, ,RGYA GAR SKAD DU, BUDDHA SYA STO TRA N'A MA, BOD SKAD DU, SANGS RGYAS KYI BSTOD PA ZHES BYA BA, 'JAM DPAL GZHON NUR GYUR PA LA PHYAG 'TSAL LO, ,GANG GIS LHUN PO'I TSAD LAS LHAG PA'I DBU NI RAB TU BYIN, ,GANG GIS RGYU SKAR BAS KYANG MANG BA'I BRGYA PHRAG SPYAN RNAMS KYANG NI BTANG, ,SA GZHI DANG MNYAM RGYA MTSO LTA BU'I SHA DANG KHRAG RNAMS KYANG, ,DE LTAR DKA' BA SPYOD MDZAD SANGS RGYAS BCOM LDAN RTAG TU PHYAG 'TSAL LO, ,G-YO ZHING 'KHYUG 'GRO'I GLOG 'DRA'I SEMS NI GANG GIS DBANG DU GNAS PA DANG, ,'JIG RTEN GSUM PO MI SHIS RGYA MTSO LAS NI GANG GIS YANG DAG SGROL, ,SRID 'JOMS BDUD 'JIG PHYIR DU GANG ZHIG SLAR YANG SRID PAR 'JUG ,DE LTAR DKA' BA SPYOD MDZAD BCOM LDAN SANGS RGYAS RTAG TU PHYAG 'TSAL LO, ,GANG GIS SNYING RJE'I SDOM PA'I KHUR BUS SEMS CAN DON LA DGYES PA'I PHYIR, ,LHA DANG LHA MIN 'JIG RTEN GSUM PO'I GTZO BOS MI RTOG RNAM PAR SPONG, ,BKRES SDUG SROG CHAGS RNAMS LA BRTZE BA MCHOG GNAS GANG ZHIG LUS RAB STER, ,DE LTAR DKA' PA SPYOD MDZAD BCOM LDAN SANGS RGYAS RTAG TU PHYAG 'TSAL LO; ,GANG GIS SNYING RJES 'THOB PA'I SEMS CAN MYUR DU BSGRAL ZHING BSKYAB PA'I PHYIR, ,GANG ZHIG PHYUGS DANG NYA DANG RI DAGS 'GRO BAR DGON PA'I NANG DU GNAS, ,YUN RING NGAL DANG DUB PA BZOD CING LUS RNAMS KYANG NI KUN DU GTONG, ,DE LTAR DKA' BA SPYOD MDZAD BCOM LDAN SANGS RGYAS RTAG
TU PHYAG 'TSAL LO, ,GANG ZHIG SEMS CAN MANG PO'I LUS KYI NAD LA SMAN GYI PHYIR DU NI, ,'GRO LA BYAMS PA'AM SNYING RJE'I DBANG GIS MCHOG TU MU GE'I DGON PA RU, ,NAGS TSAL RNAMS SU GLANG CHEN LUS RNYED GZHAN GYI SDUG BSNGAL SEL LA SBYOR, ,DE LTAR DKA' BA SPYOD MDZAD BCOM LDAN SANGS RGYAS RTAG TU PHYAG 'TSAL LO, ,MU GE'I ZUG RNGU ZUG PA'I DUS SU DBU LA SKYES PA'I RIN PO CHE, ,BCAD NAS BYIN PAS BRAM ZE DANG NI MI BDAG LA SOGS GNAS PA'I PHYIR, ,KUN DU DE BZHIN THUGS KYI BYID PA SLA BAS THAMS CAD SEMS CAN DON, ,DE LTAR DKA' BA SPYOD MDZAD BCOM LDAN SANGS RGYAS RTAG TU PHYAG 'TSAL LO, ,NAGS RNAMS SO SOR GNAS MDZAD RMI LAM BZANG POS YANG DAG SMRA BA THOB, ,MA DANG RGYAL PO PHA ROL PHAN PA SPYOD PA RNAMS KYI SENG GE'I KHRIR, ,GNYIS 'THUNG MCHE BA DRUG PAR 'KHRUNGS TE 'GRO BA GANG PHYIR CHOS RNAMS KUN, ,DE LTAR DKA' BA SPYOD MDZAD BCOM LDAN SANGS RGYAS RTAG TU PHYAG 'TSAL LO, ,SBYIN DANG TSUL KHRIMS YON TAN BZOD PA'I RANG BZHIN STOBS BRTZON BSAM GTAN DANG, ,SHES RAB RAB GSUNG MTSUNGS PAR SPONG BA'I BYAMS DANG SNYING RJE'I YON TAN GYIS, ,'BROG DGON GNAS PA'I 'GRO BA 'DREN PA'I DED DPON THOB CING YANG DAG RTOGS, ,DE LTAR DKA' BA SPYOD MDZAD BCOM LDAN SANGS RGYAS RTAG TU PHYAG 'TSAL LO, ,'PHAGS MA NOR RGYUN MAS MDZAD PA'I SANGS RGYAS KYI BSTOD PA RDZOGS SO,, ,,RAB TU BSNGAGS PA'I GNAS CHEN PO BAL PO YAM BU'I GRONG KHYER DU SGRA'I MKHAN PO DPAL RGYAL BA'I BZANG PO DANG, SH'AKYA'I DGE SLONG NYI MA RGYAL MTSAN DPAL BZANG POS BSGYUR BA'O,,