'JUG ZHAL GSUM 'JIGS PA'I NYAMS BCOM NAS, ,ZHAL BZHI MNGA' ZHING BCU GNYIS PHYAG DANG LDAN, ,LHA CHEN TSANGS PA RGOD PA'I NYAMS BCOM NAS, ,G-YAS PA SER PO BZHED PA'I TSUL DU BSTAN, ,TSOGS KYI BDAG PO'I GSHE BA'I NYAMS BCOM NAS, ,GLANG CHEN PAGS PAS RGYAN BYAS MCHE BA GTZIGS, ,SGRA GCAN LHA MIN NYI ZLA KHAR BCUG NAS, ,RNGAM PA'I NYAMS BCOM TSANGS PA'I MGO BO BSNAMS, ,BRGYA BYIN SPYAN MANGS ZHI BA'I NYAMS BCOM NAS, ,SKU LA SPYAN GSUM GZI BRJID LDAN PA PO, ,ME LHA TSANGS PA ZHI BA'I NYAMS BCOM NAS, ,THAL BA'I TSOM BUS SKU LA BRGYAN PA PO, ,KLU CHEN SE SHA RMAD BYUNG NYAMS BCOM NAS, ,MI MGO LNGA BCU GCIG GIS DO SHAL BYAS, ,SKU GSUNG THUGS LA SDUG BSNGAL GSUM NUB PAS, ,THAMS CAD BDE BA CHEN POR THUGS SU CHUD, ,YANG DAG TING 'DZIN RANG BZHIN BCOM LDAN 'DAS, ,'KHOR LO'I DBUS NA G-YAS BRKYANG SBYOR BAS BZHUGS, ,CHOS NYID MI 'GYUR SKU MDOG MTHING GAR BSTAN, ,THABS KYI TSUL GYIS 'GRO BA'I DON MDZAD PA, ,THUGS RJE MCHOG GYUR DE LA PHYAG 'TSAL LO, ,DE YI YUM GYUR RDO RJE PHAG MO NI; ,SKU MDOG DMAR PO ZHAL GCIG PHYAG GNYIS MA, ,BDUD BZHI BCOM NAS BDE CHEN THUGS CHUD MA, ,GNYIS MED YUM GYUR DE LA PHYAG 'TSAL LO, ,ZHI SOGS LAS MDZAD YE SHES BZHI YI SKU, ,TSAD MED BZHI DANG PHYAG RGYA BZHI LDAN MA, ,PHYOGS BZHI PADMA'I DBUS NA BZHUGS PA YI, ,MKHA' 'GRO YUM BZHI MO LA PHYAG 'TSAL LO, ,RTAG PA LA SOGS DE BZHIN GSHEGS PA BZHI, ,BUM PA BZHI DANG BDUD RTZIS BKANG BA'I SNOD, ,MTSAMS BZHIR MCHOD PA'I GZUGS KYIS GNAS PA YI, ,THABS SHES DBYER MED DE LA PHYAG 'TSAL LO, , SEMS NI SKYE BA MED PAR THUGS CHUNG CING, ,MI BSKYOD RIGS SU SKU MDOG MTHING GAR BSTAN, ,RNAM THAR BRGYAD RTZIBS THUGS RTAGS RDO RJES BRGYAN, ,MKHA' SPYOD YAB YUM RNAMS LA PHYAG 'TSAL LO, ,GSUNG NI SGRA BRNYAN LTA BUR THUGS CHUD CING, ,'OD DPAG MED RIGS SKU
MDOG DMAR POR BSTAN, ,RNAM THAR BRGYAD RTZIBS GSUNG RTAGS PADMAS BRGYAN, ,SA SPYOD YAB YUM RNAMS LA PHYAG 'TSAL LO, ,SKU NI SGYU MA LTA BUR THUGS CHUD CING, ,RNAM DAG RIGS SU SKU MDOG DKAR POR BSTAN, ,RNAM THAR BRGYAD RTZIBS SKU RTAGS 'KHOR LOS BRGYAN, ,SA 'OG YAB YUM RNAMS LA PHYAG 'TSAL LO, ,GSHIN RJE BRTAN SOGS KHRO MO CHEN MO BRGYAD, ,MI 'AM CI SOGS GDUL PHYIR THA DAD BZHUGS, ,KHVA GDONG LA SOGS LHA MO BRGYAD PO RNAMS, ,DAM TSIG 'KHOR LOR BZHUGS LA PHYAG 'TSAL LO, ,RIN CHEN LAS GRUB DPAG MED GZHAL YAS KHANG, ,BYANG CHUB MCHOG GI CHOS RNAMS YONGS RDZOGS PA, ,GTZO BO BDE CHEN THUGS KYI SNANG BA NI, ,SNA TSOGS RGYAN DANG LHA MO'I TSOGS KYIS MDZES, ,CHOS RNAMS TSAD MED DUR KHROD BRGYAD KYIS BSKOR, ,RNAM PAR GZIGS SHING THA DAD GDONG DU BSTAN, , NYAN THOS RANG RGYAL 'KHOR LOS SGYUR SOGS BRGYAD, ,PHYOGS RNAMS SKYONG ZHING KLU DANG SRIN PO'I GZUGS, ,THUGS RJES NYON MONGS BSREG MDZAD 'BAR BA'I PHRENG, ,RNAM SNANG RANG BZHIN THAR PA'I GRONG KHYER MCHOG ,BDE CHEN BZHUGS GNAS DE LA PHYAG 'TSAL LO, ,BCOM LDAN 'DAS DPAL 'KHOR LO SDOM PA LA BSTOD PA KHA CHE'I PAndI TA CHEN PO BRAM ZE RIN CHEN RDO RJES MDZAD PA RDZOGS SO,, ,,RGYA GAR GYI MKHAN PO PAndI TA MA H'A DZNY'A NA DAD BOD KYI LO TZ'A BA MAR PA CHOS KYI DBANG PHYUG GIS BSGYUR BA'O,,