, ,RGYA GAR SKAD DU, ,SHR'I TZA KRA SAMBA RAshE KA KRI Y'A KRA MA, BOD SKAD DU, DPAL 'KHOR LO SDOM PA'I DBANG GI BYA BA'I RIM PA, ,DPAL 'KHOR LO SDOM PA LA PHYAG 'TSAL LO, ,DNGOS PO THAMS CAD GCIG SDOM PA, ,DPA' BO SDOM PA LA BTUD DE, ,RGYA CHE MCHOG TU GSAL BA YI, ,DBANG GI BYA RIM BSHAD PAR BYA, ,DE LA JI LTA BA BZHIN DU DBANG BSKUR BA RJES SU GNANG ZHING RNAL 'BYOR BZHI LA MKHAS PA, RNAL 'BYOR PA RIG PA BZLAS PAS RANG GI SLOB MA LEGS PAR YONGS SU BRTAGS TE RJES SU 'DZIN PAR 'DOD PAS, RGYAL PO DANG CHOM RKUN LA SOGS PA'I NYE BAR 'TSE BA THAMS CAD SPANGS PA'I DKYIL 'KHOR GYI KHANG PAR CHOG JI LTA BA BZHIN GNAS TE, RDUL TSON GYI DKYIL 'KHOR RAM RAS BRIS LA SOGS PA'I DKYIL 'KHOR LA NYER SPYOD LNGAS MCHOD DE, MTSAN MO'I DUS LA BUM PA RNAMS LHAG PAR GNAS PAR BYA'O, ,BZHI BCUR GCIG GIS DMAN PA'I BUM PA LAS MA RNYED NA DGU'O, ,DE LA GTZO BOR 'GYUR BA'I BUM PA LA SNA TSOGS PADMA'I ZE 'BRU LA GNAS PA'I GOO R'I DANG 'PHROG BYED KYI SNYING GA'I STENG DU NYI MA LA RDO RJE CAN BSHAD PA'I MTSAN MA GNYIS BRI BAR BYA'O,, MKHA' 'GRO MA DANG L'A MA DANG, KHAndA RO H'A DANG GZUGS CAN MA RNAMS KYI BUM PA BZHI LA SNA TSOGS PADMA'I ZE'U 'BRU LA GNAS PA'I RO'I SNYING GAR NYI MA BZHI LA GRI GUG BZHI'O, ,RAB GTUM LA SOGS PA DANG YANG DAG PAR LDAN PA'I THOD PA'I DUM BU LA SOGS PA DPA' BO NYI SHU RTZA BZHI RNAMS KYI BUM PA NYI SHU RTZA BZHI RNAMS LA SNA TSOGS PADMA'I DBUS SU GNAS PA'I RO'I SNYING GAR NYI MA SO SOR GRI GUG DANG RDO RJE'O, ,KHVA GDONG MA LA SOGS PA PHYOGS DANG PHYOGS BRAL DU GNAS PA RNAMS KYI BUM PA BRGYAD RNAMS LA SNA TSOGS CHU SKYES KYI DBUS SU GNAS PA'I RO'I SNYING GAR NYI MA LA GRI GUG RE RE'O, ,LAS THAMS CAD PA'I BUM PA DANG RNAM PAR RGYAL BA'I BUM PA DAG GI SLAR YANG SO SOR GLANG PO DANG, SENG GE DANG, RTA DANG, RMA BYA DANG, NAM MKHA' LDING RNAMS KYI STENG DU GNAS PA'I SNA TSOGS PADMA'I SNYING POR YI DAGS LNGA BRIS PA'I SNYING
GAR ZLA BA DANG NYI MA BZHI LA GO RIMS BZHIN 'KHOR LO DANG RIN PO CHE DANG, SNA TSOGS RDO RJE RNAMS RNA MA PAR SNANG MDZAD DANG, RIN CHEN 'BYUNG LDAN DANG, 'OD DPAG MED DANG, DON YOD GRUB PA DANG, MI BSKYOD PA STE DE BZHIN GSHAGS PA LNGA PO RNAMS KYI MTSAN MA BRI BAR BYA'O ZHES PA RIM PA'O, ,DE LA GTZO BOR GYUR PA'I BUM PA NI CHES CHE BA, NAG PA DANG RTZA BA MED PA, LTO BA CHE BA, MGRIN PA MTHO BA, MTSAN MA LEGS PAR BRIS PA, GOS BZANG POS MGRIN PA DKRIS PA, TZU TA'I LO MA LA SOGS PAS KHA BRGYAN PA, GSER DANG DNGUL DANG; MU MEN DANG, MU TIG DANG, BYU RU DANG, NAS DANG, GRO DANG, 'BRAS DANG, SO BA DANG, TIL DANG, MA SHA DANG, BRi TA TI DANG, KAndA KA RI DANG, GZHAN GYIS MI THUB PA DKAR PO DANG, DAndOTPA LA DKAR PO DANG, SA HA DE WA TE SMAN LNGA RNAMS LTO BAR GZHUG GO, ,BDUD RTZI LNGA DANG SGRON MA LNGA LHAN CIG PA'I DRI'I CHU THOD PA'I NANG DU GNAS PA RNAMS KYIS KYANG LTO BA YANG DAG PAR GANG ZHING YONGS SU DGANG PAR BYA'O, ,H'Um LAN BDUN BZLAS PA'I BYA RU DANG LHAN CIG PA'I SKUD PA DKAR POS DE RNAMS KYI MGRIN PA DKRI BAR BYA'O, ,L'A MA LA SOGS PA RNAMS KYI BUM PA BZHI DANG KHVA GDONG MA LA SOGS PA RNAMS KYI BUM PA BZHI NI SGO BZHI'I LOGS BRGYAD RNAMS SU GO RIMS BZHIN MTHAR RE RE'O, ,KU SHA'I STAN LA DGU PO DGOD DE, GTZO BOR GYUR PA BCOM LDAN 'DAS KYI BUM PA LTE BA'I STENG DE NYID DU DGOD PAR BYA'O, ,'DI NI BUM PA RNAMS KYI GRANGS DGU LA BYA BAR BSHAD PA'O, ,GANG GI TSE BZHI BCUR DMAN PA'I LHA RNAMS KYI BUM PAR 'GYUR BA DE'I TSE LHA RNAMS KYI RANG RANG GI GNAS KYI RJES SU 'BRANG BAS DGOD PAR BYA'O ZHES BYA'O, ,DE NAS BUM PA LHAG PAR GNAS PA'I CHO GAS LHAG PAR GNAS PAR BYA'O, ,DE LA CHO GA 'DI YIN TE; SLOB DPON RANG NYID LHA'I RNAL 'BYOR DANG LDAN PAS, RANG GI SNYING GA'I SA BON GYI 'OD ZER GYIS NAM MKHAR GNAS PA'I DKYIL 'KHOR BKUG NAS, MCHOD YON DANG ZHABS BSIL LA SOGS PA DBUL BAR BYA'O, ,PHYI NAS 'KHOR LO DE CHAGS PA CHEN PO'I MES ZHU
, ,BAR GYUR TE, GO RIMS BZHIN RANG RANG GI BUM PA RNAMS SU GZHUG GO, ,ME TOG GI PHRENG BAS NYE BAR MDZES PA'I RDO RJE RNAM PAR RGYAL BA'I BUM PA'I STENG DU GZHAG GO, ,AOm BADZRA KUndA LI BADZRA H'Um PHAt CES PA'I SNGAGS BRGYA RTZA BRGYAD KYIS BSNGAGS LA LAS THAMS CAD PA'I BUM PA LA YANG SNGAGS 'DI KHO NA BRGYA RTZA BRGYAD KYI GRANGS KYIS MNGON PAR BSNGAGS PAR BYA'O, ,GTZO BO LA SOGS PA'I BUM PA LA YANG RNAL 'BYOR JI LTA BA BZHIN GTZO BO DANG DKYIL 'KHOR PA'I SNGAGS KYIS SO, ,DE NAS ME TOG DANG BDUG SPOS LA SOGS PA RNAMS KYIS YANG DAG PAR MCHOD DE GTOR MA PHUL NAS, MI BSKYOD RDO RJE LA SOGS PA'I BSTOD PA SNGON DU 'GRO BAS DRIL BU DKRONG BAR BYA'O, ,BUM PA LHAG PAR GNAS PA'I CHO GA'O, ,DE NAS DRIL BU DANG, AAKshA PA'I dA MA RU DANG, BA tA HA DANG, H'A H'A'I RNAM PA DANG, PI WANG DANG GLING BU DANG, RNGA ZLUM DANG, RDZA RNGA DANG, DGOD PA DANG, SGEG PA DANG, GLU DANG, GAR DANG, ME TOG DANG, BDUG PA DANG, DRI DANG, ZHAL ZAS DANG, ME LONG DANG, RO DANG, REG PA DANG, CHOS KYI DBYINGS KYI MTSAN NYID DE NYI SHU PO RNAMS KYIS DKYIL 'KHOR MCHOD PAR BYA'O, ,DE'I RJES SU DKYIL 'KHOR PAR BYAS PA'I SLOB MA SNGAGS KYI TSUL GYI SKAL BA DANG LDAN PA ME TOG GI PHRENG PA 'DZIN PA PUS MO'I LHA NGAS LA BTZUGS PA RNAMS LA, KHA CIG GSANG SNGAGS GRUB DON GNYER, ,DKYIL 'KHOR 'DIR NI 'JUG PAR BYED, ,DE NAS GZHAN NI BSOD NAMS 'DOD, , GZHAN DAG 'JIG RTEN PHA ROL GNYER, ,'JIG RTEN PHA ROL LA DMIGS PA'I, ,DAD PA MANG DU BYED PA YI, ,BLO LDAN DKYIL 'KHOR 'DIR 'JUG BYA, ,TSE 'DI'I 'BRAS BU 'DOD MI BYA, ,TSE 'DI 'DOD BZHIN PA LA NI, ,'JIG RTEN PHA ROL DE BZHIN MIN, SKYES BU TING 'DZIN PHA ROL GNYER, ,TSE 'DI'I 'BRAS BU 'BAD MED NYID, ,CES SLOB MA RNAMS LA RJES SU BSGRAGS LA, ,DE RNAMS KYANG SEMS KYIS DPAL HE RU KA'I GZUGS RANG GI LUS LA GZHUG CING, RDO RJE PHAG MO'I PADMAR GNAS PA'I DE BZHIN GSHEGS PA THAMS CAD ZHU BA
RNAMS KYIS DBANG BSKUR BAR BSAMS NAS, DNGOS SU LHA'I DKYIL 'KHOR GYI SGOR 'DUG STE 'JUG PAR GSOL BA GDAB BO, ,PHAG MO LHAN CIG YANG DAG SBYOR, ,DPA' CHEN KHYOD BDAG STON PA STE, ,BYANG CHUB CHEN PO'I TSUL BSTAN PA, ,MGON PO CHEN PO BDAG 'TSAL LO; ,DAM TSIG DE NYID BDAG LA STZOL, ,BYANG CHUB SEMS KYANG BDAG LA STZOL, ,SANGS RGYAS CHOS DANG DGE 'DUN TE, ,SKYABS GSUM DAG KYANG BDAG LA STZOL, ,THAR PA CHEN PO'I GRONG MCHOG TU, ,MGON POS BDAG NI GZHUG TU GSOL, ,ZHES BRJOD NAS DKYIL 'KHOR DU 'JUG PAR GSOL BA GDAB BO, ,DE NAS SLOB DPON GYIS SLOB MA GCIG GTZO BOR BYAS NAS, BU TSUR SHOG CIG THEG CHEN GYI, ,GSANG SNGAGS SPYOD TSUL CHO GA NI, ,KHYOD LA YANG DAG BSTAN PAR BYA, ,KHYOD NI TSUL CHEN SNOD YIN TE, ,SKU GSUNG THUGS KYI RDO RJE CAN; ,DUS GSUM 'BYUNG BA'I SANGS RGYAS RNAMS, ,RDO RJE SNGAGS KYI MTHU RNAMS KYIS, ,MNYAM MED YE SHES YANG DAG BRNYES, ,SNGAGS KYI RAB SBYOR MNYAM MED PA, ,GANG GI SH'AKYA SENG GE SOGS, ,DPA' BO RNAMS KYIS BDUD KYI SDE, ,STOBS CHEN DRAG PO CHEN PO BCOM, ,'JIG RTEN RJES 'JUG RTOGS NAS NI, ,'KHOR LO BSKOR NAS MYA NGAN 'DAS, ,DE BAS KUN MKHYEN THOB BYED DU, ,BU YIS BLO GROS 'DI GYIS SHIG ,CES DE RNAMS LA BRJOD NAS, ,DKON MCHOG GSUM LA BDAG SKYABS MCHI, ,SDIG PA THAMS CAD SO SOR BSHAGS, ,'GRO BA'I DGE LA RJES YI RANG, ,SANGS RGYAS BYANG CHUB YID KYIS BZUNG, ,DE NI THUB PA SKAL BA CHE, ,SANGS RGYAS RNAMS KYIS BSKYED JI LTAR, ,BYANG CHUB SEMS NI BLA NA MED, ,DAM PA DAG GIS BSKYED PAR BGYI, ,SRID PA'I RGYA MTSOR BYING BA YI, ,'GRO 'DI MTHA' DAG BSGRAL CHED DU, , BDAG KYANG THAMS CAD MKHYEN GYUR NAS, ,DBANG PHYUG KUN GYI GNAS LA GNAS, ,ZHES SKYABS GSUM GYI TSIGS SU BCAD PA LAN GSUM BRJOD NAS, SLOB MA DE RNAMS LA, AOm BADZRA KUndA LI BADZRA H'Um PHAt CES PA'I SNGAGS KYIS SRUNG BA BYAS TE, DE RNAMS KYI SNYING GA MGRIN
, ,PA SPYI BO RNAMS SU GO RIMS BZHIN ZLA BA LA GNAS PA'I RDO RJE DANG PADMA DANG 'KHOR LO'I DBUS SU H'Um A'A: AOm ZHES PA BSAM PAR BYA'O, ,SLOB DPON LANGS TE RDO RJE G-YAS PA'I KHU TSUR GYIS BZUNG NAS SLOB MA RNAMS KYI SNYING GA MGRIN PA MGO BOR RDO RJES REG NAS H'Um A'A: AOm RANG NYID BRJOD DE MGO BOR ME TOG ,MDUN DU BDUG SPOS DANG MAR ME DE BZHIN DU SNYING GAR DRI SBYIN PAR BYA'O, ,DE'I RJES SU, AOm BADZRA KUndA LI BADZRA H'Um PHAt CES PA'I SNGAGS LAN BDUN BZLAS PAS AA SHVATthA LA SOGS PA MA GAS SHING RMA MED PA SOR BCU GNYIS PA'I TSAD RTZE MOR ME TOG GI PHRENG BAS DKRIS PA'I SO SHING SLOB MA RNAMS LA SO SOR SBYIN NO, ,DE RNAMS KYANG GDONG SHAR RAM BYANG DU BLTAS TE ZOS NAS STENG DU BLTAS NAS BA LANG GI LCI BAS BA LANG GI KO BA TZAM DU BYUGS PA'I SA PHYOGS SU DOR RO, ,DE LA ZHI BA LA SOGS PA'I LAS KYI BYE BRAG ,GANG GI MNGON PHYOGS LHUNG GYUR NA, ,DE YIS DNGOS GRUB MCHOG SHES BYA, ,DE BZHIN SHAR DU RTZE MO YIS, ,DNGOS GRUB PAR MAR RAB TU GRAGS, ,BYANG BA LTAS TE BZHIN THA DKAR NI, ,'JIG RTEN PA YI DNGOS GRUB 'DOD, ,SO SHING DOR BDE BZHIN DU, ,JI LTA'ANG RTZE MO 'OG 'GRO NA, ,DE TSES 'OG DNGOS GRUB 'GYUR, ,RNAM DPYAD MED PAR NGES PA YIN, ,STENG DU PHYOGS NA MKHA' SPYOD NYID, ,DE LTAR THE TSOM MED PAR 'GYUR, ,ZHES SO, ,DE'I RJES SU ZHAL BSIL BA'I DRI CHU KHYOR BA GSUM 'THUNGS TE, AOm HR'I: BI SHUDDHA DHA RMM'A: SARBBA P'A PA NI TZ'A SAm SHO DHA YA SARBBA KA LPA N'A PA NA YA H'Um, ZHES PA'I SNGAGS 'DIS KHA BSHAL BA BYA'O, ,SO SHING GI CHO GA'I SGRUB PA'O,, ,,DE'I MDUN DU NYE BAR 'DUG STE AOm BADZRA KUndA LI ZHES PA LA SOGS PA'I SNGAGS LAN BDUN BZLAS PA'I KU SHA RNAMS STAN DANG SNGAS KYI CHED DU DE RNAMS KYI LAG PAR BYIN NAS; SNGAGS 'DI NYID KHO NAS LAN BDUN MNGON PAR BSNGAGS PA'I SRUNG SKUD SUM SGRIL MDUD PA GSUM BYAS PA DPUNG PA G-YAS LA BCINGS TE, CHOS BSTAN PAS SPO BA BSKYED PAR BYA'O, ,'JIG RTEN DU NI KUN MKHYEN RNAMS, ,RES 'GA' 'BYUNG NGAM MI 'BYUNG SRID, ,AU DUMB'A
RA'I ME TOG BZHIN, ,BRGYA LAM NA NI RES 'GA' ZHIG ,GSANG SNGAGS SPYOD PA'I TSUL 'BYUNG BA, ,DE BAS KYANG NI RNYED DKA' STE, ,GANG GIS MNYAM MED SEMS CAN DON, ,MYA NGAN MI 'DA' BYED PAR NUS, ,BSKAL PA BYE BA DU MA RU, ,SNGON DU SDIG PA BYAS PA GANG, ,DKYIL 'KHOR 'DI 'DRA MTHONG NAS NI, ,DE KUN ZAD PAR 'GYUR YIN NA, ,GRAGS PA MTHA' YAS SNGAGS SPYOD KYI, ,TSUL LA GNAS NA SMOS CI DGOS, ,SKYOB PA'I GSANG SNGAGS BZLAS NA NI, ,GO 'PHANG BLA NA MED PAR 'GYUR, ,SPYOD MCHOG 'DI LA GANG RNAMS KYIS, ,BLO GROS SHIN TU DRI MA MED, ,DE RNAMS KYI NI SDUG BSNGAL KUN, ,'BYUNG BA'I NGAN 'GRO YANG DAG BCAD, ,BDAG NYID CHEN PO KHYED RNAMS KYIS, ,RNYED PA MNYAM MED DE RING RNYED, ,GANG GIS KHYED RNAMS RGYAL BA KUN, ,SRAS BCAS RNAMS KYIS BSTAN PA 'DIR, , BDAG NYID CHEN POS SKYE BZHIN PAR, ,KUN DU YONGS SU BZUNG NAS GNAS, ,DE YIS KHYED RNAMS THEG CHEN DU, ,SANG NI LEGS PAR SKYE BAR 'GYUR, ,THEG PA CHEN PO CHER 'BYUNG BA'I, ,LAM MCHOG 'DI NI DPAL DANG LDAN, ,GANG GIS KHYED RNAMS 'GRO 'GYUR LA, ,DE BZHIN GSHEGS PA RNAMS SU 'GYUR, ,ZHES CHOS BSTAN PA BSGRAGS NAS SLAR YANG DE RNAMS LA AOm BADZRA KUndA LI'I SNGAGS KYIS BSRUNG NGO, ,RDO RJE CAN GYIS SANGS RGYAS LA, ,'GRO BA SKYOB PA'I CHED DU DBANG, ,YON TAN 'BYUNG GNAS JI LTAR STZAL, ,DE LTAR BDAG LA GNANG BAR GSOL, , SLOB MA DE RNAMS KU SHA'I STAN LA NYAL DU GZHUG CING, RMI LAM GANG CUNG ZAD MTHONG BA DE NANG PAR NGAL SMROS SHIG CES DE LTAR RIG PA'I DBANG BSKUR BAR 'OS BA'I SLOB MA LHAG GNAS BSTAN TO, ,SLAR YANG DKYIL 'KHOR GYI KHANG PAR ZHUGS TE SLOB DPON GYIS BSRUNG BA'I DON DU RDO RJE 'KHYIL BA'I SNGAGS BZLA'O, ,NANG PAR GTOR MA YANG BYIN NAS PHYIR BYUNG NAS SLOB MED RNAMS BOS TE, DE RNAMS LA RMI LAM DGE MI DGE DRIS NAS, RMI LAM MI DGE BAR GYUR NA SLOB MA RNAMS LA RDO RJE 'KHYIL PA'I SNGAGS KYIS YANG DAG PAR BSRUNGS TE, SNGAR BZHIN CHOS BSTAN PAR SPRO BAR BYA'O, ,GAL
, ,TE SLOB DPON DU DBANG BSKUR BAR 'DZIN PAR 'DOD PA DE'I TSE KHYAD PAR GYI SDOM PA GZUNG BAR BYA'O, ,'KHOR LO PHYIR MI LDOG PA'I DBANG, ,DAM PA BDAG LA STZAL NAS NI, ,MGON PO 'KHOR LO LHA DAG GI ,DE NYID SLOB DPON PHRIN LAS DANG, ,SANGS RGYAS KUN GYI DAM TSIG DANG, ,SDOM PA GSANG MCHOG RTAG TU NI, ,SEMS CAN KUN GYI DON BGYID PHYIR, ,SLOB DPON BDAG 'GYUR GSUNG DU GSOL, ,TSIGS SU BCAD PA DE DAG GIS SLOB DPON GYI SDOM PA LA GSOL BA GDAB PAR BYA'O, ,LHAG PAR DANG BAS, BLA MAS RIGS THAMS CAD LA GSOL BA GDAB PA, CHE GE MO ZHES BYA BA 'DI, BYANG CHUB SEMS DANG DAM TSIG DANG, ,SDOM PA RNAMS NI YONGS 'DZIN ZHING, ,GSAD BA'I 'KHOR LO 'DIR 'JUG 'TSAL, ,ZHES PA 'DIS BYA'O, ,DE NAS, GSANG BA CHEN POS RIGS DAG PA'I, ,GSANG CHEN YONGS SU 'DZIN PAR NI, ,BDAG NYID CHEN PO KHYED 'DOD DAM, ,ZHES BRJOD PAR BYA'O, ,SLOB MAS KYANG 'TSAL LO ZHES BRJOD DO, ,DE NAS RIGS LNGA LA SOGS PA'I DAM TSIG BRJOD DE, SANGS RGYAS CHOS DANG DGE 'DUN TE, ,DKON MCHOG GSUM LA SKYABS SU SONG, , 'DI NI SANGS RGYAS RIG DGA' BA'I, ,SDOM PA BRTAN PAR GYUR PA'O, ,RDO RJE DRIL BU PHYAG RGYA RNAMS, ,BLO GROS CHEN PO KHYOD KYIS GZUNG, ,BYANG CHUB SEMS GANG DE RDO RJE, ,SHES RAB DRIL BU ZHES BSHAD DO, ,SLOB DPON DAG KYANG GZUNG BAR BYA, ,BLA MA SANGS RGYAS KUN DANG MNYAM, ,'DI NI RDO RJE RIGS DAG PA'I, ,SDOM PA DAM TSIG YIN PAR GSUNGS, ,RIN CHEN RIGS LA DE BZHIN DU, ,NYIN DANG MTSAN MO LAN GSUM DU, ,ZANG ZING MI 'JIGS CHOS DANG BYAMS, ,SBYIN PA BZHI NI RAB SBYIN BYA, ,PHYI DANG GSANG BA THEG PA GSUM; ,DAM CHOS KHYOD KYIS GZUNG BAR BYA, ,'DI LTAR PADMA RIGS DAG LA, ,SDOM PA DAM TSIG MCHOG YIN NO, ,LAS KYI RIGS CHEN MTHO BA LA, ,SDOM PA THAMS CAD LDAN PAR NI, ,YANG DAG NYID DU GZUNG BAR BGYI, ,MCHOD PA'I LAS KYANG CI NUS BYA, ,GROGS NYID RDO
RJE'I SPUN GYUR PA'I, ,RNAL 'BYOR RNAMS KYI BSNYEN BKUR NI, ,SPANG ZHING DOR BAR MI BYA STE, ,JI LTAR NUS BZHIN KUN DU SPYAD, ,THEG PA DMAN PA 'DOD MIN ZHING, ,SEMS CAN DON LA RGYAB PHYOGS MIN, ,'KHOR BA YONGS SU MI SPANG ZHING, ,RTAG TU MYA NGAN 'DAS DGA' MIN, LHA DANG LHA MIN GSANG BA LA, ,KHYOD KYIS BRNYAS PAR MI BYA ZHING, ,PHYAG RGYA BZHON PA MTSON CHA DANG, ,MTSAN MA 'GOM PAR MI BYA'O, ,KHYOD KYIS SROG CHAGS GSAD MI BYA, ,MA BYIN PAR YANG MI BLANG NGO, ,'DOD PA LOG PAR MI SPYAD KYI, ,BRDZUN DU SMRA BAR MI BYA'O, ,SEMS CAD GDUL DON MA GTOGS PA, ,BYA BA MA YIN THAMS CAD SPANGS, ,RNAL 'BYOR BA RNAMS BSNYEN BKUR ZHING, ,LEGS PA RNAMS LA NYER GNAS BYA, ,LUS KYI LAS NI RNAM GSUM DANG, ,NGAG GI RNAM PA BZHI DAG DANG, ,YID KYI RNAM PA GSUM RNAMS NI, ,JI LTAR NUS BZHIN BSKYANG PAR BGYI, ,DE LTAR BLA MAS SLOB MA LA DAM TSIG DANG SDOM PA LA SOGS PA SBYIN PAR BYA'O, ,SLOB MAS KYANG GUS PA DANG BCAS PAS PHYAG 'TSAL TE, GZUNG BAR BYA BA'I RIM PA 'DIS, ,SANGS RGYAS THAMS CAD LA PHYAG 'TSAL LO, ,MGON PO SANGS RGYAS DE'I SRAS PO RNAMS KYANG BDAG LA DGONGS SU GSOL, ,BDAG CHE GE MO ZHES BGYI BA DENG NAS BRTZAMS TE JI SRID BYANG CHUB SNYING POR 'DUG GI BAR DU, ,JI LTAR DUS GSUM MGON PO RNAMS, ,BYANG CHUB TU NI NGES MDZAD PA'I, ,BYANG CHUB SEMS NI BLA NA MED, ,RAB MCHOG BDAG GIS BSKYED BAR BGYI, ,TSUL KHRIMS BSLAB PA RNAM PA GSUM, ,DGE BA'I CHOS NI SDUD PA DANG, ,SEMS CAN DON BYA'I TSUL KHRIMS NI, ,SO SOR BRTAN POR BDAG GIS GZUNG, ,SANGS RGYAS CHOS DANG DGE 'DUN TE, ,DKON MCHOG GSUM NI BLA NA MED, ,SANGS RGYAS RNAL 'BYOR SKYES SDOM PA, ,DENG NAS MCHOG TU GZUNG BAR BGYI, ,RDO RJE RIGS MTHO CHEN PO LA, ,RDO RJE DRIL BU'I PHYAG RGYA YANG, ,YANG DAG NYID DU GZUNG BAR BGYI, ,SLOB DPON BDAG KYANG GZUNG BAR BGYI, ,RIN CHEN RIGS CHEN RNAL 'BYOR GYI, ,DAM TSIG YID DU 'ONG
, ,BA LA; ,NYIN RE ZHING YANG DRUG BYAS NAS, ,SBYIN PA BZHI NI RAB SBYIN BGYI, ,BYANG CHUB CHEN PO LAS BYUR BA'I, ,PADMA'I RIGS CHEN DAG PA LA, ,PHYI DANG GSANG BA THEG PA GSUM, ,DAM CHOS SO SOR GZUNG BAR BGYI, ,LAS KYI RIGS CHEN MA THOB LA, ,SDOM PA THAMS CAD YANG DAG LDAN, ,MCHOD PA'I LAS NI CI NUS BZHIN, ,DE NYID KYI NI SO SOR GZUNG, ,BYANG CHUB SEMS NI BLA NA MED, ,DAM PA BSKYED PAR BGYIS NAS NI, ,SEMS CAN KUN GYI DON BGYI'I PHYIR, ,BDAG GIS SDOM PA MA LUS GZUNG, ,MA BSGRAL BA RNAMS BDAG GIS BSGRAL, ,MA GROL BA RNAMS BDAG GIS DGROL, ,DBUGS MA PHYUNG RNAMS DBUGS DBYUNG ZHING, ,SEMS CAN MYA NGAN 'DAS LA DGOD, ,AOm SARBA TA TH'A GA TA YO GA K'A YA B'A KTZI TTA MU TPA DA YI MYA SHE sh'A NA BA SHE shA SA TVA DH'A TU HI TA SU KHO TTA MA SIDDHI AA TYNTA BTA BA SIDDHI MA HE SHVA RY'A DHI PHA TY'A YA TZA ZHES PA 'DIS SLOB MA BYANG CHUB TU SEMS BSKYED DO, ,DE LTAR SLOB DPON GYI SDOM PA BZUNG NAS, ,ZHES PA SLOB DPON DU DBANG BSKUR BAR 'OS PA'I SLOB MA LHAG GNAS BSTAN PA'O,, ,,DE'I RJES SU BRIS PA LA SOGS PA'I DKYIL 'KHOR LA MCHOD PA RGYA CHEN PO BYAS NAS RANG GI LHA'I RNAL 'BYOR SNGON DU 'GRO BAS SLOB MA 'JUG PA'I CHO GAS RANG NYID ZHUGS TE PHRENG BA'I DBANG BSKUR BA LA SOGS PA BCOM LDAN 'DAS BDAG PO'I THUGS LAS THOB PAR BYA'O, ,DE'I TSE SLOB MA RNAMS 'JUG PA'I DON DU BDEN PA'I GSOL BA GDAB PAR BYA STE, CHOS RNAMS GZUGS BRNYAN LTA BU STE, ,GSAL ZHING DAG LA RNYOG PA MED, ,GZUNG DU MED CING BRJOD DU MED, ,RGYU DANG LAS LAS KUN DU BYUNG, ,DE BZHIN DE KHO NYID NGES 'BYUNG, ,ZHES PA'I BDEN PAS DKYIL 'KHOR NI, ,GZUGS BRNYAN GSAL BAR SLOB MA RNAMS, ,KUN GYIS SDIG MED MTHONG BAR SHOG ,CES PA LA SOGS PAS GSOL BA GDAB PO, ,DE NAS YOL BA LAS PHYI ROL DU YON PHUL TE DBANG BSKUR BA'I SKAL BA CAN GYI SLOB MA RNAM PAR SNANG MDZAD KYI GZUGS SU DMIGS TE, AA KHAm B'I RA H'Um ZHES PA'I SNGAGS KYIS ME TOG PHRENG BA BZUNG LA
LAS THAMS CAD PA'I CHUS MNGON PAR GTOR TE MIG DAR BCING BAR BYA'O, ,DKYIL 'KHOR DU 'JUG PA'I DON DU, KYE DGA' BA LA DGA' KHYED SU YIN, ,ZHES DRI, DES KYANG 'DI SKAD DU, ,SKAL BZANG BDAG BDE BA CHEN PO LA'O, ,ZHES BRJOD DO, ,DE NAS BLA MAS SLOB MA'I SNYING GAR RDO RJE BZHAG STE, AOm SARBA YO GA TZITTA AUTP'A DA Y'A MI, AOm SU RA TE SA MA YA STVAm HO:SIDDHI BADZRA YA TH'A SU KHAm, ZHES BYANG CHUB TU SEMS BSKYED PA BRJOD DE, DENG KHYOD DE BZHIN GSHEGS PA THAMS CAD KYIS BYIN GYIS RLOB PAR 'GYUR GYI, DE BZHIN GSHEGS PA THAMS CAD KYI GSANG BA CHEN PO 'DI KHYOD KYIS DKYIL 'KHOR DU MA ZHUGS PA RNAMS LA SMRA BAR MI BYA STE MA DAD PAR YANG MI BYA'O, ,H'Um DZA: H'Um ZHES PA 'DIS BKUG STE, YOL BA'I NANG DU BCUG STE DKYIL 'KHOR SHAR SGOR BZHAG NAS 'DI SKAD BRJOD PAR BYA'O, ,DENG KHYOD DE BZHIN GSHEGS PA THAMS CAD KYI RIGS SU ZHUGS KYIS DE'I PHYIR DAS KHYOD LA RDO RJE YE SHES BSKYED PAR BYA STE, YE SHES GANG GIS KHYOD DE BZHIN GSHEGS PA THAMS CAD KYI DNGOS GRUB KYANG THOB PAR 'GYUR NA DNGOS GRUB GZHAN LTA CI SMOS, KHYOD KYIS 'DI DKYIL 'KHOR MA MTHONG BA'I MDUN DU SMRA BAR MI BYA STE KHYOD DAM TSIG NYAMS PAR GYUR TA RE ZHES SO, ,SLAR YANG MGO BOR RDO RJE BZHAG STE SMRAS PA, 'DI NI KHYOD KYI DAM TSIG GI RDO RJE STE GAL TE 'GA' ZHIG LA SMRAS NA KHYOD KYI MGO BO 'GEMS PAR BYED DO, ,ME TOG DANG BCAS RDO RJE SNYING GAR BZHAG STE BRJOD PA; AOm RDO RJE SEMS DPA' RANG NYID DENG, ,KHYOD KYI SNYING LA YANG DAG GNAS, ,GAL TE TSUL 'DI SMRAS NA NI, ,SKAD CIG DE LA DRAL NAS GSHEGS, ,ZHES PA 'DIS MNA' BYED DU BCUG NAS BDUD RTZI LNGA PADMA'I SNOD DU GNAS PA'I YE SHES GSUM GYIS BYIN GYIS BRLABS TE, AOm BADZRA AA MRi TO DA KA thA ZHES PA 'DI BDUN BZLAS SO, ,'DI NI KHYOD KYI DMYAL BA'I CHU, ,DAM TSIG 'DAS NA SREG PAR BYED, ,DAM TSIG BSRUNGS PAS DNGOS GRUB STE, ,RDO RJE BDUD RTZI'I CHU 'THUNG SHIG ,CES BRJOD DE 'THUNG DU GZHUG GO, ,DE NAS 'DI BRJOD PAR BYA
, ,STE; DENG NAS BRTZAMS TE KHYOD KYI PHYAG NA RDO RJE NGA YIN GYI, NGAS 'DI GYIS SHIG CES GANG SMRAS PA DE KHYOD KYIS BYA'O, ,KHYOD KYIS NGA LA BRNYAS PAR YANG MI BYA STE, ,KHYOD YANG BA MA SPANGS PAR DUS BYAS NAS DMYAL BAR LTUNG BAR GYUR TA RE ZHES SO, ,DAM TSIG GI CHU SBYIN PA'O, ,DE NAS SLOB MAS 'DI SKAD BRJOD PAR BYA STE, DE BZHIN GSHEGS PA THAMS CAD KYIS BDAG LA BYIN GYIS RLOBS SHIG ,RDO RJE SEMS DPA' BDAG LA DBAB PAR MDZOD CIG CES SO, ,DE NAS RA'I YAN LAG LNGA DE BZHIN GSHEGS PA LNGA'I SA BON GYIS BYIN GYIS BRLABS TE, TIL MAR CHEN PO DANG GU GUL CHEN PO DAG CHA MNYAM PA LHAN CIG TU BSRES PA CHANG DANG GU GUL YANG DAG PAR LDAN PAR BYAS PA'I BDUG SPOS BSDUS NAS SLOB DPON GYIS RDO RJE PHAG MO'I SNGAGS BZLAS TE SLOB MA LA BDUG SPOS 'DIS BDUG PAR BYA'O, ,DE NAS SKU BABS NA NAM MKHA' LA 'GRO BAR 'GYUR RO, ,GSUNG BABS NA SNGON MED PA'I TSIGS SU BCAD PA RJOD PAR BYED DO, ,THUGS BABS NA BYUNG BA DANG 'BYUNG BAR 'GYUR BA DANG DA LTA BA YANG SHES PAR BYED DO, ,AOm TIshthA SA MA YA PA RI P'A LI TE H'Um H'Um H'Um HO HO HO SV'A H'A, ZHES PA 'DIS RDO RJE SPYI BOR BZUNG NA GSHEGS SO; ,DE NAS AOm TIshthA BADZRA ZHES PAS BRTAN PAR BYAS NAS KHYOD KYI MIG LA CI LTA BU SNANG ZHES DRIS TE, DE NAS DE RNAMS KYIS DKAR PO DANG SER PO DANG DMAR PO DANG NAG POR SNANG BA BRJOD PA RNAMS KYIS ZHI BA DANG RGYAS PA DANG DBANG DANG MNGON SPYOD KYI DNGOS GRUB KYI SKAL BA CAN DU BRJOD NAS BDEN PA'I BYIN RLABS BYA'O, ,YANG DAG DKYIL 'KHOR 'DI ZHES PAR, ,BDAG GIS SLOB MA RAB TU GZHUG ,LHA RNAMS RIGS KYI RIM PA NI, ,BSOD NAMS JI LTA DE LTAR SHOG ,'DI YI DNGOS GRUB JI 'DRAR 'GYUR, ,RIGS NI GANG GI SNOD DU RUNG, ,BSOD NAMS MTHU YANG JI 'DRA BAR, ,DE LTAR DKYIL 'KHOR DU GYUR CIG ,SLOB MAS KYANG G-YON SKOR DU BSKOR BA LAN GSUM BYAS NAS G-YAS SU MNGON PAR PHYOGS PAR GYUR PAS SNGAR BZUNG BA'I ME TOG GI PHRENG BA, ,PRA T'ITZTSA BADZRA HO ZHES PA 'DIS DKYIL 'KHOR DU DOR RO ZHES, DE NAS
ME TOG LTUNG BA'I RJES SU 'BRANGS NAS DMAN PA DANG MCHOG LA SOGS PA'I DNGOS GRUB SLOB MA LA MTSON TE DE LAG LA TE SANGS RGYAS RNAMS KYI DBU'I GTZUG TOR RAM MDZOD SPUR LTUNG NA DE'I TSE PHYAG RGYA CHEN PO'I DNGOS GRUB PO, ,GAL TE SPYAN NAM ZHAL LA LTUNG NA DE'I TSE SNGAGS KYI DNGOS GRUB PO, ,STOD KYI CHAL YANG MCHOG GO, ,BAR GYI CHA LA YANG BAR MA'O, ,'OG GI CHA LA DMAN PA'O, ,GZUGS BRNYAN LAS SHIN DU RING NA MNGON SPYOD DO, ,NYE NA DNGOS GRUB MYUR RO, ,LHA RNAMS KYI RANG GI GNAS KYI RE'U MIG GIS YONGS SU BCAD PA LAS SHES PAR BYA'O, , GAL TE LHA GNYIS DAG GI BAR DU LTUNG NA DE'I TSE ME TOG GANG LA NYE BA DE'I RIGS SU 'GYUR RO, ,DKYIL 'KHOR GYI PHYI ROL DU LTUNG NA DNGOS GRUB PHRA MO'O, ,GAL TE RE KH'A RNAMS SU LTUNG NA DE'I TSE SLAR YANG DOR BAR BYA'O, ,GSUM BYAS NAS DE NYID DU LTUNG NA DNGOS GRUB MED DO; ,PHYI'I RDO RJE PHRENG BA'I PHYI ROL DU LTUNG NA DNGOS GRUB MED DO, ,RING POR LTUNG NA CHES DKA'O ZHES PA ME TOG LHUNG BA'I CHO GA'O,, ,,DE NAS DE DAG GI ME TOG GI PHRENG BA SLAR YANG BZUNG NAS SLOB MA'I MGO BOR BCINGS TE, PRA TI GRiHnA TVA MI MAm SATVA MA H'A BA LA ZHES BRJOD, DE NAS DE'I MIG DAG TU ZLA BA LA AOm YIG GNYIS BSAMS TE, AOm YIG GI 'OD ZER GYIS BKUG PA'I DKYIL 'KHOR PA RNAMS DANG LHAN CIG RDO RJE DRAG PO SLOB MA'I SNYING GAR GZHUG CING SNGAGS 'DIS GDONG BCINGS PA DGROL BAR BYA'O, ,AOm RDO RJE DRAG PO RANG NYID DENG, ,MIG 'BYED PAR NI BRTZON PAR MDZAD, ,MIG NI THAMS CAD 'BYED MDZAD DE, ,RDO RJE'I MIG NI BLA NA MED, ,CES BRJOD LA MIG DAR BSAL BAR BYA'O, ,DE NAS DKYIL 'KHOR BSTAN PAR BYA STE, RANG BZHIN GYIS DAG SANGS RGYAS BDAG ,LUS NI RANG BZHIN DRI MA MED, ,DPA' BO DPA' MO'I DBANG PO'I GRONG, ,DKYIL 'KHOR LA NI BU KHYOD LTOS, ,DE NAS GNAS DANG NYE BA'I GNAS LA SOGS PA'I BDAG NYID CAN GYI DKYIL 'KHOR LUS KYI DKYIL 'KHOR LA GNAS PA BYANG CHUB KYI PHYOGS KYI CHOS SUM CU RTZA BDUN GYI DKYIL 'KHOR BA'I LHA'I 'KHOR LO
, ,DPAL HE RU KA'I LHA'I YAN LAG NYE BAR BSTAN PAR BYA'O, ,DKYIL 'KHOR DU 'JUG PA'I CHO GA'O, ,DE MA THAG TU SLOB MAS BLA MA MGON LA BDAG NYID THAMS CAD KYIS BTUD NAS GSOL BA GDAB STE, BSAM GYIS MI KHYAB CHOS SNOD MCHOG ,BDAG LA DBANG BSKUR BAR MDZOD CING, ,SLOB MAS GSOL BA BTAB MA THAG TU RNAM PAR RGYAL BA LA SOGS PA'I BUM PA BLANGS TE, PADMA'I SNOD DU GNAS PA'I CHU LA H'Um YIG DANG RDO RJE LAS BYUNG BA'I MI BSKYOD RDO RJE SLOB DPON GYIS BSGOM PAR BYA'O, ,RANG GI SNYING GA'I SA BON GYI 'OD ZER GYIS YE SHES SEMS DPA' SKUL BAR BRTZON PAS YE SHES SEMS DPA' GZHUG CING, DE LTAR YANG DAG PAR MCHOD NAS CHUS GTOR RO, ,DE NYID MI BSKYOD GZUGS KYIS NI, ,RNAM SHES PHUNG PO'I NGO BO STE, ,BRTZE CHEN STON PA DPA' BO YIS, ,DBANG BSKUR 'DI NI SPYI BOR SBYIN, ,AOm TRI TZAKRA B'I RA TVAm AA BHI shINYTZ'A MI ZHES PA CHU'I'O, ,RI MO LA SOGS COD PAN RNAMS, ,RIN CHEN MCHOG GI SA BON AOm, ,LAS GRUB RDO RJE NYI MAR BSHAD, ,'DI NI SNGA MA BZHIN MCHOD NAS, ,RDO RJE MKHA' 'GRO SPYI BO RU, ,BSAMS NAS RDO RJE CAN BSKYED BYA, ,COD PAN RNAM PA DE NYID NI, ,SDIG MED TSOR BA'I BDAG NYID DO; ,AOm SARBA BUDDHA d'A KI N'I YE BADZRA BARnnA N'I YE H'Um H'Um PHAt SVA H'A, ZHES PA'I SNGAGS 'DI YIS TE SNGAGS DE LTA BU GZHAN RNAMS KYANG BRJOD PAR BYA'O, ,COD PAN GYI'O, ,DE NAS BCOM LDAN 'DAS KYI PHRENG BA'I SNGAGS KYIS LAN BDUN MNGON PAR BSNGAGS PA'I PHRENG BA MGO BOR BCINGS NAS DBANG BSKUR BAR BYA'O ZHES PA PHRENG BA'I DBANG BSKUR BA'O, ,DZR'im DANG RDO RJE PADMA LAS BYUNG BA'I 'DU SHES DE BZHIN GSHEGS PA 'OD DPAG MED RDO RJE BSGRUBS NAS SLOB MA DAG LA LAG PA G-YAS DANG SNYING GAR SBYIN PAR BYA'O, ,HE RU KA DPAL DPA' BO LA SOGS KYIS, ,DE RING KHYOD LA DBANG BSKUR RO, ,'DI DE SANGS RGYAS THAMS CAD NYID, ,LEGS PAR GRUB PHYIR RDO RJE GZUNG, ,RDO RJE'I'O, ,RAL GRI KHAm YIG YANG DAG BYUNG, ,DON YOD GRUNG PA'I GZUGS CAN TE, ,'DU BYED NGO BO DRIL BU NI, ,LAG PA G-YON PAR SBYIN PAR BYA, ,'DI NI RNAL 'BYOR MA KUN GYI, ,DRIL
BU DBYANGS KYI RJES 'GROR BSHAD, ,KHYOD KYIS KYANG NI RTAG TU BCANG, ,BYANG CHUB MCHOG TU RGYAL BA BZHED, ,'KHOR LO GSUM BDAG DPA' BO YI, ,LAG PA RDO RJE DRIL BU 'DZIN, ,RANG BZHIN GYIS MDZES DGA' BA NI, ,PHYAG RGYA CHEN POR BYIN GYIS BRLAB, ,BDAG PO'I'O, , SLOB MA'I SPYI BOR LEGS BYIN NAS, ,BHRUm LAS RNAM SNANG MDZAD GZUGS KYIS, ,GZUGS KYI PHUNG PO'I NGO BO NYID, ,RDO RJE CAN GYIS MING DBANG BSKUR, ,AOm TRI TZAKRA AA DHI PA TI SHR'I HE RU KA P'I R'A TVAm AA BHI shINYTZ'A MI, KHYOD NI CHE GE MO RDO RJE'O, ,MING GI'O, ,DBANG LNGA THOB PA'I RGYU LAS NI; ,RNAM DAG SANGS RGYAS LNGA 'DI DAG ,MA RIG BRAL BA'I RIM PA LAS, ,YE SHES LNGA RNAMS THOB PAR BYED, ,DE MA THAG TU, GANG GIS BDAG NI KHYOD DRIN LAS, ,RANG DANG GZHAN DON NUS 'GYUR BA, ,RDO RJE DPON GYI NI DBANG, ,THUGS RJE'I GTER KYE BDAG LA STZOL; ,ZHES GSOL BA BTAB PAS YI GE NYI SHU RTZA GNYIS PA'I SNGAGS BRJOD DE SNGAGS KYI DBANG BSKUR BAR BYA'O, ,SNGAGS KYI DBANG NGO, ,DE NAS RDO RJE'I BRTUL ZHUGS MI BSKYOD PA'I GZUGS SU DMIGS TE, 'DI DE SANGS RGYAS THAMS CAD NYID, ,HE RU KA DPAL PHYAG NA GNAS; ,KHYOD KYIS KYANG NI RTAG TU BCANG, ,HE RU KA DPAL BRTUL ZHUGS BRTAN, ,ZHES PA 'DIS H'Um YIG LAS SKYES PA'I RDO RJE SBYIN PAR BYA'O, ,AOm SARBA TA TH'A GA TA SIDDHI BADZRA SA MA YA TIshthA AE shA STVAm DHA RA Y'A MI H'I: HI HI HI HI H'Um, ZHES BRJOD DE SLOB MA RDO RJE'I BRTUL ZHUGS 'DZIN DU GZHUG GO ZHES PA, RDO RJE'I BRTUL ZHUGS SBYIN PA'O, ,DE NAS DRIL BU'I BRTUL ZHUGS SBYIN PAR BYA STE, AOm BADZRA GHAntE RA nI TA PRA RA nI TA SAm PRA RA nI TA SARBA BUDDHA KshE TRA PRA TZA LI NE PRADZNY'A P'A RA MIT'A N'A DA SVA BH'A BA BADZRA DHARMA HRi DA YA SANTO shA NI H'Um H'Um H'Um PHAt SV'A H'A, ZHES PA DRIL BU'I BRTUL ZHUGS SO, ,DE NAS KHA tV'Am GA DANG dA MA RU DANG THOD PA'I BRTUL ZHUGS SBYIN PAR BYA STE, KHA tV'Am GA DANG CANG TE'U SNOD, ,DPA' BOS BYIN PA 'DI NI ZUNG, ,HE RU KA DPAL PHYAG RGYA 'DI, ,PHYI DANG NANG DU YANG DAG GNAS, ,ZHES PA'I TSIGS SU BCAD PA 'DIS SLOB
, ,MA'I LAG PA G-YAS PA DANG G-YON PAR SBYIN PAR BYA'O, ,KHA tV'Am GA DANG CANG TE'U DANG THOD PA'I BRTUL ZHUGS SO, ,DE NAS LUNG BSTAN PA, RDO RJE CAN GYI LAG G-YON GYIS, ,GRI GUG CHOS GOS GRVA BZUNG NAS, ,LAG PA MI 'JIGS SBYIN PAS GNAS, ,SLOB MA DBUGS DBYUNG BSTAN PAR BYA, ,'DIR BDAG 'KHOR LO GSUM DBANG PHYUG, ,RANG NYID SANGS RGYAS KUN RANG BZHIN, ,HE RU KA DPAL MING CAN GYIS, ,DE BZHIN GSHEGS PAR KHYOD LUNG BSTAN, ,DPAL HE RU KA ZHES BYA BA'I DE BZHIN GSHEGS PA, SIDDHI SA MA YA STVAm BHUR BU BA SVA:KHAMS GSUM PA YI RGYAL SRID CHE, ,DPAL LDAN YON TAN 'BYUNG GNAS BDAG ,BDUD KYI TSOGS KUN PHAM BYAS NAS, ,GRONG KHYER MCHOG TU KHYOD ZHUGS SO, ,ZHES PA LUNG BSTAN PA'O, ,DE NAS SLAR YANG GSOL BA GDAB PAR BYA STE, DA LTA MTSAN MA MED PAR NI, ,'GRO BA'I BYA BA BYED 'GYUR BA; ,PHYIR MI LDOG PA'I DBANG BSKUR CHE, ,DPA' BO CHEN POS BDAG LA RTZOL, ,ZHES GSOL BTAB PA'I SLOB MA RGYAN THAMS CAD KYIS BRGYAN PA MTHO BA'I GDUGS DANG RGYAL MTSAN DANG BLA RES BRGYAN BA SHAR GYI SGOR SENG GE'I STAN LA GNAS PA'I PADMA 'DAB MA BRGYAD PA'I STENG DU RDO RJE SEMS DPA'I GZUGS SU DMIGS TE, H'Um YIG LAS SKYES PA'I RDO RJE BSGOMS NAS, THOG MTHA' MED PA'I SEMS DPA' NI, ,RDO RJE SEMS DPA' DGA' BA CHE, ,KUN DU BZANG PO KUN BDAG NYID, ,RDO RJE SNYEMS MA'I BDAG PO'I BDAG ,CES PA 'DIS SBYIN PAR BYA STE, ,BCOM LDAN 'DAS DPAL MCHOG DANG PO'I SKYES BU'O, ,ZHES PA'I DE KHO NA NYID KYIS GZUNG BAR BYA'O, ,DE'I RJES SU AA YIG LAS SKYES PA'I DRIL BU, ,'DI DE SANGS RGYAS THAMS CAD KYI, ,SHES RAB DBYANGS KYI RJES 'GROR BSHAD, ,KHYOD KYIS KYANG MI RTAG TU BCANG, ,BYANG CHUB MCHOG TU RGYAL BA BZHED, ,CES PA 'DIS LAG PA G-YON DU SBYIN NO, ,SRID PA NGO BO NYID KYIS DAG ,NGO BO NYID KYIS SRID BRAL BYAS, ,RANG BZHIN DAG PA'I SEMS DPA' MCHOG ,SRID PA MCHOG NI MDZAD PA YIN, ,ZHES BRJOD CING SLOB MAS KYANG
MNGON PAR BRJOD PAR BYA'O, ,DE'I RJES SU, YID KYIS LUS BRTAN DE NYID LAS, ,PHYAG RGYA'I DAM TSIG RAB TU BRJOD, ,GANG GI LUS NI THAMS CAD BRTAN, ,DES NA PHYAG RGYA RAB TU BSGRAGS, ,ZHES PA 'DIS RANG GI 'DOD PA'I LHA'I LUS NANG GI PHYAG RGYA CHEN POR BYIN GYIS BRLABS NAS 'KHYUD PAR BYA'O, ,DE NAS 'KHOR LO GSUM BDAG PO, ,STON PA YE SHES SEMS DPA' YI, ,THUGS KA'I SA BON 'OD ZER GYIS, ,BSKUL BA'I RIM PAS BKUG GYUR PA'I, ,DPA' BO LHA MO RNAMS KYIS NI, ,BKUR STI RGYA CHEN RNAMS KYIS MCHOD, , DE BZHIN YE SHES CHUS GANG BA'I, ,BUM THOGS DE BZHIN GSHEGS RNAMS KYIS, ,RDO RJE 'CHANG DBANG DBANG BSKUR BAR, ,DPA' BOS RNAM PAR BSAM PAR BYA, ,DBANG BSKUR BA NI RDO RJE CHE, ,KHAMS GSUM PA YIS PHYAG BYAS PA, ,SANGS RGYAS KUN GYI GSANG GSUM GYI, ,GNAS LAS BYUNG BA SBYIN PAR BYA, ,ZHES SNGAGS BRJOD DE DBANG BSKUR BAR BYA'O, ,JI LTAR GSUNGS PA, BCU DRUG LO CAN SHES RAB LA, ,LAG PA DAG GIS YANG DAG 'KHYUD, ,RDO RJE DRIL BU MNYAM SBYOR LAS, ,SLOB DPON GYI NI DBANG DU 'DOD, , CES PHYAG RGYA'I DAM TSIG GO, ,DE NAS MI BSKYOD PA COD PAN DU GYUR TE DPA' BO LHA MO DAG GIS BYIN GYIS RLOB PAR BYED DO, ,AOm SU PRA TIshtHA BADZRE SVA H'A, ZHES PA'I SNGAGS BRJOD DO, ,DE NAS ME TOG LA SOGS PA'I MCHOD PA RNAM PA SNA TSOGS PA RNAMS KYIS 'DI KUN NAS MCHOD PAR BYA STE RNAL 'BYOR MA CHEN MO RNAMS KYIS JI LTAR 'DOD PAR RO, ,DE NAS RDO RJE CAN GYIS BKA' BSGO BAR BYA STE, DE NYID RIG PA'I RNAL 'BYOR PAS, ,MI BYA BA NI CUNG ZAD MED, ,DE NYID SHES PAS GNAS DES NI, ,DPA' BOS 'DOD PA LNGA SPYOD CIG ,BDAG NYID DPA' BO KUN RANG BZHIN, ,LHA MO KUN BDAG RANG NYID DO, ,DE PHYIR BDAG GIS THAMS CAD BYA, ,BDAG NYID HE RU KA DPAL MCHOD, ,BRTEN NAS SKYES PA'I CHOS CAN GYI, ,SEMS CAN GZUGS BRNYAN RANG BZHIN NO, ,KHAMS GSUM DE LTAR SHES NAS NI, ,
, ,SEMS CAN DON NI DRI MED BYOS, ,ZHES PA BKA'I'O, ,DE NAS BYA BA BYAS SLOB MAS, ,BLA MA LA NI YON PHUL TE, ,SKYE BO DAM PA 'DUS PA LA, ,BDAG NYID KUN GYIS BSTOD PHYAG BYA, ,PHYIR MI LDOG PA'O, ,SLOB DPON GYI DBANG NI PHYIR MI LDOG PA'I DBANG ZHES BRJOD LA, DBANG LNGA DANG SLOB DPON GYI DBANG YANG BUM PA'I DBANG DU BRJOD DE, THAMS CAD DU BUM PA RNAMS KYI BYA BA YIN PA'I PHYIR RO, ,DBANG BSKUR BA DRUG PO 'DI RNAMS RGYUD THAMS CAD DU MI 'GAL LO, ,DE LTAR SLOB DPON DU DBANG BSKUR BAS SKU RDO RJE RNAM PAR SBYANGS NAS, DE'I RJES SU YOL BA LA SOGS PA RNAMS KYIS DBEN PAR BYAS PA'I PHYOGS SU SLOB MA RANG GI SEMS DGA' BA, GZUGS DANG LANG TSOS BRGYAN PA DAM TSIG DANG SDOM PA'I SKAL BA CAN, RIGS LNGA SO SOR BCINGS PA'I ME TOG DANG LDAN PA'I SHES RAB MA BLA MA LA GSANG DBANG BSKUR BA'I DON DU PHUL TE; DE LA BDAG NYID 'BREL BA SPANG PA'I DUS SU, BLA MA LA BTUD NAS PUS MO BTZUGS THAL MO SBYAR TE, 'KHOR LO'I MDUN DU BYA BA BYAS, ,'KHOR LO'I SPYAN NI BLA MA CHE, ,DPA' BOS DE NYID LA BTUNG NAS, ,DE NAS GSANG DON DON GNYER BYA, ,SKYOB PA SKYABS MED RNAMS KYI SKYABS, ,'KHOR LO SDOM PA BDAG SKYOB MDZOD, ,RGYU MED PAR NI THUGS RJE CHE, ,MGON MED BDAG GI MGON MDZOD CIG ,BDAG NYID CHEN PO KHYOD JI LTAR, ,KHYAB BDAG BDAG KYANG DE LTAR MDZOD, ,'KHOR BA'I 'DAM GYI TSOGS SU NI, ,BYING BA BDAG LA SKYABS MDZOD CIG ,CES PA'I TSIGS SU BCAD PA GNYIS PO 'DIS GSOL BA GDAB PAR BYA'O, ,DE'I RJES SU RIM GYIS BSGOM MAM SKAD CIG GIS BDAG NYID DPAL DE RU KAR BSGOMS TE, SLOB MAS PHUL BA'I SHES RAB MA RDO RJE PHAG MO'I RNAL 'BYOR GYI SPRUL PA LA GO CHA CHEN PO LA SOGS PA RNAMS KYIS GO BGOS NAS, DE BZHIN DU SKU GSUNG THUGS BYIN GYIS BRLAB CING KYE RDO RJE LAS BZHAD PA, RDO RJE PADMA BYIN GYIS BRLAB STE H'Um YIG LAS RDO RJE, BY'A YIG LAS NOR BU RTZE MOR BY'A YIG SER POS DANG, AA YIG LAS PADMA 'DAB MA GSUM PA DY'A YIG LAS
ZE'U 'BRU DKAR PO RTZE MOR DY'A YIG SER POS BYIN GYIS BRLAB CING, JI LTAR GNAS PA'I BCOM LDAN 'DAS MA'I SNGAGS KYIS TZUM PA NA 'AM, DKYIL 'KHOR GYI DBUS SAM DKYIL 'KHOR DANG NYE BAR SHING DANG GOS KYI KHRI LA SOGS PA'I BDE BA'I MAL DU GZHAG STE, MTSAN PHYED KYI DUS SU GSANG BA'I DBANG BSKUR BRTZAM PAR BYA STE, DE BZHIN DU RDO RJE PADMA 'BYED PA LA SOGS PA'I BYA BAS 'DZAG PA'I GNAS SKABS SU GDONG G-YOGS BCINGS PA'I SLOB MA'I MGO BO DANG, DPRAL PA DANG MIG GNYIS DANG KHA DANG MGRIN PA DANG SNYING GA STE GNAS BDUN DU SNYING PO DANG NYE BA'I SNYING PO DANG, PHRENG SNGAGS BRJOD CING RDO RJE DANG PADMAS DBANG BSKUR BA SBYIN PAR BYA'O, ,DE GNYIS KA'I DUS TSAD RDZOGS PA DANG GSANG BA DE GNYIS LAS MTHE BONG DANG MING MED DAG GIS BTZIR TE ZHES PA DAS NA RDO RJE PADMA YIS SO, ,SNYOB MA 'OD DPAG TU MED PA'I BDAG NYID, AA HO SHIN TU BDE CHEN NYID, ,BSTAN PA STON PA YANG DAG BRJOD, ,KUN RTOGS BCOM PA'I SLOB MA YIS, ,PADMA GNAS DE KUN DU SPYAD, ,'DAS PA'I RDO RJE 'CHANG SOGS KYIS, ,JI LTAR SANGS RGYAS SRAS DBANG BSKUR, ,DE BZHIN DU NI BYANG CHUB SEMS, ,MDZES PAS BU KHYOD DBANG BSKUR RO, ,GSANG BA'I DBANG BSKUR BA'I DUS SU SLOB MA DANG SHES RAB MA RNAMS KYANG MIG DAR BCINGS TE MIG GNYIS LA AOm YIG GNYIS BSAM MO, ,AOm RDO RJE SEMS DPA' RANG NYID DANG, ,KHYOD KYI MIG NI 'BYED PAR BRTZON, ,ZHES PA LA SOGS PA BRJOD PAS PHYE STE DKYIL 'KHOR BSTAN NAS DKYIL 'KHOR GYI 'KHOR LO'I RNAM PA N'A DA LAS SKYES SO ZHES DE KHO NA NYID BSGRAG PAR BYA'O, ,GSANG BA'I DBANG BSKUR BAS GSUNG RDO RJE RNAM PAR SBYAR BAR BYA'O ZHES PA GSANG BA'I DBANG BSKUR PA'I CHO GA'O, ,DE'I RJES SU YAN LAG LNGAS SLOB DPON LA PHYAG BYAS NAS PUS MO G-YAS PA'I LHA NGA SA LA BTZUGS TE KA PO TA'I THAL MOS MDUN DU 'DUG STE, SNGAR BRJOD PA'I TSIGS SU BCAD PA GNYIS KYIS GSOL BA GDAB STE, DE'I LAG PAR SHES RAB MA'I LAG BA BZHAG NAS, DPA' MO DANG DPA' BO'I TSOGS
, ,THAMS CAD DPANG DU BYAS TE, RDO RJE SPYI BOR BZHAG NAS BLA MA RDO RJE CAN GYIS BRJOD PAR BYA STE, LHA MO 'DI NI PHYAG RGYA CHE, ,MTHA' YAS BDE BA SBYIN PA MO, ,BU YIS RNAM PA KUN DU ZUNG, ,MCHOD PA BLA NA MED PA GYIS, ,ZHES BRJOD NAS SBYIN PAR BYA'O, ,DE YANG GUR GUM DANG TZANDAN GYIS BYUGS PA, DRI BZANG PO'I ME TOG GI PHRENG BAS NYE BAR MDZES PA GOS MED PAR RANG GI CHU SKYES GSAL BAR STON PAR BYED DO, ,DE DE MA THAG TU LHA MO DE DPA' BO'I BU LA BLA NA MED PA'I BKA' BSGO BAR BYED DO, ,DPA' BO BYANG CHUB SEMS ZA BAR, ,KHYOD NI SPRO BA YIN NAM CI, ,RIGS LNGA LAS NI RAB BYUNG BA, ,RIG MA MCHOD PA LA GUS SAM, ,DRI CHEN DRI CHU STOBS KHRAG SOGS, ,DA LTA ZA BAR YID CHES SAM, ,GZHAN YANG LHA YI DAM TSIG NI, ,JI LTAR 'DOD PA SMROS SHIG BU, ,ZHES SO, ,SLOB MAS 'DI SKAD BRJOD DE; ,DAM TSIG LA SOGS 'DZIN PAR NI, ,LHA MO BDAG NI CIS MI SPRO, ,BUD MED RNAMS LA RTAG GUS DANG, ,PADMA MCHOD PAR CIS MI BGYID, ,DE NAS LHA MO DE DGA' STE, ,SGRA GROL GOS DANG BRAL BYAS NAS, ,RNAM PAR RGYAS PA'I PADMA NI, ,BSTAN TE DHA NYDZA PADMA HO; ,AE MA BDAG GI PADMA 'DI, ,BDE BA THAMS CAD YANG DAG LDAN, ,GANG ZHIG CHO GAS STEN BYED PA, ,DE YI MDUN NA BDAG GNAS SO, ,SANGS RGYAS MNYES PA LA SOGS PA, ,PADMAR BYA BA JI BZHIN GYIS, ,BDE CHEN RGYAL PO RANG NYID NI, ,'DI NYID DU NI RTAG TU BZHUGS, ,BHANYDZA MO KshA HO: ZHES SO, ,DE MA THAG TU SLOB MAS SHES RAB YE SHES KYI DBANG BSKUR BA'I DON DU, DKYIL 'KHOR DANG BLA MA LA BTUD NAS, DKYIL 'KHOR LA G-YON SKOR GYIS BSKOR BA GSUM BYAS TE, SLAR YANG DE BZHIN DU BRTZAM PAR BYA BA NYID KYI PHYIR YANG RTZOM PA LA 'JUG GO, ,BDAG NYID DPAL 'KHOR LO SDOM PA'I GZUGS KYIS DANG, DE YANG RDO RJE PHAG MO'I GZUGS KYIS RDZOGS PAR BYA STE, GO CHA CHEN PO LA SOGS PA RNAMS KYIS GO BGOS NAS, RDO RJE DANG PADMA DAG JI LTAR BRJOD PA'I SA BON LAS YONGS SU GYUR PAR BYIN GYIS BRLAB PA YANG
BYAS NAS G-YON NGOS SU 'JUG PA'I RTZA BLA MAS BSTAN PA LA BRTEN NAS SOR MO LA BRTEN NAS BSKUL TE, AOm SARBA TA TH'A GA TA AA NU R'A GA nA BADZRA SVA BH'A BA A'ATMA KO&HAm, ZHES BRJOD PAS, PADMA LA RDO RJE BZHAG STE SHIN TU DGA' BA'I BSTAN BCOS BYED PA'I BYA BAS BLA MA'I MDUN DU THOB PA'I GSANG BAS DBANG NYID LA YANG, SHES RAB MA LA JI LTAR GNAS PA BZUNG BA'I BRDAS SLOB MAS SHES RAB YE SHES NYAMS SU MYONG BA YIN LA, BLA MAS KYANG BRDA LAS SLOB MA'I BDE BA NYAMS SU MYONG BA NGES PAR RTOGS SO, ,DBANG BSKUR BA NI RDO RJE CHE, ,KHAMS GSUM PA YIS PHYAG BYAS PAS, ,SANGS RGYAS KUN GYI GSANG GSUNG PA'I, ,GNAS LAS BYUNG BA SBYIN PAR BYA, ,ZHES BRJOD CING DBANG BSKUR BAR BYA'O, ,DE NAS BCOM LDAN 'DAS MA DE MNYES NAS, ,BSTEN ZA GSANG SNGAGS BRJOD PAR MOS, ,MGO BOR LAG PA G-YON BYIN NAS, ,RJES SU GNANG BA BSTAN PAR BYA, ,DENG NAS BZUNG STE BU KHYOD KYIS, ,JI SRID BYANG CHUB SNYING PO'I BAR, ,RMI LAM BZHIN DU 'GRO KUN GYI, ,DON NI BDAG NYID KUN GYIS BYOS, ,ZHES SHES RAB YE SHES KYI DBANG BSKUR BAS THUGS RDO RJE RNAM PAR SBYANG BAR BYA'O; ,ZHES SHES RAB YE SHES KYI DBANG BSKUR BA'I CHO GA'O, ,RIM PA GSUM PO 'DI YI MCHOG ,MAN NGAG GIS NI 'DIR SHES BYA, ,'DI NI RANG NYID GSAL BA STE, ,PHYI ROL YUL NI SPANG BA'O, ,RIG 'DI BOR NAS DE NAS NI, ,THABS GZHAN GYIS NI SANGS RGYAS MED, ,BRTUL ZHUGS RNAMS KYI MCHOG GI MCHOG ,RIG MA'I BRTUL ZHUGS SPYOD GCIG BU, ,ZHES PA RIG MA'I BRTUL ZHUGS SO, ,CHU SOGS PHYIR MI LDOG PA'I MTHA', ,SLOB DPON DBANG DU BSHAD PA STE, ,PHYI ROL BSTAN PA GANG 'DI DAG, THAMS CAD NANG DU GNAS PA'O, ,KUN DU SPYOD PA'I RIM DBYE LAS, ,DPA' BO MAN NGAG LAS SHES BYA, ,GANG TSE DBANG BZHI BSTAN RNAMS KYIS, ,BRTUL ZHUGS CAN NI DBANG BSKUR 'GYUR, ,DE TSE DE NYID CES BYA 'DI, ,BSAM MED CHOS NI THOB PHYIR RO, ,PHYI DANG NANG DU YANG DAG
, ,BSHAD; ,PHYI DANG NANG GI RANG NGO BO, ,CHOS RNAMS KUN GYI NGO BO STE, ,BSAM GYIS MI KHYAB CES BSHAD DO, ,SNANG BA MED CING SKYE BA MED, ,NGAG GI LAM MIN GNAS MED NGA, ,DE NYID LNGA PA RDZOGS PA'I RIM, ,LHAN CIG SKYES PA MI ZAD PA'O, ,BSAM GYIS MI KHYAB MTHA' YAS SOGS, ,DE NI BRTAN G-YO 'GRO BDAG NYID, ,BDAG MED NYID KYIS BDAG TU GNAS, ,DPA' BA BDE BA CHEN PO RTOGS, ,ZHES PA DE KHO NA NYID KYI MAN NGAG GO, ,DE LTAR DBANG BSKUR BA MTHA' DAG YANG DAG PAR THOB PA'I SLOB MA BYA BA BYAS PA YANG DAG PAR SHES PA SEMS MNGON PAR DANG BAS BLA MA LA YON DBUL BAR BYA STE, DE NAS DE BZHIN GSHEGS GSUNGS PA'I, ,YON NI BLA MA LA DBUL BYA, ,STONG PHRAG BRGYA YI GSER DANG NI, ,RIN CHEN RNAM PA SNA TSOGS DANG, ,GOS ZUNG BRGYA PHRAG NYID DANG NI, ,GLANG PO RTA DANG YUL 'KHOR DANG, ,RNA RGYAN DANG NI GDU BU DANG, ,MGUL RGYAN DANG NI SOR GDUB MCHOG ,GSER LAS BYAS PA'I MCHOD PHYIR THOGS, ,RANG GI CHUNG MA'AM BU MO DANG, ,BRAN DANG BRAN MO SRID MO DANG, ,BCAS PA'ANG BSGRUBS NAS DBUL BAR BYA, ,BDAG KYANG DNGOS PO THAMS CAD KYIS, ,RTAG TU BLA MA LA DBUL BYA, ,DENG NAS BRTZAMS TE BDAG BRAN DU, ,KHYOD LA BDAG GIS PHUL BA LAGS, ,DE LTAR CHO GA DE BYAS NAS, ,SGRUB POS SHIN TU NGES PA NYID, ,YON PHUL BA'I PHAN YON GSUNGS PA, ,DE NAS DE NI MNYES BYED PA, ,GANG YANG MKHA' 'GRO L'A MA NYID, ,DUM SKYES MA YANG KHYAD PAR DU, ,MKHA' 'GRO MA RNAMS RNAL 'BYOR YUM, ,SGRUB POR BCAS PA'I MKHA' 'GRO MA, ,KUN GYIS 'GRO 'DI RNAM PAR SPYOD, ,KUN DU SGRUB PA PO DE YI, ,BRAN DU 'GYUR PAR THE TSOM MED, ,'JIG RTEN GSUM GYIS MI BZLOGS PA'I, ,'DI YI RNAL 'BYOR 'GRUB PAR 'GYUR, ,MI SNANG BA DANG KHUNG BUR GNAS, ,MKHA' SPYOD RKANG BYUG BCUD LEN NYID, ,SGRUB PA PO YI 'DOD PA NI, ,RTAG TU BRTAN PAR 'GYUR BA STE, ,GZUGS RNAMS DU MAR BYED PA DANG, ,NAM MKHA' LA NI 'GRO BAR BYED,,
MKHA' 'GRO MA YANG KHYAD PAR DU, ,KUN DU SKYE BO DES 'DUL BYED, ,LAN CIG MTHONG BA'I SBYOR BA YIS, ,SKAD CIG RNAL 'BYOR NYID DU 'GYUR, ,MNGON PAR DBANG BSKUR BA MED PA'I MNGON PA'I NGA RGYAL GYIS RNAL 'BYOR LA DGOS PA MED PAR BLTA BAR GSUNGS PA, SNGAGS PA DKYIL 'KHOR MA MTHONG BAR, ,GANG ZHIG RNAL 'BYOR NYID 'DOD BYED, ,MKHA' LA KHU TSUR BSNUN PA DANG, ,SMIG RGYU LA NI 'THUNG BAR BYED, ,SBYIN SREG BYAS SHING GTOR MA SBYIN BYAS NAS, ,DAM PA'I SKYE BO 'DUS PAR 'GYUR BA LA, ,DGE 'DUN STON MO BYAS NAS DE NAS NI, , DMAN DANG MGON MED RNAMS KYANG TSIM PAR BYA, ,ZHES SO, ,MA LUS 'GRO LA PHAN CHED DU, ,'DI BRIS PA YI BSOD NAMS KYIS, ,GANG TSE BDUD KYI TSOGS BCOM NAS, ,THAMS CAD HE RU KA DPAL GYUR, ,DPAL 'KHOR LO SNGON PA'I DBANG GI BYA BA'I RIM PA, PAndI TA CHEN PO SLOB DPON RTAG PA'I RDO RJE'I ZHABS KYIS MDZAD PA RDZOGS SO, ,'DI NI LO TZ'A BA CHEN PO THAMS CAD MKHYEN PA BU STON ZHABS KYI BKA' DRIN LAS BRDA SPROD PA'I TSUL LA BLO'I SNANG BA CUNG ZAD SKYES PA SH'AKYA'I DGE SLONG DHARMMA SHR'I BHA DRAS 'DREN PA DAM PA DE NYID KYI BKA' SPYI POS BLANGS TE; DPAL MAR ME MDZAD YE SHES KYIS BYIN GYIS BRLABS PA'I GNAS ZHA LU RI PHUG TU BSGYUR BA'O,,