,,RGYA GAR SKAD DU, A'ARYA RATNA KOtI N'A MA MAH'A Y'A NA S'U TRA, BOD SKAD DU 'PHAGS PA RIN PO CHE'I MTHA' ZHES BYA BA THEG PA CHEN PO'I MDO, SANGS RGYAS DANG BYANG CHUB SEMS DPA' THAMS CAD LA PHYAG 'TSAL LO, ,'DI SKAD BDAG GIS THOS PA DUS GCIG NA, BCOM LDAN 'DAS RGYAL PO'I KHAB NA BYA RGOD KYI PHUNG PO'I RI LA DGE SLONG LNGA BRGYA THAM PA'I DGE SLONG GI DGE 'DUN CHEN PO DANG THABS GCIG TU BZHUGS TE, DE NAS 'JAM DPAL GZHON NUR GYUR PA MTSAN MO SROD LA BCOM LDAN 'DAS KYI BZHUGS KHANG GA LA BA DER SONG STE PHYIN NAS BZHUGS KHANG GI SGO DRUNG NA 'GRENG STE BCOM LDAN 'DAS LA SDOD DO, ,DE'I TSE BCOM LDAN 'DAS RIN PO
, ,CHE'I MTHA' ZHES BYA BA'I TING NGE 'DZIN LA SNYOMS PAR BZHUGS SO, ,DE NAS BCOM LDAN 'DAS DRAN PA DANG MKHYEN BZHIN DU TING NGE 'DZIN DE LAS BZHENGS NAS 'JAM DPAL GZHON NUR GYUR PA SGO NA 'DUG PA GZIGS SO, ,GZIGS NAS KYANG 'JAM DPAL KHYOD NANG DU SHOG CES DE SKAD CES BKA' STZAL TO, ,BCOM LDAN 'DAS, LEGS SO, ,LEGS SO ZHES GSOL TO, ,'JAM DPAL GZHON NUR GYUR PAS BCOM LDAN 'DAS KYI LTAR MNYAN NAS BCOM LDAN 'DAS GA LA BA DAR SONG STE PHYIN NAS, BCOM LDAN 'DAS KYI ZHABS LA MGO BOS PHYAG BTZAL TE PHYOGS GCIG TU 'GRENG NGO, ,'JAM DPAL GZHON NUR GYUR PA PHYOGS GCIG TU 'GRENG BA DANG, BCOM LDAN 'DAS KYIS STAN LA 'DUG CES GNANG BA MDZAD DO, , BCOM LDAN 'DAS KYIS GNANG BAS DE NAS 'JAM DPAL GZHON NUR GYUR PA, BCOM LDAN 'DAS GA LA BA DE LOGS SU THAL MO SBYAR BA BTUD DE PHYOGS GCIG TU 'DUG GO ,PHYOGS GCIG TU 'DUG NAS BCOM LDAN 'DAS LA 'JAM DPAL GZHON NUR GYUR PAS 'DI SKAD CES GSOL TO, ,BCOM LDAN 'DAS, DA GDOD TING NGE 'DZIN GANG GIS BZHUGS BZHUGS PA LAS BZHENGS LAGS, DE SKAD CES GSOL PA DANG, BCOM LDAN 'DAS KYIS 'JAM DPAL GZHON NUR GYUR PA LA 'DI SKAD CES BKA' STZAL TO, ,'JAM DPAL, RIN PO CHE'I
MTHA' ZHES BYA BA'I TING NGE 'DZIN YOD DO, ,TING NGE 'DZIN DES NGA DA GDOD GNAS GNAS PA LAS LANGS SO, ,GSOL PA, BCOM LDAN 'DAS, CI'I SLAD DU DE LA RIN PO CHE'I MTHA' ZHES BGYI LAGS, BCOM LDAN 'DAS KYIS BKA' STZAL PA, 'JAM DPAL, 'DI LTA STE, DPER NA, NOR BU RIN PO CHE SHIN TU DAG CING SHIN TU BYI DOR BYAS PA SA PHYOGS MNYAM PA LA BZHAG NA DE GANG DANG GANG KHO NAR BZHAG PA DE DANG DER RIN PO CHE BYE BA GNAS PAR 'GYUR RO, ,'JAM DPAL, DE BZHIN DU NGA TING NGE 'DZIN DE LA GNAS NAS SHAR PHYOGS SU BLTAS TE, SHAR PHYOGS SU BLTAS NA NGAS 'JIG RTEN GYI KHAMS DPAG TU MED GRANGS MED PA DAG NA DE BZHIN GSHEGS PA DGRA BCOM PA YANG DAG PAR RDZOGS PA'I SANGS RGYAS CHOS STON CING BZHUGS PA DAG MTHONG NGO, ,DE BZHIN DU LHO PHYOGS DANG, NUB PHYOGS DANG, BYANG PHYOGS DANG, 'OG DANG, STENG NAS PHYOGS BCU'I BAR DU BLTAS NA NGAS 'JIG RTEN GYI KHAMS DPAG TU MED PA DAG NA DE BZHIN GSHEGS PA DGRA BCOM PA YANG DAG PAR RDZOGS PA'I SANGS RGYAS CHOS STON CING BZHUGS PA DAG MTHONG NGO, ,'JAM DPAL, NGAS TING NGE 'DZIN 'DI LA GNAS NAS GANG YANG DAG PA'I MTHA' MA YIN PA'I CHOS DE GANG YANG YANG DAG PAR RJES SU MA MTHONG NGO, ,'JAM DPAL, YANG DAG PA'I MTHA'I PHYAG RGYA 'DI NGAS PHYAG RGYAR BZHAG STE, DAD PA CAN GYI RIGS KYI BU RNAMS DANG, RIGS KYI BU MO RNAMS KYIS PHYAG
, ,RGYA 'DI LA SPYAD NA SPOBS PA MI CHOD PA 'DZIN PAR 'GYUR RO, ,GSOL PA, BCOM LDAN 'DAS, BDAG SPOBS LAGS SO, ,BDE BAR GSHEGS PA, SPOBS LAGS SO; ;BKA' STZAL PA, 'JAM DPAL KHYOD SPOBS PAR GYIS SHIG ,GSOL PA, BCOM LDAN 'DAS, DPER BGYI NA, NOR BU RIN PO CHE DE NYID NGOS GANG DANG GANG KHO NAS PHAB STE BZHAG PA'I RIN PO CHE'I NGOS DE DANG DE KHO NA 'BAB CING GNAS PAR 'GYUR LAGS SO, ,BCOM LDAN 'DAS, DE BZHIN DU CHOS THAMS CAD NI YANG DAG PA'I MTHA' KHO NAS GNAS LAGS SO, ,BKA' STZAL PA, 'JAM DPAL KHYOD KYIS YANG DAG PA'I MTHA' SHES SAM, GSOL PA, BCOM LDAN 'DAS, 'TSAL LAGS SO, ,BKA' STZAL PA, 'JAM DPAL, 'O NA YANG DAG PA'I MTHA' GANG NA 'DUG ,GSOL PA, BCOM LDAN 'DAS, YANG DAG PA'I MTHA' NI BDAG GI MTHA' GANG NA MCHIS PA DE NA MCHIS LAGS SO, ,YANG DAG PA'I MTHA' NI SO SO'I SKYE BO'I CHOS RNAMS GANG NA MA MCHIS PA DE NA MCHIS LAGS SO, ,YANG DAG PA'I MTHA' NI LAS SAM, RNAM PAR SMIN PA'ANG MA LAGS LA CHOS THAMS CAD KYI MTHA' YANG DE KHO NA LAGS SO, ,BCOM LDAN 'DAS, GANG DAG DE LTAR MOS PA DE DAG NI GANG LAS KYANG RNAM PAR GROL BA MCHIS LAGS SO, ,GANG DAG GANG LAS KYANG GROL BA MA MCHIS PA DE DAG NI LOG PA LAS RNAM PAR
GROL BA LAGS SO, ,GANG DAG LOG PA LAS RNAM PAR GROL BA DE DAG NI YANG DAG PAR RNAM PAR GROL BA LAGS SO, ,GANG DAG YANG DAG PAR RNAM PAR GROL PA DE DAG NI SPYOD YUL MA LAGS PA LA ZHUGS PA LAGS SO, ,GANG DAG SPYOD YUL MA LAGS PA LA ZHUGS PA DE DAG NI YANG DAG PAR ZHUGS PA LAGS SO, ,DE CI'I SLAD DU ZHE NA, BCOM LDAN 'DAS, SPYOD YUL MA LAGS PA ZHES BGYI BA NI SPYOD YUL DES BGYIS LAGS PA STE, DE'I SLAD DU SPYOD YUL MA LAGS PA ZHES 'DOGS LAGS SO, ,BKA' STZAL PA, 'JAM DPAL, SPYOD YUL MA YIN PA ZHES BYA BA DE GANG GI TSIG BLA DVAGS YIN, GSOL PA, BCOM LDAN 'DAS, SPYOD YUL MA LAGS PA ZHES BGYI BA DE NI YANG DAG PA'I MTHA'I TSIG BLA DVAGS LAGS SO, ,BKA' STZAL PA, 'JAM DPAL, LAM SGOM PA ZHES BYA BA DE GANG GI TSIG BLA DVAGS YIN, GSOL PA, BCOM LDAN 'DAS, LAM BSGOM PA ZHES BGYI BA DE NI LAM SGOM PA MA MCHIS PA'I TSIG BLA DVAGS LAGS SO; ;BKA' STZAL PA, 'JAM DPAL KHYOD LAS DANG PO PA'I RIGS KYI BU RNAMS DANG, RIGS KYI BU MO RNAMS LA CHOS JI LTAR STON, GSOL PA, BCOM LDAN 'DAS, BDAG NI LAS DANG PO PO'I RIGS KYI BU RNAMS DANG, RIGS KYI BU MO RNAMS LA 'JIG TSOGS DOR DU MA MCHIS PAR CHOS STON LAGS SO, ,BDAG NI 'DOD CHAGS DANG, ZHE LDANG DANG, GTI MUG
, ,RNAMS SPANG DU MA MCHIS PAR CHOS STON PA LAGS SO, ,DE CI'I SLAD DU ZHE NA, BCOM LDAN 'DAS, CHOS 'DI RNAMS KYI RANG BZHIN GANG LAGS PA DE NI SPANG BAR RDO MI THOGS PA'I SLAD DU LAGS SO, ,BCOM LDAN 'DAS, 'JIG TSOGS SAM, 'JIG TSOGS KUN 'BYUNG BA SPONG BAR 'TSAL BA DE NI YANG DAG PA'I MTHA' SPONG BAR BAS TE, BCOM LDAN 'DAS, BDAG NI LAS DANG PO PA'I RIGS KYI BU RNAMS DANG, RIGS KYI BU MO RNAMS LA MNGON PAR ZHEN PA MA MCHIS PA'I TSUL GYI SANGS RGYAS KYI CHOS RNAMS GZUNG BAR MI BGYI BA'AM, MNGON SUM DU MI BGYI BA DANG, SO SO'I SKYE BO'I CHOS RNAMS LHAG PAR MI DMIGS PA'ANG, SPANG BAR MI BGYI BA DE LTA BUR CHOS STON LAGS NA, GDUL BA LAS DANG PO PA RNAMS LA BCOM LDAN 'DAS JI LTAR CHOS STON PAR MDZAD LAGS, BKA' STZAL PA, 'JAM DPAL, NGA NI GZUGS RNAM PAR 'JIG PA MED PA DANG, SKYE BA MED BAR CHOS STON TO, ,TSOR BA DANG, 'DU SHES DANG, 'DU BYED RNAMS DANG, RNAM PAR SHES PA RNAM PAR 'JIG PA MED PA DAN,G SKYE BA MED PAR CHOS STON TO, ,'DOD CHAGS DANG, ZHE SDANG DANG, GTI MUG RNAMS RNAM PAR 'JIG PA MED PA DANG, SKYE BA MED PA DANG, BSAM GYIS MI KHYAB PA'I CHOS RNAMS KYANG THOB PA MED PAR CHOS STON TO, ,NGAS NI 'DI LTAR
CHOS GANG YANG MA BSHIG MA BSKYED PA DE LTAR BLA NA MED PA YANG DAG PAR RDZOGS PA'I BYANG CHUB MNGON PAR RDZOGS PAR SANGS RGYAS SO, ,'JAM DPAL, SANGS RGYAS NYID CES BYA BA DE NI CHOS KYI DBYINGS KYI TSIG BLA DVAGS LAGS SO, ,STOBS RNAMS DANG, MI 'JIGS PA RNAMS DANG, MA 'DRES PA LA THUG PA'I SANGS RGYAS KYI CHOS GANG DAG YIN PA DE DAG KYANG CHOS KYI DBYINGS KHO NA YIN PAR KHONG DU CHUD PAR BYA'O, ,NGAS NI CHOS KYI DBYINGS LA 'DI LTA STE, SO SO'I SKYE BO'I CHOS RNAMS SAM, DGRA BCOM PA'I CHOS RNAMS SAM, RANG SANGS RGYAS KYI CHOS RNAMS SAM, SANGS RGYAS KYIS CHOS RNAMS KYANG RUNG STE, DE DAG THA DAD PAR YANG DAG PAR RJES SU MA MTHONG NGO, ,DE CI'I PHYIR ZHE NA, 'JAM DPAL, DBYINGS DE LA NI BYE BRAG MED DE, 'DI LTA STE, CHOS KYI DBYINGS SO, ,CHOS KYI DBYINGS NI MA 'DRES PA'I DBYINGS SO, ,'JAM DPAL, 'DI LTA STE, DPER NA, CHU KLUNG MING THA DAD PA DANG, KHA DOG THA DAD PA DANG, RO THA DAD PA RGYA MTSO'I NANG DU BAB PA RNAMS LA NI 'DI LTA STE, 'DI NI GANG+G'A'O ZHE'AM, SI TA'O ZHE'AM, YA MU NA'O ZHES BYE BRAG TU DBYE BA'AM THA DAD DU BYAR MI NUS SO, ,'JAM DPAL, DE BZHIN DU MING THA DAD PA'I CHOS RNAMS KYANG CHOS KYI DBYINGS LA 'DI NI SO SO'I SKYE BO'I CHOS RNAMS SO ZHE'AM, NYAN THOS DANG, RANG SANGS RGYAS DANG, BYANG CHUB SEMS DPA' DANG, SANGS RGYAS KYI
, ,CHOS RNAMS SO ZHES THA DAD PAR GDAGS PAR MI NUS SO, ,'JAM DPAL, 'DI LTA STE, DPER NA, 'BRU'I PHUNG PO SNA TSOGS LA NI 'DI NI 'BRU CHE GE MO ZHIG GI PHUNG PO'O, ,'DI NI CHE GE MO ZHIG GO ZHES GDAGS SU YOD PA BZHIN DU CHOS KYI DBYINGS LA NI 'DI DAG SO SO'I SKYE BO'I CHOS RNAMS SO ZHE'AM, NYAN THOS DANG, RANG SANGS RGYAS DANG, BYANG CHUB SEMS DPA' DANG, SANGS RGYAS KYI CHOS RNAMS SO ZHES THA DAD PAR GDAGS PAR MI NUS SO, ,'JAM DPAL, 'DI LTA STE, DPER NA, 'BRU'I PHUNG PO SNA TSOGS LA NI 'BRU CHE GE MO ZHIG GI PHUNG PO'O, ,'DI NI CHE GE MO ZHIG GO ZHES GDAGS SU YOD PA BZHIN DU CHOS KYI DBYINGS LA NI 'DI DAG NI SO SO'I SKYE BO'I CHOS RNAMS SO, ,'DI DAG NI DGRA BCOM PA'I CHOS RNAMS SO, ,'DI DAG NI RANG SANGS RGYAS KYI CHOS RNAMS SO, ,'DI DAG NI BYANG CHUB SEMS DPA'I CHOS RNAMS SO, ,'DI DAG NI SANGS RGYAS KYI CHOS RNAMS SO ZHES THA DAD PAR GDAGS PAR MI NUS SO, ,'DI NI CHOS KYI DBYINGS TE, DE NI 'DI NA 'DUG GO ZHE'AM, GA GE MO ZHIG NA 'DUG GO ZHES DE LTAR BSTAN PA'AM GDAGS PAR MI NUS SO, ,DE CI'I PHYIR ZHE NA, 'DI LTAR CHOS KYI DBYINGS NI BLTAR MI MTHONG ZHING BSTAN DU MED DE, GDAGS PAR BYA BA MA YIN ZHING GDAGS PA LAS YANG DAG PAR 'DAS PA'I PHYIR RO, ,'GRO BA 'DI DE
LTA BU'I DBYINGS YIN PAR NGAS JI SKAD BSTAN PA LA GAL TE MTSAMS MED PA BYED PA DE LTAR MOS TE, MTSAMS MED PA'ANG DE LTA BU'I DBYINGS YIN PAR SHES NA, DE KUN NAS NYON MONGS PA CAN DU MI 'GYUR RO, ,DE CI'I PHYIR ZHE NA, 'JAM DPAL, MTSAMS MED PA NI CHOS KYI DBYINGS DANG MTSUNGS PAR MNYAM PA'I PHYIR TE, 'DI LTAR MTSAMS MED PA'I DBYINGS DANG, CHOS KYI DBYINGS 'DI NI GNYIS SU MED CING GNYIS SU DBYER MED DO, ,'DI LA NI 'ONG BA BA'AM, 'GRO BA'AM, KUN NAS LDANG PA MI DMIGS SO, ,BCOM LDAN 'DAS KYIS DE SKAD CES BKA' STZAL PA DANG, 'JAM DPAL GZHON NUR GYUR PAS BCOM LDAN 'DAS LA 'DI SKAD CES GSOL TO, ,BCOM LDAN 'DAS, BDAG GIS KYANG CHOS KYI DBYINGS NGAN SONG DU MCHI BA'AM, MTHO RIS SU MCHI BA'AM, MYA NGAN LAS 'DAS PAR MCHI BAR MA MTHONG LAGS SO, ,BKA' STZAL PA, 'JAM DPAL, GAL TE LA LA ZHIG KHYOD LA 'DI SKAD DU 'DRI STE, KHYOD KYI STON PA 'GRO BA DRUG DANG LDAN PA'I 'KHOR BA JI LTAR 'DOGS ZHES DE SKAD DRIS NA 'JAM DPAL KHYOD KYIS JI SKAD LAN GDAB, GSOL PA, BCOM LDAN 'DAS, DE SKAD DU SMRAS NA BDAG GIS 'DI SKAD DU LAN GDAB PAR BGYI STE, DPER NA, MI GNYID KYIS LOG PA'I RMI LAM DU SEMS CAN DMYAL BA'AM, DUD 'GRO'I SKYE GNAS SAM, YI DVAGS KYI YUL LAM, LHA
, ,MA YIN GYI RIS SAM, LHA RNAMS SAM, MI RNAMS MTHONG NA, BCOM LDAN 'DAS, JI LTAR G-YAR LAM RMI BA'I MIS SNA TSOGS MTHONG YANG G-YAR LAM SNA TSOGS MA MCHIS PA DE BZHIN DU BDAG GIS 'GRO BA THA DAD PA BSTAN KYANG CHOS KYI DBYINGS KYI NGO BO NYID THA DAD PA GDAGS PAR RNGO MI THOGS TE, DE LTA LAGS PAS, BCOM LDAN 'DAS BDAG GIS NI DE SKAD 'DRI BA LA DE SKAD CES LAN GDAB PAR BGYI LAGS SO, ,BCOM LDAN 'DAS, DE BZHIN DU SANGS RGYAS RNAMS DANG, BYANG CHUB SEMS DPA' RNAMS DANG, RANG SANGS RGYAS RNAMS DANG, NYAN THOS KYI YONGS SU MYA NGAN LAS 'DAS PA'ANG THA DAD PAR GDAGS PAR RNGO MI THOGS LAGS SO, ,BCOM LDAN 'DAS, DE DAG GIS GNAS PA DAG KYANG THA DAD PAR GDAGS PAR RNGO MI THOGS LAGS SO, ,DE CI'I SLAD DU ZHE NA, 'DI LTAR CHOS KYI DBYINGS LAS THA MI DAD PA'I SLAD DU LAGS SO, ,BCOM LDAN 'DAS, DPER BGYI NA, RGYA MTSO CHEN PO'I RIN PO CHE SNA TSOGS DUNG DANG, MAN SHEL DANG, BYU RU LA SOGS PA THA MA DANG, 'BRING DANG, MCHOG RNAMS LA 'DI NI RIN PO CHE CHE GE MO ZHIG GO, 'DI NI RIN PO CHE CHE GE MO ZHIG GO ZHES THA DAD PAR GDAGS SU MCHIS LAGS KYI, CHOS KYI DBYINGS LA NI DE LTAR THA DAD PAR GDAGS PA'I RDO MI THOGS LA, GDAGS PA DE LA'ANG THA DAD PAR DBYER
MA MCHIS LAGS SO, ,DE LA NI 'CHI 'PHO BA DANG, SKYE BA THA DAD PAR GDAGS PA'I RDO MI THOGS LAGS SO, ,DE CI'I SLAD DU ZHE NA, CHOS KYI DBYINGS LA NI 'CHI 'PHO'AM, SKYE BA'AM, KUN NAS NYON MONGS PA'AM, RNAM PAR BYANG BA MA MCHIS PA'I SLAD DU LAGS SO, ,CHOS KYI DBYINGS NI KUN NAS NYON MONGS PA CAN MA LAGS, CHOS KYI DBYINGS NI 'DRES PA MA LAGS TE, CHOS KYI DBYINGS LA NI GANG DAG SPANG BAR BGYI BA'AM, BSKYED PAR BGYI BA'I CHOS DE DAG MA MCHIS LAGS SO, ,DE NAS BCOM LDAN 'DAS KYIS MKHYEN BZHIN DU 'JAM DPAL GZHON NUR GYUR PA LA 'DI SKAD CES BKA' STZAL TO, ,'JAM DPAL KHYOD KYIS CHOS KYI DBYINGS SHES SAM, GSOL PA, GAL TE DMIGS NA BDAG GIS 'TSAL LAGS SO, ,BKA' STZAL PA, 'JAM DPAL, 'JIG RTEN GANG LA SPYOD SHES SAM, GSOL PA, BCOM LDAN 'DAS, 'JIG RTEN NI SGYU MA SPRUL PA'I MI GANG KHO NA LA SPYOD PA DE LA SPYOD LAGS SO, ,BCOM LDAN 'DAS, 'JIG RTEN ZHES BGYI BA DE NI MING TZAM DU BAS TE, BDAG GIS NI GANG BSTAN PAR BGYI BA'I 'JIG RTEN GYI DNGOS PO DANG, 'JIG RTEN GANG LA SPYOD PA'ANG YANG DAG PAR RJES SU MA MTHONG LAGS TE, BDAG GIS NI 'JIG RTEN GYI CHOS KYI DBYINGS LAS THA DAD PAR YANG DAG PAR RJES SU MA MTHONG LAGS SO, ,DE CI'I SLAD DU ZHE NA, MA MCHIS PA'I SLAD DU LAGS SO, ,BCOM
, ,LDAN 'DAS KYIS 'JIG RTEN GANG LA SPYOD CES BKA' STZAL PA DE'ANG, GZUGS KYI NGO BO NYID GANG LAGS PA DE LA NI 'CHI 'PHO DANG, SKYE BA'ANG MA MCHIS, DE LA NI 'JIG PA'AM, RAB TU 'JIG PA'ANG MA MCHIS NA GANG LA SPYOD PAR 'GYUR LAGS, DE BZHIN DU TSOR BA DANG, 'DU SHES DANG, 'DU BYED DANG, RNAM PAR SHES PA RNAMS KYI NGO BO NYID GANG LAGS PA DE NI GTAN MA MCHIS PA'I SLAD DU SKYE BA'AM 'GAG PA MA MCHIS LA, MTSAN NYID GCIG LAS MI 'DA' STE, 'DI LTA STE, MTSAN NYID GCIG PA LAGS SO, , BKA' STZAL PA, 'JAM DPAL, 'DI JI SNYAM DU SEMS, NGA DA LTAR DE BZHIN GSHEGS PA DGRA BCOM PA YANG DAG PAR RDZOGS PA'I SANGS RGYAS SU 'GYUR BA 'DI LA KHYOD 'DI SNYAM DU 'DI YONGS SU MYA NGAN LAS 'DAS PAR 'GYUR BA'AM, MI SNANG BAR 'GYUR RO SNYAM DU SEMS SAM, GSOL PA, BCOM LDAN 'DAS, DE NI MA LAGS SO, ,DE CI'I SLAD DU ZHE NA, CHOS KYI DBYINGS NI YANG DAG PAR GRUB PA MA LAGS PA'I SLAD DU LAGS SO, ,BCOM LDAN 'DAS, GAL TE CHOS KYI DBYINGS YANG DAG PAR GRUB PA ZHIG LAGS NA NI DE'I SLAD DU DE MI 'DA' BAR YANG 'GYUR BA ZHIG NA, DE LA NI YANG DAG PAR GRUB PA MI DMIGS PA STE, DE MI 'DA' BA'AM, YONGS SU MYA NGAN LAS 'DA' BAR LTA GA LA 'GYUR LAGS, DE
BZHIN GSHEGS PA NI DE LTA BU'I DBYINGS LAGS TE, DE'I SLAD DU BCOM LDAN 'DAS NI SKYES PA'ANG MA LAGS, YONGS SU MYA NGAN LAS 'DA' BAR MI 'GYUR LAGS SO, ,BCOM LDAN 'DAS KYIS BKA' STZAL PA, 'JAM DPAL, 'O NA KHYOD 'DAS PA'I DE BZHIN GSHEGS PA GANG+G'A'I KLUNG GI BYE MA SNYED PO DE DAG YONGS SU MYA NGAN 'DAS SO ZHES DE LA KHYOD JI LTAR MOS, GSOL PA, GAL TE DE DAG GI SKYE BA YANG DAG PAR RJES SU MTHONG NA NI BDAG MOS LAGS SO, ,BKA' STZAL PA, KHYOD SO SO'I SKYE BO SHI BA RNAMS NYID MTSAMS SBYOR BAR 'DOD DAM, GSOL PA, BCOM LDAN 'DAS, SO SO'I SKYE BO NYID KYANG BDAG GIS YANG DAG PAR RJES SU MA MTHONG MA DMIGS NA DE'I NYING MTSAMS SBYOR BA LTA GA LA DMIGS LAGS, BKA' STZAL PA, 'JAM DPAL, DE BZHIN GSHEGS PA CHOS GNAS PAR BZHED KYI, KHYOD SPOBS PAR GYIS SHIG ,GSOL PA, CI ZHIG LAS BRTZAMS TE SPOBS PAR BGYIS LAGS, BKA' STZAL PA, CHOS KYI DBYINGS LAS RTZOMS SHIG ,GSOL PA, BCOM LDAN 'DAS, GANG CHOS KYI DBYINGS MA LAGS PA'I CHOS DE BDAG GIS YANG DAG PAR RJES SU MA MTHONG LAGS SO; ;BKA' STZAL PA, 'JAM DPAL, MNGON PA'I NGA RGYAL CAN RNAMS SKRAG PAR 'GYUR RO, ,GSOL PA, BCOM LDAN 'DAS, GAL TE YANG DAG PA'I MTHA' SKRAG PAR 'GYUR NA NI DE'I
, ,SLAD DU MNGON PA'I NGA RGYAL CAN YANG SKRAG PAR 'GYUR LAGS SO, ,DE CI'I SLAD DU ZHE NA, BCOM LDAN 'DAS, YANG DAG PA'I MTHA' YANG GZHAN LA, MNGON PA'I NGA RGYAL CAN YANG GZHAN PA NI MA LAGS KYI, MNGON PA'I NGA RGYAL CAN RNAMS KYI MTHA' GANG LAGS PA'I MTHA' DE NYID YANG DAG PA'I MTHA' LAGS LA, YANG DAG PA'I MTHA' GANG LAGS PA DE'ANG CHOS THAMS CAD KYI MTHA' LAGS TE, DE'I SLAD DU MI SKRAG LAGS SO, ,CHOS THAMS CAD YANG DAG PAR MA BSGRUBS PA ZHES BGYI BA 'DI NI RDO RJE'I GZHI LAGS SO, , BCOM LDAN 'DAS KYIS BKA' STZAL PA, 'JAM DPAL, CI'I PHYIR NA 'DI RDO RJE'I GZHI ZHES BYA, GSOL PA, BCOM LDAN 'DAS, CHOS THAMS CAD NI MI PHYED PA LAGS TE, DE'I SLAD DU 'DI RDO RJE'I GZHI LAGS SO, ,DE BZHIN GSHEGS PA BSAM GYIS MI KHYAB PA'I SLAD DU CHOS THAMS CAD BSAM GYIS MI KHYAB PA 'DI NI RDO RJE'I GZHI LAGS TE, CI'I SLAD DU RDO RJE'I GZHI ZHES BGYI ZHE NA, CHOS THAMS CAD SEMS MA MCHIS PA'I SLAD DU LAGS SO, ,CHOS THAMS CAD BYANG CHUB CES BGYI BA 'DI NI RDO RJE'I GZHI LAGS TE, DE CI'I SLAD DU ZHE NA, CHOS THAMS CAD BRJOD PA MA MCHIS PA'I SLAD DU STE, 'DI NA MING GANG DANG GANG GIS CHOS GANG DANG GANG BRJOD PA'I CHOS DE DANG DE CHOS DE DANG DE LA MA MCHIS LAGS SO, ,GANG MA MCHIS PA DE NI STONG PA
LAGS SO, ,GANG STONG PA DE NI MED PA LAGS SO, ,GANG MED PA DE NI BRJOD PA'I RNGO MI THOGS PA LAGS SO, ,BRJOD DU MA MCHIS PA DE NI BYANG CHUB LAGS TE, DE'I SLAD DU, 'DI NI RDO RJE'I GZHI LAGS SO, ,CHOS THAMS CAD NI DE BZHIN GSHEGS PA'I YUL LAGS TE, 'DI NI RDO RJE'I GZHI LAGS SO, ,BKA' STZAL PA, CI'I PHYIR RDO RJE'I GZHI ZHES BYA, GSOL PA, BCOM LDAN 'DAS, CHOS THAMS CAD NI RANG GI YUL LAS DBEN PA LAGS SO, ,DE'I SLAD DU, 'DI RDO RJE'I GZHI LAGS SO, ,BKA' STZAL PA, 'JAM DPAL, DGE SLONG KUN DGA' BO DE'ANG CHOS KYI RNAM GRANGS 'DI KUN 'DZIN PAR 'GYUR NA, 'DIR 'ONGS PA'I MTSAN MA NGAS BYA'AM, GSOL PA, BCOM LDAN 'DAS, 'DI NI CHOS BRJOD PA'AM, BSTAN PA MCHIS LAGS SAM, BDAG GIS NI YI GE GCIG KYANG BSTAN PAR YANG DAG PAR RJES SU MA MTHONG LAGS NA, MANG PO LTA GA LA MTHONG LAGS, BKA' STZAL PA, 'JAM DPAL, LEGS SO; ;LEGS SO, ,'JAM DPAL KHYOD 'DI SKAD DU 'CHAD PA NI KHYOD KYI TSIG 'DI LEGS PAR SMRAS PA YIN TE, 'JAM DPAL KHYOD LEGS SO, ,'JAM DPAL, NGAS NI PHYOGS BCU'I 'JIG RTEN GYI KHAMS DPAG TU MED GRANGS MED PA DAG NA DE BZHIN GSHEGS PA DGRA BCOM PA YANG DAG PAR RDZOGS PA'I SANGS RGYAS RNAMS CHOS NYID 'DI KHO NA STON CING BZHUGS
, ,PA DAG MTHONG NGO, ,DE NAS TSE DANG LDAN PA SH'A RI'I BU RANG GI GNAS KHANG NAS BYUNG NAS, 'JAM DPAL GZHON NUR GYUR PA'I GNAS KHANG GA LA BA DER SONG STE PHYIN NAS 'JAM DPAL GZHON NUR GYUR PA MA MTHONG STE, BCOM LDAN 'DAS KYI BZHUGS KHANG GA LA BA DER SONG NAS, BZHUGS KHANG GI PHYI SGO NA 'GRENG BA DANG, GSUNG BA'I GSUNG THOS SO, ,DE NAS BCOM LDAN 'DAS KYIS 'JAM DPAL GZHON NUR GYUR PA LA 'DI SKAD CES BKA' STZAL TO, ,'JAM DPAL, DGE SLONG SH'A RI'I BU 'DI GNAS KHANG GI PHYI SGO NA 'GRENG STE; CHOS NYAN PAR 'DOD NA, 'JAM DPAL, SH'A RI'I BU CHOS NYAN PAR NANG DU 'ONG BAR GYIS SHIG ,GSOL PA, MTHA' 'DI NI YANG DAG PA'I MTHA' LAGS NA, GANG GI SLAD ROL DANG; NANG DANG GNYIS KA MA MCHIS PAR GDA' LAGS SAM, BKA' STZAL PA, 'JAM DPAL, DE NI MA YIN NO, ,GSOL PA, BCOM LDAN 'DAS, DE LTA LAGS PAS YANG DAG PA'I MTHA' NI MTHA' MA MCHIS PA LAGS TE, DE LTA BU'I MTHA' GANG LAGS PA DE LA NI TSUR MCHI BA'AM, PHAR MCHI BA MA MCHIS TE, BCOM LDAN 'DAS, DE LTA BU'I MTHA' CAN GYI BTZUN PA SH'A RI'I BU DE NI TSUR MCHI BA'AM, NANG DU MCHI BA'I MI RIGS LAGS SO, ,BKA' STZAL PA, 'JAM DPAL, GAL TE NGA GNAS KHANG GI NANG NA NYAN THOS DAG DANG LHAN CIG,
TU GTAM ZER ZHING 'DUG LA, KHYOD NI PHYI ROL NA 'DUG STE, NANG DU 'ONG DU'ANG MI DBANG NA CI KHYOD SDUG BSNGAL BAR MI 'GYUR RAM, GSOL PA, BCOM LDAN 'DAS, DE NI MA LAGS TE, DE CI'I SLAD DU ZHE NA, CHOS THAMS CAD NI CHOS KYI DBYINGS SU YANG DAG PAR 'DU BA'I SLAD DU STE, 'DI NI DE BZHIN GSHEGS PA ZHES BRJOD PA GANG LAGS PA 'DI'ANG CHOS KYI DBYINGS LAGS TE, MTSAN NYID GCIG PA'I SLAD DU DE BZHIN GSHEGS PA'ANG GZHAN LA CHOS KYI DBYINGS KYANG GZHAN MA LAGS SO, ,CHOS SAM CHOS BSTAN PA ZHES BGYI BA'AM, CHOS NYAN PA ZHES BGYI BA'I CHOS 'DI DAG KYANG GNYIS SU MA MCHIS PA'I SLAD DU THA DAD PA MA MCHIS TE, DE'I SLAD DU'ANG CHOS KYI DBYINGS LAS THA DAD PA MA LAGS SO, ,'JAM DPAL, ZHES BGYI BA'I YI GE GANG LAGS PA 'DI DAG KYANG CHOS KYI DBYINGS SU GTOGS TE, BCOM LDAN 'DAS, RNAM GRANGS DES NA BDAG CUNG ZAD KYANG GDUNG BA MA MCHIS LAGS SO, ,BCOM LDAN 'DAS, BSKAL PA GANG+G'A'I KLUNG GI BYE MA SNYED DU CHOS STON DU LAGS KYANG BDAG DER MCHI'ANG MI MCHI, DER MCHIR DGA' BA'AM, YONGS SU GDUNG BA'ANG MI SKYED LAGS SO, ,DE CI'I SLAD DU ZHE NA, BCOM LDAN 'DAS, GNYIS SHIG MCHIS NA NI DGA' BA'AM, YONGS SU GDUNG BA BSKYED PAR 'GYUR NA CHOS KYI DBYINGS DE NI GNYIS SU MA MCHIS TE, DE'I
, ,SLAD DU BDAG DGA' BA'AM, YONGS SU GDUNG BAR MI 'GYUR LAGS SO, ,BCOM LDAN 'DAS, CHOS STON PA MDZAD PA'I CHOS BSTAN PA DES KYANG CHOS GANG YANG GSOG PA'AM, 'BRI BA'AM, 'PHEL BA'AM, 'GRIB PAR MI BGYID DE, 'DI LTAR CHOS BSTAN PA DE NI CHOS GANG YANG DMIGS PAS NYE BAR GNAS PA MA LAGS TE, BCOM LDAN 'DAS, DE'I SLAD DU'ANG BDAG DGA' BAR MI 'GYUR ZHING YONGS SU GDUNG BAR MI 'GYUR LAGS SO, ,DE NAS BCOM LDAN 'DAS KYIS TSE DANG LDAN PA SH'A RI'I BU LA BKA' STZAL PA, SH'A RI'I BU KHYOD KYIS 'JAM DPAL GZHON NUR GYUR PA'I SPOBS PA THOS SAM, GSOL PA, BCOM LDAN 'DAS, THOS LAGS TE, BCOM LDAN 'DAS, BDAG NI BCOM LDAN 'DAS DANG, 'JAM DPAL GZHON NUR GYUR PA'I SPOBS PA THOS KYANG CI MA RUNG SNYAM STE, DE'I SLAD DU BDAG 'DI NA MCHIS LAGS SO, ,DE NAS BCOM LDAN 'DAS LA 'JAM DPAL GZHON NUR GYUR PAS 'DI SKAD CES GSOL TO, ,BCOM LDAN 'DAS, TSE DANG LDAN PA SH'A RI'I BU NANG NA MCHI BAR MDZAD DU GSOL, DE NAS BCOM LDAN 'DAS KYIS TSE DANG LDAN PA SH'A RI'I BU LA 'DI SKAD DU, SH'A RI'I BU KHYOD GNAS KHANG GI NANG DU SHOG CES BKA' STZAL TO, ,DE NAS TSE DANG LDAN PA SH'A RI'I BU GNAS KHANG DU 'ONGS NAS, BCOM
LDAN 'DAS KYI ZHABS LA PHYAG BTZAL TE PHYOGS GCIG TU 'DUG GO ,PHYOGS GCIG TU 'DUG PA DANG, TSE DANG LDAN PA SH'A RI'I BU LA 'JAM DPAL GZHON NUR GYUR PAS 'DI SKAD CES SMRAS SO; ;BTZUN PA SH'A RI'I BU KHYOD DON GYI DBANG GANG MTHONG BAS 'DIR 'ONGS, SMRAS PA, 'JAM DPAL, KHO BO NI CHOS NYAN PAR 'DOD PA'I PHYIR 'DIR 'ONGS TE, 'DI LTAR GANG NA BCOM LDAN 'DAS DANG, SKYES BU DAM PA KHYOD LTA BU GNAS PA DE NA BSTAN PA ZAB MO YANG DAG PHUL DU BYUNG BA YOD DE, DE'I PHYIR KHO BO 'ONGS SO, ,SMRAS PA, BTZUN PA SH'A RI'I BU, DE NI DE BZHIN TE BSTAN PA 'DI NI ZAB BO, ,SMRAS PA, BCOM LDAN 'DAS NYID DANG THABS GCIG TU BRTZAMS PA'I CHOS BSTAN PA DE JI TZAM DU ZAB, SMRAS PA, DE NI BTZUN PA SH'A RI'I BUS RTOGS PAR MI 'GYUR TE, DGRA BCOM PA ZAG PA ZAD PA NI CHOS BSTAN PA 'DI'I SNOD MA YIN NO, ,DE CI'I PHYIR ZHE NA, 'DI LTAR CHOS BSTAN PA 'DI NI SO SO'I SKYE BO'I CHOS LA ZHUGS PA MA YIN; DGRA BCOM PA NYID KYI CHOS LA ZHUGS PA MA YIN, RANG SANGS RGYAS KYI CHOS LA ZHUGS PA MA YIN, DE BZHIN GSHEGS PA'I CHOS LA ZHUGS PA MA YIN PA'I PHYIR RO, ,'DI NI CHOS GANG DMIGS PA'I PHYIR YANG ZHUGS PA MA YIN NO, ,'DI NI GANG DU ZHUGS PA'AM LDOG PA'ANG MED DE, CHOS THAMS CAD SHIN TU DBEN PA'I PHYIR RO, ,SMRAS PA, 'JAM DPAL KHYOD KYIS
, ,CI LAS BSAMS TE, DGRA BCOM PA ZAG PA ZAD PA CHOS BSTAN PA 'DI'I SNOD MA YIN ZHES DE SKAD SMRA, SMRAS PA, BTZUN PA SH'A RI'I BU, DGRA BCOM PA NYID NI 'DOD CHAGS DANG, ZHE SDANG DANG, GTI MUG ZAD PA YIN NA DE GANG GI SNOD YIN ZHING DE GANG JI LTA BU ZHIG GI SNOD DU 'GYUR SNYAM STE, DE LAS BSAMS NAS DGRA BCOM PA ZAG PA ZAD PA CHOS BSTAN PA 'DI'I SNOD MA YIN NO ZHES KHO BO DE SKAD SMRA'O, ,SMRAS PA, 'JAM DPAL, KHO BO NI CHOS BSTAN PA 'DI'I DON DU GTZUG LAG KHANG NAS GTZUG LAG KHANG DANG, GNAS KHANG NAS GNAS KHANG DANG, PHUG NAS PHUG TU KHYOD 'TSOL TE, BDAG GIS KHYOD LAS ZAB PA ZAB PA YANG DAG PA'I SPOBS PA 'DI LTA BU 'DI DAG THOS KYANG CI MA RUNG SNYAM STE, 'JAM DPAL, KHO BO NI BCOM LDAN 'DAS DANG, KHYOD KYI CHOS BSTAN PA LA CHOG MI SHES SO, ,SMRAS PA, BTZUN PA SH'A RI'I BU, KHYOD CHOS BSTAN PAS CHOG MI SHES SAM, SMRAS PA, KHO BO CHOG MI SHES SO, ,SMRAS PA, BTZUN PA SH'A RI'I BU CI, CHOS KYI DBYINGS CHOS 'TSOL BAR BYED DAM, SMRAS PA, 'JAM DPAL, MI BYED DO, ,SMRAS PA, CHOS KYI DBYINGS KYANG GZHAN LA, TSE DANG LDAN PA SH'A RI'I BU, GZHAN PA NI MA YIN NA CI'I PHYIR, TSE DANG LDAN PA SH'A RI'I BU, CHOS MNYAN PA LA CHOG MI SHES, DE CI'I PHYIR ZHE NA, BTZUN PA SH'A RI'I BU,
CHOS KYI DBYINGS NI CHOS 'TSOL BAR MI BYED PA'I PHYIR RO, ,GAL TE DE 'TSOL BAR BYED NA NI DE'I PHYIR DA CHOG SHES PAR 'GYUR BA ZHIG NA GANG GI PHYIR TSOL BAR MI BYED PA DE'I PHYIR CHOG MI SHES SO, ,SMRAS PA, 'JAM DPAL, DE BZHIN GSHEGS PA MA GTOGS PAR KHO BO LTA BU CHOS NYAN PA DE LTA BU KHYOD KYIS GA LA RNYED, SMRAS PA, BTZUN PA SH'A RI'I BU KHYOD SH'A RI'I BU YONGS SU MYA NGAN LAS MI 'DA' BA'I CHOS CAN YIN PAR MOS SAM, SMRAS PA, MOS SO, ,SMRAS PA, JI LTAR MOS, SMRAS PA, CHOS THAMS CAD YONGS SU MA GRUB PAS NA KHO BO'ANG YONGS SU MYA NGAN LAS MI 'DA' BA'I CHOS CAN YIN NO SNYAM DU DE LTAR MOS SO, ,SMRAS PA, BTZUN PA SH'A RI'I BU KHYOD SHI 'PHO MED PA DANG, SKYE BA MED PA'I CHOS CAN YIN PAR MOS SAM, SMRAS PA, MOS SO, , SMRAS PA, JI LTAR MOS, SMRAS PA, CHOS KYI DBYINGS SU GTOGS PA'I PHYIR TE, CHOS KYI DBYINGS LA 'CHI 'PHO'AM SKYE BA MED PA DE LTAR MOS SO, ,SMRAS PA, BTZUN PA SH'A RI'I BU KHYOD DGRA BCOM PA ZAG PA ZAD PA MI SHES PA DANG LDAN PAR MOS SAM, SMRAS PA, MOS SO, ,SMRAS PA, JI LTAR MOS, SMRAS PA, SHES PA DANG, MI SHES PA MNYAM PA NYID KYI PHYIR DGRA BCOM PA ZAG PA ZAD PA MI SHES PA DANG LDAN TE 'DI LTAR MI SHES PA DANG, SHES PA NI MI ZAD PA'I CHOS CAN YIN PA'I PHYIR DBEN PA STE, DE BAS NA MI SHES PA DANG, SHES PAR RNAM PAR MI RTOG
, ,PA'I PHYIR DGRA BCOM PA ZAG PA ZAD PA MI SHES PA DANG LDAN PAR MOS SO, SMRAS PA, BTZUN PA SH'A RI'I BU KHYOD DGRA BCOM PA ZAG PA ZAD PA, SHES PA DANG BRAL BAR MOS SAM, SMRAS PA, MOS SO, ,SMRAS PA, JI LTAR MOS, SMRAS PA, 'DI LTAR CHOS THAMS CAD NI NGO BO NYID DANG BRAL BA STE, DE BAS NA DGRA BCOM PA ZAG PA ZAD PA SHES PA DANG BRAL BAR MOS SO, ,SMRAS PA, BTZUN PA SH'A RI'I BU KHYOD DGRA BCOM PA ZAG PA ZAD PA RNAM PAR MA GROL BA'I CHOS CAN DU MOS SAM, SMRAS PA, MOS SO, SMRAS PA, JI LTAR MOS; SMRAS PA, NYON MONGS PA MED PA'I PHYIR TE, 'DI LTAR NYON MONGS PA MED NA GANG DAG LAS RNAM PAR GROL BAR 'GYUR TE, DE LTAR MOS SO, ,SMRAS PA, BTZUN PA SH'A RI'I BU KHYOD SNGON GYI DE BZHIN GSHEGS PA RNAMS MA BYUNG ZHING YONGS SU MYA NGAN LAS MA 'DAS PAR MOS SAM, SMRAS PA, MOS SO, ,SMRAS PA, JI LTAR MOS, SMRAS PA, 'JAM DPAL, BSAM GYIS MI KHYAB PA'I DBYINGS LA NI SKYE BA MED DE, GANG MI SKYE BA DE LA MI SNANG BAR 'GYUR BA'AM, YONGS SU MYA NGAN LAS 'DA' BAR 'GYUR BA GA LA YOD DE DE LTAR MOS SO, ,SMRAS PA, BTZUN PA SH'A RI'I BU KHYOD SANGS RGYAS THAMS CAD GCIG YIN PAR MOS SAM, SMRAS PA, MOS SO, ,SMRAS PA, JI LTAR MOS, SMRAS PA, 'JAM DPAL, CHOS KYI DBYINGS LA NI THA DAD PA MED
PA DE DE LTAR MOS SO, ,SMRAS PA, BTZUN PA SH'A RI'I BU KHYOD SANGS RGYAS KYI ZHING THAMS CAD SANGS RGYAS KYI ZHING GCIG YIN PAR MOS SAM, SMRAS PA, MOS SO, ,SMRAS PA, JI LTAR MOS, SMRAS PA; 'JAM DPAL, SANGS RGYAS KYI ZHING THAMS CAD NI MI ZAD PA NYID KYI ZHING YIN TE DE LTAR MOS SO, ,SMRAS PA, BTZUN PA SH'A RI'I BU KHYOD CHOS THAMS CAD YONGS SU SHES PAR BYA BA MA YIN PA DANG; SPANG BAR BYA BA MA YIN PA DANG, MNGON SUM DU BYA BA MA YIN PA DANG, BSGOM PAR BYA BA MA YIN PAR MOS SAM, SMRAS PA, MOS SO, SMRAS PA, JI LTAR MOS, SMRAS PA, 'JAM DPAL, NGO BO NYID KYIS NGO BO NYID YONGS SU MI SHES PA DANG, RANG BZHIN GYIS RANG BZHIN SPONG BA DANG, MNGON SUM DU MI BYED PA DANG, SGOM PAR MI BYED PA DANG, SKYED PAR MI BYED PA DANG, 'GAG PAR MI BYED PA DANG, LEN PAR MI BYED PA DANG, 'DOR BAR MI BYED PA DANG, MTHA' DE NI MI GNAS PA NYID DE, DE LTAR MOS SO, ,SMRAS PA, BTZUN PA SH'A RI'I BU KHYOD CHOS KYI DBYINGS NI PHUNG POR MI 'DUG PA'I DBYINGS YIN PA DANG, CHOS GANG YANG SKYE BA'AM, 'GAG PA MED PA DANG, CHOS GANG YANG PHUNG POR 'DUG PA MED PAR MOS SAM, SMRAS PA, MOS SO, ,SMRAS PA, JI LTAR MOS, SMRAS PA, 'JAM DPAL, CHOS GANG YANG SKYE BA'AM, 'GAG PA'AM, PHUNG POR 'DUG PA DE MI DMIGS TE DE LTAR MOS SO, ,SMRAS PA, BTZUN PA SH'A RI'I BU KHYOD SHES RAB
, ,GANG YIN PA DE CHOS KYI DBYINGS YIN LA, CHOS KYI DBYINGS GANG YIN PA DE SHES RAB YIN TE, CHOS KYI DBYINGS ZHES BYA BA'I MING YANG THOB PA DANG, DE'I PHYIR YANG DGRA BCOM PA ZHES BYA BAR MOS SAM, SMRAS PA, MOS SO, ,SMRAS PA, JI LTAR MOS, SMRAS PA, 'JAM DPAL, RTOGS PAR 'GYUR BA'I SHES RAB KYIS DGRA BCOM PA NYID DU 'GYUR BA DE BZHIN DU CHOS KYI DBYINGS YONGS SU SHES PAR ZAD KYI, CHOS KYI DBYINGS YONGS SU SHES PA NI 'DOD CHAGS KYI BDAG NYID DAM, ZHE SDANG GI BDAG NYID DAM, GTI MUG GI BDAG NYID KYANG MA YIN LA, CHOS KYI DBYINGS LAS KYANG DGRA BCOM PA GUD NA MED DE DE LTAR MOS SO, ,SMRAS PA, BTZUN PA SH'A RI'I BU KHYOD CHOS THAMS CAD SANGS RGYAS KYI KHYU MCHOG DANG MNYAM PAR MOS SAM, SMRAS PA, MOS SO, ,SMRAS PA, JI LTAR MOS, SMRAS PA, 'JAM DPAL, 'DI LTAR BCOM LDAN 'DAS KYIS NI CHOS THAMS CAD RANG BZHIN GYIS DBEN PAR MNGON PAR RDZOGS PAR SANGS RGYAS TE, DE LTAR MOS SO, ,SMRAS PA, BTZUN PA SH'A RI'I BU KHYOD KYI YUL JI TZAM PA DE TZAM DU KHYOD KYIS LAN BTAB PA LEGS SO, ,LEGS SO, ,DE TZAM ZHIG KHYOD LA DRIS KYI, DA NI RANG GI GNAS SU SONG ZHIG, SH'A RI'I BUS SMRAS PA, 'JAM DPAL, 'DI LTAR 'DI NYID NI BDAG GI JI SRID 'TSO'I BAR GYI GNAS YIN NO, ,DE NAS BCOM
LDAN 'DAS KYIS TSE DANG LDAN PA SH'A RI'I BU LA BKA' STZAL PA, SH'A RI'I BU, RIGS KYI BU'AM RIGS KYI BU MO GANG LA LA CHOS KYI RNAM GRANGS 'DI 'DZIN PA'AM, 'CHANG BA'AM, KLOG PA'AM, KUN CHUB PAR BYED PA DES NI SPOBS PA MYUR DU THOB PAR 'GYUR RO, ,GSOL PA, BCOM LDAN 'DAS, DE NI DE LTAR LAGS TE, JI SKAD BKA' STZAL PA BZHIN DU RIGS KYI BU'AM RIGS KYI BU MO GANG DAG GI SLAD DU CHOS KYI PHYAG RGYA 'DI BZHAG PA DE DAG NI SNGON GYI RGYAL BA RNAMS LA BGYI BA BGYIS PA LAGS TE, DE DAG DE LTAR RIG PAR BYA'O, ,DE NAS BCOM LDAN 'DAS LA TSE DANG LDAN PA SH'A RI'I BUS 'DI SKAD CES GSOL TO, ,BCOM LDAN 'DAS, CHOS KYI RNAM GRANGS 'DI'I MING CI LAGS, 'DI JI LTAR GZUNG BAR BGYI, DE SKAD CES GSOL PA DANG; BCOM LDAN 'DAS KYIS TSE DANG LDAN PA SH'A RI'I BU LA 'DI SKAD CES BKA' STZAL TO, ,SH'A RI'I BU, DE'I PHYIR KHYOD KYIS CHOS KYI RNAM GRANGS 'DI 'JAM DPAL GZHON NUR GYUR PAS ZHUS NAS NGAS LAN BTAB PA ZHES BYA BAR GZUNG ZHIG ,CHOS KYI DBYINGS ZHES BYA BAR YANG GZUNG ZHIG ,YANG DAG PA'I MTHA' ZHES BYA BA DANG, RIN PO CHE'I MTHA' ZHES BYA BAR YANG GZUNG ZHIG; SH'A RI'I BU, RIGS KYI BU'AM RIGS KYI BU MO GANG DAG CHOS KYI RNAM GRANGS 'DI 'DZIN PA DANG, 'CHANG BA DANG, KLOG PA DANG, KUN CHUB PAR BYAD PA DANG, SGOM PA DANG, SBYOR BA
, ,LA BRTZON PAR GNAS PA DE DAG NI RIN PO CHE DANG 'DRA BA YIN TE, MI SKYE BA'I CHOS RNAMS LA'ANG BZONG PA MYUR DU THOB PAR 'GYUR RO, ,GZHAN DAG LA'ANG DGE BA'I RTZA BA RNAMS YANG DAG PAR BSKYED PAR 'GYUR RO, ,CHOS NYUNG DU KUN CHUB PAR BYAS PAS KYANG CHOS MANG PO STON PAR 'GYUR RO, ,SPOBS PA MI CHOD PAR YANG 'GYUR RO, ,BCOM LDAN 'DAS KYIS DE SKAD CES BKA' STZAL NAS, 'JAM DPAL GZHON NUR GYUR PA DANG, TSE DANG LDAN PA SH'A RI'I BU DANG, LHA DANG, MI DANG, LHA MA YIN DANG, DRI ZAR BCAS PA'I 'JIG RTEN YI RANGS TE, BCOM LDAN 'DAS KYIS GSUNGS PA LA MNGON PAR BSTOD DO, ,'PHAGS PA RIN PO CHE'I MTHA' ZHES BYA BA THEG PA CHEN PO'I MDO RDZOGS SO,, ,,RGYA GAR GYI MKHAN PO PRA DZNY'A BARMA DANG, ZHUS CHEN GYI LO TZ'A BA BANDE YE SHES SDE LA SOGS PAS BSGYUR CING ZHUS TE GTAN LA PHAB PA,, ,,